بلاي ي جابر بعناد روس الرجال

البارت الثالث

اما عند الرجال كانو يسولفون ويضحكون سمعو صوت الباب وقام خالد يفتح واعتلا البيت صوت خالد وهو يقول : الحمدالله على السلامه تو مانورت السعوديه ونجد طلعو الحريم والرجال على الصوت وعد الي قعدت تبكي وتضحك لما شافت اخوانها واول ماطاحت عينهم عليها ركض لها صقر وهو يضمها قدام الكل وطول لين قال نايف : يلأخو مالنا نصيب نسلم
ابعد صقر وهو يضحك لانهم لهم سنه ماشافو وعد وسلم عليها نايف ورغد سلام طول وبعدها سلمو على الباقين وجلسو قعده عمامهم حريم ورجال مليانه ضحك وسوالف ووناسه وطبعاً كل ذا صار من الفجر لين الضهر بحكم انهم بديره يقعدون بدري حيل ولما خلصو غدا وجلسو شوي سمعو صوت طق الباب قوه قامو مفجوعين على الصوت وفتح جابر الباب وشاف واحد واقف وقال الرجال : وين اصحاب خلف بسرعه
قال جابر وخالد : حنا
الرجال : صالح واخوياه متضاربين مع خلف ومعهم سكاكين وخلف لحاله بمكانكم المعتاد الحقو عليه ليموت بين ايديهم ركض خالد واخذ السكين وهو يصارخ هو وجابر ونايف وسالم ( نايف وسالم اصحاب مع خلف بس مو كثير نفس خالد جابر ) ويقولون : والله لا نربيكم  ي الكلاب مانتركم وركضوا ووراهم عمامهم وصقر وكثير من رجال الديره الي شافو الهوشه من بعيد وعلى وصول الرجال شافو واحد معه سكين بيطعن خلف بس وقفوه العيال ودخلو بضرب وهم يكررون : والله  مانتركم ونرجع الصاع صاعين والدم بكل مكان ونايف معه عصاء وغير ضرب اليد طبعاً وجابر وسالم كانت ايدهم كافيه ووافيه عن اي سلاح وهو ايدهم ثقيله وخالد سكين بس كانت صغيره ماتبرد قلبه قطها وهو يصفقهم ( يضربهم ) وخلف الي كان يتضارب مع واحد فيهم بس كان الطعن الي فيه قوي وعميق ولحقو الرجال وفكو الهواش الي خلى الدم متطشر من صالح واخوياه وخلف لانه كان لحاله وهم كثار اما الباقي ضربو بس مانضربو ولما انفكت الهوشه وهدا الضرب شوي ركضو العيال لخلف يسندونه والرجال انفلت منهم صالح الي كان معه سكين وطعن خالد نايف سنده بسرعه هو وسالم وجابر بنفس الحضه لا شعورياً ركض لصالح وضربه ومحد قدر يفكه من العصبيه الي دخل فيها وهو عنده كل شي الا اخوياه واهله خط احمرررر ووقفه خلف الي طاح مغمى عليه واسعفوه للمستشفى هو وخالد وصالح واخوياه وجابر ونايف راحو للمستشفى معهم
............... عند الحريم
اعتلى البيت صوت البكي وهم خايفين يصير لهم شي لانهم سمعو بسالفه سكاكين وذبح
ووعد الي من كثر مابكت داخت وطاحت عليهم وهي من بعد وفاة امها صارت تخاف تفقد اهلها وبعد نص ساعه قعدت وهي تسأل وش صار وتشوف الكل يبكي وقالت لها رغد : للحين محد جاء  يطمنا
ووعد خافت يصير بخوانها او خالد شي
ورجع البيت على صوت البكاء ينتضرون احد يجي يطمنهم
.....................
