ချစ်သူ့ရင်ခွင်ထက်ဝယ် (မောင့်ချစ်သူ) [ Complete ]

အခန်း ( ၂၈)

Unicode

နေ့သစ်တစ်ယောက် ကိုယ့်အလုပ်စားပွဲမှာကိုယ်ထိုင်ကာ လုပ်စရာအလုပ်များကို လုပ်နေလေ၏။

( Ringtone)

စားပွဲပေါ်မှ ဖုန်းလေးဆီမှ သီချင်းသံကြောင့် Keyboard ပေါ်ပြေးလွှားနေသည့် လက်ကလေးများက ဖုန်းကို ကောက်ကိုင်လိုက်သည်။

'' ဟယ်လို.......''

''....................''

'' ဗျာ..အခုလား၊ ဟုတ်...ဟုတ်.အခုလာခဲ့မယ်နော် အမေ ''

တစ်ဖက်မှ ဖုန်းချသွားသည့်နှင့် နေ့သစ်လည်း ထိုင်ခုံမှအမြန်ထကာ ဘုန်းသာလျှံတို့ရှိရာ ရုံးခန်းဘက်သို့ထွက်လာခဲ့၏။

'' ဒေါက်..ဒေါက်...''

အခန်းရှေ့တွင်ရပ်ကာ တံခါးခေါက်လိုက်ပြီး အထဲမှ ဝင်ခဲ့ ဟူသည့် စကားပြန်ကြားမှ တံခါးဖွင့်ကာ အထဲဝင်သွားလိုက်သည်။

'' ဟို ကျွန်တော်အိမ် ခဏလောက်ပြန်ချင်လို့ပါ ဘော့စ်၊ အမေက ဖုန်းလှမ်းဆက်ခေါ်လို့....အရေးကြီးကိစ္စရှိလို့ပါ...''

'' ရတယ်..သွားလေ၊ ဒီနေ့ခွင့်ယူလိုက်တော့ ''

ဘုန်းသာလျှံက သလင်း၏စကားကို ခေါင်းညိတ်ကာ ထောက်ခံလိုက်သည်။

' ခွင့်ပြုပါဦး ' ဟုဆိုကာ အပြေးတပိုင်းထွက်သွားသည့် နေ့သစ်ကိုကြည့်ရင်း တနေ့က စားသောက်ဆိုင်မှာ ဆုံခဲ့သည့် ကောင်လေးတစ်ယောက်ကို သတိရသွားပြန်၏။

(လွန်ခဲ့သောရက်အနည်းငယ်က)

အလုပ်ပိတ်ရက်ဖြစ်ပေမယ့် ဧည့်သည့်တစ်ဦးနှင့်တွေဆုံရန်အတွက် ချိန်းထားသည့် စားသောက်ဆိုင်တွင် ဝင်ထိုင်နေသူက ဘုန်းသာလျှံ။

ချိန်းထားသည်ထက် မိနစ်(မိနစ်၂၀)ခန့်စောလာခဲ့သည့်အတွက် ကော်ဖီတစ်ခွက်သာ သောက်ရင်း မှန်တံခါးဘောင်မှတဆင့် အပြင်ဘက်သို့ ငေးကြည့်နေမိသည်။

(Ringtone)

ရုတ်တရက်ဖုန်းဝင်လာသဖြင့် ဖုန်းကိုင်လိုက်၏။

ဖုန်းဆက်သူက ချိန်းဆိုထားသည့် တစ်ဖက်မှဧည့်သည်.....။

'' ဟယ်လို..၊ ကျွန်တော် ဘုန်းသာလျှံပါ ''