يهزمني الحُب وانا جاهل بدرب المُحبين

البارت السادس والعشرين

طلع كاسر وتلطم وركب مع ياسر وهو فرحاااان بعد شوف وعد عكس وعد اللي م تدري وش صار فيها وتمنت ان كاسر حلالها وانه هو اللي دخل بدال بدر كانت تعض اصابع الندم وتواسي نفسها وتقول ( عادي خيرة يمكن بدر احسن من كاسر ) وهي تدري ان م فيه احسن من كاسر شكلاً وجسدًا وروحًا ومظهرًا واهم من ذي كلها م فيه ارجل من عيال محمد لا رعد ولا كاسر 
_______••______
عند فارس وحنين رجعوا الفندق وجهزوا اغراضهم متجهين للنمسا
فارس ابتسم : عيوني خلصتي ؟
حنين لفت له بحب : ايه يحبيبي خلاص اتوقع
فارس : عباياتتس وينها ؟
حنين : فالشنطة
فارس : مكياجتس ؟
حنين ابتسمت : موجود برضو
فارس : مناشفتس والصابون حقتس وكل شيء ؟
حنين : فالشنطة معليك
فارس ابتسم : اجل مشينا
حنين وقفت وحضنت فارس وقالت : انا من غيرك وش اسوي
فارس شّد عليها : لبى والله روحتس يالحنين
حنين ابتسمت وهي تحب فارس من اعماقها وكانت تتمنى هاللحظة تصير حقيقة وصارت وهي للحين مو مستوعبة كيف ربي كتب لها فارس من نصيبها
طلعوا للمطار متجهين للنمسا
—
في بيت رعد
رعد : هيام وينتس ؟
هيام كانت فالدور الثالث تحط الغسيل فالغسالة : موجودة
رعد دخل غرفتهم وطفى النور ونام علطول
هيام كانت تشتغل بحكم انها راكمت الاشغال عليها وقالت : يحسرتي عندي زوج يهتم لأهله اكثر مني ومن نفسه اليوم الصباح كنت اشوف بحر المالديف والحين اغسل المواعين وانتظر الملابس تخلص !
طلعت ودخلت الغرفة وشهقت : ناام !
رعد كان داخل كيس النوم ولا حس فيها اصلاً
هيام بحرقة همست : حسبي الله عليك رجعني المالديف !
رعد فتح عين وحده بخفه وقال : هياام سدي حلقتس !
هيام فزت وهمست : وجع كيف سمع ذا !
رعد رفع صوته : احلفي ؟؟
هيام ركضت وطلعت برا الغرفة ونزل رعد ثوبه ورجع ينام وهو دايييخ من المطار والسفر اما هيام لبست سماعتها وشغلت اغاني وكملت شغلها وكانت الساعة ١٢:٣٠ وم حست فالوقت ونظفت كل زاوية فالبيت وخلصت الغسيل ورفعت راسها بقوة وطاح الرف عليها وصرخت : الله ييااااخخذذك ااااه راااسسسيي
رعد تحرك من نومته وفتح عين وم شاف هيام جنبه ولف واخذ جواله وكانت الساعة ٣:١٣ الفجر تكلم وقال : هيياااام
هيام كانت تفرك الضربة وقالت : هاااااه ي رعد
رعد عصب : وجع وش هاه !!
هيام نزلت ودخلت الغرفة وقالت : اص بالله عشان م افصل علييك !!
رعد صد وداخ من جديد
هيام بنفسها ( خير يويلي وشفيه ذا دايخ الله يستر بس )
قربت منه وحطت قفى يدها ع جبهته تشوف حرارته وكانت عادية جدًا وقالت : اشوا
رعد وسط نومه : بتنامين ولا كيف يالجنية !
هيام بعصبية : يرجااال احمد ربك ارتب بيتك المعفن ذاا
رعد ابتسم وقال : يساتر صدق
هيام م ردت وراحت تتروش وطلعت ولبست بجامتها وبدون م تمشط شعرها علطول نامت فالطرف الثاني من السرير بعيد من رعد
_____••_____
في بيت ابو رعد
كاسر صحى وهو مروق ومتنشط ونزل وحصل جدته فالصالة : يالله صبحها بالخييير
باس راسها وابتسمت وقالت ام محمد : هلا والله بولدي هلا
كاسر : جدة شرايتس نطلع والله مليييت من البيت
ام محمد بضيق : توديني لمزرعتي منزمان م رحت لها
كاسر فز : ابشششري والله بسعدتس
ابو محمد دخل : سلام عليكم
ام محمد وكاسر : عليكم السلام
قام كاسر وسلم ع جده وجلس وقال : شرايك يجد تخاوينا ؟
ابو محمد قطب : وين ان شاءالله ؟
ام محمد : قاضي
ابو محمد لف عليها : سمي
ام محمد بضيق : ابي مزرعتي
ابو محمد : ابشري باللي يرضيتس
كاسر ضحك : اتحدداااااك يالجد الخفييفف
ابو محمد م فهم وقال بعصبية : وش تقوول انت هااااه !
