ليّت اللِذي خَلق العُيون السُود ... خَلق القُلوب الخَافقات حَديد

البارت الثالث

ضحى مشت بدون اي رد وراحت لآسر وطلعت له جزمته ولبسها وطلع علطول اما عند الميلا فدخلت براسها فكرة جهنمية وقامت بس كالعادة وقفتها الجود وهي تقول : ع وين يقمر ؟
الميلا ابتسمت ورفعت صوتها وهي تقول : امشوا كلكم يبنات خلونا نجلس برا فالحوش يالله
تالين ابتسمت وقامت هي ودالين والجود وقفت مع اختها وسحبت البندري معها وشوي وجات ضحى وتخصرت وقالت : خير خير وين سارين ؟
الميلا : بنجلس برا ليه ؟
لفت الميلا وكانت تطالع وراهم كلهم وشوي وقالت بحدة : غزيل خير قومي !
غزيل كانت تشرب قهوة وتاكل حلاها وقالت : يختي خليني اكل لا اله الا الله بجيكم شوي بس
ضحى ضحكت وقالت : عاد غزل اهم شيء عندها الاكل
غزيل عطتها نظرة وقالت : دزي بس
طلعوا كلهم ورا البيت وجلسوا وقالت الميلا : تالين وينتس مختفية ؟
تالين توسعت عيونها بصدمة وانه شلون الميلا لفت السالفة عليها وهي طبعها م تحب تجذب الانظار لها وردت بهدوء وقالت : وش نسوي يميلا من البيت للمطبخ و ع ذا الحال
ضحى ضربت فخذ تالين وقالت : يالنعجة كان تسيرون علينا !
تالين انفجرت تضحك وقالت : والله ومن يجيبنا ولا ناسية ان بيتكم بأخر الديرة ؟
الميلا عدلت جلستها بحماس وهي تحب اجواء الديرة وقالت : وفلاح وينه ؟
تالين تذكرت اللي صار بينها وبين فلاح وانها زعلت منه بعد م ضربها وهي مدخلته البيت وساتره عليه فضايحه وقالت : ابد تلاعنت انا وياه ولعاد كلمته
الجود تحمست وقالت : وش العلم ؟
دالين قامت بملل وقالت : طفش بقعد عند امي
مشت وتأففت البندري وقالت : سبحان اللي خلقكم وحطكم خوات
تالين ضحكت وقالت : م نتشابه لا وجه ولا اخلاق صح
الميلا : ايييه وربي ترفع ضغطي دالين
ضحى وهي تفصفص قالت : امنعونا من الدلة ذيك
الجود شرقت بالقهوة وقالت : دلللة !!!!
انفجروا البنات يضحكون ع رد ضحى وهي تضحك معهم وقالت : غززل عادتس بتجين
غزيل طلعت وقالت : دالين وش علتها ؟
طاحت الجود ع البندري وكانوا يضحكون بشكل مرعب وقالت ضحى : الله يرزقكم عقول ابد والله كلها علة اجلسي واسحبي
وفجأة فزوا البنات ع صوت عقاب اللي يقول : يووولدد طرريييق
ضحى فزت وشلت ترمس القهوة معها وقالت : امشوا امشششوا عقاااب امشوا
البندري برعب : عقااب اصبر البنات عندنا
عقاب زفر بعصبية وقال : اعجلي علي انتي وياها !
" كان ابو فهد حاط بابين للمطبخ باب يفتح ع الحوش عشان العيال يدخلون ويطلعون بسرعة وباب داخل البيت كأي باب عادي وعقاب جاي من ورا عشان يجدد الدلال "
دخلوا البنات كلهم ماعدا الجود اللي طاح خاتمها فالتراب من الضحك وصارت تدور عليه وهي مغمضة عين وفاتحة الثانية يقالك بتركز ومشى عقاب اول م سمع الهدوء وتوقع معاد فيه احد وشافها بكتلتها وحجمها الصغير وشيلتها ع راسها ويدينها الصغار واسواراتها واظافرها الطويلة ركز بنظره عليها وشافها كأنها بتلف وصد علطول بنظره وقال : ووولدد !!
