ليّت اللِذي خَلق العُيون السُود ... خَلق القُلوب الخَافقات حَديد

البارت الثاني عشر

مشوا واسر في قمة سعادته وماهو مصدق انه لمح عيونها السود بعد اسبوع كان طويل بالنسبة له ولأهله ..
" في بيت ابو تركي "
دخلت الميلا وهي تتنفس بسرعة وقالت : يارب تركي م شافني وبعدين من اللي كانوا فالصندوق ؟؟
الجود جاتها وقالت : ميلو شسمه لحظة ! وشفييك ؟
الميلا وهي تحاول تتنفس وتشرح لأختها قالت : اااف خليني اخذ نفس
الجود ابتسمت واشرت لها تجلس وجلست الميلا وقالت : سيارة عقاب هي الونيت الاحمر ؟
الجود هزت راسها بنعم وقالت : ايه اظن ليه ؟
الميلا عضت اصبعها برعب وقالت : وربي اذا شافني تركي كذا بيقضي علي
الجود : شدعوة وش سويتي ؟ المهم امي تقول تجهزوا بنروح لبيت عمي عايض بعد شوي
الميلا : والله ؟
قامت مع الجود ودخلوا داخل وقابلوا امهم وقالت بكل صراحة : جودي خليتس فالبيت تجهزي وعقاب بيجيبتس عندنا
الجود توسعت عيونها وقالت : يمه ماهو منجدتس ! بجي معكم مالي شغل
الميلا غمزت لها وقالت بخبث : شفييتس اجلسي رجلتس موصي انه اللي يجيبتس
الجود : وعساس عندكم خبر ؟ شلون عرفتوا
ام تركي : هو م قاله بس احسن لكم عشان تتراضون
الجود : لا ماني زعلانه منه ولا هو زعلان بجي معكم يعني بجي
الميلا ضربتها بخفه وقالت : يحمار افهمي افههمميي
الجود صارت تهز راسها بنفي وتقول : لا لا لا لا لا م ابي اسمع
ام تركي ضحكت وقالت : خلاص خليها يالله اكشخوا معكم عشرين دقيقة وبعدها بطلع وبسحب ع اللي خلفوكم
الميلا : يعني تسحبين ع نفستس ؟
ام تركي ضربت الميلا اللي انفجرت تضحك ع فهاوة امها والجود من قوة اللخمة عجزت تضحك وقامت ودخلت الغرفة وبدأت تكشخ والميلا معها وكل وحدة منهم تساعد الثانية خلصوا وصرخوا وقالت الجود : ميللوو تهبلييينن !!
الميلا ضحكت بخجل وقالت : وقسسم بالله اني ماخذه منك
الجود غنت بكل غنج ودلع وقالت :
نعنبووتس انتي مكاااسر عود جاوي
ملبستتس سندس وشربتس سلسبيله
ياجمييييلة قام يطووي الحال طاوي
عززززتي للي سوواااتي عززتي له
لو تمرييين الشيوخ اهل الفتااااوي
عوودوا مثثليي يجرروون الطوييلة
-
كانت الميلا تغني معها وثنتينهم طايرين من الفرحة ودخلت ام تركي وضحكت وقالت : بسم الله عليكم يبناتي الله يحفظكم بحفظه حصنتوا انفسكم ؟
الميلا ابتسمت وقالت : لا تعالي يمه حصنينا
جلسوا نفس عوايدهم وهم صغار وابتسمت ام تركي وهي تشوف الجود وبجمالها الطاغي والدبلة بيدها تدل ع انها ملك لعقاب وغمازتها بخدها الايسر وشامتها تحت شفايفها المليانة وشعرها اللي شابه لون البُن والميلا وبملامحها الحادة وعيونها الوساع السود وشعرها اللي كساه لون الليل وقت القمر العتيم وغمازاتها بوجنتيها الثنتين ابتسمت انهم برضى وحصنتهم وحضنتهم وقالت : ودعتكم ربي من كل عين وحاسد
الميلا : ويخليتس لنا
الجود ابتسمت وقالت : اميين وياتس يجنتي مشينا ؟
ام تركي : ايه والله عاد عيب في حق ام فهد اللي صار لهم وللحين م شفناهم
الميلا احتدت نظرتها وقالت : هذا اللي قاهرني ااه مدري شلون بجلس معهم وهم جلسوا يعانون لحالهم اسبوع !
الجود : خلاص ابوي اللي بعدنا وهم يعرفون امشوا
قاموا مع بعضهم وطلعوا لبيت ابو فهد ..
" في مجلس ابو فهد "
دخل ابو تركي للبيت ومشى للمجلس وسلم وقال : سلام عليكم ياهل المحل
ابو فهد كان جالس مع ابو فلاح وفزوا لأخوهم وقالوا : عليكم السلام
دخل ابو تركي ومشى لهم وقال : سمعت من اهل الديرة ان عقاب مظلوم
ابو فهد بحدة : ايييه وانت مغير تسمع من فلان وتصدق علان !!
ابو تركي ابتسم بضيق وقال : وانا جيت بين كفتين كلها كسرت ظهري وجنوبي انت وولدك وبنتي
ابو فلاح : خلاص العنوا ابليس واللي صار صار
ابو تركي تقدم لأخوه الكبير وباس راسه وقال : سامحني يعضيدي مالي الا الله ثم انت
ابو فهد : غصب تعتذر بعد كلامك اللي تمنيت اني اموت ولا اسمعه !
ابو تركي فز وباس كتفه وقال : اعوذ بالله يخوي !
ابو فلاح تقدم وحضنهم اثنينهم وقال : مغير حن يالثلاث تبون تنقصون عددنا بعد ؟ خلاص تراضوا
ابو فهد ابتسم وقال : و احد يقدر يشيل بخاطره ع اخوه ؟
ابو تركي وابو فلاح كملوا الجملة اللي يعرفونها من زمن طويل : وان شال م يسمى اخو !
