يهزمني الحُب وانا جاهل بدرب المُحبين

البارت الواحد والخمسين

دخلوا الحريم وتعشوا وبدأت فقرة السوالف والحش عن البنات والكل فرحان لشوق وانها م حبت واحد لعاب
هيام : لين اليوم طولتي عند رعد وكاسر شسالفة ؟
لين قامت وهي تضحك وقالت : وظفوني دكتورة جراحة مع فارس
سلمى شهقت : اماااانه !!
حنين ضحكت : ماشاءالله يحظتس بتشوفين فارس كل يوم
لين ضحكت : وربي وبعدين حنين خير ؟ كلن ع همه سرا
هيام انهارت تضحك وقالت : حننيينن جوووي
حنين ابتسمت : ورربي
شوق بهدوء : مبروك لين
لين لفت لها : الله يبارك فيتس وفيكم كلكم
وعد ابتسمت : وانا مالي مبروك ؟
لين صرخت : ااايييعههه وععدد تووظففتت فالطيران !!
الحريم كلهم سمعوا لين ودخلوا ركض للغرفة وقالوا بصوت واحد مع البنات : ماشاءالله !!
هيام صفقت : زي كاااسر صح ؟؟
وعد ضحكت : ايه مديرة ع راس كاسر
هيام بزعل : اننمم ماشاءالله يححظظتس ودي اشوف دوام رعد
حنين ضحكت : عادي تقدرين تروحين له وتشوفين
هيام فزت اول م تذكرت سالفة فيّ وقالت بنفسها ( لازم احاسبه ولازم م يكرر غلطة مشاعل ! )
وعد : بس لحد يقول لكاسر سامعين ولا ذيب لأنه بيقوله علطول
سلمى ضحكت : بشرى تحسست انتي معي ؟
بشرى ابتسمت : ايه كأنها تشوفنا كيف نسولف مع ذيب نقول له كل شيء
لين جلست بحب وقالت : كيف يعني تقولون له كل شيء ؟
بيان ابتسمت : يعني بأختصار ذيب اقرب اخواننا لنا ودايم نسولف له عن اي شيء يضايقنا وعلطول يروح يجيب لنا اكل ولا يطلعنا اححببه صدق
سلمى ابتسمت بضيق : يحظتس ي بيان فيه انا وبشرى والعنود تزوجنا وانحرمنا منه
بيان ضحكت : اشهد بالله اني محظوظه
العنود : الله يخليه لنا حتى واحنا متزوجين م يقصرر والله
بشرى : اي والله م يقصر
لين بصراخ : اافف خلاااص حمستوونيي علييه
طاحوا البنات يضحكون عليها وقالت حنين : لا ي لين لاا اثقلي
لين : اعنبوها حالة والله معاد فيني ثقل سولفوا لي عنه
بيان : كأنها ذيب وربي
لين قطبت : كيف يعني ؟
بيان : ذيب يسأل عنتس كثير ويقول سولفوا لي عنها واتذكر مقلبنا فيه انا وضاري
سلمى شهقت : ضاااري يمقلبب !! انقلبتوا يوم اعرست حسيبكم ربي
بشرى ضحكت : اييه وربي فاتتس ي سلمى
سلمى : انطققوا طييبب
لين بحماس : وسلمى صادقة
هيام : تحمسست
بيان وقفت فالنص وصارت تحكي لهم السالفة واعتلت اصوات ضحكاتهم وحماس لين وفرحتها بفزة ذيب اول م قالوا له ان لين اللي مسوية الفطور وانتهت بيان سالفتها وهي تقول : وبس م افطر رجع ينام بس وربي ي ضاري اكلها منه
خولة وهي تضحك : بنات ولا انا اول م قلطت ونسيت ان ذيب موجود
لين احترقت علطول وقالت : هاه كيف يعني ؟
الكل حسبوا ان لين تسأل سؤال عادي وكملت خولة وهي تقول : دخلت غرفته اول م سمعت ضاري يصارخ ونسيت اني اتغطى منه
بيان ضحكت : وهو بعد م قصر صرخ فيتس وقال يووولدد
سلمى ضحكت : يهوووه وش الاكشن ذاا !