كاسر انفجر ضحك : ولا شيء سلامتك
ابو محمد : معكم من الحين للعصر وبنمشي قولوا للعرب يخاوونا وكلم رعد بعد
كاسر اشر بأصبعه ع خشمه : على خشمي
طلع ابو محمد للمجلس يقيّل ( قيلولة الساعة ١١ )
كاسر طار لجواله ودخل القروب وسجل فويس يقول فيه : سلام عليكم جميعًا صبحكم الله بالخيير معكم اخوكم وولدكم كاسر متجهين بأذن الواحد الاحد فالعصر للمزرعة حقت ام محمد بحدود الرياض والكل يعرفها واللي وده يجي الله يحيه واللي م يبي الله يستر علينا وعليه تنبية اسبوع كامل بنكون هناك جهزوا عفشكم ولا تجون بيدينكم فاضية وسلامتكم .
بعد نص ساعة اتفقوا الكل الا رعد اللي للحين م فتح جواله
كاسر اتصل عليه ووصله صوت رعد
رعد : ارحب
كاسر ابتسم : الله يبقييي من يررحبب
رعد : امرني يالكاسر
كاسر : شفت الواتس ؟
رعد قطب : لا ليه ؟
كاسر : تستهبل انت !
رعد : كاسر لا تغثني اخلص !
كاسر ضحك : بتجي انت وهيام للمزرعة ؟
رعد : هاه ؟
كاسر : ولد فيك شيء ؟
رعد ابتسم : لا بس ان شاءالله بنجي متى ماشين ؟
كاسر : العصر
رعد شهق : اوووه انا فالدوام الحين عطيتوا هيام خبر ؟
كاسر : مدري والله م اتوقع دق عليها انت
رعد : يالله سكر
( سكر كاسر وكان رعد يسمح لأهله بس يسكرون قبله )
رعد دق ع هيام
هيام : هلا
رعد : جاهزة ؟
هيام ابتسمت : ايه ابشر بي بس
رعد : قسم بالله انتس كفو !
هيام : متى جاي ؟
رعد : فالدوام والله ومطول بعد الساعة ٤ العصر بجي البيت خليتس جاهزة
هيام بملل : عادي اروح مع محمد ؟
رعد زفر بعصبية : لا طبعًا
هيام : تكفى تكفى
رعد احتد صوته : هيااام لاتغثييننيي انتي مرتي وانا المسؤول عنتس خلاااص !
هيام بزهق : طيب خلاص لاحول ولا قوة الا بالله !
رعد سكر بعصبية وقال : استغفر الله لازم اعصصب
منصور دخل : شسالفة صوتك واصل برا
رعد ابتسم وقام يسلم عليه وقال : ابد والله كنت اكلم
منصور : اسمع انا بطلع اليوم املك
رعد فز : احلف بالله !!
منصور ضحك : والله
رعد حضنه : مبروك والله اطلع معك ؟
منصور : اطلق خوي والله مشينا
رعد ضحك وهو استغل الفرصة ووقع وطلع وكان سابق الوقت بثلاث ساعات
اتجهوا لبيت ابو ضاري
ابو ضاري : ارحبوا والله
منصور ابتسم : الله يبقيك ياعم
رعد : هلا هلا بعمي
ابو ضاري : اقلطوا
دخلوا لمجلس الرجال ونادوا سلمى توقع عشان تملك ع منصور ووقعت وانتهوا وقال منصور : ياعم عادي ادخل اشوفها
ابو ضاري ابتسم : ابد خذ راحتك
دخل منصور وتنحنح وهو جاي ببدلته مستعجل عشان طلب سلمى له امس وقال : مبروك للمره الثانية والله يجيب الثالثة
ابتسمت سلمى بتسليك وقالت : الله يبارك فيك توك طالع من دوامك ؟
منصور ضحك : ايه
سلمى قربت وشهقت : وااااوو يالشارات !!!
منصور حضنها وقال : شرايتس برجلتس بس
سلمى كانت تحترق وماهي عارفة تتصرف مع الاوضاع ذي وقالت : ممكن تبعد ابي اتنفس
ضحك منصور وبعدها وقالت : ماشاءالله جعلها في ازدياد يارب 
منصور لاحظ ان سلمى ماهي نفس اللي كلمها امس وقال : غريب نفذت لتس طلبتس وللحين ضايقة تبين عيوني ؟
سلمى اتسعت عيونها وقالت : هاه وش تخربط انت من اللي قالك اني متضايقة ؟
منصور احتدت نظرته وقال : سلمى فيتس شيء وبعرف وشهو قبل اطلع
سلمى طنشته وقالت : الله يبارك فيك والله يتمم ع خير
وطلعت وخلت منصور مصدوم وراها وهو م يدري ان سلمى كذا م تحب الحب ولا شيء ولا تبي تقرب منه اصلاً
طلع وهو منلخم وقال : يالله يالرعد ؟
رعد قام : يالله نستأذن ياعمي والله يتمم لهم يارب
ابو ضاري : الله يوفقكم يارب
طلعوا منصور ورعد
رعد لف له وقال : شفيك شكلها م اعجبتك
منصور بصدمة واضحة : خلك من ذا الحين انا مصدوم
رعد ضحك : ليه ؟
منصور : بنت عمتك ذي ماهي صاحية
رعد : افا وش سوت بعد ؟
منصور بجدية : امس تكلمني وكانت تهبل وتجذب الواحد واليوم دفشة وم تبيني يولد وش ذي اللحسة !