بالمستشفى
كان الكل ينتضر الدكتور يطلع يبشرهم على خالد وخلف خالد كان طعنته خفيفه وضمدوها  له اما خلف كانت طعنه بكتفه وبطنه وكلهن عميقات وحالته خطره وكسور وجو عمامه كلهم علشان محد يشره عليهم معاد محمد الي جاء وهو خايف عليه جاء الدكتور واتجه الكل له الدكتور : اهل خالد ابشركم اصابته بسيطه مافيه شي
محمد بخوف : وخلف عبدالرحمن وش صار عليه
الدكتور : وقفنا النزيف بس حالته خطيره اصابات عميقه وكسور نحتاج دم وارسلت الممرضه تشوف لنا دم يتطابق مع فصيلته
انتهى من الكلام وجت الممرضه تركض وقالت : مافيه نفس فصيلة الدم خلصت
محمد بغضب : يادكتور يرحم والدينك قل بسرعه وش فصيلة الدممم
الدكتور : A+ فيه مطابق ؟
محمد : انا انا
الدكتور : مانقدر ناخذ منك لحالك فيه غيرك
ناضر محمد اخوانه وكان فيه منهم مطابق بس ماتكلمو ضرب الجدار قوه بقهر ركض نايف لاقسام الانتضار يدور متبرع بس مافيه احد نفسه ورجع طاح على الجدار عندهم وحط يده على راسه وهو مقهور منهم.         ومحمد دخل يتبرع لين يلقون احد
جابر وقف بغضب مسح دموعه وقعد يصفق : ونعم ونعم العمام والله ... تشوفون ولد اخوكم طايح بين الحيا والموت وقاعدين ونتم نفس فصيلة الدم اخ اخ يلقهر صدق الله يخلق ويفرق بس لاتنسون ان اليتيم له حوبه ورجع على الجدار ضايق ودموعه تنزل من قهر وحزن وهي حالة خلف بنزول مستمر طلع محمد وهو يقول : ترف ونوف يمكن نفس الفصيله
وركض معه نايف والباقي ينتضرون بحزن ماعاد عمامه طبعاً الي يتمنون موته علشان ياخذون راتب ابو خلف والبيت ويتولون خواته اما جابر للحين يدور متبرع بس كان المستشفى مابه ناس كثير اليوم ومافيه احد نفس فصيلة الدم.      اما نايف ومحمد كانو مسرعين حيل وبيت اهل خلف كان قريب من المستشفى وصلو وهم يركضون وقف نايف عند الباب ودخل محمد واخذ البنات معه وركبو وهن يبكن بكى قطع قلب نايف ومحمد وصلو ودخلن تبرعو وخذهن محمد على طرف وهو يجلسهن على الكرسي ويهديهن اما خالد طلع من الغرفه ورفض يجلس بلغرفه وطلع عند غرفت الملاحضات ينتضر خلف يقوم بسلامه
.............................
في بيت الجد قايد
اتصل فيهم خالد وطمنهن انهم بخير وانه ينتضر خويه يقوم بسلامه وهدا وضعهم بس عم الهدوء المكان ووصلو الكل معادا خالد ونايف وسالم وجابر الي ضلو بالمستشفى عند خلف
...........................
في بيت خلف كانت ام خلف منهاره تبكي بعد ماجاء محمد وقال انهم يحتاجون دم واخذ البنات معه بس ماهي الا دقايق وطق الباب وكان جابر الي بعد ماتطمن على خلف راح للمركز وتوه رجع قالت ام خلف برعب : خلف فيه شيي !!
جابر : لا ي خاله كلموني وقالو حالته استقرت وساعه ويحطونه بالغرفه وانا جيت اوصلك للمستشفى عنده وانا رايح لهم
ام خلف ( مع انها هي ربتهم مع جابر وهم حسبت عيالها الا انها تتغطى عنهم لما كبرو ) كانت لابسه عبايتها ونقابها وقالت ببكي قطع القلب : ودني له الحين وانا امك محد طمني وانا خايفه عليه اطالع الله واطالعه
جابر بحزن على حالتها : يلا اركبي السياره مفتوحه وانا بجيب لك مي من البقاله تهدين فيه اركبت وجاب جابر المي وعطاها
ام خلف : من الي سوا هسواه الي مايخاف الله
جابر : هاذا شباب متهاوشين معنا من 3 سنين وهم كل فتره بضرب معنا ولما شافو خلف لحاله وهم كثار سوو الي سووه وماعليك انا اخذت حق خلف وهذا هم مقطوطين بسجن
ام خلف : ي يمه لتشمت فيهم والله يعين اهلهم وانتم ي يمه تنازلو عشان اهلهم حرام انا جربت الشعور اليوم شعور يقطع القلب
جابر : ي خاله لو تنازلنا بتضمنين انهم مايتعرضون لنا بشي متضمنين المره الله ستر بس غيرها الله اعلم وش بيصير هاذي كم سنه تخليهم يمشون زين
ام خلف : الله يعين اهلهم ويصبر قلوبهم هلكم سنه
جابر : امين
.......................