لين غطت وجهها وقالت بنفسها ( يححظظهاا شافتته وهو صاحي من النووم ويحظهاا سمعت صوتته وهو صاحي من النوم محظظووظظه اااه قلبي يحتتررقق ! )
هيام مسكت راس لين وقالت : لين فيتس شيء ؟
لين رفعت راسها وهي مبتسمة وقالت بهمس : لا شدعوة محد غار
وعد : بنات الرجال راحوا نروح للمجلس نرتبه ؟
هيام : يالله وانا بشرف عليكم
حنين قامت وقومت سلمى وهيام معها وهيام سحبت لين ولين مسكت بوعد وقاموا كلهم بمسكة حنين وضحكت وقالت : يلبييهه قوموا تعاونوا م ذلوا يالله يحلويني
سلمى بصوت عالي : اشهد بالله انها امنا يححلوتس يحنيني يححظظك يفااارس
هيام حضنت حنين وقالت : اي والله يحظظه
لين سحبت حنين وقالت : هييه وخروا من اختي
حنين كانت تضحك ووجهها احممرر وقالت : استححييتت يحيوااناتت
بشرى مسكت خدودها وقالت : وهه يزيينتس
طلعوا البنات للمجلس وكان فاضي وملييان اغراض وشماغات العيال والطواقي والعُقل
هيام مسكت راسها وقالت : يراااسي وشذا تفضخوا هنا ولا وش !
البنات طاحوا يضحكون ودخلوا داخل ومسكت وعد بوكيت دخان وقالت : من الوسخ اللي يدخن ؟
الكل بصوت واحد : زوجتس
وعد طاحت ع الكنب تضحك وقالت : يهووه وشذا كلكم تدرون
لين : الصدق م فيه الا فارس اللي م يدخن
حنين ضحكت : صادقة بس عشان الربو ولا هو سربوت معهم
هيام وهي تضحك : خير ورعد بعد !
لين ابتسمت : اوووههوو شكلها م تدري
هيام توسعت عيونها وقالت : يددخنن !
حنين : ايه واول واحد في عيالنا اتذكر اول م قفطه ابوي يويلي يالضحك والرعب اللي صار
لين مسكت بطنها وصرخت وهي تضحك وقالت : وررربيي ي انه قممطط ذاك اليوم بس بعدها اعترف وبعدها بفترة طاح كاسر معه
هيام بصدمة : بنات منجدكم ؟ م عمري شفته
حنين : ايه بس ترا رعد م يدخن قدامنا ومستحيل نشوفه يعني في دوامه اول اذا كان لحاله بالبيت اذا رجعتي فتشي دولابه وصدقيني بتحصلين
هيام : يرااسي صدق زوجي ولي سنة معه وللحين م ادري انه يدخن
شوق : حتى انا توو ادري ان حمد يدخن هذا وانا ساكنه طول عمري معه
وعد مسكت خدودها وقالت : اااح حمد !! طاح من عيني
لين استقعدت لها وقالت : يعني كاسر طايح من عينتس ؟
وعد رمت واحد من العقل عليها وقالت : انطمميي
لين ضحكت بألم وقالت : بنات اصبروا بلبس واحد من الشماغات ذي
اتجهت لين واشرت لها سلمى ع شماغ وقالت : لين البسي ذا
لين راحت له واخذته بدون م تفكر انه لذيب ولبسته وتعصبت فيه ع راسها وفاحت ريحة عطرها وريحة شعرها فيه وقالت بزحف : اتحدااااك يالبنااات الحلووييين
شوق ضحكت وقالت : ااخخسس والله وطلعتي مانتي بهيينة
لين اتجهت لشوق وحاوطت خصرها وقالت : يلبييهه يالزيييين جعلني فستان اسوود بسس
شوق حاوطت رقبة لين وقالت : وشذا الزاحف اللي يهببل
بيان كانت تصور وهي تضحك وقالت : يووه جووي يبنااات
هيام فزت ع صوت فارس وقالت : ييوويلليي رججعوواا !
وعد شهقت : كذذااببعهه ويين نروووح
لين ضحكت : انا ساترة وجهي
حنين : احلفي ووجهتس ؟
سلمى مدت يدها بمعنى " اهجدوا شوي " وقالت : اصه اصبروا !