باس ابو تركي راس اخوه وضحكوا وجلسوا وبدأت السوالف وكل م مرت سالفة قطرت دمعة ابو تركي واعتذر بكل حزن ويمسكونه اخوانه مواساة ..
" عند الحلاق "
طلعوا العيال بعد م خلصوا وقال عقاب : الحين وين ؟
اسر كان متحمس يشوفها مره ثانية وصار ينط ويقول : البيت البيت البيت
ناصر بشك : اسر سلامات فيك شيء ؟
عقاب قربت وقبصه وفز اسر وقال عقاب : بس يحتاج من يأدبه
اسر حضن عقاب وعض كتفه وعقاب ميت يضحك واسر معه ولف لأذن عقاب وهمس وقال : شفت عيونها السود والله ان معاد معي عقل رجعوني اشوفها مره ثانية
عقاب ابتسم وباس راسه وقال : يجعلها تفداك يخوي
اسر : حاااشا مجارره لبى عييينها انا اللي جعلني فداها
عقاب : اللي ودك يالشيخ
ناصر ابتسم وقال : يالله خلص صقر مشينا
طلع صقر وقال : بالله كيف ؟ والله اني ملك جمال
اسر : يوووه يشيين الثقة
عقاب بقرف : واااثق ؟
ناصر عبس بوجهه وقال : يييعووه وشعنده ذا
فلاح انفجر يضحك وقال : خييير خيير وشفيكم ع اخوي !
هيثم : تشووف غيرانين
فهد بحدة : امششوا اخرتوني !
اسر همس وقال : م قلت لك لا تاخذه
عقاب ابتسم وقال : وانا وشدراني انه بينشب لنا كذا
ناصر : وربي ودي اصفق عيال عمي سالم
تركي بصوت عالي : ييعييااال امشششوا غاابت الشمس !!
ركضوا العيال وركب اسر فالغمارة وقال : ويمين بالله م انزل ترضى يعقيب ينزلوني ؟
عقاب مسك كتفه وقال : انزل انا ولا تنزل ي حبيبي
اسر : يالله فهد دز امها
عقاب انفجر يضحك وقال : لااا لا م اتفقنا تختار فهد
< بعد ثواني وكلنا نعرف وش صار >
عقاب فالصندوق قال بعصبية : الله يقلع راسك المربع ذا !
اسر ابتسم وحك راسه وقال : والله م دريت نسيت انه فهد جلدنا وركب ولده فالغمارة لنا الله
عقاب بصوت عالي قال : المشكى ع الله سيارتي وينزلوني فالصندوق
اسر انسدح ع فخذ عقاب وقال : عادي شف القمرا
عقاب : اي قمرا يرحم والديك ؟
اسر انفجر يضحك وقال : يعني نص قمرا
عقاب : اكرمني بصمتك تكفى
اسر مد يده ومسح لحية عقاب وباسها وقال : يجعلني قببلك يعقاااب
عقاب ابتسم ونزل وباس جبين اسر وقال : مجار مجار
[ مجار : الله يمنعك من فداي او الموت قبلي ]
ناصر طلع راسه وقال : عييااال تغبررتوا يلعنم الضضحك
انفجروا يضحكون ولف اسر وقال : يرجااال عض لك ع شحمة
عقاب : اسحب عليه عريس م نقدر نقوله شيء لكن بكره بنتفاهم زيين
اسر قام وعدل جلسته وقال : عقيب صدق ترا الجود جات
عقاب : صدق والله ؟
اسر : ايييه يتيس !
عقاب رفسه وقال : طييب لا تسب وبعدين ادري انها جات
اسر ابتسم وقال : يووه احسدك تدخل وتشوفها وتحضنها وانا انتظر اللحظة اللي المح فيها الميلا اخر مره شفتها واول مره كانت بعرسك وهي لابسة احمر ااه يويل قلبي عليها
عقاب ابتسم بتسليك وقال : ها ودك ترفع علومك ولا ادق وجهك ؟
اسر ابتسم بفشلة وقال : سم
وبعد الصمت اللي صار بمدة وصلوا لبيت ابو فهد وركضوا عيال سالم لبيتهم وتركي مشى لبيت ابوه ونزلوا فهد وولده ثامر واسر وناصر وعقاب لبيتهم وركضوا ناصر واسر وهم يتهاوشون ع حمام المقلط
اسر بصراخ : ورربيي م تدخخل جااي قبللك !!
ناصر وهو عند باب الحمام ويسحب الباب عشان م يسكره اسر اللي كان داخل الحمام وقال بحدة : يببهه شوووف اسسر م يخليينني اترووش وانا المعررس !!
عقاب سمع هواشهم وضحك ومشى لغرفته ووقف عند باب المطبخ وقال : ييوولدد به حد ؟
البندري ابتسمت وقالت : هلا عقاب ادخل
دخل عقاب وشاف البندري وحصة جالسين يضبطون التمر بحشواته المختلفة من [ جوز هند - فول سوداني - شوكولاتة ] ابتسم وقال : تسمحوا لي بحبة ؟
حصة ابتسمت وقالت : اذا م سمحنا لأجمل عم نسمح لمين ؟
عقاب ابتسم وتقدم وباس راسها وراس البندري وجلس ع ركبه وقال : م فيه نعيمًا ؟
البندري ضحكت وقالت : نعيييمًا شكله جاز لك شكلك بدون دقن بس حلو عشان شامتك
حصة : توو ادري ان عنده شامة اصلاً كنت حارمنا جمالك
عقاب كان بيتكلم بس حس ان الوقت وقف والكل سكت وم يسمع الا صوتها وهي تقول : يبنااات ابي عططري الذهبي شفتووه ؟
البندري رفعت صوتها وهي تقول : جوودي تعاالي
عقاب قام ووقف بطوله وعرضه وكان ينتظر دخولها من الباب وشوي وصله صوتها وهي تقول : خلاص يقلبي حصلته
عقاب ابتسم وطلع مع الباب ومشى لغرفتهم تحت نظراتها بصدمة من شباك الصالة ابتسمت وقالت بصوت هامس : عقاب تكفى لف علي
وكأن عقاب يسمعها لف وراه وشافت الجود وجهه وشكله وطوله وعرضه وحلاقته وشامته كانت منهارة من جماله ضحكت بحب ورجعت ورا عشان م يشوفها وعقاب م لف الا عشان يسمع ثامر بأخر الحوش يناديه فز قلبها اول م سمعت صوته الرخّيم وهو يقول : يالله احسبوا لي عشر دقايق بس
دخل للغرفة وسكر الباب وراه ولفت الجود للميلا اللي تطالع فيها وهي مصغرة عيونها
الجود : وشفيتس ؟
الميلا ابتسمت بخبث وقالت : لاااا والله !؟ وش نظرات الحب وعيونتس تطلع قلوووب
ضحى انفجرت تضحك وقالت : اييييه شفييتس ميلو سمعت صوته وطار فيها اجل لو تقابله
الجود قامت وقالت ووجهها محمر : بناات وقفوا !!