في بيت ابو خالد
وصلو وهم خايفين على خالد وسالم ليروح يسوي شي 
المها بخوف : يالله خايفه على خالد ترك الغرفه والمغذي علشان خلف
سلمى : مدري وش عنده يخلينا نقلق عليه المفروض يرتاح ويجلس خويه مو طاير نايم
حلا : وانتي ماتعرفين تسكتين ابد الناس عندها مشاعر
جود : ماتعرف ولازم نعلمها انهم اكثر من اخوان ومتربين مع بعض
سلمى : وانا وش قلت يتطمن على جرحه ويرجع يسوي الي يبي كيفه مو يخلينا على اعصابنا
حلا : ماعليه سالم معه ينتبه له
المها : بس يلا انتي وياها وقومو نسوي العشاء لابوي ليعصب ويعلمكم الكلام الزايد
قامو وسلمى للحين تحلطم ( اتوقع معروف معناه 😅)
......................
في بيت تركي
وعد كانت حالتها تقطع القلب بس لما جا نايف وتطمنت هدت بس للحين خايفه على خالد وزاد خوفها يوم عرفت ان طلع من الغرفه الي بالمستشفى ينتضر خلف وصحت على صوت نايف يقول : يبه انا برجع للمستشفى بس جيت اطمنكم
ابو صقر : رح وطمنا عليه واذا قعد قل له بجي ازوره بعد الدوام
رغد : احط لك عشاء قبل لتروح له؟
نايف : لا يروحي بروح ماقدر اتأخر
وعد بضحك تحاول تخليه يضحك هي بعد : ايي وحنا مسحوب علينا الغلا راح لخلف و عيال عمك وحنا لا
نايف ضحك وقال بمزح : اي ي عمري وانتي اخذت عقلتس بعد روابي
صقر وهو يضحك : اقول قم قم وانا بقعد مع خواتي ونضحك ونسولف
وعد : ونحش فيك بعد
نايف : افااا سحبتو علي خلاص
رغد : طاح كرتك
الكل : هههههههههههههههههههههههههههههههههههههههههههههههههههه
ابو صقر : وين للي مستعجل
نايف : اي والله يلا مع السلامه
الكل : مع السلامه
وبدا السوالف والجو يهدا
............................
اما بيت ابو جابر
كان الوضع هدوء تام بما ان مافيه احد غير روابي وابوها وامها
روابي : افف البيت يضيق الخلق من دون جابر
ابو جابر : وحنا مو مالين عينك ؟!
روابي : الا يبه بس انتم هادين مافيه شي نقوله او نسولف به
ام جابر : لا وانتي الصادزه القطو مايحب الا خناقه
ابو جابر وروابي : هههههههههههههههههههههههههههههههههههههههههههههههههههه
ابو جابر : دام تعشينا وخلصنا ان ودك اوديك عند وعد ورغد تم ؟!
روابي وقفت وهي تحضن ابوها : كفووو والله ابو جابر المحزم ...... بس ممكن طلب صغيرر
ابو جابر : وشو !
روابي : تتصل على عمي تقول له ناخذ البنات معنا حرام لحالهم محد يوديهم خالد وسالم بالمستشفى
ابو جابر : تم
وركضت تجهز وتصل ابو جابر على اخوه ووافق ابو خالد
...........................
في بيت العمه سعاد
كاااان هدووء محد يبي يتكلم غير جواهر وابوها موقفو سوالف
جواهر بخبث : يبه امس البنات كانو يسولفون ويقطون علي كلام تهاوشت معهم وتخيل كلهم علي حتى اختي اختي ماتكلمت ولا دافعت عني وهم يسبون بتربيتك لي  وساره ساكتهه ولا نطقت بحرف ابد والله
وبدت تسوي حالها تبكي وقام ابو جواهر ضرب ساره كف وسحبها مع شعرها وقال بغضب : والله والله لو عدتي الحركه ذي مراا ثانيه لتموتيين فاهمه
دخلت سعاد بصدمه وطاح الصحن منها وهي تركض تفكهم وقالت : فكها فكها كسر يكسر ايدك ولا والله اتصل على اخواني يربونك زين
تركها ولف على سعاد وصفقها كف قوي لف وجها وقعد يضرب ويكرر : تهددينيي انا ي سعاد وبمنو بخوانك نشوف
ساره : يبههههه خلاااص خلاااااص تعبت من كثر الهواش تعبت حرام عليك والله ترا انا بنتك وامي زوجتك مو بس جواهر 
جواهر وهي واقفه عندهم : وليهه ي روحي حاسدتني حب ابوي وبعدين يبه مو تضرب امي مالها دخل
ابو جواهر بغضب : الي اشوفه يعلى صوته بلبيت ياويللله فاهمين ........ راح لغرفته
جواهر : عاجبك الحين سويتي كل هالمشكله وضرب ابوي امي زين انا بفندق مو عند جدي بس
ساره بغضب : اقسسسسمم بالله لو ماتذلفين ياويلك
جواهر بصراخ وخبث : خفتت لا بالله لتسوين شي وش بيدك اصلاً تضربيني مثلاً 
سعاد : بسس جواهر الضاهر اني ماعرفت اربيك من دلع ابوك بس اكثر من كذا ياويلك اسمعك تعلين صوتك فاهمه ماتخافين من ربك لما يسئلك عن بر الوالدين ؟؟!!
