ပြန်လိုချင်တယ် (Completed) OC

Part (14) Uni/Zawgyi

ပြန်လိုချင်တယ်

အပိုင်း (14)

ခင်သက် မနေ့ကအစောကြီးအိပ်ပျော်သွားတာမို့ နေပိုင်ထွဋ်အိမ်ပြန်လာသလား၊ မလာသလားဆိုတာတောင်မသိလိုက်ခဲ့ပါ။ ဒီရက်ပိုင်းမှာလည်း စိတ်ရောလူရောပင်ပန်းနေတာမို့နှစ်နှစ်ခြိုက်ခြိုက်အိပ်ပျော်နေခဲ့တာ တစ်ညလုံးလည်းတစ်ရေးမှမနိုးခဲ့။ အိပ်ယာပေါ်မှာတဂျီဂျီနဲ့တုန်ခါလာသောအနှောင်အယှက်ပေါ်လာလို့ ခင်သက်မဖွင့်ချင်ဖွင့်ချင်နဲ့ မျက်လုံးဖွင့်ကြည့်လိုက်တဲ့အခါ သူမရဲ့ဘေးအိပ်ယာနေရာလွတ်ပေါ်၌ ရှိနေသောနေပိုင်ထွဋ်၏ဖုန်းလာနေတာဖြစ်သည်။

ခင်သက်လည်း သူမခန္ဓာကိုယ်လေးကိုထိုဖုန်းအနားရောက်အောင်လှိမ့်ပြီးဖုန်းScreenကိုကြည့်လိုက်တော့ မှတ်မထားသောဖုန်းနံပါတ်အစိမ်းတစ်ခုဖြစ်သည်။ နေပိုင်ထွဋ်ကရေချိုးခန်းထဲကနေဘောင်းဘီတစ်ထည်တည်းနှင့်ထွက်လာပြီး ခင်သက်ကြည့်နေသောဖုန်းကိုကောက်ယူ၍နားမှာကပ်လိုက်သည်။

"ဟယ်လို"

"................"

"သြော်....မှုံနံ့သာလား "

ခင်သက် နေပိုင်ထွဋ်ဆီကနေမှုံနံ့သာဆိုတဲ့နာမည်ကြားလိုက်ရပြီးနောက် နေပိုင်ထွဋ်ကအခန်းထဲကနေထွက်သွားပါသည်။ ခင်သက်လည်း ခေါင်းအုံးဘေးကစားပွဲပေါ်မှာရှိနေသည့်သူမရဲ့ဖုန်းကိုဖွင့်ကြည့်လိုက်တော့မနက်၆နာရီအချိန်ဖြစ်သည်။ နေပိုင်ထွဋ်ဟာမနက်၆နာရီအိပ်ယာထမယ့်လူမဟုတ်။ သူမနက်မှအိမ်ပြန်လာတာပဲဖြစ်ရမည်။

ခင်သက် သူဘယ်ချိန်ပြန်လာတာလဲဆိုတာကိုအတည်ပြုနေရင်း တစ်ဆက်တည်းတွေးမိလာတာက ဒီအချိန်ဘာကြောင့်မှုံနံ့သာက သူ့ကိုဖုန်းဆက်ရလဲဆိုတာဖြစ်သည်။

ခင်သက်လည်းနိုးနေတဲ့အတူတူ ဆိုင်သွားဖို့ပြင်ဆင်ဖို့အိပ်ယာကနေထလိုက်တော့သည်။ ထိုစဥ် နေပိုင်ထွဋ်ကဖုန်းပြောပြီးအခန်းထဲသို့ပြန်လာဝင်လာကာ သူ့အဝတ်ဗီရိုကိုဖွင့်၍ကုမ္ပဏီသွားရန်အဝတ်အစားဝတ်သည်။ ခင်သက်ကိုတောင်စကားမပြောဘဲချက်ချင်းပြန်ထွက်သွားတာမို့ မှုံနံ့သာနဲ့ဘယ်လောက်များအရေးကြီးသောကိစ္စများရှိနေသလဲဟု စဥ်းစားမိလာသည်။