غزيل ضحكت وقالت : استحت جعله بعمري استحت !
الجود مشت ودخلت للمطبخ وقالت : نوني فيه موية باردة ؟
البندري ضحكت وقالت : وشفييتس قلبتي طماطة !؟
حصة فتحت الفريزر وطلعت موية وقالت : اكيد شافت عمي
الجود : ليتتس تشوفين وش سووا فيني عمتس ذا وانا م قابلته باقي
غالية ابتسمت وقالت : روحي له قبل يطلع للرجال لأنه مستحيل عاد يرجع
الجود : م ناداني صح ؟ ليه اروح له
غالية توسعت عيونها وقالت وهي تضحك : ععششنناا والثقل
الجود ابتسمت وقالت : اييه حبيبتي لازم
اخذت الموية وطلعت وشافت الحضور بدؤا يجوون وقفت جنب اختها وامها وصارت تسلم وصح انها احترقت وانقهرت من كلامهم وهم يتهامسون واختلفت الردود بين ( غريب جات وم طلبته رضاوة ، شلون ترجع لبيت اهله بعد اللي سواه ، الاكيد انه بريء لكن غريب م طلبت رضاوة .. الخ ) صدت وطلعت وعيونها تغورقت بدموعها وكانت تهف ع نفسها عشان م تبكي ولفت ع صوت تمنت انها تموت ولا تسمعه
الهنوف : وش تحسبين خلصت ؟ وبعدين شلون ترجعين بسرعة انتي
الجود تجمعت بيدها حرارة ظلم زوجها وحرارة كلام الناس اللي م يرحم والوضع اللي عاشوه قبل اسبوع ولا ارادي صفقت الهنوف كف دوى فالبيت كامل ومن قوته اختل توازن الهنوف وتقدمت الجود وشّدت شعرها بيدها وقالت : ماهي انا ولا هو عقاب اللي نضعف بسبتتس !! ولا هم امثالتس اللي يخربوون بيننا سامعة والحين اطلعي برا بيتي قبل اشرود في حيااتتس واكرهتس اليوم اللي عرفتي فيه عقاب واهله وفييني !!
الهنوف كانت عاجزة تتكلم وقامت علطول وركضت من حيث م جات والجود ترجف عصبية لفت ودخلت ع خروج عقاب من الغرفة مشى ومر من الباب والجود واقفة عنده ولا لف بحكم انه يدري ان البيت مليان حريم ولو لف عقاب شوي كان ممكن بيصير اللقى بعد اسبوع كامل فرقى الجود ابتسمت اول م شافته وقالت بصوت عالي : عااش من شافك يعقيب
عقاب تعصّب بشماغه ومشى وم تكفل انه يطالع وراه او يرد عليها ويشوفها وطلع ركض للمخيم وهو تأخر ع الرجال
ابتسمت الجود بضيق وقالت : امداك تنساني ؟
دخلت وهي ماسكة الغصة ودموعها وصارت تشتغل تشغل نفسها ..
" بداية الزواج الساعة سبعة مساءً "
حريم ال مقّبل كانوا م بين سلام وتراحيب وزغاريط وبين بخور وتحضير وتقديم
ام فهد وهي تعكز بعصاتها قالت : غلو يبنتي وين صحن التمر اللي سوته البندري ؟
غالية رفعت كتوفها بعدم معرفة وقالت : مدري والله يمه
ولفوا ع خروج الجود والبندري ومعهم صحون التمر ابتسمت ام فهد وقالت : وين بنحصل مثل الجود لعقاب ؟ الحمدلله يارب انها عدت ع خير
غالية ابتسمت بحب وقالت : اي والله الحمدلله يالله امشي ارتاحي
تقدمت ام فهد مع اكبر بناتها وجلست مع العجز سوالف وضحك وتباريك
الجود : نوني وين تالين ؟
البندري رفعت رجولها وشافت تالين بأخر الحوش مع بنات خالاتها اشرت للجود وقالت : شوفيها هناك
الجود مشت لهم وقالت : سلام بنات شخباركم ؟
دلال : هلا هلا عليكم السلام مين ؟
الجود ابتسمت بكلافة وقالت : الجود
كادي ابتسمت بخبث وقالت : اها اللي خانها رجلها ورجعت له ؟
الجود تقدمت لها ودقت الفنجال وانكبت القهوة واحترقت كادي وضحكت الجود وقالت : لا حبيبي انا اللي انظلم زوجها وطلعت برائته للناس كلهم
مشت وهي تسحب تالين اللي كانت تضحك وقالت : عزتي لها كادي
الجود بحدة : انكتمي لا اكمل عليتس !!
تالين ابتسمت وقالت : شفيتس تحولتي لعقاب بس انثى المهم سمي امريني ؟
الجود ابتسمت وقالت : تعالي شيلي معي الطاولات الثلاثة اللي قدام المدخل
تالين : وش فيه زفة !؟
الجود : اييه
تالين مشت مع الجود وقامت دالين معهم وقالت : وش السالفة بنات ؟
تالين اشرت لها تجي ومشت وشالوا اول طاولة ووصلوا للطاولة الثانية وكانوا اهل ابو سلطان قاعدين عندها
الجود زفرت بملل وقالت : هياا خذلك !