رعد ضحك بقوة : اييييه هي كذا سلمى م تدري وين تدربي براسها بس معليه تروّضها ان شاءالله
منصور : الله يقوينا
رعد ابتسم وقال : تخاوينا ؟
منصور قطب : وين ؟
رعد : مزرعتنا
منصور : تم
رعد ابتسم : انشهد بالله انها مرحبا
منصور ابتسم : يالبيه يالرعد
رعد ابتسم وباسوا خشوم بعض ( سلام الرجال )
مشوا متجهين لبيت ابو منصور ودخل منصور ركض وجهز له ملابس حقت ٣ ايام بحكم انه م بيطول ورجع ركض وركب وقال : توكل ع الله
رعد ضحك : باقي الحب
منصور ابتسم : بالله ؟
رعد هز راسه بنعم واتجهه لبيته عشان ياخذ هيام
وصل ودخل وقال : ياهيام الرعد مشينا ؟
هيام كانت تبخر شعرها وقالت : لبيه يروح هيامك اصبر شوي
طلع رعد وهو مستعجل واخذ الاغراض اللي كانت ع الباب وركبها فالسيارة ورجع ودخل للغرفة وشاف هيام وكانت تفتن قال : الحين ذا الزيين كله للمزرعة ؟
هيام م ردت ولبست عبايتها وخلصت وقالت : يالله ؟
رعد بحدة : اسمعيني منصور معي و..
قاطعته هيام بشهقة : هااااه !!!
رعد قطب بحدة : وجعاااه ي هيام قصري صوتتس !
هيام استغربت : شفيك انصدمت بس المهم كمل
رعد مسك يدها وقال : م ابي صوتتس يطلع !
هيام تخصرت : حشى تستهبل انت صح ؟؟
رعد : تكلمي بس لاترفعين صوتتس الواحد يغار !
هيام ضحكت : ايه اشوا لا معليك م احس اني بحتاج شيء
رعد مسك خشمها : ايه وبعد دقيقة من الخط بتقولين وقف عند البقالة كأنتس بزر
هيام بزعل : رعّودي !
رعد حضنها : لبيه يعيونه
هيام : م بتردني حتى لو اقولها صح ؟
رعد بحب : اعنبوتس انا بقدر اصلاً اردتس ؟
هيام شّدت عليه وقالت : خل نطلع عشان م نتأخر ع منصور وتذبحني سلمى بالصياح
مشى رعد وكانت هيام تسابقه وقال : تراهم تملكوا
هيام : ايه ادري قالت لي سلومتي الله يوفقهم يارب
رعد : امين
طلعوا وركبت هيام ورا رعد ورعد ركب ومشوا متجهين للمزرعة
منصور : م بغيت !
رعد حك راسه وهو مبتسم : طولت ؟
منصور : لا ابد جلست ساعة
رعد احتدت نظرته : حشى والله اللي يدور الزلة صدق
منصور انفجر يضحك : امزح معك شفييك عصبت
هيام بنفسها ( مسكين شكله م يدري انه يعصب ع اتفه الاسباب )
رعد كان صوته مرتفع شوي وقال : م عصبت !
منصور احتد صوته وقال : الا معصب وبعدين لا تنسى اني اعلى منك منصب
رعد ضحك : حبيبي منصب ماهو هنا الحين اللي يثبت قوتك هو هل تقدر تواجهني ؟
منصور ابتسم : تحدي ؟
رعد : اتحداااك ي منصور ولد عبدالرحمن تطرحني ع الارض اذا وصلنا
منصور بتحدي : بس ؟
رعد : تعجبني ثقتك
هيام دقت كتف رعد ولف لها : لبيه ؟
هيام بصوت خجول : لين تقول انهم نسوها فالبيت وتبينا نرجع لها
رعد استغرب : من جدتس ؟
هيام : اي والله شوف
اعطته الجوال وشاف رسايل وحلطمت لين وضحك وقال : يالله يالله
منصور : يولد حلوه اللهجة عليك !
رعد ابتسم : اول مره تسمعني اتكلم بها صح ؟
منصور هز راسه بنعم : ايه
رعد : هيام خليها تطلع ع الباب
هيام : ايه ايه قلت لها
رعد وقف عند باب بيتهم وطلعت لين وهي فاتحه وجهها وصدت علططول وقالت : يييووييلليي ويلااااه منصصوور !!!
رعد فز وقال : لفيييي وجهتتس !!
منصور لف لها وقال : شفييك !
رعد : ولا شيء
ركبت لين بعد م ضبطت نقابها وسلمت والكل رد السلام
رعد بحدة : خير طالعة من البيت كاشفه وجهتس ؟
لين بغباء : مدري م كنت اتوقع احد معكم
رعد : الله يصبرني عليتس انتي وهيام
هيام شهقت : خييرر شدخلني !
رعد : هييااام !
منصور همس له : يرحم ابوك خلاص لاتدخلني بمشاكلكم انا خلقة متفشل !
رعد صد وهو يستغفر وكملوا طريقهم للمزرعة
.....................
