Application For Divorce [ 离婚申请 ]

၈

Unicode

အချစ်ပြိုင်ဖက်လား မဟာမိတ်လား!?

အိုက်ရွှယ်သည် ချန်းကျင်း၏စကားကို ကြားသောအခါ နည်းနည်းမျှ အံ့ဩသွားခြင်းမရှိပါဘဲ ထိုအစား သူက တခစ်ခစ်ပင် ရယ်လာသေးလေ၏။

"ကျွန်တော်ထင်သားပဲ"

သူသည် အိပ်ရာပေါ်တွင်ထိုင်နေသော လုထောင်ကို လှည့်ကြည့်ရင်း

"ကြည့်ရတာ ကျွန်တော့်ရဲ့အစ်ကိုကြီးက ကျွန်တော်တို့ပဲ စကားပြောနေလို့ သိပ်မပျော်မရွှင် ဖြစ်နေတဲ့ပုံပဲနော်"

ချန်းကျင်းသည် လုထောင်ကို ကြည့်လာခဲ့ရာ အမှန်တကယ်ပင် သူသည် မပျော်မရွှင်ဖြစ်နေကြောင်း မြင်လိုက်ရလေသည်။ မှတ်ဉာဏ်များ ပျောက်ဆုံးသွားပြီးနောက် အရင်ကအမြဲတမ်းနီးပါး ခက်ထန်နေခဲ့သော သူ၏မျက်နှာသည် ယခုအခါ ပို၍ ခံစားချက်များကို ထုတ်ဖော်ပြလာတတ်သဖြင့် အနည်းငယ် အသစ်အဆန်း ဖြစ်နေသလိုပါပင်။

သို့သည့်တိုင် ခက်ထန်သည့်မျက်နှာကိုသာ နေသားကျခဲ့သည့် ချန်းကျင်းကမူ ၎င်းနှင့် အနည်းငယ် စိမ်းသက်နေသလို ခံစားရလေသည်။

သူသည် ကုတင်အနားသို့ လျှောက်လာခဲ့ပြီး လုထောင်၏ မကျေမနပ်ဖြစ်နေသော မျက်ဝန်းများကို နူးညံ့စွာစိုက်ကြည့်ကာ တောင်းပန်စကား ဆိုလာခဲ့၏။

"တောင်းပန်ပါတယ်နော် အကြာကြီး စောင့်လိုက်ရလား!?"

ချန်းကျင်းသည် ၎င်းမေးခွန်းကို မေးပြီးခါမှ နောင်တရသွားမိ၏။ ဤအမေးစကားက သူနှင့် မလိုက်ဖက်သလို ခံစားရသည့်အတွက်ပင်။

လုထောင်က သူ့ကို ဘယ်တုန်းကမှ မစောင့်ခဲ့ဖူးတာ!!

သူကသာ တစ်ချိန်လုံး တစ်ဖက်လူကို လိုက်နေခဲ့ခြင်းဖြစ်ပြီး အဆုံးထိ ထိုလူနှင့် နည်းနည်းလေးမျှ နီးစပ်မလာခဲ့ဖူးပါပေ။ ထိုအစား တဖြည်းဖြည်းသာ ဝေးကွာသွားခဲ့ရလေ၏။

လုထောင်သည် အနည်းငယ် မကျေမနပ်ဖြစ်နေသေးသည့်ပုံနှင့် သူ့ကိုကြည့်လာခဲ့ပြီး တစ်ဖက်လူကို အံ့ဩစေနိုင်သည့် စကားတစ်ခွန်းကို ဆိုခဲ့ပေသည်။