Unicode
ကလေးက ချော့လို့ကို မရဘူး
_____________
ယုဂန်၏မျက်ဝန်းနက်နက်ဝယ် မျက်ရည်တို့ ရစ်ဝါးနေခဲ့သည်။
ယုဂန် သူ၏ရင်ခွင်၌ပိုက်ထားသော ကလေးငယ်ကိုငုံ့ကြည့်လိုက်သောအခါ သူ၏နှလုံးသားတွင်းမှ နက်ရှိုင်းပူနွေးမှုများက ပိုမို၍ လှိမ့်တက်လာပြီး သူ့ကို ပို၍မျက်ရည်မဆည်နိုင်အောင်ဖြစ်နေစေသည်။
မောင်က သူ၏ပခုံးကို ပိုမိုတင်းကျပ်စွာဖက်လိုက်သည်။
မောင်၏ ကိုယ်သင်းရနံ့နှင့် ကိုယ်၏နွေးထွေးမှုက ယုဂန်ကို လုံခြုံစေပြီး သက်တောင့်သက်သာရှိသော အိမ်ကလေးတစ်လုံးနှယ် ထွေးပွေ့လာသည်။ယုဂန် မောင့်ကို အသာအယာမှီတွယ်လိုက်သည်။ သူ မောင့်ကိုလှည့်ကြည့်လိုက်သောအခါ မောင်က သူ၏မျက်ရည်များကို နူးညံ့ညင်သာစွာ သုတ်သင်ပေးလာသည်။
ယုဂန် နှာကလေးကို တစ်ချက်ရှုံ့လိုက်၏။ သူ့ကိုကြည့်ပြီး မောင်က ခပ်ရေးရေးပြုံးနေသည်။
ထိုအချိန်ဝယ် နံ့ရှားကြာဖြစ်သော သုနန္ဒာမှာ ယုဂန်နှင့်အရုဏနားသို့ လျှောက်လာသည်။ သူက ယုဂန်လက်ပေါ်မှ ကလေးဆီ လက်ကမ်းကာ
" ကလေးကို တစ်ချက်လောက်ကြည့်ပါရစေ"
ဟု ခွင့်တောင်းစကားဆိုသည်။
သုနန္ဒာတွင် ကလေးအတွက်ကြည့်ရှုစရာရှိနေမှန်း သိသည်မို့ ယုဂန် ကလေးကို သုနန္ဒာလက်ထဲသို့ ဂရုတစိုက်ထည့်ပေးလိုက်သည်။
သုနန္ဒာက ကလေးကို သေချာထွေးပွေ့၍ အစုံအဆန်ကြည့်ရှုနေသည်။ အထူးသဖြင့် ကလေး၏ကိုယ်တွင်းစွမ်းအားကို သူ၏စက္ခုအမြင်အာရုံနှင့် ချိန်ဆကြည့်ရှုနေသည်။ နတ်မင်းများထံမှ ပညာသင်ခဲ့ရသူမို့ လူတစ်ဦး၏ဖြစ်တည်မှုကို ကြည့်ရှုရသည်မှာ သုနန္ဒာ၏ကျွမ်းကျင်သောဘာသာရပ်တစ်ခု ဖြစ်သည်။
သုနန္ဒာက ကလေးကိုကြည့်ရှုပြီးနောက် ဆိုသည်။
" ကလေးက လူဘီလူးကပြားပါ။ ဘီလူးသွေးပါတာမို့လို့ အချိန်တစ်ခုရောက်တဲ့အခါ ဘီလူးအစွမ်းတွေ ပေါ်လာပါလိမ့်မယ်"
YOU ARE READING
The Everlasting One (volume 2 + 3 )
FantasyStart Date : 24.11.2021 End Date : 1.4.2024 Unicode ဥတ္တရနိုင်ငံရဲ့ မင်းသားအရုဏဟာ သူ့ချစ်သူ ယုဂန်နိုင်နဲ့အတူ ပျော်ပျော်ရွှင်ရွှင်နေထိုင်သွားဖို့ပဲ ဆန္ဒရှိခဲ့တယ်။ ဒါပေမဲ့ မထင်မှတ်ထားတဲ့အရာတွေ သူတို့နှစ်ဦးဆီ ရောက်ရှိလာတဲ့အခါ.... ယုဂန်ကိုလက်တွဲပြီး သူက...