Reincarnated as the Seventh Princess (Book 2/3) (COMPLETED)

Kabanata CXV: Ang Kasagutan

- ZACHARIAS -

Panay lamang ang pagsimsim ni Haring Zacharias sa kanyang kopita habang nakatulala ito sa kawalan at tila ba malalim ang iniisip. Napapalibutan din ito ng mga sira at basag na kagamitan dahil katatapos lamang nito magwala kani-kanina lamang at pinagbabato ang kanyang mga kagamitan. 

Madaling araw na ngunit imbes na nagpapahinga na ang hari ay nananatili itong gising na gising at bakas ang galit at kalituhan sa ekspresyon nito. Dagdag pa na hindi kumportable ang hari sa pananatili sa isang kakakabit lamang na tolda sa kalagitnaan ng malamig at masukal na kagubatan. Mas sanay itong natutulog sa kanyang silid na napaliligiran ng mga mamahaling mga kagamitan at mayroong isang napakalaki at napakalawak na kama. 

Ngunit wala naman siyang magagawa kundi ang manatili na lamang dito dahil pagkatapos nang mga naging kaganapan kanina sa Cymopoleia ay sapilitan na silang pinaalis ni Dareios at ng ilang aristokrata ng Cymopoleia. Naisin man niya ang pumalag at hindi sumang-ayon dito ay hindi niya magawang makipagtagisan ng salita at otoridad sa isang binata at isang kalahating tao at kalahating isda na hari pagka't alam niya noong mga oras na iyon ay dehado na ang kanyang kalagayan. At imbes na ayusin niya ang gusot na kanyang ginawa ay ang kanyang anak na si Zephyrus ang ginawa niyang pain at pangsakalan sa kasalanang hindi naman nito ginawa. Pero para kay Zacharias, hindi na niya kailangan pang humingi ng tawad dahil noong umpisa pa lamang naman ay iisa na ang kanyang layunin ngunit napurnada lamang ito dahil may hindi natuloy sa kanyang plano. 

"Mierda!" Malakas nitong mura sa isang banyagang salita at muli nitong ibinato ang kanyang kopita sa sahig dahilan para kaagad itong mabasag at makagawa ng isang malakas na tunog. 

Lalong umusbong ang kanyang galit sa mga dapat na naging kaanib na niya noong mga oras na iyon. Hindi siya makapaniwala na nagawa siyang traydurin ng mga nilalang na nangako sa kanyang tutulungan siya sakupin ang Cymopoleia at mapasailalim sa kanyang otoridad ang kapangyarihan nito kapalit ang dalawang babae lamang. Hindi niya maintindihan kung bakit hindi umayon sa usapan ang mga nilalang na nagsabi sa kanya na sila na mismo ang tatapos sa buhay ng hari ng Naia at sila na mismo ang makikipaglaban sa kanya. 

Kaya naman nang nakita niya kanina ang hari at reyna ng Naia at ang sandamakmak na mga kawal nito na nagtataglay din ng mas malakas na kapangyarihan ay sinubukan niya pang daanin ang mga ito sa usapan sa pag-asang darating ang kanyang mga kasabwat ngunit halos maubos na ang kanyang laway sa pagpapaikot ng usapan ay wala man lamang dumating na mga kaalyado! 

"Mga traydor! Putang ina! Argh!" Galit na galit na sigaw ni Zacharias at muli itong nagwala sa kinalalagyan niyang tolda. 

Hindi niya matanggap na napurnada ang kanyang mga plano dahil nagtiwala siya na magpapadala ng tulong ang mga nilalang na nangako sa kanya noong nakaraan. Hindi siya makapaniwala na sa isang iglap lamang ay nawalang parang bula ang pagkakataon niya na mapasakamay ang kaharian ng Cymopoleia na noon pa man ay matagal na niyang pinapangarap. Tandang-tanda niya pa ang pangako ng mga nilalang sa kanya dalawang linggo na ang nakalilipas bago pa ang kaarawan mismo ni Dareios. 

Alas dyis na ng gabi at oras na rin upang tapusin ni Zacharias ang kanyang mga trabaho para sa araw na ito. Dala ang baso na naglalaman ng kopita at isang tabako naman ang kagat niya sa kanyang bibig ay kaswal na naglakad ito papunta sa silid-aklatan upang kunin ang ilang papeles na kinakailangan niya pang aprubahan bukas. Sakto naman pagkarating niya sa silid ay ibinaba niya muna ang kanyang kopita ngunit wala pang ilang segundo ay tila ba may naramdaman siyang presensya sa palibot niya kaya hindi siya nagdalawang-isip na magpakawala ng kanyang kapangyarihan na matatalas at nakahihiwang mga hangin. 

Mabilis niya rin inilabas ang kanyang pana na gawa rin sa hangin at tangin siya lamang ang nakahahawak saka ito itinapat sa isang nilalang na nagtatago sa anino hindi kalayuan sa kanya.