شهقت الجود وقالت : بسم الله ييمه !!
عقاب كان يفور عصبية وهو م يحب يشوف اي شيء يخص الاناث وقال بحدة : وش مجلستس هنا ادخلي داخل !
الجود مشت برعب ووصلت للباب بس كان عقاب قريب وهي بحكم انها تخاف منه وبقوة قالت بهدوء وبصوتها المهزوز : طيب وخر بدخل !
فاحت ريحة عطر الجود وتداخلت بعطر عقاب الرجالي وريحة العود وشبة الضو واستغفر ونزل الدلال ومشى تاركها وراه تناظر بظهره العملاق وقلبها يدق ويدينها ترجف بشكل مرعب وانصعقت اول م مسكتها البندري وقالت : وش فيتس صنمتي ؟
الجود شهقت وقالت : بندري خرشتيني !!
البندري نزلت بنظرها للدلال وقالت : اف غريب عقاب راح ؟
الجود دخلت بدون اي رد ثاني وشالت البندري الدلال ودخلت فيها للمطبخ وجددتها وقالت بنفسها ( معقولة عقاب شاف جود ؟ م اتوقع بس ليه عقاب راح وهو م عمره تراجع عن اوامره ! ) كملت تحط بهارات القهوة ونزلتها عند الباب وقالت بصوت هامس وبحدة : عقاااب اسرر ناااصرر !!
اسر سمع صوت البندري وجاء يركض وقال : لبيه بندري وش بغيتي ؟
البندري ابتسمت وقالت : امسك الدلال وودها عند الرجال
اسر قطب وقال : وين عقاب ليه م جابها ؟
البندري : سلامات يعني ماهو عندكم ؟
اسر : لا بالله م شفته اسمعي من اللي عندكم ومن اللي جاء
البندري لاحظت تغيير ملامح اسر وقالت بحدة : ورع اعقل وش تبي بالنساوين
اسر تكى ع الجدار وقال : ابي اعرس اعنبو غيرتس شوي وادخل ثلاثين
البندري ضحكت وقالت : والله ؟ طيب في احد ببالك ؟
اسر علطول تذكر الميلا بدون اي سبب وتلطم واخذ الدلال وقال : امزح معتس يالنعجة
ومشى والبندري م كانت نبيهة زي ضحى ونست الموضوع علطول ودخلت داخل وقالت : بنات نرجع برا ؟
الجود برعب : لا معاد بجي انا
ضحى : ايه خلونا نجلس هنا البندري عقاب وينه ؟
البندري جلست وقالت : مدري والله اسر اللي خذا الدلال من عندي
ضحى : اسر وش قال وليه عقاب نزل الدلال ؟؟
الجود ارتبكت وقالت بنفسها ( يارب مو عشاني وبعدين وش نزلها وخلاص ليه يحبون يتحرون !! )
ضحى قامت وراحت للمطبخ ودقت الدريشة ثلاث مرات وشوي ودخل اسر وقال : وضيحي وش بغيت ؟
ضحى ضحكت وقالت : تعال يافلذات كبدي تعال
اسر دخل وهو يضحك وحضنها وقال : وشفيتس من مضيق عليتس بس اشري والباقي علي
ضحى : والله محد بس استغربت هدوءك اليوم
اسر : اي هدوء ؟
ضحى ضربته وقالت : وين عقاب طيب ؟
اسر : برا ليه
ضحى : خله يجي الان
اسر مشى وطلع ركض ووصل عند الضو وقال : عقاب فيك شيء ؟
عقاب لف له وقال : لا
اسر : طيب وضيحي يبيك
عقاب قام ومسك يد ثامر بقوة وقال بحدة : خلك عند الدلال دقايق وبرجع
ثامر ابتسم برعب وقال : ابشر يعم
عقاب ضرب راسه بخفه وقال : تبشر بالجنة يحبيب عمك
مشى عقاب ورا اسر ووصلوا للمطبخ وكانت ضحى تقطع السلطة ودخلوا وقال اسر : وضيحي شوف جبت لك عقاب
ضحى ضحكت وقالت : قتلتوا انوثتي
عقاب دخل وقال : وضيحي وش تبي ؟
ضحى : الحين بينقص منك شيء انت وياه اذا عاملتوني كأني بنت ! ولا عشاني جيت بعدكم !