سكتوا البنات وتقدمت سلمى وطفت انوار المجلس وعم الصمت فيه
" عند الرجال "
فارس فتح الباب وقال : جد بتمشي ؟
ابو محمد : ايه خلهم يطلعون لي
فارس هز راسه بنعم ودخل واستوقفه صوت كاسر اللي لحقه وقال : استريح يبو نادر بدخل انا
فارس : تم
دخل كاسر للبيت وقال : ي ام فارس وحنين وجدتي جدي بيمشي ويزهمكم
ام فارس وام محمد طلعوا وقالوا : حنين بترجع مع فارس
فارس شافهم وقال : اييه بتجي معي وبنسمر مع كاسر شوي ونرجع
ام محمد : في حفظ الله اجل
طلعوا الحريم كلهم ومحد التفت للمجلس ابدًا والبنات داخل وقلوبهم بين يدينهم لا يجي رعد ويدخل
رعد تقدم وسلم ع امه وقال : وحشتينيي يالغالييية
ام رعد ابتسمت : م يوحشك غالي يروح امك
رعد : محتاجة شيء ؟ توصيين ؟
ام رعد همست له : ايه اوصيك ع هيام واوصيك ع ولدكم وعليك انتبهوا لبعضكم يولدي
رعد باس راسها وقال : ابشري يعيوني
مشت ام رعد لزوجها وطلعوا الحريم كلهم ووقف حمد وهو يقول : شوق وينها ؟
شوق فزت وقالت : يويللييي !
هيام ضربت راسها بخفه وقالت : بتنكبينا اططلطععيي وادخلي بسرعة
لين : تعالي معي
شوق مشت مع لين اللي طلعت راسها من باب المجلس وشافت سيارة حمد عند الباب وكاسر وذيب واقفين ع الباب ومستحيل تقدر تعدي وقالت : ابلش يالنكبة صدق
شوق : انتي معتس شماغ لفيه عليتس واطلعي وجيبي اغراضي وارجعي
لين هزت راسها وفتحت الشماغ ولفت نفسها فيه وطلعت ولف ذيب لها وشاف شماغه ومشى وراها وهو م عرف من هي وقال بصوت حاد من وراها : خيير شمااغي وش يسوي معتس ؟
لين فزت برعب وقالت : ذييب !!!
ذيب فز وقال : لييني !!
لين ركضت ودخلت داخل وهي متمسكة بشماغه وقالت : ذاا شماغه الله ينكب سلمى !!
" وكانت سلمى تدري انه شماغ ذيب بس تحب تنكب البنات جوي 🤣 "
ذيب من برا : شماغي طيب هاتيه ؟
لين تذكرت كل شيء وتذكر بوكيت دخانه وشارت بدلته وقالت : ذيب دقيقة بس
ذيب ابتسم وهو يعشق اسمه من منطوقها وقال : عيوني لتس
ركضت لين لجناحها وفتحت دولابها وحصلت اغراضه واخذتها ولفتها بالشماغ وطلعت ركض وقالت : ذيب ؟
ذيب : روحه
لين كان قلبها يدق بكل كلمة تطلع من مبسم ذيبها وقالت : هاك
ذيب مسك شماغه وتلامست اصابعهم ببعض وسحبت لين يدها بسرعة وقال : وشذا ؟
لين : اغراضك
فتح ذيب الشماغ وحصل شارته وبوكيت دخانه وضحك وقال : اهاا وانا اقول وين اغراضي اختفت
لين ضحكت : ايه طاحت منك اول م دخلت غرفتي
ذيب تذكر اجمل ليلة بحياته وقال : اااه لو بيدي م طلعت
لين قالت بخجل : ولو بيدي م طلعتك
ذيب : هانت يحبيبي كلها اسبوع واجي اخطب ولا ترديني تكفين
لين بحب : توكل ع الله وتقدم وابشر يالذيب ب ليّنك
ذيب ابتسم وقال : وش كنتي تسوين فالمجلس ؟
" فالمجلس "
رعد : اصبر اغراضي بالمجلس
هيام : لااا رعد بيدخل !!
البنات فزوا برعب اول م شافوا ظله واقف عن الباب ودفوا هيام له وارتطمت فيه وانفجع وقال : مممنن
هيام فزت وكتمته وقالت : هيااام اصص
رعد برعب وعصبية : ووش تسووييين هنااا !!
