သူဌေးကြီး၏ဒုတိယမြောက်အိမ်ထောင်ဖက်

Chapter (63)

နေ့လည်ခင်းအတွက် စားသောက်ပွဲကို ​ပြင်ဆင်ထားကြပြီးနေပြီဖြစ်တာကြောင့် မုန့်ရန်က ကလေးကို နာနီတွေလက်ထဲအပ်ခဲ့ပြီး လော်ရှို့နဲ့အတူ ထိုင်နေခဲ့တယ်။

စားပွဲပေါ်က ဟင်းလျာတွေက ပွဲတော်အတွက် မပါမဖြစ်တဲ့ သားကြီး၊ငါးကြီးနဲ့ အဆီများတဲ့ ဟင်းလျာတွေ ဖြစ်နေတာကြောင့် မုန့်ရန်အတွက် အတော် အခက်တွေ့နေခဲ့ရတယ်။ဒါ့ကြောင့် စားဖိုဆောင်ဝန်ထမ်းတွေက မုန့်ရန်အတွက် ပေါ့ပါးတဲ့ဟင်းလျာတွေကို သီးသန့်ပြင်ဆင်ပေးလိုက်ရတယ်။

လော်ရှို့က ထမင်းနည်းနည်းပေါ်မှာ ဂေါ်ဖီထုတ်စွပ်ပြုတ်စမ်းထားပြီး အဝါရောင်ဂေါ်ဖီရွက်လေးတွေထပ်ထည့်ပေးထားတဲ့ ပန်းကန်လုံးလေးကို မုန့်ရန်ကို ပေးလိုက်ပြီး မုန့်ရန်အတွက် အသီးအရွက်ဟင်းလျာတွေတစ်ခုပြီးတစ်ခု ထည့်ပေးနေခဲ့တယ်။မုန့်ရန် ဗိုက်ပြည့်သွားတာကြောင့် ခေါင်းခါပြီး ထပ်မထည့်ပေးဖို့ ပြောတော့မှပဲ ရပ်သွားတော့တယ်။

လော်ရှို့ရဲ့ ဆွေမျိုး တစ်သိုက်က ဒါတွေကို အသေးစိတ် လိုက်ကြည့်နေကြတယ်။ဒါတွေကိုကြည့်ခြင်းအားဖြင့် မုန့်ရန်ဟာ လော်မိသားစုဝင်တစ်ယောက်ဖြစ်နေပြီဆိုတာကိုရှင်းလင်းစွာသိမြင်နိုင်ပါတယ်။

ဒီနေ့မှာ ဆွေမျိုးတွေ လူစုံတက်စုံရောက်နေကြတယ်။မုန့်ရန်က ကန်တော့ပွဲပြီးကတည်းက ခဏလေးပဲနားလိုက်ရတယ်။ဆွေမျိုးတွေ
အတူတကွ စားကြ၊သောက်ကြ၊ပြောကြ၊ဆိုကြလုပ်နေရာကနေ သီးသန့်ခွဲထွက်နေဖို့ မသင့်တော်ဘူးလေ။ဒါဟာ လော်မိသားစုရဲ့ဘိုးဘေးစံအိမ်ဖြစ်တာကြောင့် မုန့်ရန်သူတို့ကို ယဉ်ကျေးချိုသာစွာဆက်ဆံပြီး ရေလိုက်ငါးလိုက် နေနေခဲ့ရတယ်။

နေ့လည်ပိုင်းမှာ နောက်တစ်ကြိမ် လက်ဆောင်တွေဝေပေးခဲ့ပြန်တယ်။ဒီတစ်ခါက ဆွေမျိုးတွေနဲ့ ခြံဝင်းထဲက လူတွေအကုန်လုံးအတွက် ပေးဝေခြင်းဖြစ်တယ်။ဒါတွေပြီးတာနဲ့ မုန့်ရန် ဆင်ခြေတစ်ခုပေးပြီး အနားယူလိုက်တယ်။

လော်ရှို့ကလဲပဲ မုန့်ရန်နဲ့အတူ အခန်းထဲကို ပြန်လိုက်လာခဲ့တယ်။

"ပင်ပန်းနေပြီလား??"

"နည်းနည်းပါ.."

မုန့်ရန်က ကလေးငယ်လေးကို ခပ်ဖွဖွလေးပုတ်သိပ်နေတယ်။