فالمزرعة
كاسر تنفس بقوة وقال : اييييه ذا الهواء النقي مو سموم الرياض
ام محمد ابتسمت : شفت
كاسر : ايه يعيوني
دخلت سيارات ابو رعد وابو هيام ومحمد معلنين وصلوهم
كاسر : ارحبوواا
( كاسر كان لابس ثوب ومتقمص شخصية البدوي اللي م تطلع الا فالبر او المزرعة )
الكل : الله يبقيك
ام رعد : يالبيييههه يالهوواااء
كاسر : يرد الرووح
ام هيام : ايه والله انه يرد الروح
كاسر قطب : يمه وين لين ؟
ام رعد ضحكت : تخيل نسيناها وجات مع رعد ومنصور
كاسر ابتسم : ماشاءالله منصور جاي
ابو رعد : ايه شبيت الضو ؟
كاسر : كل شيء جاهز
ابو رعد : اييه ذا ولدي !
كاسر باس راس ابوه وقال : ابشششر بي
جلسوا الرجال في بيت الشعر ينتظرون الباقين
وماهي الا نص ساعة ووصلت سيارة حمد معلنه وصول ام شوق وبناتها وعيالها
فز كاسر وقال : ارحببوواا وهمس وقال وارحبي يالوعد ارحبي يادهر قلبي ورجعانه ارحبي ياللي تليتي قلبي من اقصاااه ارحبي ياللي كسرتي ضلوعي بحبتس وارحبي ياللي تهد حيلي بنظرتها وخصرها المنحوت
حمد نزل : سلمه سلام عليكم
الكل رد السلام وقاموا يسلمون على خوالهم
وقال كاسر : ياعمة الحريم داخل البيت
ام شوق ابتسمت : طيب يعيوني
كاسر كان يناظر يبي يشوف وعد بس م شافها ونزلوا كلهم وراحوا وهي مالها حس بس شوق وامها تضايق وقال ( لا يالوعد تكفيين قولي انتس جيتي )
ابو رعد بحدة : كاسر صب القهوة وراك تجمدت محلك !
كاسر لف لأبوه : سم طال عمرك
صب القهوة للرجال وهو عينه ع السيارة وللحين متأمل ان وعد موجودة وفجأة فز ع صوتها وهي تقول : حمممد افتحح الموتر عباايتي نشببت !!
حمد ضحك وقال : يووه ي وعد ورا م تكلمتي من صبح
وعد بزهق وهي كانت تجرها تبيها تطلع بس م فيه فايدة وخافت تنشق وقالت له : اخلصص
حمد : م فيني حيل اقوم والسيارة تنفتح من الباب
كاسر رفع يده : جب المفتاح
حمد رماه له ومسكه كاسر ورفع ثوبه بيده ومشى بخفة وقال : ارحبي يالوعد
وعد فزت وقالت : الله يسلمك يالكاسر
كاسر ابتسم وقال : ياحيي ذا الصوت اللي خذا عقلي
وعد م ردت وهي مصدومة وقالت : حي نباك افتح اذا ممكن شوي وانهار ترا
ضحك كاسر وفتح السيارة ودخلها ومد يده وفتح الباب حقها وسحبت عبايتها وشاف فستانها اللي كساه اللون الاحمر وقال : احمر بعد اعنبوتس ارفقي بي
وعد شهقت وقالت : كاسر ناد لي سامي !!
كاسر فز ونزل وركض لوعد وقالت : لا لا لا تناظر ساقي طالعه لاتجي
كاسر ابتسم ووقف جنب وعد ومد يدينه من قدامها وفك الفستان والعباية وفاحت ريحة عطره وريحة الضو في عباية وعد وقالت : خلاص شكرًا ابعد
كاسر ناظرها بحدة وقال : يويل قلبي وحااااالي
وعد ناظرت بعيونه وكان قريب ومشت من جنبه وقالت : لاتنسى اني مخطوبة !
كاسر مسك قلبه وقال : وم كسرني الا انتس حلال غيري
( وعد دخلت وقلبها يدق بقوة وللحين م تدري ليه كاسر كذا يجذبها وهي تعرف حقيقته بس م تبي تفضحه وهي باقي تحسب انه يكلم بنات وتحسب انه كاسر اللي عمره ١٩ سنة )
كاسر ابتسم وقال : اه والعيون واه والصوت واه والشكل وااااه يالوعد !
