ﺍﻟﺒﺎﺭﺕ ﺍﻻﻭﻝ ...
ﺭﻭﺍﻳﺔ ... ﺟﻮﻟﻴﺖ ﻭﺃﺳﺮﻫﺎ ... ﻏﻴﺎﻫﺐ ﺍﻹﻧﺘﻘﺎﻡ
ﺑﻘﻠﻤﻲ ... ﻧﻮﺭ ﺳﻤﻮ ﺍﻟﻌﺮﺍﻕ ...
ﺍﺑﺘﺪﺉ ﺍﻭﻝ ﺣﻠﻘﺎﺗﻬﺎ ﻭﻣﺎ ﺗﺤﻤﻞ ﺑﻴﻦ ﺍﺳﻄﺮﻫﺎ ﺍﺗﻤﻨﺊ ﺍﻥ ﺗﻨﺎﻝ ﺍﻋﺠﺎﺑﻜﻢ 😍
ﻣﺴﺎﺋﻜﻢ ﻣﺤﻤﻞ ﺑﺄﺟﻤﻞ ﺍﻟﻮﺭﻭﺩ ...
💔💔💔💔💔💔💔💔💔💔
ﺗﺪﺭﻱ ﻳﺎﻟﺒﺎﺭﺩ ﺣﻨﻴﻨﻚ
ﺗﺜﮕﻞ ﺍﻋﺬﺍﺭﻙ ﻭﻫﺰﻫﻦ
ﺗﺪﺭﻱ ﮔﻤﺖ ﺍﻛﺘﺐ ﺭﺳﺎﻳﻞ
ﻭﺭﺟﻊ ﺍﻣﻦ ﺍﻟﺬﻟﻪ ﺍﺷﻜﻬﻦ
ﻭﻣﻦ ﺯﻣﺎﻥ ﺍﺟﺮﻭﺣﻲ ﺗﻨﺰﻑ
ﻫﺴﻪ ﻣﺪﺭﻱ ﻣﻨﻴﻦ ﺍﻛﻀﻬﻦ
............................................
ﻧﺎﻳﻤﻪ ﻋﻠﺊ ﺍﻟﺴﺮﻳﺮ ﻭﻣﺘﻀﺎﻳﻘﻪ ﺣﻴﻴﻞ ﺷﻮﻭﻳﻪ ﻭﺍﺑﺠﻲ ﻭﺣﺪﻩ ﻭﻏﺮﺑﻪ ﺗﻌﺼﺮ ﺭﻭﺣﻲ ﻣﻊ ﺍﻟﻌﻠﻢ ﺍﻫﻠﻲ ﺑﻨﻔﺲ ﺍﻟﻤﺤﺎﻓﻈﻪ ﺑﺲ ﻣﻦ ﺗﺰﻭﺟﺖ ﻭﻟﺤﺪ ﺍﻻﻥ ﻭﺍﻧﻲ ﺍﺣﺲ ﺑﻐﺮﺑﻪ ﻭﻭﺣﺪﻩ ﻓﻀﻴﻌﻪ ...
ﺍﻧﺘﺒﻬﺖ ﻋﻠﺊ ﻧﻔﺴﻲ ﺗﺰﻭﺟﺖ ...!!!! ﺍﻱ ﺯﻭﺍﺝ ﻫﺬﺍ ﻟﻴﺶ ﺍﻧﻲ ﻫﻢ ﻣﻌﺘﺒﺮﻩ ﻧﻔﺴﻲ ﻣﺘﺰﻭﺟﻪ
ﻟﻼﺳﻒ ﺍﻧﻲ ﻭﻳﺎﻩ ﺍﺑﺒﺒﺪ ﻣﺎ ﻧﺸﻜﻞ ﺟﻮﻭ ﺍﺳﺮﻩ ﻣﻌﺘﺪﻝ ﺭﻏﻢ ﻗﻠﺔ ﻛﻼﻣﻲ ﻭﻳﺎﻩ ﻭﺭﻏﻢ ﺯﻭﺍﺟﻲ ﻣﻨﻪ ﻭﻗﺮﺑﻲ ﻣﻨﻪ ﻟﻜﻦ ﻟﻼﺳﻒ ﻋﻼﻗﺘﻨﻪ ﺍﺑﺮﺩ ﻣﻦ ﺍﻟﺠﻠﻴﻴﺪ
ﺍﺑﺘﺴﻤﺖ ﺑﺎﻣﻞ ﻣﺬﺑﻮﺡ ... ﺧﻠﻴﻨﻲ ﺍﻧﻲ ﺍﺟﺎﺯﻑ ﻭﺍﺑﺪﻱ ﻭﻳﺎﻩ ﺧﻠﻴﻨﻲ ﺍﻧﻲ ﺍﻟﻲ ﺍﺗﻘﺮﺏ ﻣﻨﻪ ﻭﺍﺧﻠﻲ ﻳﻌﺘﺮﻑ ﺑﺤﺒﻲ ﻻﻥ ﻫﺎﻱ ﻣﻮ ﺣﺎﻟﻪ ﻳﺎﺧﺬ ﺍﻟﻲ ﻳﺮﻳﺪﻩ ﻭﻳﺮﻭﺡ ...
ﻭﻛﻔﺖ ﺑﻤﺮﺡ ﺍﺧﺬﺕ ﻣﻮﺑﺎﻳﻠﻲ ﻃﻠﻌﺖ ﺭﻗﻤﻪ ﻛﺎﺗﺒﻪ ﻋﻠﻴﻪ ﺯﻭﺟﻲ ... ﻋﺸﺘﻮﻭ ﺍﻣﺪﺍﻧﻲ ﻫﻢ ﻋﻨﺪﻱ ﺯﻭﺝ ﻣﺜﻞ ﺍﻟﻌﺎﻟﻢ ﻓﺮﺣﺎﻧﻪ ﺑﻲ ...
ﺍﺑﺘﺴﻤﺖ ﻭﺍﻧﻲ ﺍﺷﻮﻑ ﺍﺳﻤﻪ ﻣﻨﻮﺭ ﺑﺸﺎﺷﺔ ﺗﻠﻴﻔﻮﻧﻲ ﻛﺎﺗﺒﻪ ﻋﻠﻴﻪ ... ﺍﻟﻜﺎﺳﺮ .. ﺯﻭﺟﻲ
ﺗﺮﺩﺩﺕ ﺍﻛﺘﺐ ﺷﺊ ﻭﺿﻠﻴﺖ ﻓﺎﺗﺤﻪ ﺍﻟﻤﺴﻮﺩﻩ ﻳﻤﻜﻦ ﺩﻗﻴﻘﻪ ﻛﺎﻣﻠﻪ ﻭﺍﻧﻲ ﻣﺎ ﺍﻋﺮﻑ ﺷﻨﻮ ﺍﻛﺘﺐ ﻭﺷﻨﻮ ﺍﺳﻄﺮ ﻣﻦ ﻛﻠﻤﺎﺕ ...
ﻛﺘﺒﺖ ... ﻛﺎﺍﺍﺍﺳﺮ ﺍﻧﻲ ﺍﺣﺒﺒﻚ ﺍﻧﺖ ﻟﻴﺶ ﺑﺎﺭﺩ ﻭﻳﺎﻳﻪ
ﺭﺩﺕ ﺍﺿﻐﻂ ﺍﺭﺳﺎﻝ ﻟﻜﻦ ﺳﺮﻋﺎﻥ ﻣﺎ ﺗﺮﺍﺟﻌﺖ ﻭﺣﺬﻓﺘﻬﺎ ﻣﺎ ﺍﺭﻳﺪ ﺍﺫﻝ ﺭﻭﺣﻲ ﺍﻟﻪ ﺧﻠﻲ ﻫﻮ ﻳﻌﺘﺮﻑ ﺑﺤﺒﻲ ﻣﻮ ﺍﻧﻲ
ﻓﺰﻳﺖ ﻣﻦ ﻣﻜﺎﻧﻲ ﺑﺮﺭﺭﻋﺐ ﻋﻠﺊ ﺻﻮﺕ ﺍﻟﺒﺎﺏ ﻭﻫﻮ ﻳﻨﻄﺮﻕ ﺑﻘﻮﻭﻩ
ﻣﺎ ﻟﺤﻜﺖ ﺍﻟﺒﺲ ﻧﻌﺎﻟﻲ ﻓﺘﺤﺖ ﺍﻟﺒﺎﺏ ﺑﺎﻭﻋﺘﻠﻲ ﻭﻫﻲ ﺗﻄﻚ ﺑﻌﻠﺠﻬﺎ ﻭﺗﻜﻠﺐ ﺑﻌﻴﻮﻧﻬﺎ ﺑﺪﻟﻊ ﻛﺎﻟﺖ ﺑﺎﺳﺘﻔﺰﺍﺯ ... ﺗﺮﺉ ﺻﺎﺭ ﺷﻬﺮﻳﻦ ﻣﻦ ﺗﺰﻭﺟﺘﻲ ﻣﻌﻘﻮﻟﻪ ﻟﺤﺪ ﺍﻻﻥ ﺗﺴﺘﺤﻴﻦ
ﻟﻮ ﻋﺠﺒﺞ ﺍﻟﻮﺿﻊ ﺍﻧﺘﻲ ﻛﺎﻋﺪﻩ ﻭﺍﺣﻨﻪ ﻧﻄﺒﺦ ﻭﻧﻘﺪﻡ ﻛﺪﺍﻣﺞ
ﺍﺑﺘﺴﻤﺖ ﺑﻬﺪﻭﺀ ... ﻻ ﻭﺍﻟﻠﻪ ﺑﺲ ﻭﺍﻟﻠﻪ ﻓﻌﻼ ﺍﻧﻲ ﺍﺳﺘﺤﻲ ﻳﻌﻨﻲ ﺷﻮﻳﺔ ﺍﻟﻌﺎﺋﻠﻪ ﻣﺎﻟﺘﻬﻢ ﻣﻴﺨﻠﻮﻥ ﻭﺍﺣﺪ ﺑﺴﺮﻋﻪ ﻳﻨﺪﻣﺞ ﻭﻳﺎﻫﻢ ...
ﺭﺩﺕ ﺑﺎﻧﺰﻋﺎﺝ ﻭﺑﻌﺪﻫﺎ ﺗﻄﻚ ﺑﻌﻠﺠﻬﺎ ﻭﻣﺘﺨﺼﺮﻩ ... ﻻ ﺣﺒﻲ ﺍﻧﺘﻲ ﺩﻣﺞ ﺟﺎﺍﺍﻣﺪ ﻭﻣﺘﺠﺎﻣﻠﻴﻦ ﺷﺒﻴﻬﻢ ﻋﻴﻴﻨﻲ ﺍﺷﻮﻭ ﺻﺎﺭ ﺳﻨﻴﻦ ﻋﺎﻳﺸﻪ ﻭﻳﺎﻫﻢ ﻣﺎ ﺣﺠﻴﺖ ﻋﻠﻴﻬﻢ ﻣﺜﻠﺞ ﻫﺎﻱ ﻭﺍﻧﺘﻲ ﺻﺎﺭﻟﺞ ﻳﻮﻣﻴﻦ ....
ﺑﺎﻭﻋﺘﻠﻬﺎ ﺑﺼﺪﻣﻪ ... ﻳﺎﺍﺍ ﻋﺰﺍﺍﺍ ﻋﻠﺊ ﻛﻴﻔﺞ ﻳﻤﻌﻮﺩﻩ ﺗﺮﺉ ﻫﻤﻪ ﺑﻴﺖ ﺧﺎﻟﺘﻲ ﻗﺒﻞ ﻛﻮﻭﻭﻟﺸﻲ ﺑﺲ ﺍﻧﻲ ﻣﻤﺘﻌﻮﺩﻩ ﻋﻠﻴﻬﻢ ﻭﺍﻧﺘﻲ ﺗﻌﺮﻓﻴﻦ ﺑﺤﻴﺎﺗﻲ ﻣﺠﺎﻳﻪ ﺍﻟﻬﻢ ﻟﺬﻟﻚ ﻣﺴﺘﻐﺮﺑﻪ ﺷﻮﻭﻳﻪ .
ﺟﺮﺕ ﻧﻔﺲ ﻣﺰﻋﻮﺝ ﻭﺗﻜﻠﻤﺖ ﻣﻦ ﻭﺭﻩ ﺧﺸﻤﻬﺎ ... ﺩﻳﺎﻟﻠﻪ ﻳﺎﻟﻠﻪ ﺭﻭﺣﻲ ﻟﻠﻤﻄﺒﺦ ﺳﻮﻳﻠﻨﻪ ﻋﺸﺎ ﺍﻟﻴﻮﻡ ﻧﺮﻳﺪ ﻧﺎﻛﻞ ﻣﻦ ﺍﻳﺪﺝ
ﺑﻠﻠﺖ ﺷﻔﺎﻳﻔﻲ ﺑﺤﻴﺮﻩ ﻭﻫﺰﻳﺖ ﺭﺍﺳﻲ ﺑﻘﺒﻮﻝ ...
ﺧﻠﻴﺖ ﻭﺭﺣﺖ ﺑﺪﻟﺖ ﻟﺒﺴﺖ ﺛﻮﺏ ﺟﻮﻳﺘﻲ ﻣﺨﺼﺮ ﻭﻃﻮﻭﻳﻞ ﻭﻟﺒﺴﺖ ﺷﺎﻝ ﻟﻮﻧﻪ ﺫﻫﺒﻲ ﻭﺑﻲ ﺧﺮﺯ ...
ﺭﺣﺖ ﻟﻠﻤﻄﺒﺦ ﻃﻠﻌﺖ ﺍﻟﻤﻮﺟﻮﺩ ﺑﺎﻟﺜﻼﺟﻪ ...