تالين : يمه بنات معهم سلطانة
الجود بقرف : منهي ذي واي وحدة فيهم ماشاءالله شغال ابوهم انجاب ارانب ست بنات وعشر عيال خير ؟
تالين انفجرت تضحك وكملت وهي تقول : شوفيها المتينة ذيك والله ان تدعسنا
الجود شاش راسها وقالت : تعقب وانا مرت عقيب
دالين ضحكت وقالت : حيي والله عينتس !
مشت الجود وقالت : حبايبي لو تكرمتوا يعني قوموا بنغير مكان الطاولة
ام سلطان بحدة : ولييه ان شاءالله !؟
الجود سكرت عيونها بقوة وقالت : خالتي قومي بسرعة
ام سلطان صرخت فيها وقالت : تخلخلت عظامك !!
الميلا شّدت ع قبضتها ومشت من وراهم وضربت الطاولة بكل قوتها وقالت وعيونها تطلع شرار : بتقووميين ولا اعفسس العرس علييتس !؟!
فزت سلطانة وقالت بصوتها الرجولي : هييييه انتي !!؟
الميلا طارت عيونها وقالت بصدمة : لحظة متأكدين انها ماهي سلطان
انفجروا تالين ودالين يضحكون وتفشلت سلطانة وقامت وقاموا خواتها وامها وشالوا الجود والميلا الطاولة ونقلوها لأسوء مكان وهم مستقصدين
تالين وهي للحين تضحك قالت : ااااه بططننيي م اتحممملل
دالين : وربي يميلو سددت لها وحدة
الميلا اشرت باصبعها ع الطاولة وقالت : هييه انتي مكانكم هنا
مشت داخل عند غزيل وجلسوا اهل ابو سلطان وهم يحترقون من قوتها وفرض شخصيتها ..
" عند غزيل "
الميلا دخلت وقالت : اخس والله واعرستي وانتي كنتي تقولين لي بعرس بعدتس
غزيل بحدة : بنت ؟ انتي تبيني اهفتس بالزنوبة ذي م تفهميين وصيية والله لولا الله ثم وصية امي م خذيت الاقشر ناصر !
الميلا انفجرت تضحك وغمزت لها وقالت بخبث : متأكدة انه اقشر ؟
غزيل بصراخ : وضييح طلعيي الملعونه ذي من عني
ضحى وهي تضبط شعرها ابتسمت وقالت : تعرفين ميلا مقدر عليها الا رب العالمين
الميلا : شفتتيي حتى وضوح واقفة معي وراتس انتي قلبتي ولا عشانتس بتعرسين يالعوباء !
غزيل طنشت الميلا وفزت الميلا وحضنتها وقالت : امزح يحيوانه ! وعساه عرس الدهر يروح الميلا
غزيل ضحكت وقالت : ادري وامين يعيون غزل
مشت الميلا وقالت : ضحى مشينا ؟
ضحى طلعت مع الميلا تحت صراخ غزيل عليهم مشوا بكل هيبة وجمال وطلعوا وعلى جمال البندري والجود م كان احد يوقف ساكت قدام ملامح الكبار الميلا وضحى طلعوا والتفت الرقّاب لهم وبدأ الحديث والكلام عنهم
الميلا ابتسمت وقالت : تدخلين شوط يبنت العم ؟
ضحى مسكت يد الميلا بكل انوثه ودخلوا ع الدقة وصاروا يتمايلون بكل غنج وانوثه تحت انظار الحريم والتصفيق والتعزيز من خواتهم وبنات عمانهم
الميلا ضحكت ورفعت صوتها وهي تقول : عاااششت وضوووح
وضحى تذكرت عرس الجود وابتسمت وقالت : عششتتيي
الجود انسحبت من البندري وهي تقول : قوومي نلحق !
الجود قامت وقالت : يالله م نقولتس لا
دخلوا الاربع وكل وحدة ماسكة الثانية ابتسمت الجود وقالت : عااااشووا
والطق وصوت الطقاقة وهي تقول بكل حماس :
يا سلام يا بنات ال مقبل
دوس با سلام ردلي یا سلام
يا ويل منهو اللي يعاديهم يعاديهم
بنات مساعد ان طبوا الميدان
يا ويل منهم ال يماريهم
دوري دوري دوري في دوري
بنات قومن وارفع الطيران
لجأت سلي من يماريها
بنات قومو وارفعوا الطيران
لجأت إلي من يماريهم
يا سلام يا سلام
طيب طيب طيب
یا سلام یا سلام طيب طيب
-
وتالين ودالين دخلوا معهم وغالية وحصة وسحاب وسديم النتفه كانوا يرقصون بكل حب ويأكدون لكل ان اللي صار لهم اثر عليهم ..
" عند الرجال فالمخيم "
عقاب بحدة : عييال الصف لا يخرب الفرقة وصلت !!
اسر تقدم ومسك ذراع اخوه وقال : معليك
عقاب اشر لصقر يصف زين وصفوا عيال واحفاد مساعد وقالوا بصوت واحد :
ياسلامي ياقرومن مخلفها قروم
درع جنبي واسمها اسمي وشاني شانها
ان بدا لزمن حضرنا وسدينا اللزوم
وان صفينا ننطح القوم في مـياديــنها
-
دخلوا الفرقة وبدأ عرس الرجال بعد زامل آل مقّبل
ابو فهد اشر بعينه لعياله يقومون يصبون القهاوي وهو م يثق فالقهوجيين ابتسم اسر وقال : قم والله م فيه امل
عقاب قام ومسك الدلة وبدأ يلف وكان يسمع كلام الناس فيه وانه للحين مذنب كان كل ماهو ويضغط بقبضته ع الدلة وطفح الكيل وهم ماهم ناوين يسكتون تقدم عقاب وتوسط المخيم بحيث الكل يسمعه وقال بصوته الرجولي والعالي : يرجااال اسمعوني الله يرضالي عليكم
لفوا كل من فالمجلس لوقفة عقاب المهيبة وانصاغوا له واحد واحد من اكبر من فالمجلس لأصغر نفس فيه كمل عقاب كلامه وقال : الرجال يغدي رجال ويحشم عمره ولعاد يقعد يحكي مثل الحريم ! اعقبوا الواحد الشنب يخط وجهه ومتجمعين لي هنا في مجلس شيوخ ورؤوس قوم وذا كلامكم اللي بيقعد يتحكوى فيني وفي اهلي يطلع برا يتعذره محلي ويتعذرونه اهلي !
