Flying Gulls Never Land [ဘာသာပြန်]

13

SCROLL DOWN FOR ZAWGYI

UNICODE

CH13- MARRIED TO A LACKING HUSBAND

မော့ချိုးသည် ရှားပါးလှသော နာမည်နောက်စာလုံးကို ပိုင်ဆိုင်ထားသော်ငြား လုဖုန်းနှင့်အတူတူကျောင်းတက်စဥ်အခါကမူ မော့ချိုး၏စာမေးပွဲအဆင့်များမှာ သာမန်ဖြစ်သကဲ့သို့ ရုပ်ရည်ရူပကာကလည်း ထူးကဲမနေခဲ့ ။ မျက်နှာအမူအရာမှာ အမြဲတမ်းသုန်မှုန်နေတတ်ပြီး တစ်စုံတစ်ခုကိုကြောက်ရွံ့ကာအမြဲတစေ ရတက်မအေးစိုးရိမ်နေသည့်ပုံပေါ်ပေ၏ ။

ပြီးလျှင် ဘီယာပုလင်းဖင်တို့ကိုပင် အမှတ်ရစေနိုင်လောက်သော မျက်မှန်ထူထူကို အမြဲဝတ်ဆင်တတ်၏ ။ ထို့ပြင် တခြားသူများနှင့် အဆက်အဆံမလုပ်ပဲ တစ်ယောက်တည်းသာနေတတ်သည်ကိုလည်း လုဖုန်းသတိထားမိသည် ။

အရွယ်ရောက်ပြီးသူတို့၏ လောကတွင် ဝင်ဆန့်နိုင်ဖို့ရန် လူအများက လက်ခံနိုင်သူတစ်ယောက်ဖြစ်ဖို့ရန်မှာ မိမိ၏မျက်နှာအစစ်ကို ဖုံးကွယ်ကာ တခြားသူများအတွက် အနစ်နာခံပေးဖို့ လိုအပ်ပေသည် ။ လူငယ်လူရွယ်များကြားတွင်ကား ထိုသို့မဟုတ် ။ တစ်ဦးအပေါ်တစ်ဦး ဆက်ဆံပုံများ ၊ ခံစားချက်များသည် ဖုံးကွယ်မှုနည်းကာ ပို၍စစ်မှန်၏ ။ သို့သော် တင်းတင်းကြပ်ကြပ် ပြဋ္ဌာန်းထားသော စည်းမျဥ်းများကတော့ ရှိနေသေးသည် ။

မော့ချိုး၏မူမမှန်သော အပြုအမူများ ၊ သူကိုယ်တိုင် ပတ်ဝန်းကျင်မှ လူများနှင့် အဆက်အဆံမလုပ်ပဲ ရှောင်ပြေးနေမှုတို့က နောက်ဆုံးတွင် သူ့အားသိုးဖြူအုပ်ထဲမှ သိုးမည်းတစ်ကောင်ဖြစ်လာစေပြီး မကြာခင်မှာပင် လူတိုင်းနီးပါးက မော့ချိုးကို သည်းမခံနိုင်ဖြစ်လာတော့သည်။

အစပထမတွင်ကား သက်တူရွယ်တူသူငယ်ချင်းများကြားတွင် သူ့အကျင့်စရိုက်နှင့်ပတ်သက်၍ တိုးတိုးတိတ်တိတ်မကောင်းပြောခြင်း ၊ မော့ချိုး၏စကားလုံးများ ၊ အပြုအမူများနှင့်ပတ်သက်၍ နောက်ကွယ်တွင် ပြယ်ရယ်ပြုခြင်းတို့သာ ရှိခဲ့သည် ။

သို့သော် တဖြည်းဖြည်းနှင့်ပင် အရာရာတိုင်းမှာ ပို၍ပြင်းထန်လာခဲ့ပြီး လူများက သူ့မျက်စိရှေ့တွင်ပင် တိုက်ရိုက်အရှက်ခွဲခြင်း လှောင်ပြောင်ခြင်းတို့ကို ပြုလုပ်လာကြတော့သည် ။