ﻫﻤﺴﺖ ﺑﻜﻠﺒﻲ ﺑﻘﻬﺮ ... ﺷﻜﺪ ﻣﻜﺮﻭﻫﺎ ﻫﻞ ﻧﻮﺍﻝ ﻫﺎﻱ ﻣﺎﻝ ﻧﻮﺍﻝ ﻣﺎﻝ ﻧﻌﺎﻝ ﻫﺎﺍﺍﻱ
ﺍﻭﻭﻑ ﺍﺳﺘﻐﻔﺮ ﺍﻟﻠﻪ ﺭﺑﻲ ... ﻋﻮﻭﺩ ﻫﻲ ﻣﺮﺓ ﺍﻟﺠﺒﻴﺮ ﺍﻟﻲ ﺗﺘﺤﻤﻞ ﺍﻟﺤﻠﻮﻩ ﻭﺍﻟﻤﺮﻩ ﺍﺷﻮﻭ ﻫﺎﻱ ﺑﺲ ﺗﺪﻭﺭ ﺍﻟﺰﻟﻪ ﻋﻠﻴﻪ
ﺍﻧﻲ ﻣﻨﺎ ﻫﺬﺍ ﻣﻄﻨﻜﺮ ﻋﻠﻴﻪ ﻭﻫﺎﻱ ﻣﺘﺨﺒﻠﻪ ﻭﻣﺤﺪ ﺍﺣﺲ ﻳﺤﺒﻨﻲ ﺑﻬﻞ ﺍﻟﺒﻴﺖ ... ﺣﺘﺊ ﺧﺎﻟﺘﻲ ﻣﺪﺭﻱ ﺷﺒﻴﻬﺎ ﺗﺴﻤﻴﻨﻲ ﺍﻟﻤﺎﻳﻌﻪ ...
ﻏﻤﻀﺖ ﻋﻴﻮﻧﻲ ﺑﺎﺳﺊ ﻭﻣﺴﺤﺖ ﺩﻣﻌﺘﻲ ... ﻳﺎﺍﺍﺍﺭﺑﻲ ﺍﺷﺘﺎﻗﻴﺖ ﺍﻻﻣﻲ ﻭﻳﻴﻦ ﺟﺎﻧﺖ ﻣﺎﻣﺎ ﻣﺪﻟﻠﺘﻨﻲ ﺩﻻﻝ ﻛﻠﻪ ﻣﻦ ﻭﺭﻩ ﺃﺧﻮﻳﻪ ﺣﺎﺭﺑﻨﻲ ﻣﺤﺎﺭﺑﻪ ﺑﺲ ﺍﻟﻠﻪ ﻳﻌﺮﻑ ﺑﻴﻬﺎ ...
ﺍﺗﺬﻛﺮﺗﻪ ﻣﻦ ﻗﺒﻞ ﻻ ﺍﺗﺰﻭﺝ ....
ﺟﻨﺖ ﻛﺎﻋﺪﻩ ﺍﻗﺮﻩ ﺑﻜﺘﺎﺏ ﺍﻟﻔﻠﺴﻔﻪ ﺑﺎﻟﺨﺎﻣﺲ ﺍﻻﺩﺑﻲ ﻭﺩﺧﻞ ﺍﺧﻮﻳﻪ .. ﺣﺎﺍﺯﻡ ...
ﺑﺎﻭﻋﻠﻲ ﻛﺎﻝ ﺑﻘﺮﻑ ... ﻛﻮﻭﻭﻣﻲ ﻃﻜﻴﻠﻲ ﺑﻴﻀﻪ
ﺍﻧﻲ ﺧﻠﻴﺖ ﺍﻟﻜﺘﺎﺏ ﻭﺩﺍ ﺍﻣﺸﻲ ﻫﻮ ﻋﺎﻁ ﺑﻴﻪ ... ﻭﻣﺮﺭﺭﺭﺭﺽ ﺑﺴﺮﺭﺭﺭﻋﻪ
ﺑﺎﻭﻋﺘﻠﻪ ﺑﺎﻧﺰﻋﺎﺍﺝ ... ﻣﻮ ﺩﺍ ﺍﻣﺸﻲ
ﻣﺎ ﺍﺷﻮﻭﻭﻑ ﻫﺬﺍ ﺍﻟﻪ ﻫﺠﻢ ﻋﻠﻴﻪ ﺭﺍﺷﺪﻳﺎﺕ ﻭﺿﺮﺑﺎﺕ ﻭﺍﻧﻲ ﺿﻠﻴﺖ ﺍﻋﻴﻂ ﻭﺍﺣﺎﻭﻝ ﺍﺧﻠﺺ ﻧﻔﺴﻲ ﻣﻨﻪ
ﺍﺟﺖ ﻣﺎﻣﺎ ﺗﺮﻛﺾ ﻭﻫﻲ ﺗﺮﻳﺪ ﺗﺨﻠﺼﻨﻲ ﻣﻦ ﺑﻴﻦ ﺍﺩﻳﻪ ﻟﻜﻦ ﻟﻼﺳﻒ ﻣﺎ ﻛﺪﺭﺕ ﻻﻥ ﻃﻮﻟﻬﺎ ﻣﻴﺴﺎﻋﺪﻫﺎ ...
ﺷﺎﻟﺖ ﺍﻟﺪﻭﻟﻜﻪ ﻣﺎﻟﺖ ﺍﻟﻤﻲ ﻭﺭﻛﻌﺘﻪ ﺑﻴﻬﺎ ﺑﻈﻬﺮﻩ ﻫﻮ ﺑﺎﻭﻋﻠﻬﺎ ﺑﻐﻀﺐ ... ﻳﻤﻤﻪ ﻟﻴﺶ ﺗﻀﺮﺑﻴﻨﻴﻲ ...
ﺳﺤﺒﺘﻪ ﺑﻘﺴﻮﻩ ﻭﻫﻲ ﺗﻌﻴﻂ ﺑﻲ ... ﻭﻟﻚ ﻧﺬﻝ ﻟﻴﺶ ﻭﻳﻪ ﺍﺧﺘﻚ ﺷﺒﻴﻴﻚ ﻭﻳﺎﻫﺎ ﻳﻌﻨﻲ ﻣﺎ ﺗﺠﻲ ﺩﻗﻴﻘﻪ ﺍﺫﺍ ﻣﺎ ﺗﺨﻠﻲ ﻣﺮﺍﺭﺓ ﺍﻟﻤﻮﺕ ﺑﺤﻠﮕﻲ ..
ﺷﺪ ﻋﻠﺊ ﺷﻔﺎﻳﻔﻪ ﺑﻌﺼﺒﻴﺔ ... ﺧﻠﻲ ﺗﻮﻭﻟﻲ ﺣﻴﻮﻭﻭﻭﺍﻧﻪ ﺍﺩﺑﺴﺰ ﺍﻛﻠﻬﺎ ﻃﻜﻴﻠﻲ ﺑﻴﻀﻪ ﺗﻤﺸﻲ ﻋﻠﺊ ﻛﻴﻒ ... ﺗﺘﻤﺎﻭﻉ ﺍﻻﺩﺑﺴﺰ ...
ﺍﻣﻲ ﻏﻤﻀﺖ ﻋﻴﻮﻧﻬﺎ ﺑﺎﺳﺊ ﻭﻗﻬﺮ ... ﻭﻟﻚ ﺷﻠﻮﻭﻥ ﺑﻴﻚ ﺷﻨﻮ ﺗﻤﺸﻲ ﻋﻠﺊ ﻛﻴﻒ ﻭﻟﻚ ﺯﻣﺎﻝ ﻭﺍﻟﻠﻪ ﻳﺠﻲ ﺍﺑﻮﻭﻙ ﻭﺍﺧﻠﻲ ﻳﻄﻴﺢ ﺣﻀﻚ ﺣﻴﻮﺍﻥ ﻛﺎﺩﺭ ﻋﻠﺊ ﻫﻞ ﻃﻔﻠﻪ ﺷﺎﺑﻌﻬﺎ ﻛﺘﻞ ...
ﺯﻣﺠﺮ ﺑﻐﻀﺐ ... ﻭﺍﻟﻠﻪ ﺣﺘﺊ ﻣﺪﺭﺳﻪ ﺑﻌﺪ ﻣﺎﻛﻮﻭﻭ ﻋﻮﻭﺩ ﻋﺒﺎﻟﻬﺎ ﻣﺎ ﺍﺩﺭﻱ ﺑﺴﻮﺍﻟﻔﻬﺎ ﺍﻟﺴﺎﻓﻠﻪ
ﺍﻣﻲ ﺿﺮﺑﺖ ﻋﻠﺊ ﺧﺪﻫﺎ ﺑﺮﻋﺐ ﻭﻫﻲ ﺗﺒﺎﻭﻋﻠﻪ ﻣﺘﺴﺎﺋﻠﻪ ﻫﺰﻳﺖ ﺭﺍﺳﻲ ﺑﺨﻮﻑ ﻭﺍﻧﻲ ﺍﺑﺠﻲ ﺑﻌﺪﻡ ﺗﺼﺪﻳﻖ
ﺗﻘﺮﺑﺖ ﻣﻨﻪ ﻭﻫﻲ ﺗﻀﺮﺑﻪ ﻋﻠﺊ ﺑﻄﻨﻪ ﺑﻌﺼﺒﻴﺔ .. ﺳﻮﺍﻟﻒ ﺷﻨﻮﻭ ﻭﻟﻚ ﺷﺘﺤﺠﻲ ﺍﻧﺖ ﺍﺧﺘﻚ ﺷﺒﻴﻬﺎ ﺍﺣﺠﻲ ﻻ ﺍﻃﻤﻚ ﺑﮕﺎﻋﮏ
ﺑﺎﻭﻋﻠﻲ ﻭﻫﻮ ﻳﺘﻮﻋﺪ ﺑﻴﻪ ... ﺭﺍﻓﻌﻪ ﺭﺩﺍﻧﻬﺎ ﻭﻣﻄﻠﻌﻪ ﺳﺎﻋﺘﻬﺎ ﻭﺗﻤﺸﻲ ﻭﺗﺘﻤﻀﺤﻚ ﻭﻳﻪ ﺻﺪﻳﻘﺎﺗﻬﺎ ﺍﻟﻜﺢ ...
ﺍﻣﻲ ﺑﺎﻭﻋﺘﻠﻲ ﺑﻘﻬﺮ ﻭﺿﺮﺑﺘﻨﻲ ﺑﺎﻟﺪﻭﻟﻜﻪ ﻟﺴﻪ ﻻﺯﻣﺘﻬﺎ ... ﺍﻣﺸﻲ ﻭﻟﻲ ﻣﻦ ﺧﻠﻘﺘﻲ ﺍﻟﺊ ﻣﺘﺊ ﺍﺿﻞ ﺍﻋﻠﻢ ﺑﻴﺞ ﻭﺍﻧﺘﻲ ﻣﺜﻞ ﺍﻟﻜﺪﻳﺶ ﻻ ﻓﻬﻢ ﻭﻻ ﻋﻠﻢ ..ﺯﻣﺨﺖ ﺑﻮﺟﻬﻴﻲ ... ﺍﻣﺸﻲ ﻭﻟﻲ
ﺍﺷﻮﺓ ﻫﺬﺍ ﻣﺎ ﺻﺪﻙ ﻣﺎﻣﺎ ﻋﺎﻃﺖ ﺑﻴﻪ ﻟﺰﻡ ﺩﻓﺎﺗﻴﺮﻱ ﻭﻛﺘﺒﻲ ﻛﻠﻬﺎ ﺷﮕﮕﻬﺎ ﻭﺍﻧﻲ ﻻﺯﻣﺘﻪ ﻭﺍﺑﺠﻲ ﻭﺍﺗﻮﺳﻞ ﺑﻲ ﻳﻌﻮﻑ ﻛﺘﺒﻲ ﻭﻫﻮ ﻛﻞ ﺷﻮﻳﻪ ﻭﺭﻓﺴﻨﻲ ﻭﺩﻓﻌﻨﻲ
ﺭﺣﺖ ﺍﻣﺸﻲ ﻟﻠﻐﺮﻓﻪ ﺍﻟﺜﺎﻧﻴﻪ ﻭﺍﻧﻲ ﺍﺑﺠﻲ ﻭﺍﻣﻲ ﺩﺧﻠﺖ ﻋﻠﻴﻪ ﻛﺎﻟﺖ ﺑﻐﻀﺐ ﻛﺎﺳﺢ ... ﺷﻠﻮﻭﻭﻥ ﺑﻴﺞ ﻭﻟﺞ ﻳﻌﻨﻲ ﻧﺎﻭﻳﻪ ﺗﻤﻮﺗﻴﻨﻲ ﺗﺮﺉ ﺟﺰﻋﺖ ﻣﻨﺞ ﺍﻧﻲ ﻣﻘﺼﺮﻩ ﻭﻳﺎﺝ ﺑﺸﺊ ﻣﻮ ﺍﺣﺮﻣﺺ ﻋﻠﺊ ﺭﻭﺣﻲ ﻭﺍﺷﺘﺮﻳﻠﺞ ﺍﻟﺸﺊ ﻣﻮ ﻭﻳﻦ ﻣﺎ ﺍﺭﻭﺡ ﻣﺎ ﺧﺬﺗﺞ ﻭﻳﺎﻱ ﻣﻮ ﻣﻦ ﻭﺍﺣﺪ ﻳﺤﺠﻲ ﻭﻳﺎﺝ ﺍﺻﻴﺮﻟﺞ ﺳﻴﻒ ﻭﺩﺭﮔﻪ ﻟﻴﺶ ﻫﻴﺞ ﺗﺴﻮﻭﻳﻦ
ﻣﺴﺤﺖ ﺩﻣﻮﻋﻲ ﺑﺎﺳﺊ ... ﺍﻟﻴﺴﻤﻌﻬﺎ ﻳﻜﻮﻭﻭﻝ ﻫﻲ ﺗﻔﺘﺮ ﺑﺎﻟﻤﻮﻝ ﻭﺍﻧﻲ ﺍﻓﺘﺮ ﻭﺭﺍﻫﺎ ﻫﻲ ﻃﻠﻌﺘﺞ ﺍﻟﻔﺨﻤﻪ ﻛﻠﻬﺎ ﻟﺴﻮﻙ ﺍﻟﻤﺨﻀﺮ ... ﻭﺑﻌﺪﻳﻴﻦ ﺍﻧﻲ ﺷﻤﺴﻮﻳﻪ ﻭﺍﻟﻠﻪ ﺣﺎﺯﻡ ﺟﺬﺍﺏ
ﻋﺎﻃﺖ ﺑﻮﺟﻬﻲ ... ﻣﻮ ﻳﻜﻮﻝ ﺗﺘﻤﻀﺤﻜﻴﻦ ﻭﺗﺘﻤﺎﻭﻋﻴﻦ ﺑﺎﻟﺸﺎﺭﻉ ...