جاء سامي : ولد شسالفة ؟
كاسر لف : وش ؟
سامي : وين وعد
كاسر مثّل الثقل علطول وقال : دخلت وبعدين ليه تسألني ؟
سامي : مدري والله بس قلت يمكن صار لها شيء
كاسر قرب واتسعت عيونه وقال : وش تقصد ؟؟
سامي هز راسه بنفي : لا لااا لاتفهمني غللط
ضحك كاسر وخبط ع كتفه وراح للرجال
سامي : بغيت اجيب العيد وبغيت انسى انه اخو رعد
كاسر تلطم وجلس قدام الضو بحكم انه برد فالمزارع وفز ع صوت رعد اللي دخل مع منصور بعد م نزلوا لين وهيام عند باب الحريم
الكل : ارحبب
منصور ابتسم : الله يبقيكم
ابو محمد ابتسم : ارحب يولدي
منصور باس راسه : سلمه يالله
جلسوا كلهم ورعد جلس جنب كاسر وقال : شفت وعد ؟
كاسر هز راسه بنعم وقال : تتغلى علي بسلامها يالرعد
رعد ابتسم : م هقيتك خفيف بس شكلك لحقت اخوك
كاسر شدّ ع كتف رعد وقال : واللي يشوف وعد يثقل ؟
رعد : اه ياخوي وش سوا فينا الحب
كاسر ضحك وقال : لعب فينناااا
رعد : اننشههدد
كاسر : شرايك نمشي ؟ ودي افضفض لك
رعد قام ومد يده وقام كاسر معه وراحوا يمشون وقال رعد : اسلم
كاسر ابتسم : جعلك تسلم الحين برد ع سؤالك
رعد قطب : اي سؤال ؟
كاسر : وش اللي شدّني بوعد
رعد ابتسم وحط يدينه ورا ظهره وقال : اسمعك يالكاسر
كاسر : اولاً عيونها وصوتها وروحها الحلوة وكلامها وطريقتها بالمشي وحركاتها وعصبيتها وعنادها حبيت كل شيء فيها وم صابني فالمقتل الا خصرررها
رعد ضحك وقال : ماشاءالله اثر الخصر ذابحك مثل اخوك ؟
كاسر لف لرعد بقوة وقال : وانت بعد !!!
رعد : للأسف
كاسر انفجر يضحك وقال : اعنبوها قلبتني قلب وتلت قلبي يالرعد
رعد : الله يجمعك فيها يخوي
كاسر بحب : ياااارب
رعد : ايه كمل ؟
كاسر : وش ؟
رعد : انت تقول انها تتغلى عليك بسلامها وش صار
كاسر حكى لرعد كل شيء وقال رعد : لا يالكاسر لاتوضح لها انك جايها ع وجهك !
كاسر ابتسم : اثقل ؟
رعد : تقدر ؟
كاسر : اعنبو غيرك والله معاد التفت لها حتى لو تناديني
رعد بحدة : اثقل اجل !
كاسر اشر بأصبعه ع خشمه : على ذا الخشم
رعد قرب وباس خشمه وقال : يالله ورني شخصيتي فيك
كاسر : انت ثقيل ؟
رعد : لا بس شخصيتي صعبة وعصبية عشان كذا م الين بسرعة فهمت
كاسر هز راسه بنعم : ايه ايه
رعد ابتسم : امش نروح للرجال
كاسر قام وهو فعلاً خلاص ثقل بس قلبه ينبض بأسم وعد وبس وعد
............................
عند البنات اجتمعوا وجلسوا فالحوش ورا البيت الطين اللي كان متوسط المزرعة
هيام : لين
لين لفت : لبيه ؟
هيام ابتسمت : لبيتي في منى اسمعي ادخلي داخل وجيبي البطاطسات نبي ناكل شيء
لين قامت وراحت تجيبها ورجعت وقالت : سلمى ترا منصور هنا
سلمى لفت بقوة : ااايششش ؟؟
هيام ضحكت : صح النوم
سلمى : والله م درييت !
هيام : المهم سولفوا
بشرى : بنات تخيلوا كاسر قال انه بيخطب شوق بدال وعد
وعد لفت بقوة وقالت : ووش تقولييين انتي ؟؟؟
الكل ضحكوا وقالت هيام : شخببااار اللي غارت ؟
وعد شهقت : ايش انا اغار ؟؟ اقصد انه يبي بدر يطلقني وبدر وافق والحين رجع لشوق ؟؟
بشرى ضحكت : امزح يغبية بس نبي اشوف ردتس
وعد : سامجيين
قامت وراحت داخل للمطبخ تشرب مويه وللحين قلبها يوجعها وشافت كاسر ياخذ حطب وقالت : كاسر !
كاسر كان يسمعها ووده لو يلف ويركض لها بس اكتفى بكلمة : هلا ؟
وعد : يقولون خطبت في شوق ؟؟
كاسر ابتسم وقال : ووش يهمتس ؟
وعد شهقت : تستهبل انت الحين تبيني ولا تبيها ؟
كاسر : خلصتي ؟
وعد عصبت : كاااااسسرر !!
كاسر لف لها ورجعت علطول ورا الباب وقال : هااه يوعد هاااه !
وعد ضحكت بأستفزاز : اها اشوفك طفشت مني لدرجة صرت تقول هاه بدال يعيونه ولا لقيت لك بنت جديدة !
كاسر توسعت عيونه وقال : وشش تخربططيين انتي !!
وعد : ترا اعرف حقيقتك عشان كذا رفضتك اصحى ع نفسك تحسب اني م اعرف !
كاسر : وش تعرفيين ؟
وعد ضحكت : تكلم بنات وتراسلهم وشوي وتموت عليهم وكل يوم معك وحدة جديدة
كاسر اشتط ودخل عليها فالمطبخ وقال وهو يصّر ع اسنانه : ووعععدد اععقلللييي !!
وعد شهقت اول م مسك فكها بقوة وقالت : ووخرر منيي واعترررف انك نسوونجيي وحقييير ولعّاب بعد !!