عقاب ابتسم وقال : الحين ذي السالفة اللي جايبتني عشانها ؟
ضحى سكتت وقالت بهدوء : اح قطعت اصبعي !
اسر فز وقال : فيتس شيء اصبعتس سالم !
ضحى بأستهزاء : لا راشد
اسر انفجر يضحك وضحى معه بس سكتت ولفت بنظرها لعقاب اللي كان يناظر الباب الداخلي للمطبخ وكأنه ينتظر احد
ضحى بصدمة : عقاب خير ؟
عقاب لف لها بسرعة وتنحنح وقال : وشو !
اسر لف وقال : وش وش سوا ؟!
ضحى : مدري يطالع فالباب كأنه ينتظر احد والسؤال له عقاب تنتظر احد ؟!
عقاب ارتبك وقال : هاه ؟ لا وش من انتظر بعد !
اسر ابتسم بضيق وقال : يمكن يبي يشوف الميلا ماهو بيخطبها الليلة !
ضحى بصدمة : ااايششش عقاااب والميلاا !!؟!
وعند الباب حست الجود انها انصفقت ع وجهها وانصعق جسمها كله من الخبر اللي سمعته وهي كانت ناوية تطلع تجيب خاتمها وبالصدفة وقفت عند الباب وسمعت كل شيء
عقاب : وخير ان شاءالله والصراخ اقصري حستس ولعنة !! وبعدين اشوفها فالشوفة يحمار ؟
ام فهد وقفت عند الباب وقالت : جودي يبنتي ودتس بشيء ولا ناقصتس شيء ؟
عقاب لف علطول لأمه اول م سمع اسم الجود منها وقال : يميمتي متى تحضرون العشاء ؟
اسر : الجود وينها هنا ؟
ام فهد ابتسمت وقالت : لا بس واقفة عند الباب
الجود بفشلة وعيونها امتلت بدموعها قالت : لا يعمتي م ابي شيء بس خاتمي ضايع وحسبت انه طاح مني فالحوش
ضحى : عيال وجع اذلفوا خلاص !
عقاب صد وطلع ولحقه اسر ودخلت ام فهد وهي ماسكة الجود معها وقالت : هاه يبنتي تطلعين تدورينه ؟
الجود : ايه ايه يعمة بروح
مشت الجود وطلعت وصارت تدور له يمين يسار ومثل م خمنت م كان الخاتم موجود ابدًا وكأن الارض انشقت وبلعته لفت بشويش وشافته طايح ومسكته ولبسته ابتسمت براحة انها حصلته ودخلت ركض ع سوالف ضحى وامها وكملت لمجلس الحريم وجلست جنب امها والميلا
" فالمطبخ "
ضحى : يمه عقاب بيخطب الميلا
ام فهد : ايه هذا كلامه وكلام ابوتس ليه ؟
ضحى ابتسمت بفرحة وقالت : اخ ياااارب يتمم ع خيير
ام فهد : اميين يبنتي
ضحى ضحكت وقالت : يعني عقيب بيعرس ! يالله ورعي تكفون مقدر
ام فهد بصدمة : ورعتس ! اعنبوتس ذا الجثة والعملاق ورعتس انتي !!
