သက္ကရာဇ်တစ်ခု၏ ချိုမြိန်သောရက်စွဲများ(Completed)

21.

သက္ကရာဇ်.. အိမ်က အရှုပ်ထုပ်ကောင် ဥာဏ့်ကို ခနဲ့ပြီး တည်တံ့မောင်ရှိရာသို့ထွက်လာခဲ့သည် ။

ထို့နောက် ဆေးရုံသို့သွားရန် busပေါ်၌ထိုင်ကာ ဥာဏ့်အကြောင်းစဥ်းစားမိပြီး သက္ကရာဇ်မျက်နှာထက်၌ မဲ့ပြုံးတစ်ခုဖြစ်ပေါ်လာခဲ့သည် ။
ဒီ ဥာဏ်ဆိုတဲ့ကောင်က တကယ့်ငကြောင်ကောင်...သူ့ကိုများ ရာရာစစ အမိန့်လာပေးနေသေးတယ်...
သက္ကရာနဲ့ သက္ကရာဇ်ဆိုတာ တစ်ယောက်ထဲဆိုတာ မသိတာလဲ မဟုတ်ဘူး...တကယ်ဆို ဒီ ခန္ဓာကိုယ်က သက္ကရာဇ်ရဲ့အပိုင်ဖြစ်ပြီး သက္ကရာဆိုတာ သက္ကရာဇ်ကို မှီခိုပြီးနေရတဲ့ ကပ်ပါးကောင်သာသာလဲဖြစ်နိုင်တာပဲ...

*ဟုတ်တယ် သက္ကရာဆိုတာ သက္ကရာဇ်ရဲ့ ကပ်ပါးကောင်သာသာပဲ*

"*****မှတ်တိုင်သို့ မကြာခင်ရောက်တော့မည်ဖြစ်သောကြောင့် ဆင်းမည့်သူများ ကြိုတင်ပြင်ဆင်ပေးကြပါရန် မေတ္တာရပ်ခံအပ်ပါသည်ရှင် *

မှတ်တိုင်ရောက်တော့မည်ဖြစ်ကြောင်း intercomကအသံကြားမှ သက္ကရာဇ် တွေးလက်စအတွေးများကို ရပ်တန့်၍ ကားပေါ်မှ ဆင်းရန်ပြင်ရသည် ။

တည်တံ့မောင်တို့ဆေးရုံရှေ့ရောက်တော့ ဆေးရုံအဝ၌ ဂျူတီကုတ်အဖြူရောင်များဝတ်ကာ လူနာများ လူနာရှင်များနှင့် ဖက်လဲတကင်းနှုတ်ဆက်နေကြသော အပြုံးချိုချိုနှင့် ဆရာဝန်များကို တွေ့ရလေသည် ။

ထိုလူအုပ်ကြား၌ မိမိ၏ချစ်ရသူ တည်တံ့မောင်ကိုလိုက်ရှာကြည့်သော်လည်းမတွေ့ရပေ ။
သက္ကရာဇ်က အခုမှ တည်တံ့မောင်ဆေးရုံကိုရောက်ဖူးသောကြောင့် ဟိုကြည့်ဒီကြည့်နှင့် အူကြောင်ကြောင်ဖြစ်နေကာ တည်တံ့မောင်ကို မျက်စိဝေ့ဝဲ၍ လိုက်ရှာနေမိသည် ။

"ဒီမှာ ခဏဗျ ဒေါက်တာ တည်တံ့မောင်ကို ဘယ်မှာရှာလို့ရလဲသိလား ''

"ဘယ်သိမလဲ reception မှာသွားမေးပါလား လူကအရေးကြီးနေရတဲ့အထဲ ဘာတွေလာမေးမှန်းမသိဘူး ''

အနီးနားသို့ ရေကြီးသုတ်ပြာနှင့်လျှောက်လာသော လူတစ်ယောက်၏ လက်မောင်းအားလှမ်းဆွဲကာ သက္ကရာဇ် မေးမိတော့ ဘုနဲ့ဘောက်အဖြေသာပြန်ရသည် ။
သက္ကရာဇ် အနည်းငယ်စိတ်တိုသွားပြီ မျက်ခုံးများကိုတွန့်ချိုးပစ်၍ ပြန်ပြောမည်ပြင်တုန်း ထိုလူမှာ ဘယ်အချိန်ထဲက ထွက်သွားမှန်းပင်မသိလိုက် နေရာ၌ မရှိတော့သောကြောင့် သက္ကရာဇ် စိတ်လျှော့လိုက်သည် ။
ဒီနေရာမှာ ရန်ဖြစ်မိရင် သူ့အချစ်အတွက် မျက်နှာပျက်စရာဖြစ်မှာစိုးလို့ စိတ်လျှော့လိုက်တာ...မဟုတ်ရင် သူ့ဒေါသနဲ့ဆို ခုနအချိုးမပြေဖြေသွားတဲ့လူကို ရေဆုံးမြေဆုံးလိုက်ပြီး ပညာပေးမိမှာ....