فز اسر وقف جنب عقاب وقال بصوت عالي وهو يضحك : اها طلع عندنا ام زكي حتى حن يالرجال
انفجروا فلاح وعيال عم وعمات وخوال وخالات اسر ضحك معه وعقاب ابتسم ومشى وكمل يصب ومشى اسر وهو بس من كلام عقاب ونظارته عرف منهو يقصد تقدم وقال : سلطااان
سلطان رفع عيونه لآسر وقال : خير ؟
اسر شاف يده مثبته ع ركبته تقدم وحط الدلة ع قفى قبضة سلطان وشهق من الالم الحرق وقال اسر بحدة وعروق يدينه بارزة وعيونه تطلع شرار : امم زككيي اهدداا لا اطللع علوومك ولا نسييت انك تبكبك وتفضفض وتكب عشاك عندي قدام بااب الدكاان ها الوااحد يلزم حدده !
رفع الدلة ويد سلطان محترقة وقام يركض وطلع من المخيم ابتسم اسر وكمل يصب بكل روقان ومر ع عيال عمه وعماته وخواله وخالاته وكلهم من تعزيز وضحك ابتسم وقال : واحد ينقز ويكمل بدالي
غريب قام وقال : هات يولد الخالة
اسر ابتسم وعطاه الدلة وجلس وبدأ يسولف مع الباقين
عبدالعزيز : اسر عاد عندك فرس ؟
اسر : اييه ابشرك
عبدالعزيز ابتسم وقال : لييه م تجيبها يخوي !
اسر توسعت عيونه وقال : ووين احطها
عبدالهادي : قصده فالاعراس والزواجات
فلاح : لا يحمار الاعراس هي نفسها الزواجات
تركي انفجر يضحك وقال : مسووي يبي يطول السالفة
عبدالهادي قام وبان الحزن ع ملامحه وفزوا العيال كلهم رضاوة له ضحك وقال : يمهطف قايم اصب لي قهوة
اسر ضربه والعيال معه وهو يضحك بصوت عالي وقال : قليلل حيااا
فلاح : المصيبة انه ولد عمتي ذهبية محد يقدر يقول له شيء
اسر : خلك منها اخوانه واااجد
عبدالعزيز ضحك وقال : عزتي لأمي والله مرأة بين ثلاث رجال وعمتي نوره توفت الله يرحمها
اسر : بس عماني حاطينها فعيونهم
عقاب تقدم لهم وقال : عيال نويصر بخاطره شيء ؟
اسر لف له وكانت ملامحه باردة وينتظر العرس يخلص تقدم اسر له ووصل له وقال : نويصر عسى م شر ؟
ناصر : يخوي وراي مقابلة فالمستشفى من الساعة ست الصبح والعرس م وده يخلص
طاح اسر ع ركب ناصر يضحك وتقدم عقاب وشله مع ياقته وقال : وقف فشلتنا !!
اسر وهو يضحك قال : تكفى سببه يضحك من حقه يزعل
عقاب ابتسم ع جنب وقال : وشو ؟
ناصر نزل عقاله وقال بحدة : شكل خاطركم تنجلدون !؟
ابو فهد من جنب ولده قال : عقااب اسر انقلعوا من وجهي !
عقاب اشر بأصبعه ع خشمه وقال : ع ذا الخشم يبو عقاب
مشى عقاب واسر وراه ووصلوا لمدخل المخيم ولف اسر لعقاب وقال : انت بخاطرك شيء ؟
عقاب : ايه
اسر فز له وقال : افاااا عططني حرف بس
عقاب ابتسم وباس كتف اخوه وقال : ابي ادخن
اسر ضربه وقال : يالليل مطوولك امش امش نشوف العرس حق الحريم
عقاب طارت عيونه وقال : هااااه !
اسر ابتسم وحك راسه وقال : مسيت بالخير عقاب شحالك ؟
وركض وعقاب وراه ولف اسر وهو ميت ضحك وقال : اصبرر اشرح لك عشااان ناصر والزفة
عقاب بصوت عالي قال : وقف اذا انت ع رجال !
وقف اسر علطول ولف وارتطم صدره بصدر عقاب وقال : ارحب
عقاب ابتسم وقال : مشينا للحريم ؟
اسر انفجر يضحك وقال : من اول يالدبشة !
مشوا ووصلوا لباب بيت ابوهم من ورا وفتحه اسر وشاف حصة تأكل اختها سديم لفت وصرخت وقال اسر : بننتت عمانتس يحمااره
عقاب بحدة : وللممها والصصووت اقصررييه !
حصة برعب : ياااعم ليييه كذا !!