جواهر : انا ماعقت يمه بس انتِ تفرقين بينا هاذا هي تصارخ ليه ماقلتي شيي ولا بس جواهر لها صوت
راحت لغرفتها وبقت ساره تهدي امها وهي لحالها تبي احد يهديها قررت تعلم خوالها والي بها بها ولا تشوف امها كل يوم بهالحال تبكي
..........................
بالمستشفى
صحى خلف وهو يحاول يكون قوي قدام الكل علشان محد يخاف عليه اكثر وبالاخص خواته وامه الي يطالعون الله ويطالعونه وبعد ماسلمو اخوياه طلعو علشان خواته يقدرون يدخلون
ترف ببكي : خلف انت بخير !
خلف : اي يعيون خلف بخير ومابي شي وانتي لا تبكين خلاص هاذا انا قدامك
نوف بدموع ماوقفت : يس شوف انت بالمستشفى شلون بخير وانت هينا ؟
خلف بتعب : ابد والله اذا تبين اطلع الحين اطلع ومقعد دقيقه هينا
نوف : لا لا نبي تقعد هينا ونتطمن عليك
ترف بغضب : الله ينتقم منهم اذا بياخذونك منا وانت ابونا واخونا وكل شي بنسبه لنا حتى انت ياخذونك بعد
خلف بتأثر بالي قالته : ابد والله محد ياخذني منكم وانا ولد ابوي يبطون عضم
ترف ونوف : الله يخليك لنا ذخر
ام خلف : يمه انت نم وارتاح معليك منهن ترا بس يسولفن
خلف : لا من امس وانا نايم ابي اقعد معكم وبعدين يزين سوالفهن والله انها احلا من العلاجات الي يعطوني ايها
ام خلف بضحك : علاجات تجيب الصداع
الكل : هههههههههههههههههههههههههههههههههههههههههههههههههههه
وبعد دقايق طق الباب خلف : منو
جابر : انا ومعي الدكتور
خلف : دقيقه .... بنات تغطو واطلعن شوي بس لما يمشون الرجال
ترف : يصير نرجع اخر شي ورا ونبقى هنا؟
خلف : كل شي لترف ونوف يصير
ترف : كفو ....... تغطن وارجعن ورا اخر الغرفه وجو الرجال والدكتور وطمنهم ومشاء
خالد : ها كيفك اليوم ؟
خلف : بخير الحمدالله بس انتم متى امداكم رحتو و جيتو
جابر : ابد من السالفه وهاذا حنا عندك ماتعديناك
خلف : وليه مارحتوا ترتاحون انا بخير
نايف : مالنا راحه الا وانت برا المستشفى وان تبي تهاوش هاوش خالد مطعون بكتفه وماقعد بالغرفه واقف هنا
خالد : لا والله واخليكم وانا ارتاح معصي
خلف : وانت سوال من صاقعك على راسك وقايل لك اني بموت ترا انت طعن وانا بعد يعني المفروض انا اقوم بعد عندك
خالد : لا انا خفيفه وطعنه وحده وانت 3
خلف : انثبر انثبر ارتاح على الكرسي وجابر ماعليك امر ناد الدكتور ابي اطلع اليوم
سالم : لا لا تقعد ومافيه روحه وبعدين ابوي وعمامي والعيال جايين
خلف : ماله داعي والله وبعدين مامنك رجا بي ابد طالع اليوم طالع
جابر بضحك : شوف الطيب ماينفع معك اعرف من يقدر عليك .. ي خاله يرضيك يطلع وهو بهالحال
ام خلف : لا والله مايمشي وهو بهالحال ابد
خلف بضيق : يمه لا تحلفين الله يرضى عليك وبعدين تعرفيني محب المستشفيات ابد
ام خلف : لا اعرفك ماتحب تخلينا لحالنا وحنا نقعد عندك لين تتشافى والله ي خلف ماتطلع الا اذا تبي تكسر حلفي
خلف : يمه انا بخير والله ومابي اكسر حلفك وبعدين البنات وين يقعدون والمدرسه
ام خلف : بعد المدرسه ينزلون هنا مي مشكله
