ليّت اللِذي خَلق العُيون السُود ... خَلق القُلوب الخَافقات حَديد

البارت الثالث عشر

دخلت الجود للبنات تكمل السهرة معهم في فقرة م تخلى البيوت منها بعد كل زواج تسمى بالاستديو التحليلي ..
" في بيت ابو تركي "
تركي دخل مع امه ودخلها وقالت : تروك لا تطولون
تركي اشر بأصبعه ع خشمه وقال : ع ذا الخشم يميمتي
طلع يركض وقابل ابوه راجع وقال : تركي ع وين !
تركي وقف جنب ابوه وباس كتفه وقال : يبه بنسمر مع العيال 
ابو تركي بحدة : وامك وخواتك وينهم ؟
تركي ابتسم وقال : امي داخل البيت وخواتي ؟ مدري بس اذا قصدك الميلا فجلست وبرجعها معي والجود عند زوجها واهله
ابو تركي عصب وقال : جوود ترجعهاا الحييين !!
تركي طارت عيونه بصدمة وقال : ننعممم !!!
ابو تركي بحدة وواضح انه منقهر من عقاب اللي م جاء ولا سلم عليه ولا اعتذر منه وهذا كان تفكير ابو تركي قال وهو يزفر البراكين داخله : العاقب عقيب م جاء يسلم علي هذا وانا عمه وابو مرته !
تركي شّد ع قبضته وقال بنفسه ( ااااه يعقاااب لاززم تخليي شيء نااقص وتنسسى ان ابووي اكثر وااحد يدقق !! ) وابتسم بكلافة لأبوه وقال : ابشر
ابو تركي : الااان
ركض تركي راجع لبيت عمه وهو يقول بصوت عالي : ابششر يبه ابشر
دخل ع جلوس عقاب بالبراد ومشى وضربه بكل قوته وفز عقاب ومسك تركي مع رقبته وقطع مجرى التنفس عنده وصرخ بوجهه وهو يقول : صببيي ووشش علللمكك !!!
تركي بكل قوته وعصبيته لف يد عقاب وفزوا اسر وفلاح واقفين مع عقاب وهم م قوى عليهم يخلونه بعد المصايب اللي طاحت ع راسه وكسرت ظهره
ابتسم تركي وقال : ماشاءالله وش الحمية اللي عندكم علي !!
عقاب بحدة : ووش لعنتتك !!
اسر بحدة وعصبية : ايييه حميييّا اخووي ترا !
فلاح وقف بينهم وقال : وانا طرف الصلح بينكم تركي وشفيك ؟
تركي ابتسم وقال : معاد فيه طب عقاب
مشى وتركهم جاهلين السبب وراه ودخل وقال بصوت عالي : ي جووودي
الجود فزت وقالت : الله يستر
ركضت ومشت لأخوها وقالت : لبيه ؟
تركي بحدة : البسي عبايتتس وتعالي الان
الجود غطت وجهها بيدينها وقالت : لا يارب وشفييكم بعد !!
تركي بعصبية صرخ عليها وقال : اخلصصيي وميييلا معتس
الميلا دخلت بكل قوتها وهي رافعة حواجبها وقالت بحدة : خيير خيرر ؟
تركي : اعجلوا علي !
الميلا تقدمت ومسكت كتوفه جاهلة وجود اسر ع طرف الجدار مصدوم يسمع اللي بينهم وانصفق بمنظرها الفاتن وفستانها ومكياجها كانت فاتنة وجمالها مستحيييل
الميلا بحدة : شفيييك ؟
تركي زفر بقرف وقال : يخي طفشت من سالفة ابوي وعقاب يخيي وربي اني اسعى ورا عقاب واصلح ولي اسبوعين اكلم ابوي يرضى علييه وكل م زانت جاء الحمار وخرب كل شيء وابوي يبي جود فالبيت الحييين لأن عقاب باقي م اعتذر !
الميلا انفجرت تضحك وقالت : بسس !!
