Worship Me, I Can Make You Rich (Myanmar Translation) U+Z (Complete)

Chapter 41 (U+Z)

-Unicode-

အခန်း ၄၁: ရှာလကာရည်သောက်နေပြီ!!

လျောက်ကျစ်ဖျင်က နံပါတ်တစ်စစ်သင်တန်းကျောင်းက စတုတ္ထနှစ်ကျောင်းသား တစ်ယောက်ဖြစ်တယ်။

မက်ခါဒီဇိုင်းဌာနက ကျောင်းသားတစ်ယောက်အနေနဲ့ သူက အခု လောလောဆယ် အလွန်အင်မတန် စိတ်ကသိကအောက်နိုင်တဲ့ အခြေအနေတစ်ခုမှာ ရောက်နေတယ်။

သူနဲ့ရွယ်တူ အတန်းဖော်တွေဆို တချို့က အမှတ်အလွန်ကောင်းလို့ မက်ခါထုတ်လုပ်တဲ့ကုမ္ပဏီတွေနဲ့ စာချုပ်တွေတောင် ချုပ်ပြီးနေပြီ။ သူတို့ ဘွဲ့ရပြီးတာနဲ့ ချက်ချင်း အလုပ်တန်းလုပ်လို့ရနေပြီ။

အဆက်အသွယ်ကောင်းတဲ့ မိသားစုကလူတွေကျတော့လည်း စစ်တပ်ထဲမှာ နေရာရနေကြပြီ။ တပ်သုံးမက်ခါတွေက အဆင့်အတန်းမြင့်တယ်။ သူတို့က ထိန်းသိမ်းစောင့်ရှောက်ဖို့တို့ တည်ဆောက်မှုအပိုင်းတို့မှာ အလွန်လူလိုတယ်။ သူတို့ရဲ့ အဆက်အသွယ်နည်းနည်းပါးပါးကို ထည့်သွင်းလိုက်တဲ့အခါ အဲဒီအတန်းဖော်တွေက တစ်ရှိန်ထိုး အောင်မြင်ဖို့ဆိုတာ အချိန်အတိုင်းအတာတစ်ခုလောက်ပဲ လိုတယ်။

ကျန်နေတာကတော့ သူလို အမှတ်လည်း သိပ်မကောင်း၊ မိသားစုကလည်း အဆက်အသွယ်မရှိတဲ့ သူတွေပဲ။ ဘွဲ့ရပြီးလို့ သူတို့အတွက်ကျန်နေတာကတော့ ဦးတည်ရာမဲ့မှုပဲ။

သူက မဟာမက်ခါပြိုင်ပွဲကို ဝင်ပြိုင်ခဲ့ပေမဲ့ သူ့အမှတ်က သူလိုငါလိုပဲ - အဆင့် ၂၀ ကနေ ၃၀ အတွင်းမှာ ရှိတယ်။ လုံးဝကြီး နောက်ကျကျန်ခဲ့တာမဟုတ်ပေမဲ့ အလွန် ပြောင်မြောက်နေတာလည်း မဟုတ်ဘူး။

မက်ခါထုတ်လုပ်တဲ့ကုမ္ပဏီကြီးတွေ အများကြီးရှိတယ်။ သူတို့က လူခန့်မယ်ဆိုရင် အမှတ်အကောင်းဆုံးသူတွေကိုပဲ ငှားကြမှာပဲ။

ဒီနေ့မတိုင်ခင်အထိ လျောက်ကျစ်ဖျင်က လုံးလုံးလမ်းပျောက်နေတယ်။ ရေတစ်ဝက်ဖြည့်ထားတဲ့ ခွက်လိုပဲ အပေါ်ကိုလည်းမတက်နိုင်၊ အောက်လည်း မဆင်းနိုင်ဖြစ်နေတယ်။ ဘွဲ့ရပြီးနောက် သူဘယ်မှာ အလုပ်သွားရှာရမှာလဲ။

နံပါတ်တစ်စစ်သင်တန်းကျောင်းက ဘွဲ့ရတာဖြစ်နေသရွေ့ ဘယ်မှာမဆို အလုပ်ရှာရမခဲယဉ်းဘူးလို့ လူတိုင်းကပြောကြတယ်။ အထူးသဖြင့် သူသာ မွေးရပ်မြေကို ပြန်သွားရင် သေချာပေါက် အဲဒီဂြိုလ်မှာတော့ စတားဖြစ်လာမှာပဲ။