كاسر شّد عليها وقال : حبيبيي الكلام ذا قبل ٤ سنيينن انتي اللي اصحي ع نفسسك !!
وعد كانت متلثمه بس واضحة عيونها وجزء من خشمها وقالت : هااات جوالك اذا انت رجال وقدها !
كاسر بعد ومد لها جواله وفتح ودخلت وفتشت كل شيء وم حصلت حاجة وكل شيء عنده نظيييفف ودخل الملاحظات وشافت اسمها في قصيدة كاتبها كاسر بس سحب جواله وقال : لا يعيون كاسر ذي خطيرة تشوفينها وانتي مخطوبة
وعد كانت متحمسة : ورني تكفى يالكاسر
كاسر ضحك وطلع وقال : خصرتس يبي له مسكه صح !!
وعد ناظرت بخصرها وقالت : كاااسرر ورننيي
كاسر طلع وراح للرجال وهو واثق ان وعد طاحت في شباكه بعد م مسح نظرتها له وجلس معهم حول الضو
اما وعد اللي كانت تقول في نفسها ( وش كتتب فالقصيددة اااه ابي اشوووفهاا ) بعدها شهقت اول م جاتها فكرة انها تروح فالليل وتفتح جواله وتشوف القصيدة ..
_________
بعييد فالنمسا
فارس بحب : يالبيه م احلى من المنظر الا الحنين
حنين ضحكت : فارس تكفى نبي نروح للجبل ذا
فارس : من عيوني امشي
مشوا وهم مشابكين يدينهم وكل واحد معطي الثاني وعد انه م يترك يده ابدًا
حنين شهقت : الله ييجننن !!!
فارس : متأكدة انتس مانتي اجمل منه ؟
حنين ضحكت : فااارس
فارس حاوطها وقال : لبيه يعيون الفارس
حنين بخجل : خلاص ابي اتأمل بدون م تحرجني
فارس شّد عليها : ابشري يعيوني
حنين ابتسمت ومسكت يدينه بقوة وقالت : فارس بعدها بنروح نشرب قهوة طيب ؟
فارس : انتي امريني وبس
حنين كانت ضايعة في فارس وكل يوم تحبه اكثر من اليوم اللي قبله
_______•••_______
فالمزرعة
وصلت سيارة ابو سعيد
رعد زفر بعصبية : من اللي عزمه ذا !
كاسر صد عنهم : مدررري لو يجي عمي عادي بس عياله !
رعد ابتسم : تشوووف
محمد بقرف : يالله انك تمنعني منهم
رعد وكاسر قاموا وهم واقفين جنب بعض وقالوا : ارحبوواا
سعيد : الله يبقيكم
الكل رحبوا وسلموا وطار كاسر يجيب المبخرة عشان ياخذ جمر من الضو ويبخر بيت الشعر بالعود
كاسر : يوولدد
وعد كانت باقي فالمطبخ ولفت شالها عليها وقالت : ادخل
دخل كاسر وقال : وعد وين المبخرة ؟
وعد وقفت : مدري والله بس بشوف
كاسر استعجلها : خلصييننيي
وعد : طيييب !
كاسر م كان معها ويبي يخلص قبل يقوم رعد
وعد : كاسر شوفها هنا م قدرت اوصلها
كاسر تقدم وم عطى وعد مجال توخر ووقف وراها بس بينهم مسافه واخذها وقال : وعد ذبحتيني يوعد وخري
وعد كان معها مجال بس كانت جامدة وقالت بهمس : كاسر
كاسر نزل راسه ووصل لطولها وقال : قلبه
وعد لفت له وقالت : كاسر
كاسر بحدة : ووعدد تكلمي قبل افز عليتس !
وعد وهي كاتمة الضحكة : بّدري جاء ؟
كاسر توسعت عيونه وقال : بدرتس !!!
وعد : ايه بدر بدر
كاسر : انتي صاحية ؟
دخلت لين وقالت : ماشاءالله اشوفكم مستمتعين
وعد شهقت وقالت : اخوتس اللي م يستحي
كاسر قرب اكثر وقال : حطي عينتس بعيني !
وعد كانت اجرىء بكثيير وحطت عينها في عين كاسر وقالت بهمس : عيوني
كاسر احتد اكثر وقال : عيونتس خليها لبدرتس تسمعيين ؟ ودوري لي بعدين
طلع وهو معصب وعرفت وعد انه يغاار لا ويحترق عليها بعد ضحكت وقالت : لين وش بغيتي ؟
لين بصدمة : يساتر صدق كاسر يخوف وتراه قد كلمته وبيطيرتس من راسه
وعد م تنكر انها خافت بس قالت عكس خوفها : وتحسبين انه يهمني ؟
لين زفرت بملل : اف بكيفتس معاد عرفت لتس والله !
طلعت وعد ومسكت هيام بيدها وراحوا يمشون فالمزرعة ووصلوا للبوابة الغربية ( طبعًا هي ثلاث بوابات البوابة الرئيسية والبوابة الشرقية والبوابة الغربية )
هيام صغرت عيونها وقالت : يمه وعد تشوفين احد ؟
وعد لفت معها وقالت : لا بسم الله لاتخوفيني
هيام كانت تشوف هيئة بس تجاهلت وم استوعبت الا من صوت وعد ينادينها : هيااام امشي يالله
هيام مشت تلحق وعد ببطىء واستوقفها صوت سعيد وراها وقال : هيااام !!!
