الجميلة والوحش

الجميلة والوحش 25

#الجميلة_والوحش
الحلقة 25

اتصل قيس: بواحد من أفراد الكتيبة الو مساء الخير
عامر: من معاي ومتصل برقم دولي
قيس: أنا قيس محمد ###
عامر: اووووو قيس وين وين متدكرنا بعد هالسنين وين وشن أخبارك
قيس: والله الحمدلله بارك الله فيك نبيك في خدمة ياوخيي
عامر: ضحك عارفة الاتصال مش بلاش
قيس: عاد أنا نقولك بتخدمني مرحبتين كمهدا أزعل تو نرضيك
عامر: تفضل الدلل وخيي
قيس: نبيك الدورلي واحد اسمه رمضان جبران ###
عامر: حاضر بس من هذا يقربلك
قيس: هذا أب جلال
عامر: مادام بو جلال ندوره شخصيا ونشوف موضوعه
قيس: تمام بارك الله فيك ان شاء الله نردهلك في الخير
عامر: عيب مش بيناتنا

قيس سكر الخط
ليلى: شن فيه قيس
قيس :مصيبة بو جلال طبوه من الحوش
ليلى: هييييي حي عليه
قيس: توا كلمت صاحبي يدور عليه بالك يلقاه يستر الله الكتيبة ماعندهم الروح وين احتمال ينفوه حتى النفي
ليلى: ربي يستر وخلاص حي على خالتي فاطمة ياناري عليها مسكينة
قيس: أبصر شن مداير مع نسابته لأنه نسيبه في الكتيبة لو طلع هو نهاره أسود مايشوف فيه ضي
ليلى: ربك يستر

عامر: قعد يشوف في سجل لي شادينهم في الكتيبة القي واحد اسمه رمضان جبران سأل لمعاه هذا من مشي خداه
عمر: معاد ###
عامر: الراجل رمضان جيبوهلي وشدوا معاد ### في الحبس من أمتى نشدوا في ناس لمصالح شخصية
عمر: حاضر تفاهم مع أربعة شدوا معاد وشدوه وحطوه في الزنزانة ورمضان طلعوه ورفعوه لعامر أول مادخلوا رمضان
وقف عامر: تفضل عمي رمضان تفضل آنستنا
رمضان: مستغرب من الاستقبال متوقع جايبينه بيعطوه طريحة الله يآنسك ويزيد فضلك
عامر: قعمزه عالكرسي شن تشرب عمي رمضان
رمضان: اميه حسه الرعشة قاعدة في رجليا
عامر: عمر اميه للحاج
عمر :حاضر
رمضان: أنت من ياولدي
عامر: أنت عارف من طابك من الحوش
رمضان: من غيره معاد نسيبي أكيدة من أخته لأنه قلتلها خوك الفرفوط مانخافش منه
عامر: مادام أنت على بينة من الأمر أنت ياعمي في أمان عندي مادام مارفعوكش
رمضان: أنتم ليش خديتوني من الحوش مادام هذا كلامك
عامر: توا جتني مكالمة دولية طلبت مني نهتم بيك وندور عليك ومن أعز أصدقائي وطلبت نهتم بيك بنفسي
رمضان: بارك الله فيك وفيهم
عامر: ويبارك في عمرك عمي: أنا صديق ولدك جلال ياعمي أكيد عرفتني عامر ###
رمضان: دمعوا عيونه وبدي يبكي بجد
عامر: هدي بالك ياعمي
رمضان: ديما حاصل في مشاكلي وأنا مادرتله شي في عمره هو ليديرلي
عامر: ولدك جلال مكلم قيس وبما أنها مكالمة دولية معناها مسافر مكلمني ندور عليه ونسيبك معاد حنهتم بيه مش هو ليطب عمي رمضان وأنت مادخلك بشي صفحتك نظيفة ومعروف بسمعتك الطيبة ياعمي عند كل الناس
رمضان: هذي شهادة نعتز بيها
عامر: تبي نوصلك عمي بذات نفسي للحوش حاضر على عيونك وعيون جلال وقيس بتتسهل وبتروح بروحك كذلك حاضر
رمضان: بارك الله فيك ياولدي ان شاء الله في ميزان حسناتك
عامر: طلع مع عمكم رمضان وفتحله السيارة هيا تفضل ياحاج
رمضان: قعمز يزيد فضلك
عامر: عمر الموضوع خليه لعند نجي
عمر: تامة 👍

