Flying Gulls Never Land [ဘာသာပြန်]

46- LURING HIM TOWARDS THE DEPTHS OF THE ABYSS

SCROLL DOWN FOR ZAWGYI

UNICODE

CH46 - LURING HIM TOWARDS THE DEPTHS OF THE ABYSS

လွန်ခဲ့သောဆယ်နှစ်တာလုံးတွင် လုဖုန်းယုံကြည်ထားခဲ့သည်ကား ရှန့်မင်အော်သည် မိမိ၌ဖြစ်ပျက်နေသောအရာများကိုလည်းကောင်း ၊ မိမိသေသည်ရှင်သည်ကိုလည်းကောင်း ဂရုမစိုက်ဟူ၍ပင် ။ မိမိအပေါ်  ရှန့်မင်အော်၏အပြုအမူများသည် လုဖုန်းနှလုံးသားလေး တုန်ယင်သွားရလောက်အောင်ထိ အမြဲတစေ စိတ်မပါဟန်ဖြင့် စိမ်းကားနေခဲ့ပေ၏ ။

သို့သော် အကယ်၍  , မျက်နှာပြင်အပေါ်ထိပ်ဆုံးတွင် ပေါ်နေသည့်အရာများက အမှန်တရားဟုတ်မနေခဲ့လျှင်မူ ?

လောင်ဟွမ်နှင့် လက်ဆွဲနှုတ်ဆက်ကာ စကားစမြည်ပြောကြပြီးနောက် လုဖုန်း အိမ်သို့ဦးတည်ခဲ့သည် ။ အိမ်ပြန်လမ်းတွင် စူပါမားကတ်တစ်ခုရှေ့ဖြတ်သွားမိချိန် စီးကရက်တစ်ဘူးနှင့် ဘီယာဘူးအချို့ပါ ဝင်ဝယ်ဖြစ်သေး၏ ။

အရက်သေစာသောက်ခြင်းက ခန္ဓာကိုယ်ကိုထိခိုက်စေသော်ငြား ဒီည လုဖုန်းခံစားနေရပုံမျိုးနှင့်ဆိုလျှင် မူးမိုက်သွားလောက်အောင် သောက်ပစ်လိုက်ဖို့ရန် သည့်ထက်ပိုကောင်းသော အခါသမယ မရှိတော့ပေ ။

စီးကရက်ကိုမီးညှိလိုက်ကာ အနံ့စူးရှရှ စီးကရက်ငွေ့များကို ရှူသွင်းရှူထုတ်ပြုမိသည် ။ မှတ်ဉာဏ်များကား လွန်ခဲ့သောဆယ်နှစ်ဆီ ဦးတည်လှော်ခတ်လျက် ။

ထိုနေ့က ဖြစ်ပျက်ခဲ့သည့်အရာများအပေါ်  လုဖုန်း ပြန်တွေးပြန်ပြောခြင်းမျိုးက အတော်အတန်ရှားပါးလှသည် ။ သို့သော် ဒီနေ့တွင်တော့ ထိုနေ့၏အသေးစိတ်များအထိ အလည်အပတ်မသွားပဲ မနေနိုင်တော့ ။

....

လုံးဝအဆက်အသွယ်မရသည်မှာ နှစ်လကြာပြီးနောက်ဝယ် ၊ နောက်ဆုံးတွင်တော့ ရှန့်မင်အော်က မိမိဖုန်းခေါ်သည်ကို လက်ခံဖြေကြားလေပြီ ။

သူတို့နှစ်ယောက်ကြား ငြိမ်းချမ်းရေးယူခြင်း၏လက္ခဏာတစ်ရပ်ဟု မှတ်ယူ၍ရနိုင်,မရနိုင် သူမသိ ။ သို့သော် အလွန်တရာပင် ပျော်ရွှင်ကာ စိတ်လှုပ်ရှားနေခဲ့၏ ။ ယခုလက်ရှိဖြစ်ပျက်နေသည်က အိပ်မက်ဟုတ်မဟုတ် သေချာအောင် မိမိကိုယ်ကို လက်ဖြင့်ဆွဲဆိတ်ကြည့်မိသည်အထိပင် ။