هيام : ياللييلل كلنا هنا نرتب مع وعد وجيتوا وطفت النور عشان م تشوفونا
رعد : طيب اصبري
طلع رعد وقال بصوت عالي وبخبث : عيياااال المجلس مليان بنات شرايكم ؟
فارس قام : اسألك بالله ؟
رعد وهو يضحك : وربي
سامي : جووي
كاسر تقدم وهو يضحك وقال : بأخذ وعد الكاسر وبمشي
رعد : لا يخوي لاتقتل متعتنا
كاسر انفجر يضحك وقال : تمم والله انه تم
سلمى : م يسويها منصوور
منصور ابتسم : احتزممي يبنت عبدالله
رعد : يهوووه اصبروا نتفااهم
هيام بصوتها الانثوي وهي مقصدها تحرق رعد قالت : بتدخلون يعني ؟ ولا وش
رعد لف لصوتها وقال : انكتمي انتي شوي !
سلمى رفعت فستانها وقالت : بناتتت الحقوونيي
ركضت سلمى وطلعت قدامهم والكل وراها يركضون من العيال ورعد شاف البنات كلهم وصد وهو يضحك وقال : قطييع ماشاءالله
كاسر والعيال لفوا وصدوا عنهم وهم يضحكون
سلمى بصراخ : ذيييب !!
ذيب لف وقال : ووولدد وششذاا
سلمى ركضت له وحضنته وغطت وجهه عن البنات اللي دخلوا وطاحوا ع الارض يضحكون ولين مفجوعة وقالت : يمه وش صار ؟
هيام : الله لايعيدها من فجعة
لين طلعت راسها من الباب وشافت كيف سلمى حاضنه ذيب اللي كان اطول واعرض منها وكانت مختفية بين يدينه وكان محاوطها بشكل كسر قلب لين وقالت : سللمى تعااالي
سلمى تركت ذيب ودخلت وهي تضحك وقالت : وربي اني مطنوخة
بشرى : ارحمينا من طناختتس تكفين
بيان وهي ترجف من الضحك : ورربيي ي سلمى ارحميينا
سلمى : لا والله ؟ احمدوا ربكم بس
ذيب اتجهة للعيال وحصلهم يضحكون وقال : وش العلم يرجال !
كاسر : رعد خوفهم شويتين وطاروا للبيت
حمد بصوت عالي وهو يضحك : شوووق عجلي !
شوق طلعت بعبايتها ومسكت ذراع حمد وطلع معها لسيارته هو وسامي واتجهوا لبيتهم
فارس كح وقال : من اللي يدخن !
كاسر لف في محمد وذيب ومحد فيهم كان يدخن وقال : مدري محد
رعد طلع والدخان مستقر بين شفايفه ومتشمر وشعره مبعثر ع وجهه وكان ملفت ويفتن وقال : معليش مقدرت امسك نفسي
ذيب ابتسم : جووي وربي
محمد طلع بوكيت دخانه وصاروا يسولفون عن الانواع واخطرها وكذا
فارس : الله يكتمك يرعد قل امين
رعد زفر بوجه فارس الدخان وصد فارس بسرعة وهو يكح وقال رعد : لا بس استرجع الايام الخوالي ايام كنت بتموت بين يديني عشاني ادخن
فارس اخذ علاجه وقال : انا م صدقت ع الله تتركه
رعد : م تركته بس م كنت ادخن كثير يعني فالدوام منصور يشوفني اطلع من مكتبي عشان ادخن
منصور : صادق والله
رعد بصوت عالي : يوولدد هييااام اطلعيي
هيام : يالله يالله
ودعت هيام وعد وباركت لها وطلعت لرعد ووقفت وهي تشوفه قدامها يدخن وتاكي ع الجدار بطوله وعرضه وعضلاته وعروق يده البارزه وازرته المفتوحة وثوبه المشمر الاسود كان يفتن بكل شيء وتقدمت له ومسكت ذراعه ولف لها رعد وابتسم وقال : هاتس مفتاح سيارتي اركبي وشوي وبجي
هيام اخذته من يده وطلعت وحضنها محمد ومشى معها للسيارة ووراهم حريق داخل جوف رعد اللي م يتحمل يشوفها جنب اي احد غيره
هيام : رعد يدخن ؟
محمد ابتسم : م كنتي تدرين ؟
هيام هزت راسها بنفي وقالت بحزن : قلبي يوجعني م ابيه يتعب ويروح من يديني بسبب دخان !
