ᴍᴇʀᴀᴋɪ - ʙʟ [completed]

01

මම හවස මෙඩිකල් යුනිට් එකට ගියේ මගේ ලියුම බාර දෙන්නයි. අපේ මෙඩිකල් යුනිට් එකේ ප්‍රසිඩන්ට් අයියා හිමාල් මේසේ ගාව වාඩිවෙලා හිටියා. මම ඇතුළට ගියේ කිසිම පැකිළීමක් නැතුව හරිම සැහැල්ලුවෙන්. 

ඒත් ගියාට පස්සේ මට තරු පෙනුණා. මේසේ ඉස්සරහා සෝෆා එකේ වාඩි වෙලා හිටියේ මෙනත් අයියා. මම තරම් එයාට බය වුණු තවත් මනුස්සයෙක් මේ ලෝකේ තව නැතුව ඇති. ඒ තරමට මම එයාට බයයි.

මෙනත් අයියා කියන්නේ හිමාල් අයියගේ යාළුවා.

මෙනත් අයියා මට හොඳට සැලකුවා.

මම හුස්මක් ගත්තත් මෙනත් අයියට මට ඕන මොනවද කියලා තේරුණා.

එයා මට හැමදේම කරලා දුන්නා.

ඒත් මම තාමත් එයාට බයයි.

'අයියේ මේක මගේ ලියුම...' මම හිමාල් අයියට ලියුම දුන්නහම හිමාල් අයියා මං දිහා බැලුවා. 

'මොනවද මල්ලි මාස්ක් එකේ?' හිමාල් අයියා ඇහුවේ මූණේ ඇඳුන ලොකු හිනාවක් එක්ක. 

මට ටික වෙලාවක් ගියාට පස්සේ තමයි මතක් වුණේ මම මාස්ක් එකේ ඇඳපු පූසව. 

'පූසෙක්...' මම උත්තර දුන්නා.

හිමාල් අයියා ටිකක් සද්දෙන් හිනාවුණා. 'මෙනත් මේ බලන්නකෝ මෙයාගේ මාස්ක් එක.'

මෙනත් අයියා එයාගේ අතේ තිබුණ පොතෙන් ඔළුව උස්සනවා මට පෙනුණා. මම ඒක දැකලත් නොදැක්කා වගේ හිමාල් අයියා දිහාට මූණ හරවන් හිටියේ මෙනත් අයියා දිහා බලන්න තරම් මට කිසිම හයියක් නොතිබුණ නිසයි.

'මේ පැත්ත හැරෙන්න.' 

මම මෙනත් අයියා දිහාට හැරුණා. ඒත් එයාගේ මූණ දිහා බැලුවේ නෑ. 

'ලස්සනයි.' මෙනත් අයියා එහෙම කියලා මගේ ඇඟ දිගේ පහළට බලන් ආවා. 

මම ගල් වුණේ එයා ඒක දකියි කියලා බය වෙලයි.

'හිමාල් මම මෙයාව අරන් යනවා පොඩ්ඩක්. මට වැඩ වගයක් තියෙනවා කරගන්න.' මෙනත් අයියා කිව්වේ පුටුවෙන් නැගිටින ගමන්.

හිමාල් අයියගේ උත්‍තරේ මට ඇහෙන්නත් කලින් මෙනත් අයියා මාව ඉස්සරහට තල්ලු කළේ දොරින් එළියට බහින්න කියලා සන් කරන ගමන්.

අද ඉස්කෝලේ දවසක් නිසා ළමයි පන්තිවල කතා කරන සද්ද වලින් ඉස්කෝලේ පිරිලා තිබ්බා. අද ඉස්කෝලේ දවසක් නොවුණ නිසා මෙනත් අයියා ඇවිත් හිටියේ එයාගේ සංගමේක වැඩකට පාට ඇඳුමින්.

'මගේ පස්සෙන් එන්න.'

මම ගියා. 

අපි දෙන්නා ගියේ කවුරුත්ම නැති අත ඇරලා දාපු පරණ පොත් කාමරේට.

මම කාමරේට ආපු ගමන් මෙනත් අයියා දොර වහලා දැම්මා.

මට දැනුණා මගේ අවසානය ළඟයි කියලා.

'අත පෙන්නන්න.' 

එයාගේ අණ හරිම සෘජුයි. 

මම එයාට මගේ අත්ල පෙන්නුවා.

'අත දිග අරින්න.'

මම බයෙන් හිටපු දේ ඒක.

දිග හුස්මක් අරන් ඒක සද්ද නැතුව පිට කරමින් මම අත දිග ඇරියා.

අපි දෙන්නා අතරේ ටික වෙලාවක් ලොකු නිහඬතාවයක් තිබ්බා.

'මාස්ක් එක ගලවන්න.'

මෙනත් අයියගේ වචන මට පුදුමයක් වුණත් මම හෙමින් මාස්ක් එක ගලවලා සාක්කුවට දාගත්තා.

ඊළඟට මට ඇහුණේ හුළඟ කපාගෙන ඇවිත් මගේ මූණේ වැදුණ මෙනත් අයියගේ අතේ සද්දේ.

________________

'ඔයාට බෑ මේ වගේ දෙයක් කරන්න.'

________________

Meraki

2021 - 12 - 17