ضحى : يحليلله عقيب يجعله في حياته يتهنى ويلقى الميلا بنت احلامه واللي بتعوضه وتغيير من قسوته يارب
ام فهد رفعت يدينها للسماء بحنية وحب وقالت : يالله يارب
ضحى : يميمتي ادعي لي البندري تجي تساعدني فالتحضير
ام فهد نادت بصوتها وهي تقول : البندري غالية احلام حصيص تعالوا
دخلت حصة وقالت : يعيوني يجدة لبيه ؟
وبعدها غالية والبندري وقالوا : لبيه
ضحى : خلصت السلطة وبقى التحضير امشوا نتساعد الرجال طلعوا الحين لصلاة العشاء والعشاء بعدها لازم يكون جاهز
ام فهد زفرت بضيق وقالت : وين احلام ؟
حصة باست راس جدتها وقالت : انا بدالها تعرفين امي يجدة وانا اخاف انها تحزنتس
ام فهد ابتسمت لحصة وقالت : الله يرضى عليتس يبنيتي
طلعت ام فهد وبدؤا البنات يشتغلون ويشيلون وشوي ودخلت الميلا وتالين وغزيل وقالت الميلا : بنات تحتاجون مساعدة
حصة ابتسمت : م نقول لا يالله يدنا بيدكم
تقدموا البنات وصاروا يتساعدون وخلصوا وقالت ضحى بهمس : وخواتكم الصغار م منهم فايدة ؟
تالين : دالين وتعرفونها
الميلا جلست عند درج مجلس الرجال وقالت : وجودي مدري شفيها ولا والله انها سنعة واكثر مني بعد
ضحى جلست وقالت : غزل امتس تعبانه ؟
غزيل بحزن : ايه والله وحلفت علي اجي بدالها للعشاء وبرجع اول م اتعشى
الميلا : سلامتها خالتي وشفيها ؟
غزيل : تعرفين تليف الكبد وقالوا الدكاترة مالها علاج وفالبيت ع اجهزتها ولو نفصلها ماتت امي
الميلا شهقت وقالت بصدمة وحزن : اسألتس بالله غزل تكفيين !
غزيل بحزن ودموعها اخذت مجراها : والله الله يشفيها ويعافيها يارب ويرد لها عافيتها
الكل : اميين
ضحى : يالله قوموا العيال بيجون بعد شوي
دخلوا البنات وجلسوا مع الحريم حول الصحون وبدؤا ياكلون عشاهم مثل م الرجال فالجهة الثانية ..
" بعد ساعة ونص تحديدًا الساعة تسعة "
بيت ابو فهد فضى من الناس وطلع وشاف ابو تركي وقال ابو فهد : راشد لاتنسى بنسير عليك بعد ساعة
ابو تركي : ابشر وكثر الله خيرك يعايض
مشوا الاخوين متعاكسين واحد دخل بيته والثاني مشى لبيته مع اهله
" في بيت ابو تركي "
ابو تركي : صباح خليتس جاهزة بيجون بعد ساعة
ام تركي ابتسمت وقالت : ابشر ولا يهمك
ابو تركي : انا بدخل انسدح وان كاني ابطيت فتعالي صحيني
ام تركي هزت راسها بنعم وطلع ابو تركي لغرفته القديمة وهو حن للديار وحط راسه ونام علطول
اما عند ام تركي فمشت ووصلت لغرفة بناتها وشافت الجود ترتب سريرها عشان تنام وقالت : لا تنامون عمكم عايض بيجي يخطب الميلا لعقاب الا ع طاري ميلا وينها ؟
الجود لفت بنظرها للغرفة كاملة وقالت : مدري اظن ي فالمطبخ او الحمام
ام تركي : عمومًا حتى انتي لاتنامين انا تعبانه وابي من يسوي القهوة
الجود بملل : تبشرين يمه شوي واروح اسويها
طلعت ام تركي وانسدحت الجود ع السرير وانتثر شعرها ع اطرافه وقالت بنفسها ( يعني ميلا بتعرس وبعقاب بعد ! وكأن عمي يسمع سوالفي معها قبل كم اسبوع !! ) طلعت جوالها من تحت مخدتها وصارت تقلب وتسولف وفجأة فزت بفرحة ودقت ع صاحبتها ورفيقة دربها ووصلها صوتها وهي تقول : هلاااا جوووديي !