محمد : شفيييك هيام تتفاولين عليه اذكري الله وم بيصير الا كل خير
هيام : الله يستر بس
ركبت هيام السيارة وطلع رعد من باب البيت ومشى للسيارته
محمد : هيام زعلانه
رعد ابتسم ع جنب وقال : اعرف اراضيها
محمد ضحك وقال : تم اجل
رعد فتح باب سيارته وقال : حمود قل لكاسر بكرا المخيم
محمد لف لرعد وقال : اماااانه بكرا ؟
رعد هز راسه بنعم وركب السيارة وقالت هيام : ابعد مني الزفت ذا
رعد لف بقوة وقال : ايش ؟
هيام كانت تناظر بسيجارته اللي بين اصبعينه وقالت : ابعدها !
رعد ابتسم وفتح الشباك ورماه وقال : صح نسيت انتس حامل
هيام بحدة : حتى لو اني مو حامل م ابي اشوفك تدخن قدامي !
رعد : م بتشوفيني اصلاً
مشى للبيت والصمت سيد المكان ووصلوا ونزلت هيام وتمسكت بالباب وقالت : رعد تعال شوي
رعد طفى سيارته ونزل واتجهة لها وقال : لبيه ؟
هيام تمسكت بذراع رعد اللي شّد عليها وقال : تعبانة ؟
هيام : لا بس ابي امسكك اخاف اطيح
رعد ابتسم ومشى مع هيامه للداخل بيتهم وجلست بمساعدة رعد ع الكنب فالصالة وقالت : رعد وش البيت ذا !
رعد حك راسه وقال : وش وسخ ؟
هيام : تستهبل كييف كنت عايش فيه !!
رعد قطب : حبيبيي شفييه ؟ البيت نظيف لا تكبرينها !
هيام كانت تشوف الغبار بشكل اوضح من رعد اللي م كان يهتم بس كوساخة لا كان كل شيء مكانه وهذا اللي صدم رعد وقالت : م تشوف الغبار ؟
رعد : اهااا مدري والله ثلاث ايام م كنت اجلس بالبيت كثير
هيام بحدة : حتى انا م بجلس فيه وهو كذا !
رعد مسك فكها ورفع راسها له وقال بحدة : شفيتس وش النفسية الزفت ذي !
هيام مسكت يده بقوة وبعدتها عنها وقامت وقالت : انا بطلع لبيت اهلي من بكرا سامع ؟
رعد توسعت عيونه وقال : بدييينا !!
هيام : بدينا ولا لا انا م بجلس هنا
رعد بعتب واضح : وليه جيتي طيب ؟ كان ذلفتي مع محمد اللي تحضنينه قبل شوي تقول ان لتس سنة م شفتيه !
هيام بصراخ : رررععد خيير وشذا الاسللووب !!
رعد بحدة : صوتتس لا يرتفع عليي !
هيام كملت بنفس النبرة وقالت : وش بتسووي ؟؟
رعد تقدم لها وحاوط يده ورا خصرها وشّدها عليه وقال بصوت هز روحها : انتتيي عاارفه م فييه العن مني وم فييه اخططر مني عشاان كذا اهججديي قبل اهجدتتس !
هيام كانت ترجف من قرب رعد وكانت تعشق قربه وقالت بهمس : رعد لا تبعد مني ولا تخليني يوم ولاتفكر حتى
رعد لفها ونزلها ع الكنب واعتلاها وقال بصوته الثقييل : الحين تبين تروحين ولا تجلسين لاتلعبين ع الحبلين !
هيام حاوطت رقبته وقربت راسه منها وهمست بأذنه وقالت : عقلي يطلبني اروح عند اهلي بس عشاني وعشان ولدنا وقلبي يطلبني انام واصحى وانا بين احضانك وبين بوساتك وحبك لي
رعد ابتسم وباس خشمها وقال : وانا اتفق مع قلبك طيب ؟
هيام ضحكت وقالت : انتبه ع بطني بس وانت جالس فوقي
رعد ضحك وقال : اقوم يعني ؟
هيام كانت بترفض انه يقوم بس قام رعد وقال : اسف طيب
هيام فزت ومسكت يده وقالت : رعد شفييك م قلت لك تقوم !
رعد سحب يدها وباسها بقوة وقال : انتظرتس بعد شهرين
مشى رعد وطلع لغرفتهم تحت صدمة هيام وقالت : وراه ذا !
لفت لشنطتها الصغيرة واخذت جوالها ودقت ع محمد ووصلها صوته وهو يقول : عيوني يهيام
هيام : تعال اخذني
محمد شهق : شسالفة !!
