ဝသာန်ကာလဖြစ်သောကြောင့် မနက် ၆နာရီဟူသောအချိန်သည် မှောင်နေသေးသည်။ ကောင်းကင်တစ်ခွင်၌ မိုးရိပ်မိုးသားတို့ပြည့်နက်နေပြီး ခပ်ဖွဲဖွဲမိုးပေါက်လေးများက မဟူရာရောင်ကတ္တရာလမ်းမပေါ်သို့ အပြိုင်အဆိုင် ဆင်းသက်နေကြသည်။ လမ်းတစ်လျှောက်တွင်လည်း မနက်ခင်းစျေးသည်မှအပ သွားလာလှုပ်ရှားသူသည် အလွန်နည်းပါးနေ၏။
သော်စစ်သည် ထီးတစ်ချောင်းကို ပျင်းတိပျင်းရွဲဆောင်းလျက် ကျောပိုးအိတ်ကိုလည်းဖြစ်သလိုလွယ်ထားသည်။ သူ၏ခြေလှမ်းများက လေးကန်လျက် စိုစွတ်နေသော မိုးဖွဲထဲတွင် ကျောင်းသို့ဦးတည်နေသည်။ မနက် ၆နာရီဟူသောအချိန်က စောလွန်းနေသေးသည်။ ကျောင်းထဲ၌ ဂိတ်စောင့်ဆရာမပင်ရောက်မလာသေးပါ။ ဂိတ်စောင့်တဲလေးထဲတွင် ကျောင်းစောင့်ကြီးတစ်ယောက်သာရှိနေ၏။
သော်စစ်နိုင်သည် ကျောင်းတံခါးဝသို့ ရောက်သောအခါ ကျောင်းစောင့်ကြီးက သူ့ကိုမြင်၍ အံ့အားသင့်သွားသည်။ ဒီလောက်မိုးအေးအေးနှင့် အိပ်လို့ကောင်းတဲ့အချိန်မှာ ဒီကျောင်းသားက ဘာလို့ ကျောင်းကိုအစောကြီးရောက်လာတာလဲ ။ ထို့ကြောင့် ကျောင်းစောင့်ကြီးက ထီးတစ်ချောင်းဆွဲကာ ကျောင်းတံခါးဝလေးကို ဖွင့်ရင်းဖြင့် သော်စစ်ကိုမေးလိုက်သည်။
" မင်း ဘာလို့ အစောကြီးလာတာလဲ ။ ကျောင်းထဲမှာဘယ်သူမှတောင်မရောက်ကျသေးဘူးကွ "
သော်စစ်က ကျောင်းထဲဝင်လိုက်ရင်း ကျောင်းစောင့်ကြီးကို စိတ်မပါသောအသံဖြင့် ပြန်ဖြေသည်။
" အစောကြီးနိုးလို့ "
သော်စစ်က ထိုသို့ ဖြေပြီး သူ၏ စာသင်ခန်းသို့ တန်းတန်းမတ်မတ်ပင် လေးကန်စွာလျှောက်သွား၏။ အနောက်၌ကျန်နေခဲ့သော ကျောင်းစောင့်ကြီးက ဂိတ်စောင့်တဲလေးထဲသို့ ပြန်ဝင်ရင်း ထီးပိတ်ကာ ခပ်တိုးတိုးရေရွတ်လိုက်သည်။
" ဒီကောင် အိပ်နေရင်း လမ်းထလျှောက်တာများလား "
စာသင်ခန်းထဲသို့ ရောက်သောအခါ စာသင်ခန်းတစ်ခုလုံးမှောင်မိုက်၍နေ၏။ အပြင်ဘက်က မိုးကြောင့် ကောင်းကင်၏အလင်းဓာတ်လည်း ကွယ်ပျောက်နေကာ ပတ်ဝန်းကျင်တွင် အုပ်မှိုင်းစိုစွတ်၍ ပျင်းစရာပင်ကောင်းနေသည်။ သော်စစ်သည် လွယ်အိတ်ကို ခုံပေါ်ပစ်တင်၍ စိတ်ပျက်လက်ပျက်ပင် ထိုင်ချလိုက်၏။ အမှန်တော့ ညက သူ့မေမေနှင့် ကတောက်ကစလေးဖြစ်ခဲ့သည်။ သူ့ဖေဖေက အလုပ်ကိစ္စတစ်ခုကြောင့် အိမ်ပြန်မအိပ်သည်ကို သူ့မေမေက အပြစ်တင်ပြောဆိုသည်။ ပထမတော့ ရန်ပွဲဟာ လင်မယားနှစ်ယောက်နှင့် စတင်ရာမှ အိမ်ရှေ့၌ tv ကြည့်နေသော သော်စစ်ဘက်သို့ ဦးတည်လာသည်။ အခန်းထဲ၌ ရန်ဖြစ်နေသည့် မိဘနှစ်ပါး၏စကားသံများကို သူမကြားလို၍ tv အသံအကျယ်ကြီးချဲ့ကာ tv ကို စိုက်ကြည့်နေ၏။
YOU ARE READING
အချစ်ဦး (အခ်စ္ဦး) (Completed )
Romanceအချစ်ဦး သို့မဟုတ် ငယ်ချစ်ဦး အခ်စ္ဦး သို႔မဟုတ္ ငယ္ခ်စ္ဦး