الجود بفرحة : اخ داااانه وححشتتييننيي
دانه ابتسمت ونزلت من فرسها وقالت : م يوحشتس غالي اصبري ادخل من الخيول اصبري
الجود ابتسمت وقالت : الله انتي فالاسطبل
دخلت دانه احد غرف الاسطبل وقالت : ايه نعم فيه ليه ؟
الجود : ولا شيء بس سألت حيي صوتتس والله
دانه ضحكت وقالت : حيي نباتس يعيونها اسمعي بقولتس وش صار
الجود : اسلمي
دانه : تخيلي ببدأ بكرا بأسطبل الصقلاوية
الجود قطبت وقالت : وينهو فيه ذا ؟
دانه : قريب من الديرة تخيلي لدرجة اني اقدر اجي بيتكم مشي !!
الجود شهقت بقوة وقالت : تستهبلييييين !! انا واهلي نقلنا للرياض !!
دانه صرخت بقهر وقالت : امااااانه كذاااابه يارب يصير شيء وتجلسين بالديرة يااارب
الجود : امانه م دريتي ! المصيبة اني اكلمتس شبه يومي بس م سألتيني !
دانه : والجلطة اننا بنفس الديرة بس عشان اهلي وقبيلتي وجماعتي غير عنكم م نتقابل كثير
الجود : معليه يقلبي عادي بنطول هنا يمكن اللي يجي اسبوعين
دانه : اييه كويس اجل اسمعي وراي ثلاث خيول افك اللجام والسرج حقها وادخلها داخل غرفها بقفل تمام ولا تنتظريني ابي شغلي يكون ع اكمل وجه بحكم انه اخر يوم
الجود ابتسمت وقالت : معسلامة يقمري اشوفتس ع خير
سكرت الجود ومشت للمطبخ وقالت بصوت عالي : ميللوو
م وصلها صوت الميلا وقالت بشك : وينها ذي !
مشت وصارت تحضر القهوة وحطتها ع الغاز وجلست ع جوالها فالمطبخ
" نرجع شوي بالاحداث "
عقاب : يعني ؟
اسر وفلاح : بنطول
عقاب بحدة : ويعني !
اسر : يخوي غط علي عند ابوي وان قال شيء قول راح عند الفرس حقته تعبانه صرررف
عقاب ابتسم وقال : وكم لي ؟
فلاح : اي شيء تكفى بس غط عليه
عقاب : تمسك الدكان اسبوعين قدام !
اسر عبس بوجهه وانصفق ع راسه من فلاح وهو يقول : واافق
اسر بزعل : تم
عقاب ضحك وقال : يحمار اصلاً ابوي حاط عينه علي الليلة والحين انت وافقت تمسك الدكان اسبوعين يالله درز
ودخل للبيت وركضوا اسر وفلاح اللي كان يطقطق عليه للاسطبل الصغير والمتواضع حقهم
" عند الميلا "
اول م دخلت مع اهلها للبيت ركضت ولبست جزمتها الطويلة وركضت واخذت جاكيت طويل واخذت شيلتها وطلعت من الباب الخلفي ركض للأسطبل وهي معاد تقدر من شوقها للخوصاء
" نرجع للحاضر فالاسطبل "
اسر ركض وارتفع صوته وهو يقول : يالخوووصااااء
ضربت الخوصاء برجلها ووقفت ع خلفيتها وصهلت شوق له وركضت حتى وصلت لآسرها وابتسم وحضنها بكل حب وقال : يعساااني م اتبدل فيتتس !
فلاح وقف عند باب الاسطبل وقال : اسمع انا والله مواعد تالين اطلعها وامشيها ووقفت معك عند عقاب ووصلتك للأسطبل والحين انتهت مهمتي توصي ؟
اسر ابتسم وقال : جميلك سابقك يبو سالم وموفق يحبيبي
طلع فلاح يركض ودخل اسر بالخوصاء لغرفتها وانسدح وجلست الخوصاء وحطت راسها ع صدره وضحك وحضنها وغمض عيونه وغط في نومته علطول ..