هيام لفت له بسرعة وقالت : سعيد !!
سعيد انصفق ع وجهه من جمال هيام كان يتاملها وماهو مستوعب انه ترك ذي لرعد كان واقف وم قدر يرمش اما هيام ركضت ورا وعد وهي تقول : وععد اركضيي
وعد فزت : ليييه !
هيام قربت وقالت : سععييد ورانااا
وعد : يويلليي
ركضوا الثنتين ووصلوا لبيت الطين وهم يالله يأخذون نفس وقالت هيام بنفسها ( يووييليي ويلااه لايدري رعد ذبحنننيي وذببح سعييدد ! )
اما سعيد كان حرفيًا جااامد وقال : العن ابوها صدق انها موتتتن حمررر وانا اقول وش عند رعد هايم فيها وشوي ويموت عشانها !
مشى سعيد وبس هيام تتمشى براسه بشعرها وخصرها وسيقانها ووجهها وشامتها ومنطوقها لأسمه كان قلبه يدق برعب وبحب وهو حالف م يخليها لرعد كان طايح ع وجهه عندها
جلس فالمجلس وهو ماهو معهم
اما رعد نغزه قلبه وقام وقال : هيام
هيام فزت برعب وجات تركض : هلا يمه وشفييك !
رعد شك : خيير خييرر ؟ شفيييتس ؟
هيام مسحت وجهها وقالت : ولا شيء وش بغيت
رعد طنش الشعور اللي دق بقلبه وقال : انتي بخير تحتاجين شيء ؟
هيام كانت ترجف داخليًا وهي مصدومة كيف حس رعد وقالت : لا يحبيبي
رعد باس شامتّها وقال : طيب انتبهي لتس
راح رعد وزفرت هيام براحة وهي تدعي من كل قلبها انه يعدي هالموقف ع خيير وم يدري عنه رعد
............
فالعشاء تحديدًا الساعة ٩ الليل
هيام : بنات بتنامون ؟
لين : انا لا
سلمى وبشرى : ولا انا
شوق : احس بخمول بنام
هيام كانت م تبي تقابل رعد لأنها بتفضح نفسها بنفسها قدامه وقالت : انا بنام بس وين الحمام ؟
وعد بحشرة : انا ابييه بعد
هيام : تعالي يالمحزم
وعد ضحكت ولبست جلالها هي وهيام وراحوا مع بعض
ووصلوا وحصلوا رعد وكاسر عند الحمام
كاسر ابتسم : اوووهووو شووف من اللي شرفوا
رعد كانت عينه حاادة وعطاهم نظرة وقال : هلا والله بالهيام والوعد
وعد شهقت وقالت : يمه رعد يخوف
هيام شّدت عليها : اص اص لاتزيدييين توتري
كاسر وقف : وش جابكم ؟
هيام م كانت تبي تتكلم وتجيب راس رعد بصوتها ففضلت الصمت وتكلمت وعد : نبي الحمام اذا تسمح !
كاسر : تعالي طيب
وعد لفت بقوة ع هيام
هيام همست : لا تطالعييننيي !!
وعد : تكلميي زوجتس ترا !
هيام تأففت : رعد
رعد ابتسم اول م سمع صوتها : عيونه
هيام قربت منه وجلست عند رجوله وقالت : وشفيكم هنا جالسين
رعد حاوط راسها بيده وقال : ابد جلسة فضفضة
هيام ضحكت : عند الحمام ؟
رعد احتد صوته : ننتظر حمود
محمد طلع من الحمام : يالله يعيال ؟
وبعدها استوعب وقال : اهلييين هيوومه
هيام قامت وحضنت محمد وقالت : وحشتني
محمد باس راسها : لبى عيونتس ياروح اخوتس
رعد زفر بضيق : خلاص يبو هاتها !
محمد لف يسأل هيام : تبينه ؟
هيام هزت راسها بنفي : لا
فز رعد وسحبها لحضنه وقال : انا م تبيني !
هيام همست له : احبك
رعد ابتسم وباس راسها : قسم بالله اني اضعاافتس يدنياا الرعد وهيامه
هيام : بروح الحمام وانتوا تقلعوا يالله
محمد : اف اف طردة ؟
هيام : ايييه
رعد مسك محمد ومشى وغمز لها وقال : والله لا احاسبتس بعدين
هيام تجاهلته ولفت لكاسر ووعد
اما كاسر وقفت وعد بعيد شوي وقالها : قربي عشان البرد
وعد : وشدخلك ؟ احد شكى لك ؟
كاسر بحدة : لاتخليني اقوم !
وعد : قم !!
كاسر قام ووقف قدامها وقال : وبعدييين والعناد ؟
وعد بقرف : اف تقرف ترا ابعد مني !
كاسر توسعت عيونه : احلفيي !!!