جابر : لا ي خاله انا عندي الحل انا والعيال عند خلف كذا او كذا وابوي عند جدي بيقعد عنده كم يوم لنه تعبان روحو عند اختي وامي بالبيت مافيه احد اقعدو انتم عندهم لين يطلع خلف
خلف بحده : معصي عندهم بيت ويقعدون به وانا بطلع
جابر يمثل العتب علشان يرضى خلف : خلف تضايق انهم عندنا وانتم حسبت اهلي وماعليك ترا البيت مابه احد
خلف بضيق : لا ي جابر والله ماتضايق من كذا بس انت تعرف طبعي زين
خالد وسالم : خلف وخواتي وامي بعد يروحون لبيت عمي ابو جابر بعد يتونسون مع خواتك وامك خلهم يغيرون جو والمدرسه مي مشكله اذا قصدك علينا خل عمك يوديهن او يغيبن بكرا وبعد بكرا ترا عطله
نايف : وخواتي بعد يروحن عندهم وانت لاتشيل هم كلها كم يوم بس ترا معرفتك عنيد
خلف سكت شوي وهو مايبي يكسر حلف امه وبنفس الوقت مايبي اهله يقعدون بمكان ماهو بيتهم ويكونون ضيوف فيه ولما فكر شوي شاف ان خواته فعلاً طفشو من البيت وقرر يخليهم علشان يغيرن جو ولايكسر حلف امه غير ذا يخلي اخوياه يشكون انه مايثق فيهم وهو يثق فيهم وماقصد عليهم اصلاً : خلاص تم بس بشرط بكرا اطلع
الكل : تم
ام خلف : الله يرضى عليك
خلف : امين ... وانتضرو عمي يجي يوديكم
ام خلف : ابشر
وبعد الكلام ذا دخل العم محمد وقالو له رفض بالبدايه انهم يروحون وقال يجون عنده بس اقنعوه وداهم لبيتهم ياخذون اغراض بسيطه تكفيهم يوم او يومين بس وباقي العيال كل واحد راح يقول لاهله ويوصلهم ويرجع الا سالم لان خالد رايح لهم ماله داعي كلهم يروحون
...........................
بيت تركي ابو صقر
دخل نايف وشرح لهم كل شي
وعد : يعني بنتعرف عليهن ونقعد معهن يومين ؟
نايف : اي ولاوصيكم عليهن ترا خلف خويي من عمر
رغد : لا توصي واصلاً حنا شفناهن كم مرا مع امهن ونعرفهم وبنتعرف عليهم اكثر اليومين ذي
وعد : اي انا وروابي وسلمى من زمان ودنا نتعرف عليهن زين
نايف بضحك :انتي وروابي وسلمى ابعدوا عن البنات فكوهم ترا خلف رباهن على الادب مو القافه زيكن
صقر بضحك : والله ماضنتي دامك خوي اخوهن
وعد ورغد وهن يصفرن ويضحكن : كفوو والله انك احسن منه تدافع عن خواتك 
نايف : اقول اخلصي
وراحو يخلصون وماهي الا دقايق وخلصن وصقر وصلهن ونايف راح للمستشفى
.............................
ببيت خالد ابو جابر
شرح لهم جابر بعد كل شي ووصاهم
روابي : وليه ماقلت بدري ابي افهم الحين متى يمدي نجهز حلا وقهوه ونرتب ونبخر هاا
جابر بحده: وانتي وبعدين مع طولت السان خلصي اقول وماله داعي حلا سوي قهوه بس وبخور دقيقه تراه ويخلص مو صناعة صاروخ
روابي : احلف بس
ام جابر : ماعليك يمه منها الحين اجهز كل شي بسرعه وهي تساعدني لاشيل هم 
روابي : ومتى يمدي اكشخ اجل
ام جابر : لاصرتي قرمه ( سنعه ) وتخلصين بسرعه
ضحك جابر وقال : عاشت ام جابر سددي لها كل شوي
ام جابر : ماعليك منها تراها امس تقول البيت مو حلو من غيرك
جبر بضحك : ادري اني الملح والقبلة اكيد
روابي : لا لتصدق حالك بس
راح للمستشفى وهم قعدو يخلصون بسرعه كل شي ويرتبون
...........................
