302 (Completed)

Part-10

Unicode

"ဟယ်?? ဟိုဟာဘာကြီးလဲ?? မဟုတ်မှလွဲရော......"

မျက်စိရှေ့မှာမြင်နေရတဲ့ ထိုအရာဟာ
သေချာပေါက်ကို အာကာသယာဥ်ပျံတစ်ခုမှန်း သူမ အတပ်သိနေပါ၏။ မနက်ခင်းတုန်းက websiteတစ်ခုမှာကြည့်ဖြစ်ခဲ့တဲ့ ကွင်းပြင်ကျယ်ထဲက ထူးဆန်းတဲ့ချုိင့်ခွက်ကြီးအကြောင်းကို သူမ မတွေးမိဘဲ မနေနိုင်တော့...။

"မဟုတ်မှလွဲရော...ပျောက်နေတယ်ဆိုတဲ့ အဲဒီ့ယာဥ်ပျံများလား?"

မတိုင်မီက တစ်ယောက်တစ်ပေါက် စကားများထားတဲ့ နှစ်ယောက်သားကလဲ ဘာလုပ်လို့လုပ်ရမှန်းမသိတော့ဘဲ သူမနည်းတူ ယာဥ်ပျံဆီကြည့်မိကြရင်း စိတ်ထဲကနေတော့ 'သွားပြီ' ဟု ပြိုင်တူတွေးလိုက်မိကြသည်။

အရင်ဆုံးအသိဝင်လာတာက အဒေါ်ကြီးလီ ကမ်းပေးခဲ့တဲ့ ဂဏန်းချဥ်စပ်ဘူးကို လက်ထဲကိုင်ထားပါတဲ့ ကျန်းကျယ်ဟန့်။ သူက ဘေးကကုန်းကျွင့်ကို တံတောင်နဲ့တိုက်လိုက်ပြီး လေသံနှိမ့်ကာ အလျင်စလို စကားဆိုလိုက်သည်။

"ဘာလုပ်နေတာလဲ မှန်တံခါးသွားပိတ်လေ"

အဒေါ်ကြီးလီကတော့ ဆိုဖာပေါ်ပြုံးတုံးတုံးနှင့် ထိုင်ချနှင့်ပြီး သမီးဖြစ်သူ၏ တအံ့တဩစကားကို ကြားဟန်တောင်မပေါ်ပါချေ။

ကုန်းကျွင့်ထက် ခြေလှမ်းမြန်နေခဲ့တဲ့ လီကျစ်ရှန်က သူမရဲ့မျက်မှန်ထူထူကို ပင့်ကာကိုင်ရင်းဖြင့် ဘေးခြံလွတ်ဆီ ဦးတည်နှင့်ပြီ။

အခြေအနေဟာ အရေးပေါ်ဖြစ်နေပြီမို့
ကျန်းကျယ်ဟန့်က လက်ထဲ ဂဏန်းချဥ်စပ်ဘူးတန်းလန်းဖြင့် လီကျစ်ရှန်ကိုအပြေးဆွဲရတော့သည်။ ကုန်းကျွင့်က မှန်တံခါးဆီပြေး ၊ ကျန်းကျယ်ဟန့်က လီကျစ်ရှန်ဆီပြေးရင်းဖြင့် အတော်လေး ယောက်ယက်ခတ်လို့သွားရသည်။

တိုက်တိုက်ဆိုင်ဆိုင်ဆိုသလိုပဲ စန်းလင်အာ့တစ်ယောက်ကလဲ ယာဥ်ပျံနောက်ကနေ ထွက်လာခဲ့ပြီး အရှေ့ကနှစ်ယောက်သားရဲ့ အရေးပေါ်အခြေအနေကို ချက်ချင်းနားလည်လိုက်၏။ သူက အရှေ့ကို ခပ်သွက်သွက်အပြေးလှမ်းလိုက်ပြီး ၊ မှန်တံခါးပိတ်ဖို့လုပ်နေတဲ့ ကုန်းကျွင့်ကို ကျော်ကာ...ကျန်းကျယ်ဟန့် လှမ်းဆွဲဖို့ကြိုးစားနေတဲ့ လီကျစ်ရှန်ရဲ့ရှေ့အရောက် ၊ သူမရဲ့နဖူးပြင်ဆီ ဖြောင်းခနဲမြည်အောင် ရိုက်ချလိုက်တော့သည်။