ဗညားသတိုး ညကအနမ်းလေးကို ပြန်တွေးမိပြီး နှုတ်ခမ်းထောင့်တို့ ကော့တက်လာ၏။နန်းစောရှင်ရဲ့နှုတ်ခမ်းလေးက နူးညံ့ကာ စွဲမက်ဖွယ်ကောင်းသည်။နီရဲအိထွေးသည့်နှုတ်ခမ်းလေးက နုအိနေကာ လျှာနုနုလေးကိုရစ်ထွေးမိတော့ ယစ်မူးဖွယ်အတိ။နန်းစောရှင်ရဲ့တစ်ကိုယ်လုံးကို မြိုချမိမတတ် ရင်ခုန်စိတ်လှုပ်ရှားဖွယ်လည်းကောင်းသေး၏။
ချစ်ရသူလေးရဲ့နှုတ်ခမ်းလေးကို ထိတွေ့ရသည်က တိမ်တွေပေါ်အလည်သွားရသလို လေနှင်ရာမိန်းမောသွားရပြီး ထူးထူးခြားခြားကျေနပ်ဖွယ်ကောင်းသည်။
ဗညားသတိုး နန်းစောရှင်ရဲ့နှုတ်ခမ်းလေးကိုအပိုင်သိမ်းလိုက်နိုင်သောကြောင့် ရင်ထဲတွင် ပျော်ရွှင်မှုတွေ ပေါက်ဖွားနေပြီး မြင်မြင်သမျှက သာယာကြည်နူးဖို့ကောင်းနေသည်။
"နောင်တော်"
ဗညားသတိုး ဗညားငယ်မင်းသားခေါ်သံကြောင့် ကော့တက်နေသည့်နှုတ်ခမ်းကို အောက်ချလိုက်ပြီး အေးစက်စက်မျက်နှာထားကို ပြုပြင်ယူလိုက်သည်။
"ဆိုလေ"
"ဟံသာဝတီနေပြည်တော်ကို ပြန်ဖို့ အားလုံးအဆင်သင့်ဖြစ်ပါပြီ ထွက်ခွာလို့ရပါပြီ"
"ကောင်းပြီ ညီတော် သည်နေ့ကျက်သရေရှိလှပေတယ် နေပြည်တော်ရောက်ရင် တိုက်ကြက်ဖတစ်ကောင်ပေးလေမယ်"
ဗညားသတိုးက ပြုံးရင်း ဗညားငယ်မင်းသားရဲ့ပါးလေးကို ဆွဲဖဲ့လိုက်သည်။ဗညားငယ်မင်းသားက ရုတ်တရက်တောင့်ခဲသွားပြီး အလျင်အမြန်ဒူးထောက်လိုက်သည်။ဒူးထောက်လိုက်လို့ဒူးခေါင်းနှင့်ကြမ်းပြင်ထိသည့် ဒုတ်ခနဲအသံထွက်ပေါ်လာသည်။
"နောင်တော် တန်ဆောင်တိုင်ညက နောင်တော့်ထံက ကြက်ခိုးတာကအပျော်ပါ ကျန်တဲ့သဘောမရှိပါဘူး ညီတော် နောက်မလုပ်တော့ပါဘူး"
"......."
ဗညားငယ်မင်းသားရဲ့ကြောက်လန့်တကြား ဝန်ခံသည့်စကားသံက တဲနန်းအတွင်းကျယ်လောင်စွာထွက်ပေါ်လာ၏။
ဗညားသတိုး ကွန့်ရောင်ဝါဓားကို ကိုင်ဆောင်လျက် တဲနန်းအပြင်ကိုထွက်သည်။စစ်သူကြီးဝတ်စုံအသစ်လေးနှင့် ခံ့ညားစွာတောက်ပနေသည့်နန်းစောရှင်လေးကို မြင်ရလေတော့ တည်တင်းထားသောနှုတ်ခမ်းတစ်စုံက ကော့တက်လာပြန်၏။
YOU ARE READING
ချစ်သောပြည့်ရှင်မင်း(Completed)
Historical Fictionစစ်နတ်ဘုရားဟံသာဝတီအိမ်ရှေ့မင်းက အင်းဝနန်းတွင်းမာသူလျှိုလုပ်ရင်း အင်းဝမင်းသားငယ်လေးကိုကာကွယ်ချင်လာတဲ့အခါ နောင်တော်တစ်ပါးရဲ့သစ္စာဖောက်မှုကြောင့် အင်းဝမင်းသားငယ်လေးကဟံသာဝတီကိုရောက်သွားရရှာပါတယ် သူတို့နှစ်ဦးကံကြမ္မာတွေကိုဘယ်လိုဖြတ်ကျော်ပြီးစစ်မှန်တဲ့ပြ...