ببيت فيصل ابو خالد
دخل خالد وشرح كل شي بسرعه
سلمى : زين يعني بنتونس ونفلها ببيت عمي
المها : حنا وين وانتي وين افهمي البنات حالتهم حاله خايفين على اخوهن مو جايات مسيرات
خالد : فهميها ومو تقعد تستعبط عندهن لانهن ماوقفن بكي من امس توهن هدن يوم قعد خلف
حلا : يروحي هن واضح يحبن اخوهن حيل لما شفتهن اخر مرا
خالد : اي خلف هو الي مربيهن هن اصلاً مايذكرن ابوهن حيل
جود : خلاص فهمنا عليك وانا مسويه حلا باخذه معنا لبيت عمي اكيد انهم محتاسين مو مسوين شي
خالد : يلا يلا بس خلصو بسرعه
وراحن يخلصن ودخل ابو خالد الي توه جاي من القهوه
ابو خالد : وين الناس مافيه احد
خالد : يبه خويي خلف اهله راحو لبيت عمي خالد لين يطلع بسلامه بكرا وقلت اودي البنات هناك مع خواته يقعدن لبكرا وهو بكرا بليل يطلع
ابو خالد : وحنا من يقعد عندنا هنا يسوي اغراضنا وحوستنا واكلنا
خالد : يبه الرجال ترا رفض بس حنا اصرينا بعد الهوشه وهو تعبان لازم يقعد بالمستشفى ومايقدر يخلي اهله لحالهم وانت عارف ابوه متوفي وعمامه ماش بس واحد وخلف مايبي يسوي له مشاكل اكثر
ابو خالد : خلاص طيب بس تراك تحمل انت وعيال عمك تجهزون لنا اكلنا واغراضنا ببيت جدك
خالد بضحك : ابشر صقر عندك ماعنده لا شغل ولا مشغله .... وانحاش قبل لبوه يهاوشه
وبعد ذا كله حطو غداء ابوهم وطلعو وراحو لبيت عمهم
............................  
ببيت خلف
ترف : عمي خلصنا
نوف : وانا وامي بعد خلصنا نمشي الحين !
محمد : ي بنات خلونا ننتظر شوي الناس مايدرون اننا نجيهم مايمدي يسوون شي عيب ندخل كذا وش يقولون
ام خلف : عمكن صادق ننتضر نص ساعه على الاقل
ترف ونوف : ابشرو
محمد : لا اوصيكم اي شي تبونه قولو لي واذا احد ضايقكن علمني والمدرسه تداومن وانا اوديكم وارجوكم
نوف : ماتقصر ي عمي
ترف : خيرك سابق
محمد : يلا جيبن قهوه نتقهوى ونروح
راحت نوف وجابت القهوه وقعدو يتقهوون ويسولفون وعمهم يوصي وبعدها مشو 
...........................
ببيت خالد ابو جابر
روابي قعدت بتعب : اخيراً خلصت توقعت يجون وانا للحين
ام جابر : اي بس لصار الموضوع يهمك غيره مامنتس فود ( مامنك فايده )
روابي : حرام عليك ومن كل يوم تقعد تكرف معك (تشتغل معك )
طق الباب وقالت ام جابر بضحك : يلا قومي فكي الباب ورينا شطارتك
وركضت روابي تزيد البخور وتفك الباب قالت : يهلا اخيراً جيتن انتضر من اليوم احد يجي يكرف معي
رغد بضحك : اي اخيراً تحركتي وسويتي شي وبعدين حنا ضيوفتس تذكري
رغد : ماعليك منها سوينا الغدا لابوي والعيال وجينا
روابي : يلا حياكم ادخلو وذي انا اوريها من لقى احبابه نسى اصحابه
دخلو وهم يضحكون وسلمن وقعدو
رغد : شخبارتس ي خاله
ام جابر : الحمدالله وانتن لكم يومن ماشفناكن اخباركم اخبار اخوانكم 
رغد : بخير يسلمون عليك
ام جابر : الله يسلمهم روابي وعد جت وجلستي قومي قهوي
روابي : انشاء الله
وقعدو يسولفون وماهي الا دقايق وطق الباب وقامت روابي تفتح : هلا هلا والله حياكم
ام خلف : الله يحييك ي حبيبتي
ترف  : هلا فيك
روابي ببتسامه : تفضلو حياكم مافيه احد غريب
دخلت ام خلف : السلام عليكم
ام جابر : وعليكم السلام تو منور البيت
ام خلف : منور بهله
وبدا سلام وسوالف وضحك وبدو البنات يخذون ويعطون مع بعض وتطيح الرسميات شوي شوي
ام جابر : روابي وعد تعالو
طلعو للمطبخ ام جابر : اتصلو على عمتكن خلوها تجي
وعد : لا يخاله تكفين نبي نرتاح من جواهرو الحيه
روابي : اي ييمه مانبي مشاكل والبنات تو مايعرفونا زين عيب يشوفن هواش من اولها
ام جابر : بلا كلام زايد واتصلو فيها هي وش دخلها ببنتها وبعدين ذي عمتكن قص يقص السان
روابي : طيب طيب
...........................