ﺭﺩﻳﺖ ﺑﺸﻬﻜﺎﺕ ... ﻳﻌﻨﻲ ﺻﺪﻳﻘﺎﺗﻲ ﻳﻀﺤﻜﻦ ﺍﻧﻲ ﺍﺳﺴﺪ ﺣﻠﻜﻲ ﻟﻴﺶ .. ﻭﺑﻌﺪﻳﻦ ﺻﺎﺭ ﻣﻮﻗﻒ ﻭﺿﺤﻜﻨﻪ
ﺍﻣﻲ ﻋﻀﺖ ﺃﺻﺎﺑﻌﻬﺎ ﺑﻘﻬﺮ ... ﺍﻟﺤﺠﻲ ﻭﻳﺎﺝ ﺿﺎﻳﻊ ﻭﻣﺪﺍﻡ ﻣﺎ ﺗﺎﺧﺬﻳﻦ ﻛﻼﻣﻲ ﻃﺒﺞ ﻣﺮﺽ
ﻛﻤﻠﺖ ﺑﺤﺮﻗﺔ ﻗﻠﺐ ... ﻭﺍﻧﻲ ﺍﻓﺘﺨﺮ ﺑﻴﺞ ﺍﻛﻮﻝ ﺑﻨﻴﺘﻲ ﺣﻠﻴﻮﻩ ﻭﺩﺍﺭﺳﻪ ﻭﺍﻟﻜﻞ ﻳﺤﺴﺪﻧﻲ ﻋﻠﻴﻬﺎ ﺗﺎﻟﻬﺎ ﺗﺮﺩﻳﻦ ﺗﻨﺰﻟﻴﻦ ﺭﺍﺳﻲ ﻭﺍﻟﻌﺎﻟﻢ ﺗﺤﺠﻲ ﺑﻌﺮﺿﺞ
ﺍﺭﺩﻓﺖ ﺑﻌﺼﺒﻴﺔ ﻭﻫﻲ ﺗﺮﻓﻊ ﺍﺻﺒﻌﻬﺎ ﺑﺘﻬﺪﻳﺪ ... ﺑﺎﻟﻘﺮﺍﻥ ﻳﺎ ﺟﻮﻟﻴﺖ ﻭﺭﻭﺡ ﺍﻣﻲ ﺍﻟﺰﻣﺞ ﺍﻛﻄﻌﺞ ﺗﻜﻄﻊ ﻻ ﻋﺒﺎﻟﺞ ﻛﺼﻴﺮﻩ ﻭﻣﻮ ﺑﻄﻮﻟﺞ ﻭﺣﺪﺑﺘﻲ ﺑﻈﻬﺮﻱ ﻻﺍﺍﺍﺍ ... ﺗﺮﺉ ﺑﻌﺪﺝ ﻣﺸﺎﻳﻔﻪ ﺷﺊ ...
ﺧﻠﺖ ﻭﺭﺍﺣﺖ ﺗﻤﺸﻲ ﺑﺼﻌﻮﻭﺑﻪ ﻭﺍﻧﻲ ﺍﺑﺎﻭﻋﻠﻬﺎ ﻭﺍﺑﺠﻲ
ﻃﺒﻌﺎ ﻣﺎﻣﺎ ﻗﺼﻴﻴﻴﻴﺮﻩ ﺣﻴﻴﻴﻞ ﺑﺤﻴﺚ ﻃﻮﻟﻬﺎ ﻣﺜﻞ ﻃﻮﻝ ﻃﻔﻞ ﺑﺎﻻﺑﺘﺪﺍﺋﻴﻪ ﻭﻋﻨﺪﻫﺎ ﺣﺪﺑﻪ ﺑﻀﻬﺮﻫﺎ ﻣﻦ ﺍﻟﻮﻻﺩﻩ ...
ﻭﺍﺗﺰﻭﺟﺖ ﺍﺑﻮﻭﻳﻪ ﻫﻮ ﻫﻤﺎﺗﻴﻦ ﺭﺟﺎﻝ ﻣﻌﻮﻕ ﻋﻨﺪﻩ ﺷﻠﻞ ﻣﻦ ﺍﻟﻮﻻﺩﻩ ﻳﻌﻨﻲ ﻫﻮ ﻋﺎﺩﻱ ﻳﻤﺸﻲ ﺑﺲ ﻣﺒﻴﻦ ﻋﻠﻴﻪ ﻣﻌﻮﻕ ﺧﻄﻴﻪ ...
ﺟﺎﻧﻮﺍ ﻳﻌﺘﺒﺮﻭﻧﻬﻢ ﺣﺎﻟﻪ ﺧﺎﺻﻪ ﺑﺎﻟﻤﺠﺘﻤﻊ ﺑﺴﺒﺐ ﺍﻟﻌﺎﻫﺎﺕ ﺍﻟﻮﻻﺩﻳﻪ ﺑﺲ ﻫﻤﻪ ﺧﻄﻴﻪ ﺍﺗﺰﻭﺟﻮ ...
ﻭﺍﻣﻲ ﺟﺎﺑﺖ ﺍﺧﻮﻭﻳﻪ ﺣﺎﺯﻡ ﻭ ﺍﺧﻮﻳﻪ ﻋﺎﺻﻢ ﺟﺎﻧﻮﺍ ﺍﻳﻪ ﻣﻦ ﺍﻟﺠﻤﺎﻝ ﻳﻌﻨﻲ ﺍﻟﻜﻞ ﻣﺘﻌﺠﺐ ﻋﻠﻴﻬﻢ ﻭﻣﺘﻔﺎﺟﺊ ﻭﻳﻜﻮﻟﻮﻥ ﻫﺎﻱ ﺍﻡ ﺣﺪﺑﻪ ﺍﻟﻘﺰﻣﻪ ﻫﻴﺞ ﺗﺨﻠﻒ ﻭﺍﻟﻠﻪ ﻣﺎ ﻧﺼﺪﻙ ﺍﺣﺘﻤﺎﻝ ﺧﺎﻣﻄﺘﻬﻢ ﻣﻦ ﺍﻟﻤﺴﺘﺸﻔﺊ ...
ﻭﻧﺴﻮ ﺍﻥ ﻫﻢ ﺧﻠﻖ ﺍﻟﺨﺎﻟﻖ ...
ﻭﺑﻌﺪﻫﺎ ﺟﺎﺑﺘﻨﻲ ﻣﺎﻣﺎ ﻻﻥ ﻗﺼﻴﺮﻩ ﻭﻋﻨﺪﻫﺎ ﺣﺪﺑﻪ ﺟﺎﻧﺖ ﺣﺎﻟﺘﻬﺎ ﺧﺎﺻﻪ ﻳﺪﺍﺭﻭﻫﺎ ﺑﺎﻟﻤﺴﺘﺴﻔﺊ ﻓﺎﺷﺮﻓﺖ ﻋﻠﺊ ﻭﻻﺩﺗﻬﺎ ﺑﻴﻪ ﺩﻛﺘﻮﺭﻩ ﻣﺴﻴﺤﻴﺔ ...
ﻣﻦ ﺍﻧﻮﻟﺪﺕ ﻣﺎﻣﺎ ﺩﻛﻮﻝ ﺍﻟﺪﻛﺘﻮﺭﻩ ﺗﺨﺒﻠﺖ ﻋﻠﻴﺞ ﻭﺗﺼﻴﺢ ... ﺑﺎﻋﻮﻭ ﻫﺎﻱ ﺍﻟﻤﺮﻩ ﺷﺠﺎﺑﺖ ﻣﻦ ﺗﻔﺎﺣﻪ ﺗﺠﻨﻦ ﻭﻫﻲ ﺳﻤﺘﻨﻲ ﻋﻠﺊ ﺍﺳﻢ ﺣﻔﻴﺪﺗﻬﺎ ﺟﻮﻟﻴﺖ ...
ﺍﻟﻤﻬﻢ ﻛﺒﺮﻧﻪ ﻭﺍﻣﻲ ﺭﺑﺘﻨﻪ ﺑﻤﻲ ﻋﻴﻮﻭﻭﻧﻪ ﻭﺍﺑﻮﻳﻪ ﺭﻏﻢ ﻣﻌﺎﻕ ﺑﺲ ﻣﺴﺘﺤﻴﻞ ﺍﺗﺬﻛﺮ ﺑﻴﻮﻡ ﻗﺼﺮ ﻭﻳﺎﻧﻪ ... ﺑﺎﻟﻌﻜﺲ ﺭﻏﻢ ﺍﻋﺎﻗﺘﻪ ﺑﺲ ﻫﻮ ﻣﺪﻟﻠﻨﻪ ﻛﻮﻭﻟﺶ ﻫﻮﻭﺍﻳﻪ ...
ﺑﺲ ﻟﻼﺳﻒ ﺍﺧﻮﺍﻧﻲ ﺟﺎﻧﻮ ﻫﻤﻪ ﺍﻟﻲ ﻛﻠﻤﺘﻬﻢ ﻣﺎﺷﻴﻪ ﺑﺎﻟﺒﻴﺖ ﺭﻏﻢ ﻣﺎ ﻣﺌﺬﻳﻦ ﺍﻫﻠﻲ ﻭﺭﻏﻢ ﻳﺸﺘﻐﻠﻮﻥ ﺑﺲ ﺣﻴﻴﻞ ﻣﻀﻴﻘﻴﻦ ﻋﻠﻴﻪ ...
ﺭﺟﻌﺖ ﺍﻟﻮﺍﻗﻌﻲ ﻭﺍﻧﻲ ﻣﺤﺘﺎﺭﻩ ﺷﻨﻮ ﺍﺳﻮﻭﻱ ﻋﺸﺎ ﻭﺍﻟﻠﻪ ﺟﻨﺖ ﺭﻏﻢ ﻣﺎﻣﺎ ﻣﻌﺎﻗﻪ ﻭﺻﺤﺘﻬﺎ ﻋﻠﻰ ﻛﺪ ﺣﺎﻟﻬﺎ ﺑﺲ ﻣﺘﻘﺒﻞ ﺍﺷﺘﻐﻞ ﻫﻲ ﻧﻬﺎﺭ ﻛﻠﻪ ﺗﺸﺘﻐﻞ ...
ﺗﺎﻓﺌﻔﺖ ﺑﻘﻬﺮ ﻛﻠﺖ ... ﺧﻠﻲ ﺍﺭﻭﺡ ﺍﻟﺰﻭﺟﺔ ﺍﺑﻮﻫﻢ ﻣﺎﻣﺎ ﺭﺿﻴﻪ ﻫﺎﻱ ﺇﻧﺴﺎﻧﻪ ﺣﻴﻞ ﻃﻴﺒﻪ ﻭﺣﺒﺎﺑﻪ ﻭﺗﺤﺐ ﺍﻟﻜﻞ ﺑﻠﻜﻲ ﺗﻌﻠﻤﻨﻲ ﺷﻨﻮ ﺍﺳﻮﻱ ...
ﺩﺍ ﺍﻃﻠﻊ ﻣﻦ ﺍﻟﻤﻄﺒﺦ ﻟﻤﺤﺘﻪ ﻭﻫﻮ ﻳﻼﻋﺐ ﺑﺒﻨﺘﻪ ﺍﻟﺒﺎﻟﻐﻪ ﻣﻦ ﺍﻟﻌﻤﺮ ﺳﺒﻊ ﺳﻨﻮﺍﺕ ..
ﺍﺑﺘﺴﻤﺖ ﺑﺤﺐ ﺍﻟﻬﻢ ﻫﻤﺴﺖ ﺑﻤﺮﺡ ... ﺭﺑﻲ ﻳﺤﻔﻈﻬﺎ ﺍﻟﻚ ﻳﺎﺍﺍﺭﺏ ...
ﺷﺎﻟﻬﺎ ﺑﻴﻦ ﺍﺩﻳﻪ ﻭﻫﻮ ﻳﺒﻮﺳﻬﺎ ﺑﺨﺪﻫﺎ ﺍﻟﻨﺎﻋﻢ ... ﺷﻠﻮﻧﻬﺎ ﺑﻨﺖ ﺍﺑﻮﻫﺎ ﺷﻠﻮﻧﻬﺎ ﻏﺰﺍﻟﺔ ﺍﻟﺤﻠﻮﺓ ...
ﺑﺎﺳﺘﻪ ﺑﺨﺪﻩ ﻭﻫﻲ ﺗﺘﻌﻠﻖ ﺑﺮﮔﺒﺘﻪ ... ﺯﻳﻴﻨﻪ
ﺿﻤﻬﺎ ﺍﻟﺼﺪﺭﻩ ﺑﺤﻨﺎﻥ ﻭﻫﻲ ﺣﻀﻨﺘﻪ ﺑﻬﺪﻭﺀ ﻭﺍﻧﻲ ﺟﻨﺖ ﺻﺎﺍﺍﻓﻨﻪ ﻭﻫﺎﺍﻳﻤﻪ ﺑﻬﻞ ﻣﻨﻈﺮ ﺍﻟﺤﻠﻮ ...
ﺑﺎﻭﻋﻠﻲ ﺑﻄﺮﻑ ﻋﻴﻨﻪ ﻭﺩﺍﺭ ﻭﺟﻬﻪ ﻭﺑﻌﺪﻫﺎ ﺭﺟﻊ ﺑﺎﻭﻋﻠﻲ
ﺍﺑﺘﺴﻤﺖ ﺑﻮﺟﻬﻪ ﻭﻫﻮ ﺑﺎﺩﻟﻨﻲ ﺑﺒﺘﺴﺎﻣﻪ ﻫﺎﺩﺋﻪ ﻭﻛﺄﻧﻬﺎ ﺍﺑﺘﺴﺎﻣﺔ ﻣﺠﺎﻣﻠﺔ ...