" عند بطلتنا "
رفعت جوالها تشوف الساعة وكانت تشير للعاشرة تماماً ابتسمت وقالت بتعب : اخيرًا وصلت ومعي وقت اجلس معها والاعبها وارجع
دخلت اسوار الاسطبل وكانت طافية انواره دليل انه م فيه احد مشت وشافت غرفتها مسكرة بأقفال ابتسمت وقالت بنفسها ( واسر حمار يحسب م بقدر اطلع ع الباب وانط عندها ؟ ) مشت وتمسكت فالباب وطلعت فوقه ونطت وشهق اسر اول م طاحت الميلا ع صدره وعلطول فز ومسك فكها بقوة وقال بصوته الرخّيم : ممنن !!
اما الميلا كانت ترجف برعب ومعاد قدرت تنكر وخصوصًا انها ماهي مغطية وجهها واسر يشوف وجهها وملامحها بوضوح بمساعدة البدر فالسماء وقالت بصوتها الانثوي المهزوز : الميلا
اسر انتفض قلبه من كل شيء وم كان يدري هو يلاقيها من جمالها ولا من عيونها الوساع السود ولا من صوتها ومبسمها وخدودها كانت اخاذه بمعنى الكلمة وقدر يستجمع نفسه ولو شوي وقال بتخدر : ميلا !
الميلا برعب وقلبها يدق قالت : اسر صد تكفى
اسر علطول صد بعينه وعطاها ظهره وقال : وش تسوين هنا وش جابتس !
الميلا قامت وقالت :عشان الخوصاء وجيت اشوفها والله
اسر : ووش تبين من الفرس حقي !
الميلا بقرف وهي تتهزء فيه قالت : وش طيب خلاص افتح البوابة بطلع بس ابي ابوسها وبروح والله
اسر ضحك وقال بنفسه ( استغفر الله بس تمنيت اني الفرس ) وقال : وخري بطلع انا وخليتس معها تبيني اطلعها للميدان ؟
الميلا ابتسمت بفرحة وقالت : لا اسمع افتح الباب ذا وانا بطلعها واذا جيت ارجعها بدق عليك
اسر قطب وقال : تدقين علي ؟
الميلا بفشلة ضربت راسها بقوة وقالت : اقصد يعني عشان تجي
اسر بحدة : ايه ايه بس معتس جوال !؟!
الميلا : طبعًا معي عمري ستة وعشرين وم تتوقع ان معي !
اسر مسح وجهه وشنبه وقال : وخري طيب
رجعت الميلا ورا الخوصاء وتمسك اسر بالباب وطلع وفتحه من الاقفال وفتحها وتلطم وطلع وهو يحلف ان قلبه مع الميلا وتأكدت مشاعره لها ..
" في بيت ابو تركي "
دخل عقاب وهو متكشخ وناصر وابو فهد وفهد للبيت واستقبلهم ابو تركي بفرحة وهو يشوف ان الامر خيرة وبيصير عنده سبب قطعي ينزل للديرة من الرياض
ابو تركي : ارحبوا يا اهلي اقلطوا اقلطوا
ابو فهد ابتسم وقال : الله يبقيك يخوي
دخل ابو فهد وعياله وقال تركي : ارحببببوا
ابو فهد وعياله قالوا : الله يبقيي من يرحب
تركي مسك عقاب وقال : تمنيت ان ناصر اللي ياخذ من عندنا لكن م يضر حتى انت رجال وعزوة وظهر ينشد به وسند
عقاب بنظرته القاتلة قال : معليييك زود يتروك
تركي ابتسم وقال : اقلط
دخلوا للمجلس وتكلم ابو فهد وهو يقول : والله يخوي مالك فالطويلة وجيتنا الليلة نطلب احد بناتك لولدي عقاب
ابو تركي ابتسم وقال : والله الساعة المباركة ابد الشيخ بيجي ونملك والزواج بعدين والبنت رأيها من رأي ابوها
عقاب توسعت عيونه وقال بنفسه ( لذي الدرجة يبوني اعرس ! ) وابتسم لعمة وشوي ودخل ابو تركي وقال : بنات
طلعت الجود وقالت : ارحب يالغالي
ابو تركي ابتسم وقال : الله يبقيتس يبنتي وين الميلا ؟
الجود رفعت كتوفها بمعنى " مدري " وقالت : والله معلم يبه
ابو تركي انصدم وركض يدور لها بكل زاوية فالبيت وم حصلها ورجع بخيبة وهو يعرف لو يقول لعايض اخوه م بيفهم ويحسب انه م يبي بناته لولده عقاب ورجع وناظر فالمجلس وشاف الشيخ وصل وتنكد ورجع داخل وقال : الجود عمتس خطب فيتس لعقاب وعطيته موافقتي ورأيتس من رأيي
الجود لفت بصدمة وقالت ودموعها اخذت مجراها : هااه !!