ببيت العمه سعاد 
اتصلت فيهم روابي وقالت لهم وقالت العمه سعاد اذا قدرت جيت
سعاد : اا ابو جواهر
ابو جواهر : خير
سعاد : اهلي مجتمعين ببيت خالد وعندهم ضيوف عادي نروح لهم ؟
ابو جواهر : لاا
سعاد : طيب
جواهر : يبه نبي نروح
ابو جواهر : مو قلتي انهم مايبونك و مايحبونك !
جواهر بلعانه : الا بس انا بروح اربيهم واجي
ابو جواهر : كفو بنيتي قويه على ابوك
جواهر وهي تضحك : تربيتك
ابو جواهر : يلا قومو اجهزو
كل ذا صار قدام ساره وسعاد الي خلاص طفشو من الحياة ذي بس سعاد لاتزال تبي تسكت وماتتكلم علشان ماتسوي مشاكل وساره كان ودها تقول لخوالها كل شي يمك يقدرون يفهمون ابوها غلطه بس كانت تسكت لانها مع كل ذا تحب ابوها وماتبي تغثه بشي ... ركبو السياره ومشو
.............................
ببيت خالد ابو جابر
رغد : وانشاء الله تنبسطون عندنا اليومين ذي
نوف  : والله القعده معكم ماتنمل
وعد : انا احس ترف بتنضم لشلتنا ونوف مع رغد والباقيات
روابي : اي والله
ترف : وش فرق شلتكن عن الباقيات
روابي بضحك : شوفي انا ووعد وسلمى وساره ومرات جود شلتنا ضحك ووناسه والباقين الهدوء والعقل وهاذا شي ممنوع عندنا
ترف : زين فيه احد زيي يحب الضحك والوناسه
وعد: اي افا عيلك
نوف : عاد هاذي معطيه البيت جو وخلف يفقدها اذا صارت هاديه
رغد : الله يقومه لكم باسلامه
الكل : امين
طق الباب وقامت وعد تفتح الباب وجو بنات عمهم فيصل وسلمو وقعدو يسولفون ويحشون بجواهر وبعد فتره طق الباب وجت عمتهم سعاد وبناتها وكان واضح على ساره انها كانت تبكي حتى لو انها تضحك واخذوها وعد وروابي وسلمى داخل يشوفن وش فيها
وعد : ساره حبيبتي وش فيك
ساره : مافيني شي
روابي : الا واضح انك تبكين وشوفي عيونك حمر
ساره : لا مافيني شي وجهي وعيوني من المكياج
سلمى : ساره حنى نعرفك زين ماتحطين مكياج وهاذا وجهك مافيه مكياج لاتكذبين علينا
وبعد اصرار من البنات انهارت ساره تبكي وتقول لهم كل شي وهاذي اول مره يعرفن ان ابوها يضربها هي وامها وكرهو جواهر على الكذب الي قالته
سلمى : ساره لاتخافين وعلمي ابوي وعمامي وتأكدي انه مهما صار مايخلونك انتي وامك عنده
وعد : ليه ماقلتي لنا من زمان وانتي عارفه اننا ستر وغطى عليك واذا ماكنتي حابه تعلمين عمامي كيفك القرار لك
روابي : معقوله تسوي فيكم كذا جواهر مهما كان انتم اهلها حنى ممكن ماتحبنا علشان كذا بس انتم ليه ؟؟!