ﺗﻘﺪﻡ ﺧﻄﻮﺍﺕ ﻣﻨﻲ ﻛﺎﻝ ... ﺷﺪﺳﻮﻭﻭﻳﻦ ؟
ﺑﻠﻌﺖ ﺭﻳﻜﻲ ﺑﺨﺠﻞ ... ﺩﺍ ﺍﺳﻮﻭﻭﻱ ﻋﺸﺎ
ﻋﻘﺪ ﺣﻮﺍﺟﺒﻪ ﺑﺘﺴﺎﺋﻞ ... ﻟﻴﺶ ﻣﺤﺪ ﺩﻳﺴﺎﻋﺪﺝ
ﺟﺎﻭﺑﺘﻪ ﺑﻨﻔﺲ ﺍﻟﺨﺠﻞ ﻭﺍﻧﻲ ﺍﻓﺮﻙ ﺑﺎﺻﺎﺑﻌﻲ ... ﺍﺀﺀ ﺗﻌﺮﻑ ﻭﻗﺎﺭ ﻣﺘﻜﺪﺭ ﻣﻦ ﺍﻳﺪﻫﺎ ﻭ ﻧﻮﺍﻝ ﻣﻠﺘﻬﻴﻪ ﺑﺒﻨﺎﺗﻬﺎ
ﺑﺎﻭﻉ ﻟﺒﻨﺘﻪ ﻭﺍﺑﺘﺴﻢ .... ﺍﻥ ﺷﺎﺀ ﺍﻟﻠﻪ ﻏﺰﻭﻟﻪ ﺑﺲ ﺗﻜﺒﺮ ﺗﺴﺎﻋﺪﺝ ﻣﻮ ﻫﻴﺞ ﺑﺎﺑﺎ
ﺿﺤﻜﺖ ﻭﺑﺎﺳﺘﻪ ﺑﺨﺪﻩ ... ﻻﺍﺍ ﻻﻥ ﻣﻦ ﺍﻛﺒﺮ ﺍﻧﺸﻐﻞ ﺑﺪﺭﺍﺳﺘﻲ ﻭ ﻭﻣﺎ ﺍﻛﺪﺭ ﺍﺳﺎﻋﺪﻫﺎ
ﺑﺎﺳﻬﺎ ﻭﺿﺤﻚ .. ﻣﺎ ﺧﻠﻴﺘﻠﻲ ﺣﻞ ﻋﻮﺩ ﺍﺟﻴﺒﻠﺠﻦ ﺑﻨﻜﻼﺩﻳﺸﻴﻪ ﺗﺴﺎﻋﺪﺟﻦ ...
ﺟﺎﻧﻮ ﻳﺤﺠﻮﻥ ﻭﺍﻧﻲ ﻣﺒﺘﺴﻤﻪ ..
ﻛﺎﻟﺖ ... ﺑﺎﺑﺎ ﺑﺎﺟﺮ ﻋﻨﺪﻱ ﺍﻣﺘﺤﺎﻥ ﺑﺠﺪﻭﻝ ﺍﻟﻀﺮﺏ ﻭ ﻋﻤﺘﻮ ﻭﻗﺎﺭ ﻣﺘﻘﺒﻞ ﺗﻘﺮﻳﻨﻲ ... ﺗﻘﺮﻳﻨﻲ ﺍﻧﺖ
ﺣﺠﻴﺖ ﺑﺼﻌﻮﺑﻪ ﻭﺣﺎﻭﻟﺖ ﺍﻛﻮﻥ ﻟﻄﻴﻔﻪ ... ﺑﺲ ﺍﺧﻠﺺ ﻋﺸﺎ ﺍﻧﻲ ﺍﻗﺮﻳﺞ ﺟﺎﻥ ﻛﻠﺘﻠﻲ ﻗﺒﻞ ﺷﻮﻳﻪ ﻣﺠﺎﻥ ﻋﻨﺪﻱ ﺷﺊ ...
ﺟﺮﺕ ﻧﻔﺲ ... ﻣﺎ ﺍﻋﺮﻑ ﻭﺍﻟﻠﻪ ﻣﺎ ﻛﻨﺖ ﺍﻋﺮﻑ ﺗﻌﺮﻓﻴﻦ ﺑﺎﻟﺠﺪﻭﻝ ...
ﺿﺤﻜﺖ ... ﻻ ﺷﻨﻮ ﺍﻟﺴﺎﻟﻔﻪ ﺍﻧﻲ ﺑﺎﻻﻋﺪﺍﺩﻳﻪ ﻭﺑﻄﻠﺖ ...
ﻫﻮ ﺟﺎﻭﺏ ﺑﻬﺪﻭﺀ ... ﻻ ﺍﻧﻲ ﺣﻘﺮﻳﻬﺎ ﻭﺍﻧﺘﻲ ﻛﻤﻠﻲ ﻋﺸﺎ ﻭﺻﻴﺤﻴﻠﻲ ...
ﻫﺰﻳﺖ ﺭﺃﺳﻲ ﺑﻘﺒﻮﻝ ...
ﺗﻼﺷﺖ ﺻﻮﺭﺗﻪ ﻣﻦ ﻛﺪﺍﻣﻲ ﺑﻌﺪ ﻣﺎ ﺭﺍﺡ ﻫﻮ ﻭﺑﻨﺘﻪ ...
ﻃﻠﻌﺖ ﺍﻧﻲ ﺍﻟﻤﻘﺴﻮﻡ ﺩﺍ ﺍﺳﻮﻱ ﻋﺸﺎ ... ﻫﻤﻪ ﺑﻴﻬﻢ ﻃﺒﻴﻌﻪ ﻣﻦ ﻳﺎﻛﻠﻮﻥ ﺍﻟﻬﻢ ﻭﻗﺖ ﻣﺤﺪﺩ ﻳﻌﻨﻲ ﻛﺬﺍ ﺳﺎﻋﻪ ﺍﻟﻌﺸﺎ ﻭﻛﺬﺍ ﺳﺎﻋﻪ ﺍﻟﻐﺪﺍ ...
ﻭﻻﺯﻡ ﺍﻟﻜﻞ ﻳﺠﺘﻤﻊ ﻭﺍﺑﻮﻫﻢ ﺍﺫﺍ ﻛﺎﻡ ﻣﻦ ﺍﻟﺴﻔﺮﻩ ﺍﻟﻜﻞ ﻳﻜﻮﻭﻡ ﻭﺍﻧﻲ ﻫﻞ ﻋﺎﺩﻩ ﻛﻮﻭﻟﺶ ﻣﻀﻮﺟﺘﻨﻲ ﻳﻌﻨﻲ ﺍﺣﺘﺮﺍﻡ ﺯﺍﻳﺪ ﻭﻣﺮﺍﺕ ﻟﺴﻪ ﻣﺎ ﺷﺒﻌﺖ ﻭﻛﻠﻬﺎ ﺭﺍﺣﺖ ﻏﺴﻠﺖ ﺍﺩﻳﻬﺎ ...
ﺍﺣﺲ ﻧﻔﺴﻲ ﻭﺟﻬﺔ ﻣﺎﻝ ﻣﺨﺪﻩ ﻭﻣﺸﺮﻭﺭ ﺍﻟﻮﺣﺪﻩ ﺑﺎﻟﺴﻄﺢ ...
ﻓﺎﻇﻄﺮ ﺍﻛﻮﻡ ﻭﻳﺎﻫﻢ ...ﺧﻠﻴﺖ ﺍﻟﻄﺎﻭﻩ ﻭﺍﻟﺰﻳﺖ ﺩﺍ ﺍﮔﻠﻲ ...
ﻣﺎ ﺍﺳﻤﻊ ﺍﻟﻪ ﺣﺮﻛﺔ ﻗﻮﻭﻭﻭﻳﻪ ﻭ ﻭﺍﺣﺪ ﻳﺪﻭﺭ ﺑﺪﺭﻭﺝ ﺍﻟﻜﺎﻭﻧﺘﺮ ...
ﺩﺭﺕ ﻭﺟﻬﻲ ﺷﻔﺘﻪ ﺟﻌﻔﺮ ﻳﺘﻤﺎﻳﻞ ﻭﺩﺍﻳﺦ ﻭﻳﻔﺘﺢ ﺑﺎﻟﺠﺮﺍﺭﺍﺕ ﺗﻔﺎﺟﺌﺖ ﻭﺑﻴﺪﺓ ﺑﻄﻞ ﻛﺰﺍﺯ ﺍﺧﻀﺮ ﻛﻠﺖ ... ﺷﺒﻲ ﻫﺬﺍ
ﺑﺎﻭﻋﻠﻲ ﺑﻨﻈﺮﻩ ﺣﺎﺍﺍﺍﺍﺩﻩ ﺑﻌﺪ ﻣﺎ ﺭﻓﻊ ﺍﻟﺴﺠﻴﻦ ﺑﻠﻌﺖ ﺭﻳﻜﻲ ﺑﺨﻮﻭﻑ ﺷﻜﻠﻪ ﻣﻮ ﻃﺒﻴﻌﻲ ﻭﻻ ﻧﻈﺎﻣﻲ ...
ﻭﺟﻬﻪ ﺍﺻﻔﺮ ﻭﺷﺎﺍﺍﺣﺐ ﺗﻘﺮﺏ ﻣﻨﻲ ﻭﻫﻮ ﻳﺘﺮﻧﺢ ﺑﻤﺸﻴﺘﻪ ﻭﻳﺘﻄﻮﻃﺢ ﻋﺎﺍﻁ ﺑﻌﺼﺒﻴﺔ .... ﻟﻚ ﻛﻮﻭﻭ ... ﻟﻚ ﺣﻴﻮﻭﻭﺍﻥ ﺍﻧﺖ ﺍﺻﻼ ﻛﻠﻚ ﻗﻨﺪﺭﻩ ﻣﺎ ﺍﻟﺒﺴﻚ ﺑﺮﺟﻠﻲ ... ﻭﺣﻠﻔﺖ ﺑﻌﺪ ﺳﻮﺍﻟﻔﻚ ﻭﻳﺎﻳﻪ ﺍﻟﻪ ﺍﻟﺒﺴﻚ ﻓﺴﺘﺎﻥ ﻭﻋﺒﺎﻳﻪ ﺑﺪﻝ ﺍﻟﺒﻨﻄﺮﻭﻥ ﻭﺍﻟﻌﮕﺎﻝ ...
ﺭﺟﻌﺖ ﺑﺨﻮﻭﻑ ﻭﺭﻫﺒﻪ ﻣﻨﻪ ﻭﻫﻮ ﺗﻘﺮﺏ ﻣﻨﻲ ﺍﻛﺜﺮ ﻭﻫﺠﻢ ﻋﻠﻴﻪ ﺑﺎﻟﺴﺠﻴﻴﻦ ...
ﺻﺮﺭﺧﺖ ﺑﺼﻮﻭﻭﺕ ﻋﺎﻟﻲ ﺻﺤﺖ .. ﻣﺎﺍﺍﺍﻣﺎﺍﺍ ...
ﺭﻛﻀﺖ ﻭﺍﻧﻲ ﺍﺣﻤﻲ ﻧﻔﺴﻲ ﻣﻨﻪ ﻭﻫﻮ ﺭﺟﻊ ﺑﺨﻄﻮﺍﺕ ﻏﻴﺮ ﻣﺘﺰﻧﻪ ﻭﺑﻌﺪﻩ ﻻﺯﻡ ﺍﻟﺴﺠﻴﻦ ﻫﻮ ﺳﻜﺮﺍﻥ ﻣﺎ ﻳﺪﺭﻱ ﺑﺮﻭﺣﺔ ﺑﺲ ﺍﻧﻲ ﺍﺧﺎﻑ ﺣﻴﻴﻞ ﺧﺎﺻﺔ ﻣﻦ ﻳﺸﺮﺏ ...
ﺷﻤﺮ ﺍﻟﺒﻄﻞ ﺍﻟﻜﺰﺍﺯ ﻋﻠﻴﺔ ﺑﺲ ﻣﺎ ﺍﺟﺔ ﺑﻴﺔ ﺍﻧﻀﺮﺏ ﺑﺎﻟﺠﺎﻡ ﻣﺎﻟﺖ ﺍﻟﻄﺒﺎﺥ ﻭﺗﻔﻠﺸﺖ ﺍﻟﺠﺎﻣﺔ ﻭﺍﻟﺒﻄﻞ
ﺭﺟﻌﺖ ﺻﺮﺧﺖ ﻣﺮﺓ ﺛﺎﻧﻴﺔ
ﺳﺤﺒﺖ ﻧﻔﺴﻲ ﺑﺨﻮﻑ ﻭﺗﻨﻔﺲ ﻣﻀﻄﺮﺏ ﺩﺍ ﺍﻃﻠﻊ ﺍﺟﺖ ﺗﺮﻛﺾ ﺭﺿﻴﺔ ﻭﺧﺎﻟﺘﻲ ﻭﻧﻮﺍﻝ ﻭﻗﺎﺭ ﻛﻠﻬﻢ ﺍﺟﻮﻭ ...
ﺷﺎﻓﻮﻭ ﻟﺰﻣﺘﻪ ﺧﺎﻟﺘﻲ ﻭﻣﺎﻣﺎ ﺭﺿﻴﻪ ﻭﻫﻲ ﺗﻀﺮﺑﻪ ... ﻋﺰﺍ ﺑﻌﻴﻨﻚ ﻳﺎ ﺍﺑﻮ ﺍﻟﻌﺮﮒ ﻭﻟﻚ ﻭﻳﻦ ﺍﺿﻤﻚ ﻭﺍﺧﻮﺗﻚ ﻣﻮﺟﻮﺩﻳﻦ ...
ﺩﻓﻌﺘﻪ ﺍﻣﻪ ﻋﻠﺊ ﻣﺎﻣﺎ ﺭﺿﻴﺔ ﻭﻫﻲ ﺩﻛﻠﻬﺎ ... ﺿﻤﻲ ﺑﻐﺮﻓﺘﺞ ﺧﻴﺔ ﺭﺿﻴﻪ ﻻ ﺟﺎﺳﺮ ﻭﺻﻼﺡ ﻳﻤﻮﺗﻮ ﺭﺑﺞ ﻓﻼﺡ ﻣﻮ ﻫﻨﺎ ... ﻭﺍﻟﺤﺠﻲ ﻣﻮ ﻫﻨﺎ
ﺳﺤﺒﺘﻪ ﻣﺎﻣﺎ ﺭﺿﻴﺔ ﻭﺍﺧﺬﺗﻪ ﻭﺍﻧﻲ ﺍﺑﺠﻲ ﻭﺍﺭﺟﻒ ...
ﺧﺎﻟﺘﻲ ﺑﺎﻭﻋﺘﻠﻲ ﻛﺎﻟﺖ ... ﻫﺎﺍﺍﺍ ﺳﻮﺍﻟﺞ ﺷﺊ ؟
ﻫﺰﻳﺖ ﺭﺍﺳﻲ ﺑﻨﻔﻲ ﻭﺍﻧﻲ ﺍﻣﺴﺢ ﺩﻣﻮﻋﻲ ﻫﻤﺴﺖ ﺑﺼﻌﻮﺑﺔ ... ﻻ ﻻ ﻣﺎ ﺳﻮﺍﻟﻲ ﺷﺊ ﺭﺑﺞ ﺳﺘﺮ
ﺟﺎﺳﺮ ﺻﺎﺡ ... ﺷﻜﻮﻭﻭ ﻟﻴﺶ ﻫﺎﻱ ﺍﻟﺨﺒﺼﺔ ﻭﻣﻨﻮﻭﻭ ﻋﺎﻃﺖ ..
