ဂန္တဝင်ဂိုဏ်းချုပ် အတွဲ (၂) Unicode

အပိုင်း ၂၆၈ : လက်ကောက်နှင့် နှံကောင်

အပိုင်း ၂၆၈ : လက်ကောက်နှင့် နှံကောင်

သူသည် ကံစမ်းမဲနှိုက်၍ ပြီးသည်နှင့် လင်းဖုန်းသည် သူလျှစ်လျှူရှုထားသော အရာများ အပေါ်တွင် အာရုံပြန်စိုက်လိုက်သည်။

အစပထမတွင် အဝီစိ ငရဲမုန်တိုင်းအား ယူဆောင်လာနိုင်သူမှာ ယွဲ့ဟုန်ယန်ဟု ကြားလိုက်သော်လည်း၊ သူသည် ရှည်ရှည်ဝေးဝေး သိပ်မတွေးခဲ့ချေ။ ဘာပဲပြောပြော ကံတရားသည် သူမဘက်တွင် ရှိနေသည် မဟုတ်ပါလော။

သို့သော်လည်း နောက်ထပ် အနည်းငယ် သုံးသပ်ဝေဖန်လိုက် အပြီးတွင်၊ တစ်စုံတစ်ခုက မှားနေသည်ဟု ခံစားလိုက်ရသည်။

ရှောင်ပုတန်လေး၏ အကူအညီနှင့်ပင်လျှင်၊ အခြေခံအုတ်မြစ် အဆင့်မှာသာ ရှိနေသေးသော ယွဲ့ဟုန်ယန်သည် အဝီစိ ငရဲမုန်တိုင်းအား အောင်နိုင်ခဲ့သည်မှာ ယုတ္တိသိပ်မရှိချေ။ မေးခွန်းကား သူမသည် မည်ကဲ့သို့ သူ့ကို ယူပြန်လာနိုင်ခဲ့သနည်း ဟူ၍ဖြစ်သည်။

ရှောင်ပုတန်လေး၏ ပြောပုံအရဆိုလျှင်၊ ထိုမုန်တိုင်းကို ဗလာနတ္တိ အစိမ်းရောင် ဆေးမီးဖိုလေး၏ အတွင်းတွင် ထည့်သွင်းလာခြင်း မဟုတ်ပဲ၊ ယွဲ့ဟုန်ယန်က သယ်ဆောင်လာခြင်း ဖြစ်သည်။

ယခင်က ခွန်းလွန်တောင်တွင် လေနတ်ဘုရားဂိုဏ်းမှ ကောင်းဖန်သည်၊ မဟာလမင်း အကြွင်းမဲ့ရေအား အောင်နိုင်ရန် ကြိုးစားရာတွင်၊ သူ၏ ကိုယ်ပိုင်စွမ်းအားဖြင့် မတတ်နိုင်ခဲ့ပဲ ပြည်သူလူထုတို့၏ မဟာမီးဖို နည်းစနစ်၏ စွမ်းအားကို ငှားသုံး၍ ကြိုးစားခဲ့ရ၏။ သို့ရာတွင် ခြေတစ်လှမ်း မှားလိုက်သည်နှင့် ဒုက္ခကောင်းကောင်း ရောက်သွားခဲ့သည်။

နောက်ပိုင်းတွင် ယန်ချင်က သူ့အား အောင်နိုင်ခဲ့သော်လည်း၊ သူ့အား လွယ်ကူစေရန် ဆောင်ရွက်ပေးခဲ့သော ကောင်းဖန်အား ကျေးဇူးတင်ရမည် ဖြစ်သည်။

ယွဲ့ဟုန်ယန်သည် ကောင်းဖန်ထက် ပို၍ တိုးတက်လာခြင်းကို ထည့်တွက်ခဲ့လျှင်ပင်၊ အမှန်တကယ်မှာ အဝီစိ ငရဲမုန်တိုင်းသည် မဟာလမင်း အကြွင်းမဲ့ရေထက် အဆပေါင်းများစွာ ပို၍ ခက်ထန်ကြမ်းတမ်းပေသည်။ လင်းဖုန်းသည် ယွဲ့ဟုန်ယန်က မယုံနိုင်လောက်အောင် ခက်ခဲသော တာဝန်ကို၊ မည်ကဲ့သို့ အောင်မြင်အောင် ထမ်းဆောင်နိုင်ခဲ့သည်ကို စဉ်းစား၍မရ ဖြစ်နေခဲ့၏။