[Unicode]
အခန်း ၁၈၆ - စဉ်းလဲတဲ့အကြံကိုလက်လွှတ်ဖို့ ငြင်းဆန်ခြင်း
ဝမ်အာ့ကုန်း သူမကို လုံးဝ အယုံအကြည်မရှိပေ။
ဖြတ်သွားဖြတ်လာ ဟုတ်လား ငါတို့ရွာက လယ်ကွက်တွေဆိုတာ ရွာပြင်မှာပဲရှိတာ... အဲ့တာကို ညကြီး အချိန်မတော် ရွာပြင်ထွက်ပြီး ဘာတွေများ လုပ်နေတာလဲ ပြီးတော့ အကိုကြီးသာ့ဟိုင်ရဲ့ ဖရဲခင်းကိုလည်း ဖြတ်သွားသေးတာပေါ့!
ဝမ်အာ့ကုန်းက လူရည်လည်တယ်။ ဒီနှစ်ရက်ထဲမှာကို ဖရဲသီးရောင်းရင် ဘယ်လောက်မြတ်လဲဆိုတာ သူ သိထားတယ်။ သူ့မှာ နှစ်ရက်တည်းနဲ့ကို သူ့တသက်နဲ့တကိုယ် တစ်ခါမှ မျှော်လင့်မထားတဲ့ ငွေတစ်ရာလျန်ကြီးများတောင် ရှာနိုင်ခဲ့တာလေ! သူ့ဇနီးရဲ့ အနည်းငယ် ပူလာပြီဖြစ်တဲ့ ဗိုက်ကလေးကို မြင်တော့ ဝမ်အာ့ကုန်းရဲ့မျက်လုံးက ပိုပြီးနူးညံ့လာပြီး ရင်ထဲမှာလည်း အဖေတစ်ယောက်ရဲ့ ပီတိနဲ့ ပြည့်နေတော့တယ်။
ဒီငွေတွေက သူကိုယ်တိုင် ရိုးရိုးသားသားရှာလို့ ရလာတဲ့ငွေ၊ သူ့ရဲ့ မွေးလာမယ့် သားငယ်လေးအတွက် စုထားတဲ့ မိသားစုပိုင်ငွေ။ သူ့သားကြီးလာရင်တော့ သူ့လို အဖြစ်မခံနိုင်ဘူး။ သူငယ်ငယ်တုန်းကဆို ပေစုတ်စုတ် အဝတ်လေးနဲ့။ စားစရာလည်း အလုံအလောက်မရှိတာမို့ တနေ့တနေ့ ဘယ်လို ခိုးရမလဲ ဆိုတာပဲ အမြဲတွေးနေခဲ့တာ
နောက်ထပ် ရက်နည်းနည်းလောက် အလုပ်လုပ်ပြီးရင် ငါးခန်းပါ အုတ်အိမ်လေးဆောက်ဖို့ လူတစ်ယောက်လောက် ငှားပြီး လယ်ကွက်လေး ဘာလေး ဝယ်မယ်လို့ သူစိတ်ကူးထားတယ်။ သူ့မိသားစုက လယ်ကွက်အားလုံးကို မစီမံနိုင်ရင်တောင် တခြားလူတွေကို ငှါးလို့ရတာပေါ့! အဲ့တာမှပဲ သူ့သားလေးအတွက် အမွေလေး ဘာလေး ပေးလို့ရမှာ။ အကယ်လို့ သူ့သားကိုယ်တိုင်က စာသင်ချင်တယ်လို့ ပူဆာခဲ့ရင် အစိုးရစာမေးပွဲတွေ ဖြေလို့ရတဲ့ ကျောင်းတော်ကြီးမှာတောင် စာသင်လွှတ်ပေးဦးမှာ။ မဟုတ်လို့ သူ့သား ဆန္ဒမရှိဘူး ဆိုရင်လည်း လယ်ကွက်လေး ငှားစားပြီး နေသွားလို့ ရတာပဲ။ နောက်ဆိုရင် ဝမ်အာ့ကုန်းဆိုတာ ခွေးရောကြောင်ပါ မလေးစားတဲ့ လူလေလူလွင့် မဟုတ်တော့ဘူး။ သူဟာ ခုဆိုရင် ခေါင်းမော့ရင်ကော့နဲ့ ဂုဏ်သရေရှိ လူကြီးတစ်ယောက် ဖြစ်လာတော့မှာ။
YOU ARE READING
သက်တန့်ရောင် မိန်းမပျို Book 1 (MMTranslation)
Fantasyခေါင်းစဉ် - သက်တန့်ရောင် မိန်းမပျို (ဘာသာပြန်) မူရင်းခေါင်းစဉ် - Fields of Gold အမျိုးအစား - သဘာဝလွန်၊ စိတ်ကူးယဉ်၊ အချစ်ဇာတ်လမ်း၊ ဘဝအတွေ့အကြုံ အပိုင်းရေ - ၇၃၂ ပိုင်း မူရင်းရေးသားသူ - ကွေ့ဟွားချင်းယွီ ဘာသာပြန်ဆိုသူ - The 8Black Hands