سديم ابتسمت وقالت : عموو
اسر ابتسم وقال : هلاا هلاا يرووح عمتس
دخل عقاب ولفت حصة وقالت : ماشاءالله وش جابكم ؟
عقاب : لا شرايتس تحاسبيني ؟
حصة ابتسمت وحضنته وحاوطها عقاب وقالت : لا جد ترا باقي ع الزفة
عقاب : وشنسوي ابطيتوا علينا ولحد دق قمنا جينا
اسر وهو شايل سديم بحضنه ابتسم وقال : حصيص خذيها لاتعفس ثوبي
عقاب بهمس قال : ايييه بنت اخوك تردها ولا بنت عمك طارت بك
اسر ابتسم وقال : عقيب مفروض انك فاهمني الميلا غييير
عقاب ابتسم وقال : اسمعي وين خواتي ؟
حصة : البندري داخل اناديها ؟
عقاب رفع حاجبة وقال : وين عمة ؟
حصة ابتسمت وقالت : لا نوني غيير م بيننا عمة اصلاً م اسميهم كذا الا قدام الكل بس بيننا ضحى بأسمها والبندري برضو
عقاب : ناديها طيب
دخلت حصة وسديم معها وقالت : نووني
البندري لفت لها وقالت : عيوني ؟
حصة : عماني برا يبونتس
البندري : مين اسر وعقاب ؟
حصة هزت راسها بنعم وقالت : ماشاءالله قدتس عارفة
البندري ضحكت وطلعت لهم وقالت : عيال خير وش جابكم ؟
عقاب : متى الزفة ؟
اسر ابتسم وقال : ووين الميلا ؟
البندري ضحكت وقالت : الزفة بعد شوي والميلا وشتبي فيها ؟
اسر عبس بوجهه وقال : يقلع ابو الظلم عقاب وجاوبتي ع سؤاله وانا لا !
عقاب ضربه وقال : صببي اعققلل !
البندري : ولاتزعل الميلا فالحوش مع البنات
عقاب توسعت عيونه وقال : خيير انت وياها انا اللي مفروض اسأل زوجتي عندكم ولا سألت عنها اعنبو غييرك اثقل !
البندري ضحكت وقالت : يعني ؟ تراك تسأل عنها الحين بس جايبها من ورا اللفة
عقاب عض ع شفايفه وقال : امش امش بس
طلع وقالت البندري : الجود تصلي بغرفتكم اذا تبيها يعني
عقاب اشر لها بمعنى " طيب " وارتفع صوته وهو يقول : تقبل الله
اختفى عقاب من انظارهم ولف اسر وقال : نوني شرايتس تطلعينها لي
البندري انفجرت تضحك وقالت : لاااا انت بدييت تتهور ترضى الميلا تطلعني ع تركي ؟
اسر ابتسم وقال : يشينتس امزح
البندري : ادري بس نرجعك لطورك شوي
اسر : عطيني حلى احس اني ادوخ
البندري فزت برعب وركضت داخل وضحك اسر ومشى ودخل مع المطبخ وقال : هلااااابي يالاكل
غالية توسعت عيونها وقالت : انت م تعقل !
اسر طلع لسانه وقال : لا عندتس شيء ؟
غالية : وربي لا اعلم ابوي !
اسر : علميه خفت الحين
جلس وغالية تتحسب عليه وكمل ياكل ويتلذذ مشى وقال : م فيه احد صح ابي ادخل غرفتي
ضحى دخلت وقالت : هييييه يبوووي وش تسوي انت هنا !
اسر ابتسم وقال : ووضييححيي
ضحى لفت بكل قوتها وراها وقالت : ميلااا وقفييي اسر هناا
اسر تقدم وهو يمثل انه م سمعها وصدم بضحى اللي رجعت خطوتين ورا وطلع اسر من المطبخ ورفعت الميلا صحن الحلى الكبير ع وجهها وطاحت كل قطع الشوكولاتة اللي فيه وقالت بصراخ : ووشش جاااابه ذااا
اسر فز وقال : اخوو العييااااال
دخل للمطبخ وسحب موزة من الفواكة وغمز لغالية تحت صدمتها وطلع يركض لمخيم الرجال
ضحى بصدمة : الله يقلعه الحيوان !
الميلا نزلت الصحن وقالت : وشفييه ذا وربي ماهو بصاحي !
ضحى طاحت تضحك وقالت : الحب وم يفعل هبلتي بولدنا ولعبتي بأعداداته
الميلا وهي تشيل الشوكولاتة قالت : تحلفين بالله انه م كان كذا قبل ؟
ضحى انفجرت تضحك وقالت : وااااه يااربي تهبللونن
الميلا ضحكت ومشت بعد م شالت كل شيء وقالت : وبعدين هذا شلون صار طويل وعريض كذا ؟
ضحى : اوووه تووتس م شفتي شيء
الميلا : وشو بعد شنب وعنده وش باقي ؟
ضحى : عنده دقن ترا بس يحلقه ولا عمرنا شفناه الا مره وحدة سكر محل الحلاق عندنا اثر وفاة ابوه وسافر للهند وطلع دقنه وكان يجنن صدق بس حمار اسر
الميلا ابتسمت ومشت برا وضحى من الضحك والصدمة نست وش كانت تبي من المطبخ ..
" عند الرجال "
دخل اسر وجلس وهو يتذكر تفاصيل فستانها وابتسم اول م شاف عقاب متلطم ضحك وقال : متلطم مع الشماغ الابيض والعقال الذهبي يلعن ابو الفخاااامة يبو عايض
عقاب ابتسم وقال : اجلس اجلس بس
جلس اسر وقال : ابشرك شفتها
عقاب توسعت عيونه وقال بحدة : لااا عااد !
اسر : م شفت وجهها وهذا الحسافة لكن شفت فستانها وتفاصيلها واسواراتها
عقاب كان بيتكلم بس قاطعه اتصال طلع جواله وشاف رقم غالية رد وقال : هلا ؟
غالية : يالله جيبوا العريس
عقاب : الان
سكر وقال اسر : وش الزفة !