ﻃﻠﻌﻨﻪ ﻛﻠﻨﻪ ﻣﻦ ﺍﻟﻤﻄﺒﺦ ﻭﺍﻧﻲ ﻟﺴﺔ ﺍﺑﺠﻲ ﻭﻫﻮ ﺑﺎﻭﻋﻠﻲ ﻭﻋﻘﺪ ﺣﻮﺍﺟﺒﻪ ﺑﺎﺳﺘﻐﺮﺍﺏ ﻭﺗﺴﺎﺅﻝ ...
ﻃﻠﻌﺖ ﻣﺎﻣﺎ ﺭﺿﻴﺔ ﻣﻦ ﻏﺮﻓﺘﻬﺎ ﺑﺎﻭﻋﺘﻠﺔ ﻛﻠﺘﻠﻬﺎ ﺑﻀﺤﻜﻪ ﻭﻫﻲ ﻣﺒﻴﻦ ﻋﻠﻴﻬﺎ ﺍﻟﺘﻮﺗﺮ ... ﻫﺎﺍﺍ ﻳﻤﻤﻪ ﻋﺘﻮﻱ ﻛﻤﺰ ﻋﻠﺊ ﺟﻮﻟﻴﺖ ﻭﺗﺨﺒﻠﺖ ﻣﺎ ﺗﻌﺮﻓﻬﺎ ﻣﺮﻳﺘﻚ ﻣﺎﻳﻌﺔ ﻭﺩﻟﻮﻋﺔ ...
ﺟﺮ ﻧﻔﺲ ... ﺍﻱ ﻋﺘﻮﻭﻱ ﺳﻜﺮﺍﻥ ﻭﻃﺎﮔﻠﺔ ﺑﻄﻞ ﻋﺮﮒ ﻣﻮﻭ
ﺭﺩﺕ ﺑﻔﺸﻠﺔ ... ﻫﻬﻪ ﻻ ﻳﻤﻤﻪ ﺷﺴﺎﻟﻔﺔ ﺟﻌﻔﺮ ﻟﺤﺪ ﺍﻻﻥ ﻣﺎ ﺍﺟﻪ ﻃﺎﻟﻊ ... ﻭﻫﻮ ﺑﻄﻞ ﺑﻌﺪ ﻣﺎ ﻳﺸﺮﺏ ﻭﻳﺴﻜﺮ ﺗﺎﺏ ﻣﻦ ﻳﻮﻡ ﺍﻟﻜﺴﺮﺓ ﺍﺑﻮﻭﻙ ﺑﺎﻟﺒﻮﺭﻱ ﺍﻟﺤﺪﻳﺪ ...
ﻫﺰ ﺭﺍﺳﺔ ﺑﺎﺳﺊ ... ﺟﻌﻴﻔﺮ ﻣﺎ ﺗﺼﻴﺮ ﺍﻟﻪ ﺟﺎﺭﺓ ﻟﻮ ﺇﺑﻠﻴﺲ ﻳﺠﻲ ﺑﺠﻜﺴﺎﺭﺓ .. ﺗﻌﻠﻤﻴﻨﻲ ﺑﻲ ...
ﻫﻮ ﻃﻠﻊ ﻣﻦ ﺍﻟﻐﺮﻓﺔ ﻭﻳﻀﺤﻚ ﺑﺎﺳﺘﻬﺰﺍﺀ ﻭﻳﺘﻤﺎﻳﻞ ﺑﺨﻄﻮﺍﺗﺔ ... ﻫﻪ ﻫﺬﺍ ﻣﻢ ﻣﻨﻮﻭ ﻣﺎ ﻣﺘﺼﻴﺮﻟﻪ ﺟﺎﺍﺍ ﺟﺎﺭﻩ ﻫﺎﺍﺍ
ﺟﺎﺳﺮ ﻫﺰ ﺭﺍﺳﺔ ﺑﺎﺳﺊ ﻭﻫﻮ ﻳﻘﺒﺾ ﻋﻠﺊ ﺍﻳﺪﺓ .... ﻫﻢ ﺳﻜﺮﺍﻥ ﻭﺍﻟﻠﻪ ﺍﻟﻌﻈﻴﻢ ﺍﻟﻴﻮﻡ ﺍﺫﺍ ﻣﺎ ﺧﻠﻴﺖ ﺻﻮﺗﻚ ﻳﻮﺻﻞ ﺍﻟﺴﺎﺑﻊ ﺟﺎﺭ ﻣﺎ ﺍﻃﻠﻊ ﺟﺎﺳﺮ
ﻫﺠﻢ ﻋﻠﻴﻪ ﺑﻌﻨﻒ ﻭﻫﻮ ﻳﻠﺰﻣﺔ ﻣﻦ ﻳﺎﺧﺘﻪ ﺍﻭﻝ ﻣﺎ ﻫﺠﻢ ﻋﻠﻴﺔ ﺿﺮﺑﻪ ﺑﺒﻮﻛﺲ ﻋﻠﺊ ﻭﺟﻬﻪ ﻛﻮﻣﺔ ﺑﺎﻟﻜﺎﺍﻉ ...
ﻭﻃﺎﺣﻠﺔ ﺿﺮﺑﺎﺕ ﻭﺑﻮﻛﺴﻴﺎﺕ ﺍﻣﻪ ﺭﻛﻀﺖ ﻟﺰﻣﺘﻪ ﻭﻣﺎﻣﺎ ﺭﺿﻴﺔ . ﺑﺲ ﻫﻮ ﺍﻧﻬﺎﻝ ﻋﻠﻴﺔ ﺑﻜﻞ ﻗﺴﻮﺓ
ﻭﺫﺍﻙ ﺿﻌﻴﻒ ﻭﺳﻜﺮﺍﻥ ﻓﻠﺶ ﻭﺟﻬﻪ ﺗﻔﻠﺶ ...
ﻧﺰﻝ ﺣﻤﺎﻳﺔ ﺍﻟﺜﺎﻧﻲ ﺻﻼﺡ ﻳﺮﻛﺾ ﻣﻦ ﻓﻮﻙ ﺭﻛﻀﺖ ﻋﻠﻴﻪ ﺍﻣﻪ ﻭﻫﻮ ﺗﺘﻮﺳﻞ ﺑﻲ ... ﻳﻤﻪ ﻓﺪﻭﻭﺓ ﺍﻟﺤﻚ ﺍﻟﺠﺎﺳﺮ ﺭﺍﺡ ﻳﻤﻮﺕ ﺟﻌﻔﺮ ﻣﻦ ﺍﻟﻜﺘﻞ ﻳﻤﻤﻪ ﻣﻮﻭﻭﺗﻪ ﻭﻟﺪ ﺳﻜﺮﺍﻥ ﻣﺎ ﻳﺪﺭﻱ ﺑﺮﻭﺣﻪ ...
ﺍﺟﻪ ﺻﻼﺡ ﺍﻧﻮﺏ ﺍﺷﻮ ﻫﺬﺍ ﻟﺰﻡ ﺟﻌﻔﺮ ﻭﻃﺎﺣﻠﺔ ﺭﻓﺴﺎﺕ ...
ﺧﺎﻟﺘﻲ ﺳﺤﺒﺖ ﻛﺎﺳﺮ ﺑﻐﻀﺐ ... ﻛﺎﺍﺍﻓﻲ ﻭﻟﻜﻢ ﺷﻨﻮ ﻣﺠﺮﻡ ﻭ ﻭﮔﻊ ﺑﻴﺪﻛﻢ ﺣﺮﺍﻡ ﻋﻠﻴﻜﻢ
ﻫﻮ ﻋﺎﻁ ﺑﻮﺟﻬﻬﺎ ﺑﻐﻀﺐ ﻣﻜﺘﺴﺢ ﻣﻼﻣﺤﺔ ... ﺣﺮﺍﻡ ﻋﻠﻴﻨﺔ ﻣﻮﻭﻭ ؟؟ ﺍﺣﻨﻪ ﻭﻟﺪ ﺷﻴﺦ ﻣﻬﻴﻮﺏ ﺍﻟﻌﻠﻲ ﻫﺬﺍ ﺟﻌﻴﻔﺮ ﺗﺎﻟﻲ ﻋﻤﺮ ﻳﺨﻠﻲ ﺳﻤﻌﺘﻨﻪ ﺑﺎﻟﻄﻴﻦ ...
ﻭﻫﻢ ﻣﻴﺨﺎﻟﻒ ﻗﻨﺪﺭﺓ ﻋﻠﺊ ﺳﻤﻌﺘﻨﻪ ﺍﻟﺴﻜﺮﺍﻥ ﻣﺜﻞ ﺍﻟﺰﺍﻧﻲ ... ﻳﻮﻣﻴﺔ ﺟﺎﻱ ﺳﻜﺮﺍﻥ ﻭﻳﺘﻄﻮﻃﺢ ﺑﻨﺺ ﺍﻟﺸﺎﺭﻉ ﻭﺍﻟﻌﺎﻟﻢ ﺗﺒﺎﻭﻉ ﻋﻠﻴﺔ ...
ﻫﻢ ﻏﺎﺿﺐ ﺭﺑﻪ ﻭﻫﻢ ﻏﺎﺿﺒﻨﺔ ... ﻭﺍﻟﻠﻪ ﻭﺍﻟﻠﻪ ﻋﻠﺊ ﻳﻮﻡ ﺍﺣﻂ ﻃﻠﻘﺔ ﺑﺮﺍﺳﺔ ﻭﺍﻛﺘﻠﺔ ... ﻭﺍﺭﺗﻜﺐ ﺑﻲ ﺟﺮﻳﻤﺔ
ﻭﺑﻌﺪﻫﺎ ﻛﻤﻞ ﺑﻌﺼﺒﻴﺔ ﻭﺗﻬﺪﻳﺪ ... ﻻ ﻭﺍﻟﻠﻪ ﻟﻴﺶ ﺍﻛﺘﻠﻪ ﻟﻬﻞ ﻋﺎﺭ ﺍﻛﺴﺮﺓ ﻭﺍﺧﻠﻲ ﻋﺒﺮﺓ ﻟﻤﻦ ﻳﻌﺘﺒﺮ ...
ﻭﻟﻚ ﺣﻴﻮﺍﻥ ﺷﻜﺪ ﺳﺎﻓﺮﺕ ﻭﻃﻠﻌﺖ ﻭﻓﺮﻳﺖ ﺩﻭﻭﻝ ﻣﺎ ﻳﻮﻡ ﻣﻦ ﺍﻻﻳﺎﻡ ﺷﺮﺑﺖ ﻭﻫﻮ ﻛﻠﺔ ﺿﺎﻝ ﻛﺪﺍﻣﻨﻪ
ﻭﺍﻧﺖ ﺗﻄﻠﻊ ﺳﺎﻋﺔ ﺗﺠﻴﻨﻪ . ﺳﻜﺮﺍﻥ ﺍﺩﺑﺴﺰ ﻭﺍﻟﻠﻪ ﻭﺍﻟﻠﻪ ﺑﺎﺟﺮ ﺣﺴﺎﺑﻚ ﻋﺴﻴﺮ ﺍﻻﻥ ﻫﺴﺔ ﺷﺤﺠﻲ ﻣﺎ ﻳﺎﺛﺮ ﺑﻴﻚ ﻋﻘﻠﻚ ﺻﺎﻳﺮ ﻣﺜﻞ ﺍﻟﺘﻨﻜﺔ
ﻫﻮ ﺟﺎﻥ ﻛﺎﻋﺪ ﻭﻣﻨﺰﻝ ﺭﺍﺳﻪ ﻭﺍﻟﺪﻡ ﻳﻨﺰﻑ ﻣﻨﻪ ﻭﺧﻄﻴﻪ ﻣﺎﻣﺎ ﺭﺿﻴﺔ ﺗﻤﺴﺢ ﺑﺨﺸﻤﺔ ﻭﺷﻔﺘﻪ ...
ﺭﺟﻊ ﺟﺎﺳﺮ ﺑﺎﻭﻉ ﺍﻟﺼﻼﺡ ﻛﻠﻪ ﺑﺠﻤﻮﺩ ... ﺍﺧﺬﻩ ﻏﺴﻠﺔ
ﻧﻄﻖ ﺍﺧﺮ ﻛﻠﻤﺘﻴﻦ ﻭﺭﺍﺡ ﻟﻠﻐﺮﻓﺔ ...
ﻭﺍﻧﻲ ﻣﺪﺭﻱ ﺷﺒﻴﺔ ﺻﺎﺭﺕ ﻋﻨﺪﻱ ﺭﺟﻔﻪ ﻣﻮ ﻃﺒﻴﻌﺔ ﺣﻴﻞ ﺍﺧﺎﻑ ﻣﻦ ﻳﺠﻲ ﺟﻌﻔﺮ ﺳﻜﺮﺍﻥ ﻭﻳﻜﺘﻠﻪ ﺟﺎﺳﺮ ﻟﻮ ﺻﻼﺡ ﻟﻮ ﻓﻼﺡ ...
ﻭﻳﻜﻮﻟﻮﻥ ﺣﺘﺊ ﻋﻤﻮ ﻣﻦ ﻳﻠﺰﻣﺔ ﻳﻤﻮﺗﻪ ﻛﺘﻞ ﺍﺫﺍ ﺷﺎﻓﻪ ﺳﻜﺮﺍﻥ ...
ﻣﺮﺓ ﺳﻮﻟﻔﺖ ﻧﻮﺍﻝ ﺩﻛﻮﻝ ﺍﻟﺸﻴﺦ ﻣﻬﻴﻮﺏ ﻣﺮﺓ ﺷﺎﻓﻪ ﺳﻜﺮﺍﻥ ﺧﻼﻩ ﺻﺤﻪ ﻳﺎﻟﻠﻪ ﻛﺘﻠﺔ ﺣﺘﺊ ﻳﺤﺲ ﺑﺎﻟﻮﺟﻊ ...
ﺩﻛﻮﻝ ﻛﺴﺮﻩ ﺗﻜﺴﺮ ﺑﺒﻮﺭﻱ ﻣﺎﻟﺖ ﺍﻟﻤﺮﺟﻮﺣﺔ ﺧﻠﻪ ﺩﻣﺔ ﺑﻄﻮﻟﺔ ﺑﺲ ﻫﻮ ﺍﺑﺪ ﻣﺎ ﻳﺘﻮﺏ ...