ابو تركي حضنها وقال : يالله يبنتي ليه الدموع وعقاب رجال ويستاهل كل علمن طيب !
الجود م كانت مستوعبة اللي قاعد يصير وقالت بصدمة وهي ترجف : لا يبه لا كلن الا عقاب تكفى يبه م ابيه
ابو تركي زفر بعصبية وقال : جودي م ابي اعصب عليتس بس عاد !
الجود مسكت راسها بقوة وقالت : يمه وش اللي قاعد يصير مو هم طلبوا الميلا !!
ابو تركي بحدة : وميلا الزفت ماهي موجودة وانتي بدالها ونقاشتس معها امشي وقعي وانهي الهم اللي ع راسي
الجود رفعت عينها لعين ابوها وقالت : يببه صاااحي انت بييني وبيينه سننييينن وبنيييينن !! مستحيييل اخذ عقاااب
ابو تركي سحبها له وقال : القهوة والشاهي الان وادخلي المجلس بطلع ناصر وفهد الاااان تسمعييين !!
طلع ابو تركي تارك الجود وراه بصدمة وحزن شديد طاحت ع رجولها بطولها وقالت بصوت باكي : احلامي وطموحاتي ! انهدمت كلها ودعائي انقلب علي وقربني ربي من اهل فهد وعمي عايض والاسوء عقااب !!!
قامت وهي تحس انها شوي وتنهار وكانت تدعي الميلا تجي وتنقذها لكن م كان للميلا حس ولا خبر نزلت دمعتها الاخيرة بحرقة وقالت بنفسها ( خلاص النصيب ووقع وانتهى كل شيء ادخلي بهدوء ووقعي واطلعي ) مشت اول م سمعت صوت ابوها يناديها ويقول : يبنت تعالي
عقاب رفع عينه للباب ودخلت الجود بس م كان يدري اي وحدة فيهم الميلا والجود وم كان يفرق بينهم لكن نزل بعيونه وانصعق اول م شاف الاظافر الطويلة نفس الاساور وعرف انها الجود وكان نفسه مخنوق من جمالها ومن انوثتها وصغر حجمها كانت طفلة جنب عقاب وجلست بهدوء بعد م سلمت ع عمها وتأكد كل شيء اول م قال ابو فهد : ارحبي يالجود
الجود بهدوء قالت : الله يبقيك يعمي
ابو فهد ابتسم وقال : وشحالتس عساتس بخير
الجود ابتسمت بكلافة وبانت غمازتها الوحيدة ع خدها الايسر وقالت : بخيير جعلك بخير
وسكتت وقالت بنفسها ( اخ لو تدري وش داخلي اااخ لو تدرون !! )
وتكلم الشيخ من برا وقال : خلاص توقعون ؟ لأن الوقت تأخر يبو فهد
عقاب فز وراح يجيب الكتاب وكتب اسمه الرباعي ووقع وقام عمه ابو تركي وقال : تعال جنبها
تقدم عقاب بخجل واضح عليه وبنفس الوقت كان كارهه الشيء ذا اللي قاعد يصير له وم يدري ان الجود كانت توافقه في شيء معين ابتسم بكلافة ومد لها الكتاب ومسكت القلم برجفة وعيونها تغورقت بدموعها وقالت بهمس وهي ترجف : وين اوقع ؟
عقاب لف لعيونها وانصدم من الحزن اللي ارتسم وطغى ع ملامحها واضطر انه يمسك يدها ويحطها عند المكان ووقعت الجود ومن توقيعها انكتبت رسميًا زوجة لعقاب اللي اخذ القلم منها وكتب اسمها الرباعي وقال : الحمدلله والله يتمم ع خير