وعد طنشته ودخلت الحمام وسبقت هيام
هيام : كاسر
كاسر لف لها : هلا يالهيام
كان صوت كاسر يشبه صوت رعد بكثيييير وقالت : يساتر والصوت
كاسر ضحك : وشفيتس ؟
هيام شهقت : مو طبيعي نسخة !
كاسر : ادخلوا من البرد بس
وراح من عندهم وهو يحلف م يرجع الرياض الا وهو جايب راس وعد وجايبها له ع وجهها .
............
اما رعد دخل الخيمة مع محمد وشاف سعيد باقي يهوجس
رعد زفر بعصبية : سسعيييد !
سعيد فز : هااه !
رعد : خييير وينك عايش فيه قم ساعدنا !
سعيد قام وكان يناظر في اتجاه الحمامات ولف رعد وشاف هيام بوضوح واقفة تنتظر وعد تطلع وقال : صد جعلك م تشوف طريقك !!
سعيد استغبى : وش اصد منه ؟
رعد بحدة : من حريمنا !!
سعيد ضحك وتجاهل رعد وعرف رعد وتأكد انه يهوجس في هيام واتجهة لها علطول
رعد بعصبية : هيااام !
هيام لفت برعب وهي متأكدة انه عرف وقالت : سم
رعد سحبها للمشب وسكر الباب ودفها ع الجدار وقال : سسععييد شافتتس !!!
هيام انخرششت وقالت : رععدد شووي شووي عليي !
رعد مسك نحرها بقوة وقال : اننططقييي
هيام برعب وهي تحاول تثبت : ايه
رعد بعصبية مرعبة : وشش كنتتيي لابسسة !!
هيام بخوف : فستاني اللي علي
رعد سحب الجلال من عليها وشاف فستانها الكحلي اللي ناحت جسمها وبارز ملامحه من نحرها لمواطي اقدامها
رعد بحدة حاوط خصرها وشدّ عليه وقال : اشررححيي لي
هيام تقشعرت بعد لمسته وقالت : طيب خلاص لا تعصب والله م كنت ادري انه ورا
رعد زفر وقرب وقال : انطقي !!
هيام شرحت له كل شيء وشلون شافها ومتى وكيف
رعد كان يفور وقال : لييييه تطلعيين من البيت بدون شيء يسترتس !!
هيام برعب : والله م كنت ادري يالرعد
رعد مسك فكها وقال : والله م اعديها لتس وان كانها عدت منتس والله م اعديها له الكلب
هيام حضنته : تكفى لاتسوي شيء يدخلك بمشاكل كبيرة !
رعد شدّ عليها وقال : والله ودي اني احطتس بمشكلة مثل م حضنتس لي يسوي لي مشااكل
بعد هيام وقالت : تكفى يالرعد والله اسفه م كنت ادري انه هناك
رعد بحدة  : خلاص اطلعي ولعاد اشوفتس برا !
طلعت هيام وطلعها رعد ووصلها للحمام وخلصت ورجعها للحريم ورجع لبيت الشعر وهو حالف ان سعيد وراه بلاء بس م يدري وش هو
اما كاسر اللي كان هايم في وصوف وعد وكل مره يتذكر لمساته لوعد وينتهي ويقول ( ليتتس عندي واعطيتس كل حبي واحضنتس وادخلتس بضلوعي ليتتس حولي وحواليني ) استوعب ع صوت بدر وهو يقول : بشيك ع وعد واجي
قام كاسر وهو يتمنى انه رايح بدال بدر وشاف بدر عند الباب وشوي وطلعت وعد وحضنها بدر قدام عيون كاسر اللي كان يحترقق ويحس بحرارة توجع صدره وقال ( الله يلعن ابوك وخررر منهااا ) نزلت يدين بدر لخصر وعد وشّد عليها ووعد كانت مستسلمه له وقالت بصوتها اللي يعذب سامعه : بدر
بدر بحب : لبيه ؟
وعد : لبيت حاج يارب اسمعني انت بتطلق علطول من اول يوم ؟
بدر ضحك : لا طبعًا !
كاسر فز وحست فيه وعد ولفت له وانهبلت واحترق قلبها انه يشوفها بين احضان بدر بدال حضنه وحضنت بدر وقالت بصوت يدوب ينسمع : كاسر تكفى لاتطالعني كذا
كاسر سمعها بحكم انه قرييييب منهم وانتظر اول م راح بدر وقال : وعد
وعد لفت بحرقة وقالت : هلا
كاسر ابتسم بهدوء يعكس الحريق اللي داخله وقال :
سلمتس يالوعد والمحبة
م ينعرف ويش طبه
منتس الجفى دون سبه
وانتي ع غيري تمونين
يالوعد وشبتس علامتس
حتى تشحيين بسلامتس
تغيبين وتاتين بملامتس
اسمعي صدى اللي ينادون
قام كاسر وتلطم وراح بدون م يسمع صوت وعد اما وعد انهبلت بعد قصيدته وقالت : اه يالكاسر والله انك كسرتني صدق
ودخلت وهي دموعها بيعيونها وصوته للحين يتردد بداخلها ونامت وسط صوته وتتمنى لو انها حوله .
:::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم 🤍
( اتوقع الكل منكسرييين ع كاسر 😢 ، عطوني رايكم فالبارت احبكم 🫶🏻 )