عامر: ولع السيارة وانطلق لحوش رمضان حطه ومشي لجلال القديم دق الباب وماحد فتحله وقعد يشوف يمين ويسار شن هذا حول أو زين اتصل بيه الو جلال كيف الحال
جلال: هو قاعد مستغرب من اتصال عامر يحسابه حتى ميت 😂 اهلين عامر ماشية وأنت
عامر: تمام جيتك للحوش مالقيتكش
جلال: تعرف حوش قيس
عامر: ايه نعرفه قاعد لنفس شارعكم
جلال: ايه تعال غادي واخد منه الملحق
عامر: تمام اهو جاي

مشي ودق الباب وطلعوا قعمزوا برة
عامر: تعرف بوك من رافعه
جلال بكري تكلمت مع قيس وقلتله ماعندنا حد في الكتيبة كان معاد شن وين تعرف الكلام هذا 🤔
عامر: القيته حاجزينه عندنا وطلعته
جلال: بعدم اهتمام باهي كويس
عام:ر شن صاير بينك وبين بوك لدرجة معمز في الحوش ومش مبالي
جلال: بوي مادارلي شي حتى ياخد اهتمامي
عامر: باهي تعرف إنه مرته هي لشاكية فيه هذا ليش طبه نسيبه معاد
جلال: لفعله بايده ربي يزيده هذا ليبدل الأصل بالمقلد
عامر : ربي يهديك تي هذا بوك
جلال: والنبي ساد لينوض يقولي بوك بوك في حد مشاله وقاله هذا ولدك لماليشي غير بوه شوفله أصرف عليه دوره وأشر على الباب أمي هي أمي وبوي مافيش حد ثاني عارف أو لا أنا من الحرقة كلمت قيس بس لأنه قالوا أني أنا شكيت في بوي وطبوه لأني تعاركت معاه وهددته أنه بنحبسه أنا ورمضان مش في الأبيض للأسف وأظن أنت تعرف شن قصتي وأكثر مني لأنه سعاد ماشاء الله تقربلكم
عامر: لا حول ولا قوة إلا بالله
جلال: عامر أنت جيتني بعد مدة صح خلينا أصحاب وحبايب وقصتي مع بوي خليها على جنب مانبيش نفسد صحبتي معاك على خاطره تمام نمشي نجيبلك قهوة ونشربوها وعالكيف
عامر: تمام دير لتلقاه مناسب
شربوا القهوة وهدرزوا على أيام زمان وروح عامر وخش لأمه
فاطمة: من لجايك هذا
جلال: هذا عامر خبرني قالي انه بوي كان عندهم وتوا روح بيه
فاطمة: باهي للقي ولد حلال
جلال: مايهمش

رمضان: روح للحوش القي سعاد مستمتعة ومولعة الأغاني وترقص فرح لتبيه صار
خش والقى كلمته لصمتها وماعاد زادت كلمة
لا تأسفن على غدر الزمان لطالما رقصت على جثث الأسود كلاب
لاتحسبن برقصها تعلو على أسيادها تبقى الأسود أسوداً والكلاب كلاب
تموت الأسد في الغابات جوعاً ولحم الضأن تأكله الكلاب
وذو جهل قد ينام على حرير وذو علم مفارشه التراب
سعاد: رمضان اااااا أنت جيت طلعت
رمضان: رمضان طلع ياخاينة ياغدارة بالك تحسابي كان بعتي خوك يحبسني أنا مانعرفش أو مافيش حد وراي يطلعني الحمدلله لعندي ولدي لكلم صحابه يطلعوني أنتي طالق طالق طالق لمي شلاتيتك مرأة زيك ماتلزمني
سعاد: قعدت تخبط على وجهه ورجليها يانهاري الأغبر وين بنعدي يانهاري الأحرف يأيامي السود وخلالي عود
رمضان: فكرتي فيهن أيامك قبل ماديري عمايلك الصغار يقعدوا تمشي بشلاتيتك لعليك فاهمة توا بطلع نلقى الصغار قاعدين وأنتي ماهناش

كان بقدره أن يضربها أو مش عارف شن يديرلها بس طلاقه منها كان كفيل بثلاث طلقات في قلبها أدت لموتها بعد مارقصت فرحاً لأنه وصلت لمبغاها هذا ليشوف شي أعلى منه بتستاهل ماعلينا خلوا نمشوا لعمكم رمضان وين ماشي

فاطمة: جلال نوض الباب يدق فتح الباب القاه بوه كيف بيتكلم
رمضان: نزل طول تحت رجليه ولدي أنا كنت أعمى والله نبيك تسامحني أنا غلطت في حقك وحق أمك
حول جلال يدين بوه من رجليه مستحيل نسامحك
رمضان: أنا غلطت ونطلب منكم السماح
جلال: ....
يتبع انتظروني في الحلقة الجاية المزيد من الأحداث مع قصة رمضان وسعاد وقصة قيس وليلى
آسفة عالتأخير