ﻭﺩﻛﻮﻝ ﻣﺮﺓ ﺧﻼﻩ ﺑﻴﻦ ﺍﻟﻘﻨﻔﺎﺕ ﻭﺣﺼﺮ ﺭﺍﺳﺔ ﺑﻴﺪﺍﺕ ﺍﻟﻘﻨﻔﺔ ﺍﻟﻀﺨﻤﺔ ﻭﻛﺎﻝ ﺟﻴﺒﻮ ﺳﺠﻴﻦ ﺍﺫﺑﺤﻪ ﻫﻞ ﻋﺎﺭ
ﻭﺩﻛﻮﻝ ﺟﺎﻥ ﺍﻟﻤﻮﻗﻒ ﻳﻬﺰ ﺍﻻﺑﺪﺍﻥ ﺑﺤﻴﺚ ﻛﻠﻨﻪ ﺿﻠﻴﻨﻪ ﻧﺒﺠﻲ ﻭﻧﺘﻮﺳﻞ ﺑﺎﻟﺸﻴﺦ ﻣﻬﻴﻮﺏ ﻭﻫﻮ ﻣﺎ ﺍﻫﺘﻢ ﺍﻟﻜﻼﻣﻨﻪ
ﻭﺟﻌﻔﺮ ﺭﻏﻢ ﺧﻮﻓﻪ ﺑﺲ ﻣﺎ ﻳﺤﻂ ﻋﻴﻨﻪ ﺑﻌﻴﻦ ﺍﺑﻮﺓ ﻭﺟﺎﻥ ﻛﺎﻋﺪ ﻣﺜﻞ ﺍﻻﺳﻴﺮ ﻋﻨﺪ ﺍﻟﻌﺪﻭ
ﻭﺍﺧﻮﺍﻧﻪ ﺟﺎﻧﻮ ﻭﺍﻛﻔﻴﻦ ﻣﺤﺪ ﻣﻨﻬﻢ ﺗﺤﺮﻙ ﻻﻥ ﻳﺮﺩﻭﻥ ﻳﻨﺼﻠﺢ ﺣﺎﻟﺔ ﻭﻫﻮ ﺍﺑﺪ ﻣﺎ ﻳﻨﺼﻠﺢ ﺭﻏﻢ ﺍﻟﻜﺘﻞ ﻭﺍﻟﻤﺬﻟﺔﻭﻣﺎ ﻋﺎﻓﻪ ﺍﺑﻮﻫﻢ ﺍﻟﺸﻴﺦ ﻣﻬﻴﻮﺏ ﺍﻟﻪ ﻟﻤﻦ ﺍﺟﺖ ﺑﻨﺘﻪ ﻭﻗﺎﺭ ﺍﺧﺘﻬﻢ ﻭﺣﻀﻨﺖ ﺍﺑﻮﻫﺎ ﺑﺤﻨﺎﻥ ﻭﺗﺒﺠﻲ ﻭﺗﻄﻠﺐ ﻣﻦ ﺍﺑﻮﻫﺎ ﻳﻌﻮﻑ ﺍﺧﻮﻫﺎ ...
ﻓﺎﺟﺌﻨﻪ ﻣﻦ ﺣﻀﻦ ﻭﻗﺎﺭ ﻭﺑﺎﺳﻬﺎ ﻭﺿﻤﻬﺎ ﺍﻟﺼﺪﺭﻩ ﻭﻛﻠﻬﺎ ... ﺍﻟﺨﺎﻃﺮ ﻫﻞ ﺍﻟﻌﻴﻮﻥ ﻳﺎ ﺑﻮﻳﺔ ﺭﺍﺡ ﺍﻋﻮﻭﻓﻪ
ﻭﺭﺟﻊ ﻟﺰﻡ ﺟﻌﻔﺮ ﻃﻠﻌﻪ ﻣﻦ ﺑﻴﻦ ﺍﻟﻘﻨﻔﺎﺕ ﻭﻟﺰﻣﺔ ﺑﻮﻋﻴﺪ ﻭﺟﻬﻪ ﻣﺤﺘﻘﻦ ﻣﻦ ﺍﻟﻐﻀﺐ ﻭﻛﻠﺔ ... ﻭﺍﻟﻠﻪ ﻫﺎﻱ ﺍﺧﺮ ﻣﺮﺓ ﻣﺮﺓ ﺛﺎﻧﻴﺔ ﻻ ﺍﻣﻚ ﺗﺸﻔﻊ ﺍﻟﻚ ﻭﻻ ﻭﻗﺎﺭ ...
ﻋﻤﻮ ﺣﻴﻴﻞ ﻳﺤﺐ ﻭﻗﺎﺭ ﻭﻳﻤﻴﺰﻫﺎ ﻋﻦ ﺍﻟﻜﻞ ﻭﻫﻲ ﻓﻌﻠﺔ ﻣﺜﻞ ﺍﻟﻨﺴﻤﺔ ﺍﻟﺒﺎﺭﺩﺓ ﻭﻫﺎﺩﺋﺔ ﺣﻴﻴﻞ
ﻭﺩﺍﺋﻤﺎ ﻳﻨﻘﻬﺮ ﻋﻠﻴﻬﺎ ﻻﻥ ﺧﻄﻴﺔ ﻫﻲ ﻋﻨﺪﻫﺎ ﻋﺎﻫﻪ ﺑﻴﺪﻫﺎ ﺍﺻﺎﺑﻌﻬﺎ ﻣﻜﻄﻤﺔ ﻭﺩﻭﻡ ﻻﻓﺘﻬﺎ ﺑﻠﻔﺎﻑ ﻃﺒﻲ .. ﻓﻘﺪﺕ ﺃﺻﺎﺑﻌﻬﺎ ﺑﺤﺎﺩﺙ ...
ﺍﺧﺬﻩ ﺻﻼﺡ ﻭﻫﻮ ﻳﻮﻥ ﺭﺍﺡ ﻏﺴﻠﻪ ﻭﺍﺧﺬﺓ ﺍﻟﻐﺮﻓﺘﻪ ﻭﺑﻌﺪﻫﺎ ﺍﻧﻲ ﺭﺣﺖ ﺍﻛﻤﻞ ﺍﻟﻌﺸﺎ ...
ﺣﺴﻴﺖ ﻧﻔﺴﻲ ﻟﻌﺒﺖ ﻣﻦ ﺍﻻﻛﻞ ﻛﻮﺓ ﺻﺒﺮﺕ ﻧﻔﺴﻲ ﻣﺎ ﺍﺗﻘﻴﺊ ...
ﺭﻛﻀﺖ ﻟﻠﺴﻨﻚ ﺣﺎﻭﻟﺖ ﺍﺗﻘﻲﺀ ﺑﺲ ﻣﻜﺪﺭﺕ ﺣﻄﻴﺖ ﺍﺩﻳﺔ ﻋﻠﺊ ﻭﺟﻬﻲ ﻭﺑﺠﻴﺖ .. ﺍﺭﻳﺪ ﺍﻣﻲ ﺍﺭﻳﻴﺪ ﺍﻣﻲ ﺗﻌﺒﺖ ..
ﻛﻠﺔ ﺑﺴﺒﺐ ﻫﺎﻟﺔ ﺍﻟﺤﻴﻮﻭﻭﺍﻧﺔ ﻫﻲ ﺍﻟﻲ ﺧﻠﺖ ﺍﻫﻠﻲ ﻳﻨﻬﺎﺭﻭﻥ ﻋﻠﻴﺔ ﻭﺍﻣﻲ ﺗﺰﻭﺟﻨﻲ ﻻﺑﻦ ﺍﺧﺘﻬﺎ ﺑﺲ ﻻﻥ ﺧﺎﻳﻔﺔ ﻋﻠﻴﺔ ﻣﻦ ﺍﺧﻮﺍﻧﻲ ..
ﺧﻠﺼﺖ ﺍﻟﻌﺸﺎ ﻭﺣﻀﺮﺗﻪ ﺑﺎﻻﺳﺘﻘﺒﺎﻝ ﺑﻌﺪ ﻣﺎ ﻓﺮﺷﺖ ﺍﻟﺴﻔﺮﺓ ...
ﻃﻠﻌﺖ ﺷﻔﺖ ﺣﻤﺎﻳﺔ ﺍﻟﻜﺒﻴﺮ ﻓﻼﺡ ﺯﻭﺝ ﻧﻮﺍﻝ ﺩﺧﻞ ﺑﺎﻭﻋﻠﻲ ﻭﺿﺤﻚ ﺑﻴﺪﺓ ﻋﻼﮔﺔ ﻣﺒﻴﻦ ﺑﻴﻬﺎ ﻓﻠﻮﻭﺱ ﻻﻥ ﻋﺒﺎﻟﻚ ﻧﻔﺲ ﺍﻟﺒﻠﻮﻛﺎﺕ
ﻛﺘﻠﺔ ... ﺍﻟﻠﻪ ﻳﺴﺎﻋﺪﻙ ﺧﻮﻳﺔ
ﺿﺤﻚ ﻛﺎﻝ ... ﻫﻼ ﺑﻴﺞ ﺟﻨﺖ ﻋﻨﺪ ﺍﻫﻠﺞ ﻭﻳﺴﻠﻤﻮﻥ ﻋﻠﻴﺞ
ﺑﺎﻭﻋﺘﻠﺔ ﺑﺎﺳﺊ ﻭﻓﺮﺣﺔ ... ﺻﺪﻙ ﺟﻨﺖ ﻋﻨﺪ ﺍﻫﻠﻲ .. ﺍﻣﻲ ﺷﻠﻮﻧﻬﺎ ﺍﺑﻮﻳﺔ ﻭﺍﺧﻮﺍﻧﻲ ﺷﻠﻮﻧﻬﻢ ﻫﻢ ﺳﺎﻟﻮ ﻋﻨﻲ ﻟﻮ ﻻ
ﺍﺑﺘﺴﻢ ﺑﻬﺪﻭﺀ ... ﺍﻱ ﺳﺎﻟﻮ ﻭﺍﻥ ﺷﺎﺀ ﺍﻟﻠﻪ ﺍﻣﺞ ﺗﺠﻴﺞ ﺑﻬﻞ ﻳﻮﻣﻴﻦ ﻭﺍﺑﻮﺝ ﺩﺯﻟﺞ ﺳﻼﻡ ﺧﺎﺹ ...
ﺣﻀﻨﺖ ﻧﻔﺴﻲ ﺑﻘﻬﺮ ﻭﺣﺰﻥ ... ﻳﻌﻤﺮﻱ ﻣﺸﺘﺎﻗﺘﻠﻬﻢ ﻭﺍﻟﻠﻪ ﺍﻣﻲ ﺣﺒﻴﺒﺘﻲ ﺳﻮﺩﺓ ﻋﻠﻴﺔ ﻣﻴﺘﺔ ﻋﻠﺊ ﺷﻮﻓﺘﻬﺎ ...
ﺍﺑﺘﺴﻤﺖ ... ﻳﺎﻟﻠﻪ ﺻﻴﺢ ﺯﻭﺟﺘﻚ ﻭﺑﻨﺎﺗﻚ ﻭﺗﻌﺎﻟﻮ ﺗﻌﺸﻮ
ﺿﺤﻚ ﻭﺧﻠﺔ ﻭﺭﺍﺡ ... ﻫﺬﺍ ﺣﻤﺎﻳﺔ ﺍﻟﻜﺒﻴﺮ ﻣﺘﺰﻭﺝ ﻧﻮﺍﻝ ﻭﻋﻨﺪﺓ 3 ﺑﻨﺎﺕ ﻣﻨﻬﺎ ﻭﻫﻲ ﺣﺎﻟﻴﺎ ﺣﺎﻣﻞ ﻋﻠﻴﻬﺎ ﺳﺒﻊ ﺍﺷﻬﺮ ﺑﺲ ﻣﺎ ﺩﻛﻮﻝ ﺷﻨﻮ ﺑﻴﻬﺎ ﻭﻟﺪ ﺍﻭ ﺑﻨﻴﺔ ﻛﻞ ﻣﺎ ﺗﺎﺧﺬ ﺳﻮﻧﺎﺭ ﺩﻛﻮﻝ ﻣﻤﺒﻴﻦ ...
ﺑﺲ ﺍﺳﺘﻐﺮﺑﺖ ﺷﻌﺠﺐ ﺩﻳﺮﻭﺡ ﺍﻻﻫﻠﻲ ﻫﻢ ﺍﺑﺒﺪ ﻣﺠﺎﻧﻮﺍ ﻳﺠﻮﻧﻪ ﺷﻌﻨﺪﻩ ﻭﻳﺔ ﺍﻫﻠﻲ ﻭﻛﻞ ﺷﻮﻳﻪ ﻭﺭﺍﺡ ﺍﻟﻬﻢ
ﻭﺍﻧﻲ ﻫﻤﺎﺗﻴﻦ ﺭﺣﺖ ﻟﻐﺮﻓﺘﻲ ﺭﻏﻢ ﻫﻮ ﺯﻭﺟﻲ ﺑﺲ ﺍﻧﻲ ﺣﻴﻞ ﺍﺗﺮﺩﺩ ﻣﻨﻪ ﻭﺍﻧﻬﺒﻂ ﻣﻦ ﺍﺷﻮﻓﻪ ﺭﻏﻢ ﻭﺍﻟﻠﻪ ﻫﻮ ﺍﺑﺪ ﻣﺎ ﻣﺎﺫﻳﻨﻲ ﻭﻳﺤﺘﺮﻣﻨﻲ ﺣﻴﻞ ...
ﺑﺲ ﺗﺼﺮﻓﺎﺗﺔ ﻭﺍﺳﻠﻮﺑﺔ ﺍﻟﻬﺎﺩﺉ ﻳﺨﻠﻴﻨﻲ ﻫﻮﺍﻳﺔ ﺍﺗﺮﺩﺩ ﻭﺍﺧﺎﻑ ﻣﻨﻪ
ﻭﻫﻤﺎﺗﻴﻦ ﻫﻮﻭﺍﻳﺔ ﺍﺧﺎﻑ ﻣﻨﻪ ﻣﻦ ﻳﻬﺪﺩ ﺟﻌﻔﺮ ﻭﻳﻜﺘﻠﺔ ﺣﻴﻴﻞ ﺍﺧﺎﻑ ﻳﻌﻨﻲ ﻣﻌﻘﻮﻟﺔ ﻳﻜﺘﻞ ﺍﺧﻮﻭ ﻭﻳﺤﻠﻒ ﻳﻀﺮﺑﺔ ﻃﻠﻘﺔ ﻭﻳﻤﻮﺗﺔ ...