هيام : م فيه شيء بس م ابي انام بعيد من امي
محمد تفهم وقال : تمام انا قريب اطلعي
هيام مشت وطلعت فوق لغرفتهم وكان رعد فالحمام واتجهت للباب وحصلته مفتوح وقالت : رعد وش تسوي ؟
رعد ابتسم وقال بهدوء : ادخلي
هيام دخلت وشافت رعد لاف المنشفة ع خصره وحاط رغوة الحلاقة ع وجهه ويحلق نفسه
هيام : لييه يخي اشتقت لدقنك !
رعد : ومن قالتس اني مهتم اشتقتي له ولا لا ؟
هيام تخصرت : احلف !
رعد : مقدر احلف فالحمام
هيام لفت وقالت : بروح محمد جاء
رعد م ناظر فيها وكان مدقق بحلاقته وقال : معسلامة
هيام : بس كذا ؟
رعد ابتسم وجرح نفسه وقال : اااسسللمم
هيام فزت وقالت : وشفيييكك !
رعد مسك فكه وقال : جرحت نفسي عشانتس
هيام تقدمت وجلست ع ركبها ومسكت وجهه وقالت : عساه بضلوعي عنك
رعد ابتسم ونزل لوجهها وباس مبسمها وقال : اجلسي معي
هيام بخجل : ودي بس مقدر
رعد رجع يبوسها مره ثانية وقال وهو قدام شفايفها : اجلسي
هيام كانت تنهار داخليًا وقالت : رعد انتبه لنفسك من الشفرة واشوفك بكرا فالمخيم
قامت ولفت وسحبها رعد وجلسها بحضنه وقال بصوته الرخّيم : ابيتس بحضني طيب حرام تحرميني وانتي بتكملين اربع ايام بدوني ! ارفقي برعّودتس يالهيام
هيام تمسكت برقبته وتوسعت عيونها وقالت : رعد ماني ناقصتك ولا ناقصه حركاتك ذي وانت عارف كيف تلعب فيني وتقلب موازيني ابعد !
رعد مسك خصرها وسحبها له وقال بتخدر : بس م تقدرين تنكرين وعارف ان حركاتي عاجبتتس وم تبيني اوقف صح ؟
هيام قامت وهي ترجف وداخلها يرعد وقالت : انتبه لنفسك
مشت وهي تبي تنام بحضنه ولا تتركه ابدًا بس م تركت قلبها يغلبها وطلعت من البيت وركبت مع محمد واتجهوا لبيت اهلهم اما عند رعد فكان يضحك وهو عارف ان هيام م بتنام الليلة وبتجلس تفكر فيه وفي ملامساته وحركاته وبوساته لها وخلص ودخل تحت الدش وتروش وطلع ولبس ونام بدون تيشرته وهو ناسي انهم فالبرد ..
.......................
في بيت كاسر
دخل كاسر بعد م سكر باب بيتهم ودخل البيت وقال : بنات
وعد : لبيه يعيون البنات
كاسر تقدم وهمس لها وقال : وين لين ؟
وعد ابتسمت : في جناحها
كاسر ابتسم وشال وعد بين يدينه وحاوط بسيقانها خصره وقال : بختلي فيتس تحمليني
وعد توسعت عيونها وقالت : ايش ؟؟
كاسر ابتسم وتقدم فيها لغرفتهم وهو هايم بوعد وكل يوم يزيد حبه لها ونزلها واعتلاها وقال بحب : احبتس تدرين ولا م تدرين ؟
وعد ابتسمت : ايه ادري بس شكلك م تدري اني اهيمك واعشقك واموت فيك !
كاسر كان يتأملها بكل عشق وقال : يكبر الحب ويكبر حظي فيتس
وعد نطقت بحب وقالت : كاسر للحين مو مصدقة اني اجتمعت فيك وصرت حلالك ولك لحالك
كاسر ابتسم بخبث : بتصيرين حلالي الليلة اصلاً
وعد قطبت : كيف يعن..
قاطعها مبسم كاسر وضاعت وعد بين يدين كاسرها وهو معلنها حلاله وو🌚...
" بعيد شوي بجناح لين "
لين بملل : اف الحين اخواني كلهم متزوجين وانا للحين احضن مخدتي صح انه راحة بال لكن لو اني م عرفت ذيب كان م تمنيت الزواج اصلاً مدري وش سووا فيني سحر وربي !!
