Copper Coins《铜钱龛世》

အခန်း ၄၈(တာ့ရှန်းရမ် ၃)

Unicode

ဟွားမန်နယ်၏ နွေဦးကာလ၌ : အရိုးများနှင့် အသွေးအသားများ အထုတ်ယူခံရသောနေ့တွင်ဖြစ်သည်။ မရေမတွက်နိုင်သော ရွှေချည်မျှင်ကြိုးများက အရပ်ရှစ်မျက်နှာမှ ထွက်ပေါ်လာပြီး တစ်ကိုယ်လုံးကိုရစ်ပတ်လျက် မြေပြင်ထက်သို့ ဆွဲချဖိကပ်ခဲ့သည်။ ကြိုးမျှင်များသည် အကြေးခွံများအကြားတိုးဝင်လျက် မြဲမံစွာချုပ်နှောင်ထားပြီး ကြီးစွာသောလှောင်အိမ်ထဲ၌ ပိတ်လှောင်ထားခဲ့၏။

ရွှေကြိုးများသည် ဆံချည်မျှင်တမျှသာရှိသဖြင့် အသားထဲနစ်ဝင်သွားချိန်ဝယ် ဒဏ်ရာများမှာ သေးငယ်လှသည်မို့ သွေးယိုစီးခြင်းတော့မရှိ။ သွေးမထွက်သောကြောင့် မနာကျင်လို့တော့မဆိုနိုင်။ ထိုရွှေချည်မျှင်များကြောင့် ကိုယ်ခန္ဓာမှာ မီးပူကျွမ်းသကဲ့သို့ ပူလောင်လှချေသည်။ အပြင်ဘက်မှကြိုးများကြောင့် အကြေးခွံနှင့်အရည်ပြားများက နာကျင်ရပြီး အသားတွင်းနစ်ဝင်နေသောကြိုးများကြောင့် အရိုးထဲအသားထဲအထိ အူအသည်းလှိုက်အောင် ခံစားရသည်။ စိုးစဥ်မျှလှုပ်ရှားမှုလေးကတောင် အသည်းခိုက်အောင် နာကျင်လှသည်။ ကုဋေသန်းချီသောပုရွတ်ဆိတ်များ တစိစိဝိုင်း၍အမဲဖြတ်ခြင်းကို ခံနေရသလိုနှယ်။

သို့သော်ငြား ရွှဲရှန်ကတော့ ရွှဲရှန်ပင်။ သိန်းသောင်းချီသောမြားများနှင့် မြေပြင်ထက်ကပ်နှိပ်ထားလျှင်တောင်မှ သူလှုပ်ချင်လျှင် လှုပ်ရှားမည့်သူဖြစ်သည်။ မည်မျှပင်နာကျင်စေကာမူ ကိုယ်တွင်စိုက်နေသောမြားများကိုဆွဲနှုတ်ပြီး ဤသို့လုပ်ခဲ့သူခေါင်းကို သွားဖြုတ်ချေလိမ့်မည်။

ခန္ဓာကိုယ်နာကျင်မှုလေးလောက်နဲ့ သူ့ကို ဘယ်သောအခါကမှ တားနိုင်စွမ်းရှိခဲ့သည်မဟုတ်။

ထိုအချိန်တုန်းက လှောင်ချိုင့်ကို ဖြတ်မထွက်နိုင်ခဲ့သော အကြောင်းအရင်းမှာ နှစ်ရာစုကြာတိုင်း တစ်ကြိမ်ရောက်ရှိတတ်သော အတိဒုက္ခကို ဖြတ်ကျော်ရမည့်အချိန်ကာလသို့ ရောက်ရှိနေခြင်းကြောင့်ဖြစ်သည်။

ကြီးစွာသောအတိဒုက္ခများရှိသလို ပမွှားကိစ္စရပ်များလည်းရှိသည်။ သို့သော် လျှပ်စီးထန်သော အတိဒုက္ခကို ကြုံတွေ့ရသည်က များလှသည်။