عقاب هز راسه بنعم وفك اللطمة وقام وقال : يالله يعريس
فزوا عيال عماتهم وعمانهم وخيلانهم وخالاتهم مع اسر وعقاب وناصر وابو فهد وابو تركي وابو فلاح ومشوا والفرقة وراهم وتقول :
الله يووفق عرييسنا فيي ليلة تشابه العيد
خذا له من البدر قسسمة ولا خذا له البدر كامل
مششى وفزوا له حبب وتقدييير كل العبيد
حفييد مساعد له هيبته ومعرووف بحسن التعامل
-
عقاب ابتسم ورمى شماغه فالسماء وصرخوا العيال ورقص عقاب بكل فرحة لأخوه ودخلوا اسر وثامر معه وابتسم ناصر وصار ينط فالسماء معهم ويلف بالبشت حقه وابوهم يضحك وفهد معه والتصفيق والتصفيير وصل للحريم وعرفوا ان المعرس وصل وقاموا الحريم كلهم وتغطوا ولبسوا عبييهم
ام فهد قامت ووقفت مع بناتها واستقبلوا ناصر بالزغاريط والتباريك والبخور والعطور
عقاب ضحك وقال : وين شماغي يعيال ؟
اسر حطه ع كتفه وقال : امسك
ناصر ابتسم وتقدم وباس راس امه وقال : الله يبارك فيتس وفيكم كلكم وعساني م اتبدل فيكم
ضحى تقدمت وبخرته وقالت : مبروك يدكتورنا وعساك من اعلى المناصب يارب
البندري : مبروك ينويصر
غالية تقدمت وشالت سحاب لعمها وقالت سحاب : عمو هذي هدية مني ومن ماما
ناصر ضحك وقال : عساني افديتس انتي ومامتتس
اسر بصراخ : باااكلها ذي الورعة !
عقاب : بتاكلك هي من طول لسانها
ثامر بمعاناة قال : ححقق وربيي حقق
غالية : خييير ؟
طاحوا العيال يضحكون عليها وقالت : هيين يعقيب
عقاب ابتسم وتقدم وباس راسها وقال : افاا تزعليين علي ؟
غالية ابتسمت وقالت : امزح معك
ناصر : يالله ؟
حصة زغرطت بصوت عالي وهي اكثر وحدة تتقنها وسد عقاب اذنه وقال بعصبية : حصييص حرام حرم الدم فيتس !!
حصة ضحكت وقالت : عاااش عريسسنا
مشى ناصر مع خواته وابوه ودخلوا وكانت غزيل واقفة وضحى سبقتهم وراحت لها وقالت للميلا تدخل وفعلاً الميلا دخلت ولبست وطلعت تشوف كل شيء
ابو فهد ابتسم وقال : ماشاءالله ماشاءالله تبارك الله وشذا الزين يبنتي
غزيل ابتسمت بتوتر وباست راس خالها وقالت : الزيين انت يخال
ناصر ابتسم ووقف جنبها وقال بهمس : الصدز صدمتيني تهبلين
غزيل بحدة : انت اسكت لا افجر فيك
ناصر ضحك ومشوا وانتهت الزفة ودخلوا البنات بغزيل وطلعوا العيال بناصر ومن رقص وتخبال ركب السيارة وطلعت غزيل لحالها وهي م عندها احد يوصلها لكن صدمها عقاب واسر وفلاح اللي تقدموا ووصلها للسيارة وساعدوها بفستانها وسكروا الباب وقال اسر : موفقيين يعرساان وعقباالي
غزيل ابتسمت وقالت : اذا باللي خبري خبرك اميين
اسر انفجر يضحك وقال : اييييه امييين
ناصر بحدة : ولد كأنك فليتها ؟
اسر تبدلت ملامحه لجدية وقال : سر امها بس
مشى ناصر وهو يضحك وغزيل كانت تحب اسر وتشوفه الطف عيال خالها لفت لناصر اللي ضحك وقال : ايييه علومتس ؟
غزيل : بخيير وانت ؟
ناصر : طيب دامتس طيبة
غزيل ضحكت وقالت : وش اللطافة ذي ترا عادني حاقدة عليك من الضربة
ناصر انفجر يضحك وقال : اني والله قد دريييت انتس بعيير م تنسين
غزيل حطت يدها ع يده وقالت : البعير بيعلمك زيين وش بيسوي
ناصر لف يده وشابك اصابعه بأصابعها وقال : حلالتس يبنت عبدالملك
غزيل سحبت يدها وقالت بتوتر : بسم الله !
ناصر ابتسم ومشوا متجهين للرياض ..
" فالاسطبل "
دخل اسر وقال بصوته الثقييل : يالخووصاااااء
طلعت الخوصاء تركض وابتسم وركبها وهو يضحك وقال : فلااح عقااب يالله ؟
عقاب تقدم وقال : يالله
فلاح ركب الادهم وتلطم وركض فيه والخوصاء لحقته وعقاب وراهم بالمرتجز ووصلوا للمخيم ورفعوا مسدساتهم ورموا فالسماء وبدأ عرس الطهبلة واللعب والضحك وعقاب ابتلش بالبزارين يصارخون يبون يركبون ويركب واحد وينشب بعشرة اخر شيء صرخ فيهم وقال : بيااااكلكمم تررراا !
صرخوا البزران وركضوا لعرس الحريم ابتسم وقال : وجع ابلشوني !
