-ကပ်ဆိုးကြီးရဲ့အစ-
ဘုန်း ခွပ်
လက်သီးထိုးသံတွေ ခြေထောက်နဲ့ကန်လိုက်သံတွေက စီးကရက်တစ်လိပ်ကိုကိုက်ထားရင်းမတ်တပ်ရပ်နေတဲ့ကျွန်တော့်အာရုံကိုဖမ်းစားသွားခဲ့သည်။ အမှိုက်အိတ်အကြီးကြီးကိုဆွဲထားတဲ့ကျွန်တော်က အလုပ်လုပ်နေတဲ့ဘားရဲ့အနီးအနားကအမှိုက်ပုံးဘေးမှာမတ်တပ်ရပ်နေခဲ့တာ။ မျက်စိကလှမ်းမြင်နေရတဲ့အကွာအဝေးမှာရှိနေတဲ့ထောင့်နားမှာ လူငါးယောက်ခြောက်ယောက်လောက်ရှိမဲ့အုပ်စုတစ်စုက လူတစ်ယောက်ကိုသူတို့ခြေထောက်တွေနဲ့ကန်နေတာကိုမြင်လိုက်ရတဲ့အခါ ကျွန်တော်အမှိုက်အိတ်ကိုသေသေချာချာချည်လိုက်မိပြီး သူတို့တွေဘက်ကိုတစ်ချက်အာရုံစိုက်လိုက်ရင်း ပါးစပ်ထဲမှာရှိနေတဲ့ဆေးလိပ်ကိုတစ်ချက်ရှိုက်လိုက်သည်။ဆေးလိပ်ကိုတစ်ချက်ရှိုက်ဖွာလိုက်ရင်း ဆေးလိပ်ငွေ့တွေကိုအပြင်ဘက်ကိုမှုတ်ထုတ်လိုက်ပြီးတဲ့နောက်မှာ ကျွန်တော့်အတွေးတွေကိုပြန်စုစည်းလိုက်သည်။ ဒီလိုမျိုးအဖြစ်အပျက်တွေကိုမြင်ဖူးတာများလွန်းလို့ ကျွန်တော့်မှာနေသားတောင်ကျနေပြီ။ ဒီဘားအနောက်မှာရှိတဲ့လမ်းကမှောင်မည်းပြီးတော့တိတ်ဆိတ်နေတာကြောင့် ဝနိထမ်းတွေပဲအမှိုက်အိတ်သယ်ဖို့နဲ့ပစ္စည်းတွေပို့ဖို့ဒီလမ်းကိုသုံးကြတာ။
"ကျစ် မင်းရဲ့အားကလည်းပေါ့သေးသေးမဟုတ်ဘူးပဲ"
အမှောင်ထုထဲကနေအသံတစ်ခုကလွင့်ပျံလာခဲ့ပေမယ့် ကျွန်တော်ကတော့အဲ့ဒါကိုသိပ်ဂရုစိုက်မနေဘူး။ကျွန်တော်အခုလက်ရှိလုပ်နေတဲ့အလုပ်ကိုပြီးအောင်လုပ်ပြီးရင် ဘားထဲကိုပြန်ဝင် တံခါးတွေပိတ်ပြီးတော့အိမ်ပြန်ရုံပဲရှိတာလေ။ ဟုတ်တယ် ကျွန်တော်လုပ်သင့်တာကအဲ့ဒါပဲ။ပြီးတော့ ကျွန်တော်ဆိုတဲ့ကောင်ကအတန်းချိန်ပြီးသွားရင် ဒီနေရာမှာအလုပ်လာလုပ်နေကျကောလိပ်ကျောင်းသားတစ်ယောက်ပဲ ဟုတ်တယ်မလား။
အချိန်ကနောက်ကျနေပြီဖြစ်တဲ့အတွက်ကြောင့် ဆိုင်ကိုလာတဲ့လူတွေကမရှိသလောက်ဖြစ်နေပြီ။ တချို့လူတွေကတက္ကစီကားလာမှာကိုစောင့်နေပြီး တချို့ကတော့ကောင်မလေးတွေကိုလိုက်ကြူနေရင်းအဖော်ရအောင်ကြိုးစားနေကြသည်။တချို့ကလည်းကျွန်တော်အခုမြင်နေရတဲ့လူလိုမျိုးရန်ဖြစ်နေကြတာပေါ့။ကျွန်တော်ကအသည်းမရှိတဲ့လူတော့မဟုတ်ပါဘူး။ဒီအတိုင်းသူများတွေရဲ့ကိစ္စမှာဝင်မရှုပ်ချင်တာပဲရှိတာ။ ဒီရန်ပွဲမှာ အရိုက်ခံနေရတဲ့တစ်ယောက်က သူတို့လူအုပ်စုထဲကတစ်ယောက်ယောက်ရဲ့အဖေနဲ့ပြဿနာတက်ထားတာပဲဖြစ်လိမ့်မယ်။ ပိုပြီးတော့သေချာသွားတာက တစ်ယောက်တည်းဖြစ်နေတဲ့သူမှာ လက်သီးချက်တွေခြေထောက်နဲ့ကန်ထားတာတွေကိုတော်တော်ကြီးကိုခံထားရတယ်လေ။