قامت وطلعت برا شرفتها وفزت ونزلت اول م شافت سيارة ذيب وقالت بنفسها ( يممهه وربي طلع صادق كل ليلة يجي !! )
رجعت بهدوء لغرفتها واخذت بطانيتها وطلعت من جديد وقالت : خير يقليل الادب م عندك بيت ؟
ذيب رفع راسه لها وقال : الا والله عندي وحدة اشوفها بيتي ومسكني وحبي وعشقي بس انها بعيدة مني وقريبة لروحي وودي اني بحضنها الحين اه صدق ان الواقع مر
لين كانت تتأمل بذيبها وقالت : ذيب شرايك تخطب بكرا ؟
ذيب ضحك : متى فالمخيم ؟
لين : ايه وتجيب شيخ ونكتب الكتاب فالمخيم
ذيب : جوي يعني تبين خطوبتنا كتب كتاب ؟
لين : ايه يعني ملكة بأختصار
ذيب ابتسم : ليه طيب ؟
لين بحدة : بلا غباء وش ليه عشان م اصير اتغطى منك
ذيب ضحك وقال : م يفرق حافظتس اصلاً
لين : عشان مانت برجال !
ذيب احتدت نظرته وقال : احلفي اجيتس واعتليتس واعلمتس انا رجال ولا لا ؟
لين لفت بهدوء وقالت : اتحداك
دخلت غرفتها وسكرت باب الشرفة وسكرت ستارتها وانسدحت ع السرير وحطت مخدتها ع وجهها وصرخت بأعلى صوتها وقالت : يووييلليي ابييه بين احضاااني الااان
صارت لين تصارع الحب بشكل يضحك وهي تحرك رجولها ع السرير وتصرخ وتكتم صرخاتها وذيب تحت م زال يتأمل شرفتها وقال : والله انها غبية و ع جووي اذا تزوجتها وش بيصير !!
مشى ذيب لبيتهم وابتعد عن معشوقته ودخل لغرفته وانسدح ع السرير وقال :
ياليتني بين يدينتس نايم
‏و بحضنتس الدافي اعيش نعييم
‏من يوم شفت بعدتس م ذقت طعم
‏وغدييت كهل و تعبان وسقييم
‏ف يااارب عجل باللقاء وانعم
‏بحضنتس ولصوتتس ي ليني اهيم 
-
قال ذيب ابياته وطاح نايم بأحلامه في لينه
...................
يوم الجمعة صباحًا الساعة ٨ تحديدًا بيت ابو محمد
ابو محمد : ايه تعالوا اليوم بنجتمع كلنا
ابو جيهان : ابشر والله بنجي
سكر ابو محمد وزفر بتعب وقال : اخيرًا اخر اتصال الكل بيجون
فارس ابتسم : ماشاءالله عليك يجدك عساك ع القوة
ابو محمد : وياك يالفارس
جلسوا يفطرون وهم مستعدين نفسيًا لرحلة تخييم مدتها خمس ايام
............
في بيت رعد
صحى رعد من نومته وهو يحس بشيء نايم عليه وفز برعب لأنه عارف م فيه الا هو ببيته
رعد برعب : ممييينن ؟؟
هيام رفعت راسها بتعب : خير شفيك تصارخ !
رعد مسك قلبه وقال : ااااه يهياامي
هيام فزت وقربت منه وحضنت راسه لصدرها وقالت بهدوء : بسم الله عليك يحبيبي سم بالله
رعد لف يده ورا خصرها وشّدها عليه وقال بصوته الثقييل : متى جيتي ؟
هيام : الصباح بعد صلاة الفجر
رعد ابتسم وحشر وجهه عند نحرها وقال : احبتس وحشتيني ووحشني حضنتس والله انه اسعد صباح اللي اصحى ع وجهتس فيه
هيام ابتسمت وقالت : تهيييمك هياامك يالرعد
رعد : يالله انك لاتحرمني من هيام الرعد
شّدت هيام ع رعد وهي حالفة م تكسر بخاطره وتواسيه وتشوفه طفلها الاول قبل ايهم ..
:::::::::::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم 🤍
( هاااااي يحلويين رجعت ببارت لطييف ويضحك وقصير😔 ، بكرا اختباري الفاينل وابي دعواتكم مع اني عارفة اني بشششقه وبرجع لكم ببارت يجنن بكرا انتظروني واحبكم مرره 💞 ، تبون خطوبة ذيب ولين البارت الجاي ولا 🤌🏻😏 ؟  )