ဗီလိန်ဥက္ကဋ္ဌရဲ့ ချစ်သူလေးအဖြစ်ကူးပြောင်းလာခြင်း [မြန်မာဘာသာပြန်]

{96}

「Unicode 」

ကျိချင်းကျိုး အရင်လိုပဲပြန်ဖြစ်သွားမှ ချူချန် စိတ်သက်သာရာရသွားသည်။ကျိချင်းကျိုးဘက်က စည်းကျော်ပြီး သူ့ပေါ်ခံစားချက်တွေဖြစ်တည်လာမှာကို သူစိုးရိမ်နေမိတာကြာခဲ့ပြီဖြစ်သည်။ထို့ကြောင့် ကျိချင်းကျိုးအား ရင်းရင်းနှီးနှီးအပြုအမူတွေမလုပ်ရန် သူအတော်ကြာ ချမှတ်ထားခဲ့တာဖြစ်ပြီး နောက်ပိုင်း သူအနေခက်သွားမှာ မလိုချင်သောကြောင့် ပြန်ပြီး ရင်းရင်းနှီးနှီးနေခဲ့တာဖြစ်သည်။

မနေ့ညက ကျိချင်းကျိုးအိပ်ပျော်သွားပြီးနောက် ချူချန်ကတော့ ခင်ဗျားထွက်သွားတယ်လို့ အိပ်မက်မက်တယ် ဟုဆိုလာပါသော ကျိချင်းကျိုး၏စကားကိုသာ ဆက်တွေးနေခဲ့မိသည် ။ သူထွက်သွားတဲ့ အိပ်မက်ကြောင့် ကျိချင်းကျိုး ငိုလိမ့်မယ်လို့ သူမမျှော်လင့်ထား။နောက်ပိုင်း သူတို့စာချုပ်ပျက်သွားရင် သူဘယ်လိုတုံ့ပြန်လိမ့်မလဲ? ထိုကိစ္စပေါ် ကျိချင်းကျိုး အရမ်းပဲဝမ်းနည်းနေလိမ့်မလား။

ဖြစ်နိုင်ခြေတွေလိုက်တွေးနေသည့်ချူချန်ပါ အကြောင်းရင်းမရှိဝမ်းနည်လာပါ၏။သူ တစ်ညလုံး ကောင်းကောင်းအိပ်မပျော်ခဲ့ပါ။မနက်ခင်းလည်း အချိန်မီရုံးသွားဖို့ အိပ်ရာမထခဲ့။ကိုယ့်လက်ထဲခိုဝင်နေပါသောလူသားအားကြည့်ကာ နှလုံးသားထဲ ဝရုန်းသုန်းကားဖြစ်နေသည်။

ကံကောင်းချင်တော့ ကျိချင်းကျိုးသည် အိပ်ရာနိုးတည်းက အရင်ပုံစံတိုင်းလေးပဲပြန်ဖြစ်သွား၍သာ။သို့ပေမယ့် သူတကယ်ပဲ အဆင်ပြေသွားသည်လား၊ဟန်ဆောင်ဖုံးကွယ်ထားသလားတော့ ချူချန်မသိနေခဲ့ပါ။သူ အရွယ်ရောက်လာတည်းက တစ်ခါမှ မချစ်ခဲ့ဖူးသလို ဘယ်သူ့ကိုမှလည်း သဘောမကျခဲ့ဖူးပါ။ထို့ကြောင့် ကျိချင်းကျိုး သူ့ကို သဘောကျသွားမှာ အရမ်းကြောက်မိသလို ကျိချင်းကျိုးကို နာကျင်စေမိမှာလည်း သူကြောက်နေမိပါသည်။

တိတ်တဆိတ်သာ သက်ပြင်းမောချလိုက်ပြီး စောင်မ၍ အိပ်ရာထလိုက်သည်။

သူတို့နှစ်ယောက် အရင်လိုပဲ တူတူစားကြသောက်ကြပြီးနောက် သူလည်း အဆင်ပြေသွားပြီဖြစ်၍ ချူချန်က ကုမ္ပဏီထွက်သွားလေသည်။ ကျိချင်းကျိုးသည် ဆိုဖာပေါ်မှာ ထိုင်ရင်း အကြာကြီး တိတ်ဆိတ်နေကာ ပြီးမှ ဖုန်းထုတ်၍ လျန်ကျင်းရှင်နဲ့ ယင်းနျန်ထံ WeChatကနေ စာပို့လိုက်သည်။