ﺩﺧﻠﺖ ﺑﺘﺮﺩﺩ ﻭﺍﺑﺘﺴﻤﺖ ﺑﻬﺪﻭﺀ ﺷﻔﺘﻪ ﻣﻤﺘﺪ ﻋﻠﺊ ﺍﻟﺠﺮﺑﺎﻳﺔ ﻭﻳﻘﺮﻱ ﺑﺒﻨﺘﺔ
ﺗﺤﻤﺤﻤﺖ ﺑﺨﺠﻞ ﻫﻮ ﺑﺴﺮﻋﺔ ﺑﺎﻭﻋﻠﻲ ﺑﺲ ﻣﺤﺠﺔ ﺷﺊ
ﺟﺮﻳﺖ ﻧﻔﺲ ﺧﺠﻮﻝ .. ﻳﺎﻟﻠﺔ ﻛﻤﻞ ﺍﻟﻌﺸﺎ ﺗﺠﻲ ﺗﺘﻌﺸﺎ
ﻫﻮ ﻋﺪﻝ ﻛﻌﺪﺗﻪ ﻭﺟﻤﻊ ﻛﺘﺐ ﺑﻨﺘﺔ ﻛﻠﻬﺎ ... ﻳﺎﻟﻠﺔ ﺣﺒﻴﺒﺘﻲ ﺧﻠﻴﻨﺔ ﻧﺮﻭﺡ ﻧﺘﻌﺸﺎ ﻭﺑﻌﺪﻫﺎ ﻧﻜﻤﻞ
ﻫﺰﺕ ﺭﺍﺳﻬﺎ ﺑﻘﺒﻮﻝ ﻭﻧﺰﻟﺖ ﻣﻦ ﺍﻟﺠﺮﺑﺎﻳﺔ ﻟﺰﻣﺘﻪ ﻣﻦ ﺍﻳﺪﺓ ﻭﻃﻠﻌﻮ ﻛﺪﺍﻣﻲ ...
ﻳﺎﻟﻠﺔ ﺷﻜﺪ ﻣﺘﻌﻠﻖ ﺑﻬﻞ ﻃﻔﻠﺔ ﻭﻫﻲ ﻣﺘﻌﻠﻘﺔ ﺑﻲ ﻳﻤﻜﻦ ﻳﺤﺐ ﺍﻣﻬﺎ ﻫﻮﻭﻭﺍﻳﺔ ﻟﺬﻟﻚ ﻫﻮ ﻣﺘﻌﻠﻖ ﺑﺒﻨﺘﻬﺎ ...
ﺭﺣﻨﻪ ﻛﻠﻬﺎ ﺍﺟﺘﻤﻌﺖ ﺗﺎﻛﻞ ﺑﺲ ﺟﻌﻔﺮ ﻣﺎ ﺍﺟﺔ ...
ﻓﻼﺡ ﻛﺎﻝ ... ﺷﻨﻮ ﺟﻌﻔﺮ ﺍﺷﻮﻭ ﻣﺎﻛﻮﻭ ﺧﺎﺑﺮﻭ ﻳﺠﻲ ﻳﺘﻌﺸﺎ ..
ﺟﺎﺳﺮ ﺟﺎﻭﺑﻪ ﺑﻬﺪﻭﺀ ﻭﻫﻮ ﻳﺎﻛﻞ ﺑﺪﻭﻥ ﻣﺎ ﻳﺮﻓﻊ ﻋﻴﻨﺔ ... ﻋﻮﻭﻓﻲ ﺧﻠﻲ ﻳﻮﻟﻲ ﻻ ﺗﺨﺎﺑﺮﺓ
ﻓﺰ ﻓﻼﺡ ﻣﻦ ﻳﻤﺔ ﺑﻐﻀﺐ ... ﻟﻴﺶ ﺍﺟﺔ ﺳﻜﺮﺍﻥ؟
ﻣﺤﺠﻮ ﺍﻟﻮﻟﺪ ...
ﺟﺎﻥ ﻓﻼﺡ ﺩﻓﻊ ﺍﻟﺼﺤﻦ ﻭﻭﻛﻒ ﻣﺘﻌﺼﺐ ﺧﻄﻴﺔ ﻣﺎﻣﺎ ﺭﺿﻴﺔ ﻭﺧﺎﻟﺘﻲ ﻟﺰﻣﻨﺔ ﻭﻫﻨﻪ ﻳﺘﻮﺳﻠﻦ ﺑﻲ ... ﻓﺪﻭﻭﺓ ﻳﻤﺔ ﻭﺍﻟﻠﻪ ﺟﺎﺳﺮ ﻟﺰﻣﺔ ﻣﻮﺗﻪ ﻛﺘﻞ ﻟﻬﺴﻪ ﻳﻮﻭﻥ ﻣﻦ ﺍﻟﻮﺟﻊ
ﻓﻼﺡ ﺑﻌﺼﺒﻴﺔ ... ﻳﻄﺒﺔ ﻣﺮﺭﺭﺽ ﺣﻴﻮﺍﻥ ﻛﻢ ﻣﺮﺓ ﻧﺒﻬﻨﺎ ﻻ ﺗﺸﺮﺏ ﻻ ﺗﺸﺮﺏ ﻭﺍﻟﻠﻪ ﻭﺍﻟﻠﻪ ﺍﺫﺍ ﻣﺎ ﻛﺘﻠﺘﺔ ﻭﺩﻓﻨﺘﻪ ﺑﻴﺪﻱ ﻫﻞ ﻋﺎﺭ ﻓﻼ ﺍﺭﺗﺎﺡ ...
ﺟﺎﺳﺮ ﺑﺎﻭﻋﻠﺔ ﺑﻬﺪﻭﺀ .. ﻛﻮﻭﻝ ﻳﺎﻟﻠﺔ ﻳﻤﻌﻮﺩ ﺍﻟﻴﻮﻡ ﺟﺎﻥ ﻣﻦ ﻧﺼﻴﺒﻲ ﺑﺎﺟﺮ ﻳﺼﺤﺊ ﻭﻧﺘﺼﺮﻑ ﻭﻳﺎﺓ ﻭﻫﺴﺔ ﺗﻌﺎﻝ ﺍﻛﻞ ﻻ ﺗﺰﻋﺞ ﻧﻔﺴﻚ ﻛﺘﻠﻚ ﺑﺎﺟﺮ ﺍﻟﻨﺔ ﺗﺼﺮﻑ ﺛﺎﻧﻲ ﻭﻳﺎﺓ ...
ﻛﻌﺪ ﻓﻼﺡ ﺑﺲ ﺧﻄﻴﺔ ﻣﺎ ﺍﻛﻞ ﻻﻥ ﺟﺎﻥ ﺣﻴﻞ ﺿﺎﻳﺞ ﻭﻳﺘﻮﻋﺪ ﺑﺠﻌﻔﺮ
ﺧﻠﺼﻮ ﻋﺸﺎ ﻭﺍﻧﻲ ﻭﻣﺮﺓ ﻓﻼﺡ ﻋﺰﻟﻨﻪ ﺍﻟﺴﻔﺮﺓ ...
ﺭﺣﺖ ﻟﻠﻤﻄﺒﺦ ﺩﺍ ﺍﻏﺴﻞ ﺑﺎﻟﻤﻮﺍﻋﻴﻦ ﻭﻧﻮﺍﻝ ﺩﺗﺴﻮﻱ ﺟﺎﻱ ﻭﻻﺯﻣﺔ ﺿﻬﺮﻫﺎ ﻻﻥ ﺣﺎﻣﻞ ...
ﺩﺍﺭﺕ ﻭﺟﻬﻪ ﻋﻠﻴﻬﺎ ﻛﺎﻟﺖ ﺑﺨﺚ ﻣﻤﺰﻭﺝ ﺑﺤﻨﺎﻥ ﻣﺼﻄﻨﻊ ... ﺣﺒﻴﺒﺘﻲ ﺟﻮﻟﻲ ﺍﺭﻳﺪ ﺍﺳﺎﻟﺞ ﺳﺆﺍﻝ ﺑﺲ ﺍﺗﻤﻨﻰ ﻣﺎ ﺗﺰﻋﻠﻴﻦ ﻣﻨﻲ ...
ﺑﺎﻭﻋﺘﻠﺔ ﺑﺎﺳﺘﻐﺮﺍﺏ ... ﺍﻱ ﺇﺳﺄﻟﻲ ﺷﻨﻮﻭ
ﺑﻠﻠﺖ ﺷﻔﺎﻳﻔﻬﺎ ﻭﺟﺮﺕ ﻧﻔﺲ ... ﺍﻧﺘﻲ ﻟﻴﺶ ﺗﺰﻭﺟﺘﻲ ﺟﺎﺳﺮ ﻭﺍﻧﺘﻲ ﺗﻌﺮﻓﻴﻦ ﺑﻲ ﻣﺘﺰﻭﺝ ﻭﻋﻨﺪﻩ ﺑﻨﻴﺔ ﻭﻣﺮﺗﻪ ﻣﺎ ﻣﻌﺮﻭﻑ ﻣﺼﻴﺮﻫﺎ ﺷﻨﻮﻭ ﻭﺍﻧﺘﻲ ﺑﻌﺪﺝ ﺻﻐﻴﺮﺓ ﻳﻌﻨﻲ ﻣﻮ ﺑﺎﻳﺮﺓ ...
ﺟﺮﻳﺖ ﻧﻔﺲ ﻭﺭﺟﻌﺖ ﺍﺟﻠﻒ ﺑﺎﻟﻤﻮﺍﻋﻴﻦ ... ﺍﻭﻻ ﻋﻴﺐ ﻛﻠﻤﺔ ﺑﺎﻳﺮﺓ ﺛﺎﻧﻴﺎ ﻫﻮ ﺭﺟﺎﻝ ﻣﺎ ﻋﻠﻴﺔ ﻗﺼﻮﺭ ﺣﺘﺊ ﻟﻮ ﺟﺎﻥ ﻣﺘﺰﻭﺝ ﻗﺒﻞ ﻣﻄﺎﺭ ﻧﺼﺔ ﻭﺍﻟﺤﻤﺪ ﻟﻠﻪ ﻋﻠﻰ ﻛﻞ ﺣﺎﻝ .. ﻭﻫﻤﺎﺗﻴﻦ ﻣﺎﻣﺎ ﻛﺎﻟﺖ ﺍﻧﺘﻲ ﻭﺣﻴﺪﺓ ﻭﻫﻮ ﺍﺑﻦ ﺧﺎﻟﺘﺞ ﻭﺧﺎﻟﺘﺞ ﺗﺪﻳﺮ ﺑﺎﻟﻬﺎ ﻋﻠﻴﺞ ﺍﺣﺴﻦ ﻣﻦ ﺍﻟﻐﺮﻳﺐ .
ﻧﺰﻋﺖ ﺣﺠﺎﺑﻬﺎ ﻭﻛﻌﺪﺕ ﺑﺘﻌﺐ ﻋﻠﺊ ﺍﻟﻜﺮﺳﻲ ﻧﺰﻋﺖ ﺣﺠﺎﺑﻬﺎ ﻭﻫﻔﺖ ﺑﻲ ﻋﻠﺊ ﻭﺟﻬﻬﺎ ﻛﺎﻟﺖ ... ﺑﺲ ﺍﻟﻲ ﺍﻧﺤﺠﻪ ﻋﻨﺞ ﻏﻴﻴﺮ ﻫﺬﺍ
ﺑﻠﻌﺖ ﺭﻳﻜﻲ ﺑﺨﻮﻭﻑ ... ﺷﻨﻮ ﺍﻟﻲ ﺍﻧﺤﺠﺔ ﻋﻨﻲ ؟
ﺗﻨﻬﺪﺕ ﺑﺨﺒﺚ ... ﺑﺲ ﻓﺪﻭﺓ ﻣﺎ ﺗﺴﻮﻳﻠﻲ ﻣﺸﺎﻛﻞ ﺧﻠﻲ ﺳﺮ ﺑﻴﻨﺔ
ﺗﻌﺼﺒﺖ ﻭﺍﻗﺘﺮﺑﺖ ﻣﻨﻬﺎ ﺑﺨﻮﻑ ... ﺍﻱ ﺍﺣﺠﻲ ﺷﻨﻮ ؟
ﺭﺩﺕ ﺑﻀﺤﻜﺔ ... ﺷﺒﻴﺞ ﺍﻧﺨﻄﻒ ﻟﻮﻧﺞ ﻭﺗﻌﺼﺒﺘﻲ ﺩﺗﺤﺴﺴﻨﻲ ﺍﻟﻜﻼﻡ ﺍﻟﺊ ﺍﻧﺤﺠﺔ ﻋﻨﺞ ﺻﺤﻴﺢ ...ﻋﻄﺖ ﺑﻮﺟﻬﻬﺎ ... ﻫﻮ ﺷﻨﻮ ﺍﻟﻲ ﺍﻧﺤﺠﺔ ﻻ ﺗﺨﺒﻠﻴﻨﻲ
ﻭﻛﻔﺖ ﻭﺗﻘﺮﺑﺖ ﻣﻨﻲ ﻭﻫﻲ ﺗﺮﺳﻢ ﺍﺑﺘﺴﺎﻣﺔ ﺧﺒﻴﺜﺔ ﻋﻠﺊ ﺷﻔﺎﻳﻔﻬﺎ ﻫﻤﺴﺖ ﺑﻬﺪﻭﺀ ... ﻳﻜﻮﻟﻮﻥ ﺍﻧﺘﻲ ﻣﻮ ﺑﻨﻴﺔ ﻭﺍﻟﻜﺎﺳﺮ ﺳﺘﺮ ﻋﻠﻴﺞ ﻟﻬﻞ ﺳﺒﺐ ﻫﻮ ﻟﺤﺪ ﺍﻻﻥ ﻣﺎ ﻳﺤﺒﺞ
ﻓﺘﺤﺖ ﻋﻴﻮﻧﻲ ﻣﺼﺪﻭﻭﻣﺔ ﻭﻣﺮﻋﻮﻭﻭﺑﺔ ...
ﻧﻬﺎﻳﺔ ﺍﻟﺒﺎﺭﺕ ... ﻳﺘﺒﻊ
ﻛﻮﻧﻮﺍ ﺍﻧﺘﻢ ﻛﻮﻧﻮﺍ ﺑﺨﻴﺮ ... ﺍﺣﺒﻜﻢ 💔
ﻧﻮﺭ ﺳﻤﻮ ﺍﻟﻌﺮﺍﻕ 😘...
