တစ်ခုသောနံနက်ခင်းတွင် ယွန်းအုပ်ကြီးတစ်ခုသည် အမယ့်အိမ်ကို ရောက်လာ၏။စစ်သေနာပတိချုပ်၏အိမ်တော်မှ ယွန်းအုပ်ကြီးဖြစ်၍ အနက်ရောင်က တောက်ပြောင်နေပြီး အနက်ပေါ်မှရွှေရောင် ကနုတ်အညွှန့်အခက်များက များစွာအသက်ဝင်လှပနေသည်။မြနုမှာ လှပလွန်းသည့်ယွန်းအုပ်ကို တအံ့တဩကြည့်နေမိသည်။
ထိကိုင်လိုက်လျှင် တစ်စုံတစ်ရာပျက်စီးသွားမည်စိုး၍ ဘေးမှထိုင်ကာကြည့်နေ၏။ဗညားသတိုးနှင့်နန်းစောရှင် အမယ့်အိမ်တွင်း ဝင်လာတာကိုမြင်တော့ မြနု မျက်လုံးလေးတွေ တောက်ပသွားသည်။
"သတိုးနဲ့စောငယ်တို့ကို နုစောင့်နေတာ"
"ဘာလို့လဲ မြနု"
"သည်မှာလေ တန်ဖိုးကြီးတဲ့ယွန်းအုပ်ရောက်နေတယ်တော့် နုဖြင့်မကိုင်ရဲပေါင်"
ဗညားသတိုး ယွန်းအုပ်ကိုညဖွင့်ကြည့်လိုက်သည်။ယွန်းအုပ်အတွင်းတွင် ပျားရည်ဆမ်းထားသည့်မုန့်သလက်အဝိုင်းတွေသာမက မုန့်သိုင်းခြုံ၊မုန့်ကျွဲသဲ၊ဘိန်းမုန့်နှင့်ထားဝယ်မုန့်တို့ကို အစုံအလင်တွေ့ရသည်။
ဗညားသတိုး ထားဝယ်မုန့်တစ်ခုကို ယူလိုက်ပြီး နန်းစောရှင်ကို ခွံ့လိုက်သည်။နန်းစောရှင်က ထားဝယ်မုန့်လေးကို ဝါးလိုက်သည်။နန်းစောရှင် မျက်လုံးလေးတွေ ကွေးအောင်ပြုံးလိုက်သည်။
"အမောင် ဒါက"
"သမိန်သူရိန်ကို ပို့ခိုင်းလိုက်တာလေ"
"ဪ နောင်ကြီးသူရိန်တော့စိတ်ဆိုးရော့တော့မှာဘဲ"
"နုလည်းစားလို့ရလား သတိုး"
မြနုက ရွှန်းလဲ့သည့်မျက်ဝန်းတွေကို အစွမ်းကုန်ဖွင့်ရင်းမေးသည်။
"ရတာပေါ့ စားလေ"
မြနု အလျင်အမြန် မုန့်သိုင်းခြုံတစ်ခုကို ဝါးလိုက်သည်။နူးညံ့သည့်မုန့်သားနှင့်အထဲကအုန်းသကြားကြောင့် မြနု မျက်နှာလေးက ရွှင်လန်းလာသည်။
"ကောင်းလိုက်တာ နူးညံ့နေတာဘဲ"
"မြနု အမယ့်ဖို့ဖယ်ထားရအောင်"
မြနု ခေါင်းညိတ်လိုက်ပြီး မုန့်တစ်ခုစီကိုယူကာ ပန်းကန်ထဲထည့်၍ဘဖယ်ထားလိုက်သည်။ယွန်းအုပ်ထဲမှ မုန့်လေးတွေက ပူနွေးနေကာ အမြင်အရလည်းလှပသည်။မုန့်လေးတွေကဗညားသတိုး၊နန်းစောရှင်နှင့်မြနုကြောင့် ပြောင်စင်သွားရလေသည်။
YOU ARE READING
ချစ်သောပြည့်ရှင်မင်း(Completed)
Historical Fictionစစ်နတ်ဘုရားဟံသာဝတီအိမ်ရှေ့မင်းက အင်းဝနန်းတွင်းမာသူလျှိုလုပ်ရင်း အင်းဝမင်းသားငယ်လေးကိုကာကွယ်ချင်လာတဲ့အခါ နောင်တော်တစ်ပါးရဲ့သစ္စာဖောက်မှုကြောင့် အင်းဝမင်းသားငယ်လေးကဟံသာဝတီကိုရောက်သွားရရှာပါတယ် သူတို့နှစ်ဦးကံကြမ္မာတွေကိုဘယ်လိုဖြတ်ကျော်ပြီးစစ်မှန်တဲ့ပြ...
