Worship Me, I Can Make You Rich (Myanmar Translation) U+Z (Complete)

Chapter 28 (U+Z)

-Unicode-

အခန်း ၂၈: သည်းမခံနိုင်တော့ဘူး

ကျွမ်းကျိုးဟာ ထောင့်လေးမှာ အသံမထွက်ဘဲ အင်မတန်သနားစရာကောင်းစွာ ကွေးကွေးလေးနေနေတယ်။ သူ့ရဲ့ အရင်က ဘဝင်ခိုက်ပြီး ကျေနပ်အားရနေတဲ့ အမူအရာလေးကတော့ ပျောက်ရှသွားပြီ။

ဝမ်ရှောင်းယွင်က လက်တွေ့မှာ သေချာသိနေတယ်။ သူသာအခု ကျွမ်းကျိုးကို "မင်းက အဲဒီကြွယ်ဝခြင်းနတ်ဘုရားလား" ဆိုပြီး မေးလိုက်ရင် ငါးစက္ကန့်တောင်မပြောနဲ့ဦး၊ သုံးစက္ကန့်အတွင်းမှာပဲ ကျိုးကျိုးက ချက်ချင်းကို "နေရာမှာတင်လဲကျသေသွားတယ်" ဆိုတာ ဘာကိုခေါ်တယ်ဆိုတာ ပြလိုက်နိုင်တယ်။

ဝမ်ရှောင်းယွင် သူ့လျှို့ဝှက်ချက်ကို ဖော်ဖို့ မလုပ်နိုင်ဘူး။

သူက နည်းနည်း ကူကယ်ရာမဲ့ဖြစ်နေပြီး နည်းနည်းလည်း ရယ်ချင်နေတယ်။ သေချာပေါက် အခု ရှော့ခ်ရရမဲ့သူက သူဖြစ်သင့်တာလေ မဟုတ်ဘူးလား။

ဝမ်ရှောင်းယွင် သူ့ကို ခေါ်လိုက်တယ်: "ကျိုးကျိုး"

ကျွမ်းကျိုးက ခေါင်းငိုက်စိုက်ကျနေပြီး သူ့ကို မော့လည်းမကြည့်သလို အသံလည်း မထွက်ဘူး။

ဝမ်ရှောင်းယွင်က အသံမထွက်ဘဲ သက်ပြင်းချလိုက်ပြီး ဆိုတယ်: "ကိုယ်ပြောချင်တာက သူက မင်းအဖေမဟုတ်ဘူး၊ ဆိုတော့ မင်းကောကောပဲ ဖြစ်ရမယ် ဟုတ်တယ်မလား"

စိတ်ဓာတ်ကျနေတဲ့ ခေါင်းလေးက ဖြည်းဖြည်းချင်း မော့လာပြီး ကျွမ်းကျိုး ဝမ်ရှောင်းယွင်နဲ့ အကြည့်ချင်းဆုံသွားတယ်။

သူ့ရဲ့ အဲဒီအကြည့်က 'ကျွန်တော့်ကောကောလား။ ခင်ဗျားစိတ်ထပ်မပြောင်းတော့မှာ သေချာလား' ဆိုပြီး ပြောနေသလိုပဲ။

ဝမ်ရှောင်းယွင်က လုံးဝ လေးလေးနက်နက်နဲ့ ပြောလိုက်တော့တယ်: "ဒါက ကျိုးကျိုးရဲ့ ကောကောပဲဖြစ်ရမယ်"

ကျွမ်းကျိုးက နှုတ်ခမ်းတွေကို တင်းတင်းဖိစေ့ထားပြီး အခုဝမ်းရှောင်းယွင်ရဲ့ စကားတွေကို နည်းနည်း မယုံသင်္ကာဖြစ်နေတယ်။

ဝမ်ရှောင်းယွင် နတ်ဘုရားပုံတော်ကို သူ့ဘာသာသူ ကောက်ယူလိုက်ပြီး အလွန်ကို လေးနက်တည်ကြည်စွာနဲ့ ပြောတယ်: "သူ့ကို ကြည့်လိုက်လေ။ တော်တော်လေးငယ်ပြီး ချောလည်းချောတယ်။ ကျိုးကျိုးလိုပဲ တအားကြည့်ကောင်းတယ်။ သူက အသက်လည်း တော်တော်လေးငယ်ဦးမှာပဲ။ ဒီတော့ သူက ကျိုးကျိုးကောကောပဲ ဖြစ်တော့မှာပေါ့"