ﻻ ﺗﺴﺘﻌﺠﻠﻮﻥ ﺑﺎﻟﺤﻜﻢ ﻋﻠﺊ ﺍﻟﺸﺨﺼﻴﺎﺕ ﻫﺬﺍ ﺑﺎﺭﺕ ﺍﻭﻝ ﻫﻮ ﻣﺠﺮﺩ ﺑﺎﺭﺕ ﺗﻌﺮﻳﻔﻲ ﺑﺎﻻﺑﻄﺎﻝ ﻭﺍﻥ ﺷﺎﺀ ﺍﻟﻠﻪ ﺍﻻﺣﺪﺍﺙ ﻗﺎﺩﻣﺔ ﺑﺎﻟﺘﺴﻠﺴﻞ ...
ﻻ ﺗﻨﺴﻮ ﺍﻟﺘﺼﻮﻳﺖ ﻭﺍﻟﻤﺸﺎﺭﻛﺔ ﺑﻜﻢ ﻧﻜﺘﻤﻞ
#جوليت_وآسرها
#صور
ﻫﻼﻭ ﺑﻨﺎﺕ
ﻣﺜﻞ ﻣﺎ ﺣﺒﻴﺘﻮ ﺭﺍﺡ ﺍﻧﺸﺮ ﺍﻟﻜﻢ ﺻﻮﺭ ﺑﻌﺾ ﺍﻻﺑﻄﺎﻝ ﻣﻮ ﺍﻟﻜﻞ ﻻﻥ ﺩﺍ ﺍﻭﺍﺟﻬﻪ ﺻﻌﻮﻭﺑﻪ ﻛﺒﻴﺮﺓ ﺑﺎﻟﺸﺒﻪ ﺍﻟﻤﻘﺎﺭﺏ ﺑﻴﻨﻬﻢ 😥😥
ﺍﻭﻝ ﺷﺊ ﻧﺒﺪﻱ ﺑﺎﻟﺜﻮﺭ ﺍﻟﻤﺮﺣﻮﻡ 👹👹
ﺭﺍﺡ ﺑﺸﺮﺑﺔ ﻣﻲ ﻭﺍﻟﻠﻪ ﺗﺮﺉ ﻗﻬﺮ ﻻﻥ ﺍﻟﺜﻮﺭ ﻋﺰﻳﺰ ﻭﺧﺎﺻﺔ ﻋﻨﺪ ﺍﻟﻌﺮﺏ ﻻﻥ ﻳﺮﺑﻮﺍ ﻭﻳﺴﺘﻔﺎﺩﻭﻥ ﻣﻨﻪ ﺑﺎﻟﺤﺮﺙ ﻭﻫﻤﺎﺗﻴﻦ ﺑﻲ ﻓﻠﻮﺱ ﻣﻦ ﻳﺒﻴﻌﻮﻭ 😬💔
ﺻﺒﺮﻳﺔ ... ﺍﻟﺨﺎﻟﺔ ﺻﺒﺮﻳﺔ ﺭﻏﻢ ﻃﺒﺎﻛﺎﺕ ﺑﺲ ﺍﻟﻬﺎ ﻣﻮﺍﻗﻒ ﻛﻮﻭﻭﻟﺶ ﺣﻠﻮﺓ ﺣﺘﺊ ﺑﺎﻟﻤﺴﺘﻘﺒﻞ ﻣﻮ ﺑﺲ ﻫﺴﻪ 😍..
ﺻﺒﺮﻳﺔ ﻫﻲ ﻭﻧﻌﺎﻟﻬﺎ 👌👌😂😂😂
ﺍﺑﻮ ﺍﻟﻠﻮﻝ ... ﻣﺎ ﻟﻜﻴﺖ ﺷﺒﻴﺔ ﺍﻟﻬﺎ ﻗﺮﻳﺐ ﻣﻨﻪ ﺳﺎﻋﺪﻧﻲ ﻃﻠﺤﻪ ﻭﺟﺎﺑﻠﻲ ﻫﺎﻱ ﺍﻟﺼﻮﺭﺓ ﺗﻘﺮﻳﺒﺎ ﺍﻟﺸﺒﻪ ﻛﺒﻴﺮ ﺑﺲ ﺷﻮﻳﻪ ﺍﺑﻮ ﺍﻟﻠﻮﻝ ﺍﺳﻤﻦ . 😂👌
ﺗﻜﺴﻴﻴﻴﻢ 😬😬😬💔💔..
.....
ﺷﺎﻡ ... ﺣﺒﻴﺒﺔ ﻗﻠﺐ ﺟﺎﺳﺮ ﺍﻟﺰﻭﺟﺔ ﺍﻟﻤﺪﻟﻠﻪ ﺍﻟﻤﻔﻘﻮﺩﺓ 😍😍😍
ﻫﻞ ﺍﻧﺴﺎﻧﻪ ﺣﻠﻮﺓ ﻭﺣﺒﺎﺑﻪ ﻫﻲ ﻣﻦ ﺍﻫﺎﻟﻲ ﺳﻮﺭﻳﺎ ﻭﺍﻟﻬﺎ ﻗﺼﺔ ﺣﻠﻮﺓ ﻭﻳﻪ ﺍﺑﻮ ﻏﺰﻝ .. ﻗﺼﺔ ﻋﺸﻖ ﺣﻠﻮﺓ 😍
ﺟﻮﻟﻴﻴﺖ ... ﺟﻮﻟﻴﻴﺖ ﻃﺒﻌﺎ ﺟﻤﻴﻠﻪ ﺑﺸﻜﻞ ﺷﻜﺮﻩ ﻭﻋﻴﻮﻧﻬﺎ ﻣﻠﻮﻭﻭﻧﻪ ﻣﺎ ﺣﺒﻴﺖ ﺍﻧﺸﺮ ﺍﻟﻬﺎ ﺷﺒﻴﻬﻪ ﻻﻥ ﺍﻧﺘﻢ ﻣﺎ ﺷﺎﺀ ﺍﻟﻠﻪ ﺗﺤﺴﺴﻮﻧﻲ ﺍﻟﻌﺮﺍﻕ ﻣﺎ ﺑﻲ ﻻ ﺣﻠﻮﺍﺕ ﻭﻻ ﺣﻠﻮﻳﻴﻦ ..
ﺷﺴﺎﻟﻔﻪ ﻫﻮ ﺍﻧﻲ ﻛﺎﺗﺒﺘﻜﻢ ﺍﺟﻨﻦ ﺍﺫﺍ ﺍﻧﺰﻝ ﺻﻮﺭﺗﻲ ﺗﻀﻠﻮﻥ ﺗﻠﻄﻤﻮﻥ 👌😂😂😂
ﻻ ﺑﺲ ﻭﺍﻟﻠﻪ ﺟﻮﻟﻴﻴﺖ ﺍﻣﻬﺎ ﻭﺍﺑﻮﻫﺎ ﻣﺜﻞ ﻣﺎ ﺫﻛﺮﺕ ﻣﻌﺎﻗﻴﻦ ﺑﺲ ﻣﺎ ﺷﺎﺀ ﺍﻟﻠﻪ ﺟﻮﻟﻴﻴﺖ ﻭﺍﺧﻮﺍﻧﻬﺎ ﻛﻮﻭﻭﻟﺶ ﺣﻠﻮﻳﻴﻦ ... ﺗﻌﻮﻳﺾ ﻣﻦ ﺍﻟﻠﻪ ...
ﺟﻮﻛﻠﻴﻴﺘﺖ ﺍﻟﻜﺎﺳﺮ 💔❤😍😍
👇👇👇👇👇👇👇👇
ﻫﺎﻱ ﻫﻨﺎ ﻣﺨﻠﻴﻪ ﺍﻳﺪﻫﺎ ﻋﻠﺊ ﺧﺪﻫﺎ ﺩﻛﻮﻝ ... ﺍﻭﻭﻭﻭﻳﻠﻲ ﻟﻮ ﻳﻠﺰﻣﻨﻲ ﺍﻟﻜﺎﺳﺮ ﺍﻟﻪ ﻳﻜﺴﺮ ﺿﻠﻮﻋﻲ 👌😂💔
ﺍﻧﻮﺏ ﻣﻴﺤﺒﻬﺎ ﻳﺮﺑﻲ ﻣﻴﺤﺒﻬﺎ 😣😣😣
💔💔💔💔💔💔💔
ﻫﺴﻪ ﻧﺠﻲ ﺍﻟﻮﻗﺎﺭ ... ﻃﺒﻌﺎ ﻭﻗﺎﺭ ﻫﺎﺩﺋﻪ ﺑﺸﻜﻞ ﺑﺲ ﺗﻨﻔﻌﻞ ﺷﺨﺼﻴﺘﻬﺎ ﺗﺒﻴﻦ ﺑﺎﻟﺠﻴﺎﺕ ﻭﺣﺒﺎﺑﻪ ﺍﺣﺒﻬﺎ ﻭﺍﻟﻠﻪ ...
ﺗﺸﺒﻪ ﻫﺎﻱ 👇👇👇👇👇👇👇
💔💔💔💔💔💔💔💔💔
ﺍﻣﺎ ﺭﻳﻬﺎﻡ ... ﺗﻌﺒﺖ ﺣﻴﻴﻞ ﻭﺍﻧﻲ ﺍﺑﺤﺚ ﺍﻟﻬﺎ ﻋﻦ ﺻﻮﺭﺓ ﺭﺩﺕ ﺻﻮﺭﺓ ﺗﻜﻮﻥ ﻟﻮﺣﺪﻩ ﻣﺤﺠﺒﻪ ﺑﺲ ﻟﻼﺳﻒ ﻣﺤﺪ ﺗﺸﺒﻪ ﻣﻼﻣﺤﻬﺎ ... ﺍﻛﺜﺮﻫﻦ ﻣﻼﻣﺤﻬﻦ ﺣﺎﺍﺍﺩﻩ ﻭﺍﻟﺘﺎﺗﻮ ﻣﺨﺮﺏ ﺷﻜﻠﻬﻦ ...
ﺍﻣﺎ ﺭﻫﻮﻭﻣﻪ ﺷﻜﻠﻬﺎ ﺭﺣﻤﺎﻧﻲ ﻭﻧﻮﺭ ﻣﺤﻤﺪ ﻛﻠﻪ ﺑﻲ ... ﺍﻛﻴﺪ ﻻﻥ ﻫﻲ ﻗﺎﺭﺋﻪ ﻟﻠﻘﺮﺍﻥ ﻭﻣﻠﺘﺰﻣﻪ ﻭﻣﺤﺘﺸﻤﻪ ﺑﺸﻜﻞ ﻛﺒﻴﺮ ...
ﻟﺬﻟﻚ ﺍﻧﻲ ﻣﻜﺪﺭﺕ ﺍﺷﺒﺒﻬﺎ ﺑﺎﻗﻲ ﺍﻟﺼﻮﺭ ﺍﻟﻴﻴﻜﻮﻧﻦ ﻣﺤﺠﺒﺎﺕ ﻭﻣﺎ ﻟﻜﻴﺖ ﺷﺨﺺ ﻣﻘﺎﺭﺏ ﺍﻟﻬﺎ ﻏﻴﺮ ﻫﺎﻱ ﺍﻟﺼﻮﺭﻩ ﻟﻼﺳﻒ ...
ﻭﺍﻋﺘﺬﺭ ﻻﻥ ﻣﻠﻜﻴﺖ ﺻﻮﺭﺓ ﺑﺤﺠﺎﺏ 😥...
ﺭﻳﻬﺎﻡ .. ﻧﻔﺲ ﺍﻟﻤﻌﺎﻧﻲ ﺑﺲ ﺍﻟﻌﻴﻮﻥ ﺳﻮﻭﺩ 👇👇👇...
ﻭﻧﻮﺍﻝ ﻛﻠﺘﻠﻜﻢ ﺣﻠﻮﻩ ﺗﺸﺒﻪ ﺑﺎﺳﻜﺎﻝ ﺗﻘﺮﻳﺒﺎ ﺑﺲ ﺟﻌﻔﺮ ﻳﺸﻮﻓﻬﺎ ﻃﺎﻭﺓ ﻣﺤﺘﺮﻛﻪ 😂😂👌😬
ﻫﺎﻱ ﺍﻟﺒﻨﺎﺕ ... ﻭﺍﻥ ﺷﺎﺀ ﺍﻟﻠﻪ ﺍﻻﺑﻄﺎﻝ ﺍﻟﺸﺒﺎﺏ ﻏﻴﺮ ﻣﺮﻩ ﺍﺑﺤﺚ ﻋﻨﻬﻢ ﻻﻥ ﺍﻟﺸﺒﻪ ﺩﺍ ﺍﻭﺍﺟﻬﻪ ﺑﻲ ﺻﻌﻮﻭﺑﻪ ...
ﻭﻣﻼﺣﻈﻪ .. ﺭﺿﻴﻪ ﺯﻭﺟﺔ ﺍﺑﻮﻫﻢ ﺍﻟﻜﺒﻴﺮﻩ ﺑﺲ ﻣﺼﺎﺭ ﻋﻨﺪﻫﺎ ﺍﻃﻔﺎﻝ .. ﻓﺘﺰﻭﺝ ﺍﻟﺸﻴﺦ ﺍﻡ ﻓﻼﺡ ...
ﻭﻫﻞ ﺍﻷﻭﻻﺩ ﻭﺍﻟﺒﻨﺎﺕ ﻛﻠﻬﺎ ﻣﻦ ﺍﻡ ﻓﻼﺡ ...
ﺑﺲ ﺍﻟﺸﻴﺦ ﻋﻠﻢ ﻭﻟﺪﻩ ﻭﺍﺣﻔﺎﺩﻩ ﻭﻛﻨﺎﻳﻨﻪ ﻳﺼﻴﺤﻮﻥ ﻟﺮﺿﻴﻪ ﻣﺎﻣﺎ ﺍﻭ ﻳﻤﻤﻪ ﺣﺘﺊ ﻣﺎ ﺗﻨﺤﺮﻡ ﻣﻦ ﻫﻞ ﻛﻠﻤﻪ
ﻭﻫﻲ ﺑﻄﻴﺒﺘﻬﺎ ﻭﺣﻨﻴﺘﻬﺎ ﻛﺴﺒﺖ ﺍﻟﻜﻞ ﺍﻟﻬﺎ ...
ﻳﺎﻟﻠﻪ ﺍﻧﺘﻈﺮﻭﻧﻲ ﺍﻟﻴﻮﻭﻡ ...
ﻛﻮﻧﻮﺍ ﺍﻧﺘﻢ ﻛﻮﻧﻮﺍ ﺑﺨﻴﺮ .... ﺍﺣﺒﻜﻢ 💔
ﻧﻮﺭ ﺳﻤﻮ ﺍﻟﻌﺮﺍﻕ