ابو فهد بفرحة : اللهم اميييين
ابو تركي ابتسم وقال : اميين يارب والمهر متى م بغيت ي عايض لكن استعجل فيه
عقاب قام وسلم ع عمه وطلع تحت انظار الجود وراه وقالت بصدمة وبنفسها ( وشذا حتى سلام ووداع م سواه احسن يارب يكون كذا دايم وبعييد مني المهم بقوم اغسل يدي بكلور يع يع مقرف !! ) قامت وقالت : بدخل انا والله يتمم
ابوها وعمها قالوا بصوت واحد : اميين
دخلت وركضت لغرفتها وحطت وجهها ع وسادتها وصرخت حتى انبح صوتها ورفعت راسها وشهقت نتيجة صعوبة التنفس وانهارت تبكي بحرقة ع كل شيء صار لها واقرب انسانه لها اختها م كانت جنبها ابدًا ولا كانت تساندها حتى..
" عند باب بيت ابو تركي "
عقاب طلع وطاروا له ناصر وفهد وقالوا : وش صار !!
عقاب بصدمة مسك راسه وقال : خذينا الصغيرة
فهد شهق وقال : جود !!!!
عقاب : ايه
فهد مسك راسه وقال : والله وسواها ابوي !!
ناصر بصدمة : شلون والكبيرة !
عقاب : الميلا م طلعت وعمي جاء مرتبك احس فيه شيء بس م بنبش وراه بكيفه هو وابوي اهم شيء سويت اللي بيرضي ابوي والله يجيب الخير
مشى عقاب بدون م يسمع رأي اي واحد فيهم ووصل لبيتهم ودخل للمقلط وانسدح ينتظر سنده اسر اللي طول عليه وتذكر عقاب انه بيطول فالاسطبل وانسدح زين ونام علطول ..
" فالاسطبل "
باست الميلا الخوصاء بقوة وقالت : بااااي حبيبتي اشوفتس بعدين
طلعت وكان اسر متلطم ومغمض عيونه ابتسمت الميلا وقالت بنفسها ( ذا اسر الصغير ! الحين انا النتفه عنده والله ) وتقدمت وقالت بهمس وهي متلثمة بشيلتها : اسر
اسر لف لها بهدوء وقال بهمس ونعاس : يعيونه
الميلا توسعت عيونها وقالت : هااه !
اسر فز وقال : اسسف احسبنتس وضيحي اسسف
الميلا ابتسمت وقالت : لا لا عادي خلاص برجع البيت انتبه للخوصاء
اسر شاف الساعة بجواله وقال : انتظريني
م فهمت الميلا وشافته يركض والخوصاء تلاحقه بدون اي مجهود منه ودخلت بنفسها وسكر عليها وجاء راجع بركض وقال : امشي قدامي
الميلا رفعت حاجبها وقالت : تستهبل صح ! ان شاءالله انك م انت ناوي توصلني البيت
اسر بحدة : م بعيد كلامي ولد عمتس والليل تأخر كيف بترجعين لحالتس !
الميلا بقرف : يع وش تحسبني محتاجتك ! سر امها تكفى
مشت الميلا واسر يلاحقها وبينهم مسافة كبيرة ووصلوا للديرة وشافها تدخل من الباب الخلفي وتسكره ابتسم ورجع ركض لبيتهم وهو يبي يسأل عقاب وش صار له فالليلة ذي ..
:::::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد صح يعتبر قصير شوي لكن يجلط وفيه احداث كثيره استمتعوا فيه وانتظروني ببارت جديد اشوفكم ع خير 😢 )