اسر ضحك وقال : عبووود
عبدالهادي لف له وقال : لبيييه
اسر : تعال جرب
مشى عبدالهادي وركب الخوصاء وركضت فيه واكتشفوا انه خيال والكل يعززون له ضحك ووقف ونزل وقال : بسم الله عليها ماشاءالله تهبل
عقاب بأستهزاء : تهبل ! شف المرتجز
غريب ضحك وقال : فحححلل مثلل عقاااب
صرخوا العيال وقالوا : اوووووههه
عقاب ابتسم ع جنب وقال بخبث : وهو صادز طيب
اسر ابتسم وقال : م شفنا من الفحل شيء ولا
فلاح : ايييه قد له شهر معرس
عقاب : الخير جاي لحد يستعجل ع رزقه
عبدالعزيز ابتسم وقال : يقلعكم يعيال وش الموضوع الزفت ذا
تركي بقرف : عززييز احبببك اخيرًا احد تكلم
مجيد ابتسم وقال : منجد حتى انا كنت بتكلم
عقاب : الله اكبر وش قلنا ؟ مسووين فييها
تركي : مشينا بس
بدؤا العيال يفكون الخيام وخلصوها بعد ساعة ونص وسلموها للشركة وانتهوا ومشوا وكل واحد خذا اهل بيته
ام عبدالعزيز ابتسمت وقالت : عيال م ودكم تسلمون ع عمتكم ؟
مشوا بناتها امال والين وبيسان مع عبدالهادي اخوهم وتقدموا عيال ابو فهد وعيال ابو فلاح وتركي وسلموا عليها ومن سؤال عند الحال وسوالف خذوا عشر دقايق وبعدها صرخ عبدالعزيز وقال : ييممهه اسررري
ام عبدالعزيز ضحكت وقالت : يالله اشوفكم ع خير
عقاب : مسرى الخير ولا تقطعونا ياهل المدينة
عبدالعزيز اشر باصبعه ع خشمه وقال : ع ذا الخشم يعقيب
سروا وانتهى العرس ودخلوا العيال فالحوش
تركي : والله يبي لها سمرة بوصل اهلي واجيكم
فلاح : صقر وصل امك وخواتي وتعال
هيثم بتعب : انا بوصلهم وبنخمد
صقر ابتسم وقال : ازيين م سويت
مشى تركي ودق باب الصالة وقال : ياهل راشد
ام تركي : يالله يميلا
الميلا : يمه بلحقتس بعدين وترا تركي بيسمر برجع معه
ام تركي ابتسمت وقالت : طيب
ورفعت صوتها وكلمت وهي تقول : كثر الله خيرتس يقمراء وبارك الله بينهما وجمع م بينهم ع خيير
ام فهد ابتسمت وقالت : بالعافيية وامين يصباح
طلعت ام تركي مع ام تالين وتالين ودالين ومشوا وقال تركي : يمه وين ميلا ؟
ام تركي : جلست مع البنات وتقول بترجع معك
تركي ابتسم وقال : طيب
عند العيال قام عقاب وقال : تبون شاهي ؟
اسر : ايييه من يدينك تكفى
عقاب ابتسم وقال : تم لعييونك يالعضضيد
اسر ابتسم وقال : يعساااني م اتببدل فيييك
مشى عقاب وارتفع صوته ورا البيت وهو يقول : يووولدد
الجود ابتسمت وقالت : ادخل
عقاب دخل وهو منزل عيونه فالارض ورفع عيونه بهدوء وشافها واقفة قدامه لف عنها وقال : ساعديني بسوي شاهي
الجود توسعت عيونها وقالت : عقاب خير ؟
عقاب لف لها وقال بحدة : علامتس !
الجود زفرت بعصبية وقالت : كذا تقابل زوجتك بعد اسبوع كامل ؟
عقاب : وش تبيني اقول مثلاً !
الجود تقدمت ومدت يدها وقالت : سلم اقل شيء !
عقاب مسك يدها ونزل لها وتساوى بطولها وسلم خدادي وقال : شخبارتس ؟
الجود : بخير
عقاب سحب يده وعطاها ظهره وهو م يدري ليه متوتر ع انه مو اول مره يقابل الجود ومعقولة اسبوع قد يرجعه لعقاب القديم سحب البراد وحط فيه ملعقتين شاهي وسكر ونعناع وصب الموية وشغل عليه ولف وشافها جالسة وتتأمله تكى ع الثلاجة وقال : خلصتي ؟
الجود استوعبت وقالت : هاه !
عقاب ابتسم وقال : م تغيرتي ابد
الجود : اسبوع ترا لاتحسسني انه سنة
عقاب : صادزة
الجود زفرت بملل وقالت : عقااب وش السلام البارد ذا !
عقاب زفر بعصبية وقال : يبنتي وش تبيني اسوي اطيرتس فالسماء ؟ شكلتس عشتي وتعمقتي بزواجنا !
الجود : كذا ؟
عقاب سحب البراد وشهقت وقالت : حااار !
عقاب ابتسم وقال : ماش نسيتيني
حطه فالصينية وحط البيالات معه وحب دوار الشمس ومشى بيطلع بس استوقفه صوتها وراه وهي تقول : عقاب !
عقاب لف لها وشافها تركض بجهته نزل الصينية ع عتبة الباب ونطت الجود وحضنته بكل قوتها وقالت : وحشتني !
عقاب كانت عيونه شوي وتطلع من مكانها من الصدمة وهو م توقع انه اللي صار بيصير ارتخى لها وقال : م يوحشتس غالي يالجود
الجود ابتسمت وشّدت عليه وقالت بلطافة : ااففف حضضنك ييجننن م ابيي اخليييك
عقاب ابتسم وحط يدينه ورا خصرها ورفعها له وشّدها عليه وقال بصوته الثقييل اثر الحضن اللي طلعت مشاعرهم فيه : خلييتس طيب لاتروحيين ولا تخلييني
الجود لف وباست رقبته بكل شوق وقالت : نعييمًا الحلاقة يروحي
عقاب ابتسم ونزلها وقال : الله ينعم عليتس يجويد
الجود شهقت وقالت : لاا روجي طبع !!
عقاب ضحك ونزل لها وقال : امسحيه
الجود بخوف : م يرووح !
عقاب كان شماغه ع كتوفه سحبه ولفه ع راسه وقال : لعاد تنعاد زين ؟
الجود هزت راسها بنعم وقالت : زين
مشى واخذ الصينية وطلع للعيال فالحوش والجود وراه قلبها يدق ابتسمت وحطت يدينها ع وجهها بخجل وقالت : اااه يججننن !
دخلت الجود للبنات تكمل السهرة معهم في فقرة م تخلى البيوت منها بعد كل زواج تسمى بالاستديو التحليلي ..
:::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني 🫡 ، ثلاث بارتات ورا بعض كافيية جدًا لكتابتكم تقطع صح ولا لا ؟ بارت اليوم لذيييييذ بمعنى الكلمة وبسميه بارت " آل مقبل " لاتنسون النجمة ! وعطوني رايكم بكل شيء 😢 اشوفكم ع خير ببارت جديد بعد قطعة ارتاح فيها اشتاقوا لي لا اوصيكم 🫶🏻 )