ساره بدموع ماوقفت : لتعلمون خوالي مهما كان انا بسكت لان امي طلبتني ماقول لحد وجواهر انا مادري ليه هي كذا ماتحبني وتغار مني مع انها هي كل شي تبيه عندها وابوي يحبها وامي مع كل ذا تحبها وما ترفض لها طلب وانا قلت لكم لاني تعبت والله انا كل يوم انضرب من دون سبب غير كلام جواهر الي يسم البدن
البنات قالو لها تروح تغسل وجهها وتجلس معهم وتنسى مل شي وتنبسط وهم اصلاً كانو بحالة صدمه وتفكير كيف بيساعدونها ورجعو عند الحريم ينتظرن ساره تغسل وجهها وتجي عندهن وكانت يشوفن جواهر بنضرات الكره 
ويقولن الي تسوي كذا مستحيل انسانه تكون اما ساره راحت لحمام ( الله يكرمكم ) الي ورا علشان بتفضي كل الدموع الي فيها وترتاح وتغسل وجهها
..............................
عند العيال بالمستشفى
كانو يسولفون ويضحكون وجابر طلع بيروح يجيب ملابس من بيته علشان يقعد ببيت عمه تركي لين يروحن الحريم وهو رايح دخل مع الباب الخلفي لان ماحد يروح له ومايكون فيه حريم هناك بس شاف بنت تبكي بحرقه وتغسل وجهها وترجع تبكي ماقدر يسكت ويروح وقال وهو صاد : من انتي وليه تبكين؟
ساره الي خافت : اا اانت من
جابر : انا جابر خالد انتي من !!!!
ساره الي من الخوف سكتت وجت روابي بسرعه
روابي : جابر لحضه ساره داخل
جابر بصدمه ماتوقع انها ساره ابداً : ماكنت ادري شوفي لي الطريق
روابي بعد ماقالت لساره تنتضر شوي رجعت وقالت : ادخل بسررعه واطلع ولاتجي فيه ناس
جابر : طيب .. اخذ اغراضه وطلع وهو مو قادر يمش من الصدمه
.....................
بعد مرور 6 شهور
خلف واهله رجعو نفس قبل والشي الي تغير انهم ينتبهون لخلف وجروحه لين راحت ونوف وترف قوت علاقتهم مع بنات القايد وصارو يروحون لهم من فتره لفتره **
اما بيت خالد ابو جابر كملو روتينهم العادي بس جابر كان بعالم ثاني يفكر بساره وقتها وهي تبكي وزاد تفكيره فيها لما سمع بلغلط وعد وروابي يتكلمون بموضوع ابوها وكيف يساعدونها وهو يفكر فيها كيف بيساعدها بعد لان الي يسويه ابوها غلط كبيرر وهو ماكان يدري انه يضرب عمته بعد لو درا بيقوم الدنيا ولا يقعدها وهاذي عمته مايرضى عليها
اما روابي طلعت نتيجتها وقررت تكمل بس مأعجب الموضوع عمها فيصل وحاول يغير راي ابوها بس ابوها كان موافق ومحد غير رايه وجابر وقف معها وساعدها **
اما بيت تركي ابو صقر كان بيت الضحك والوناسه والمقالب بعد ماجو نايف وصقر ورغد وصار استنفار بلبيت لان زواج صقر قرب اما وعد طلعت نتيجتها وقررت تكمل دراسه بس نفس ماصار مع روابي صار معها ووقف معها ابوها واخوانها بس كان مخاوفها ان خالد يرفض انها تكمل اذا تزوجها وكانت تحاول تبعد الفكره كثر ماتقدر **
اما بيت فيصل ابو خالد كان زعلان على اخوانه بس يوم شافهم ماراح يغيرون رايهم سحب ايده من الموضوع اما عياله كانت حالتهم ضحك ووناسه وقصايد ويسهرون فوق السطح بس اذا قعد ابوهم الكل يختفي ويصير البيت هدوء تام خالد كان مضايقه من موضوع وعد بس هو ماعنده مانع بدراسه والمصيبه ابوه وكان يدور الوقت المناسب علشان يفاتح ابوه بموضوعها بس ماصار الوقت وسالم كانت حياته عاديه دوام ولما يخلص يروح مع خالد مزرعة ابوه بالبر ويشوفون الحلال ويتوتسون مع الخيل **
اما سعاد كان بيتهم نفس ماهو كل يوم هواش وضرب وبكي وجواهر يزيد كرهها وساره كانت تفكر بجابر وحنيت صوته لما سألها ليه تبكي بس ماطول تفكرها ورجعت تعيش الاكشن الي ببيتهم والصراخ  ** 
.............................