اسر فز قلبه من ضحكتها ولف علطول وقال وهو يتنفس بصعوبة : اعنبوتس والزييين حرراام م تطيرين من يديني بسبة عقااب !!
ركض بكل قوته طالع من اسوار بيتهم لبيت ابو تركي وصل ودق الباب بكل قوته وفتح عمه وهو منفجع وقال : ااسرر !!
اسر ابتسم وباس راسه وقال : يعمي عقاب راح لدوامه عنده استدعاء وعازمك القابلة ع عشاء ذابح لك خروفين والله انك تستاهل اللي اطيب منها واعذره عن القصور
ابو تركي ابتسم وقال : وشدعوة ذا كله ؟ عقاب ولدي وزوج بنتي ويبشر بالحضور والله انه م يقصر والله يوفقه في دوامه
اسر ابتسم وقال : ايييه اييه امين وشرفنا يعمي بكره
ابو تركي : ابشر
اسر باس يده وقال : تبششر بالجنة يعمي
ابو تركي كان بيسكر الباب بس انفجع من خروج عقاب من العدم ورا اسر وقال بحدة : عقاااب !!
ولف بعيونه لآسر وقال بكل عصبية : وتكذبب علييي !!!
اسر صفق بيده وجهه ومسحها ع شنبه وقال : افاا يعمي انا اكذب ؟!؟
عقاب لف لآسر وهو منلخم وقال وهو يهمس : ابك وش العلم !!
اسر بعصبية : اصه الله ياخذ نفسك اصصه
ولف اسر لعمه وابتسم وقال : شكله م رضى يخليني انا اللي اعزمك
ابو تركي بحدة : عقاب وش جابك م وراك دوام !؟
عقاب تقدم وباس راس عمه ويده وقال : الا وراي لكن استدعاء فالمكتب وم يحتاج بدلتي لكن م ارتاح ضميري ارسل لك الجاهل ذا وانا م اجيك يعمي ومثل م قال اسر ابيك تجي بكره للعزبة والله ان لك اللي ودك
كان اسر كاتم الضحكة ويشوف عقاب يرقع ويحاول م يجيب كلام عاكس لكلامه
ابو تركي ابتسم وقال : الله يرضى علييك يولدي لكن بنتي ابيها عندي الليلة ونجيك بكره ونشوف وش العلم
عقاب تذكر اللقى اللي صار بينه وبينها ابتسم بكل حب وقال : ابد اللي ودك يعمي انت ابوها ولو انها ع ذمتي لكن اقدم ولا تسمي انت ابوها وسمّها
ابو تركي : اجل تمسوا ع خير يعييلي
سكر الباب وانفجر اسر يضحك بكل قوته وقال عقاب : يمين عظيم ان م انطميت اني لا اشلع بطنك !!
اسر وهو يضحك قال : لااا والله حااشا وكلاا قسسسم بالله انك رجااال وكملتتت ولا جببتت العييد
عقاب ابتسم بكل ثقة وقال : انا العقاب افا علييك يالآسر
اسر ابتسم وقال : الله يجعل اسر قبل عقاب يارب
عقاب حضن اخوه من كتفه ومشوا مع بعضهم راجعين لبيتهم ..
" عند تركي والميلا "
تركي انجلط وقال : مييلو وش بس !! وش البرود ذا
الميلا ابتسمت وقالت : ابد خل ابوي علي وريح ضميرك
تركي : ابشري بس تعالوا معي
الجود تقدمت من وراهم وهي لابسة عبايتها وكل شيء ومعها عباية الجود تحت صوت ضحى العالي وهي تهاوش وتقول : سامجييين مرره والله م اسااامحكم
الميلا اخذت عبايتها وقالت : افااا يوضوح ابشري من بكره وانا عندتس
لبست عبايتها ومسكت ذراع اخوها والجود من ذراعه اليمين وطلعوا مع بعضهم ومر تركي وقال : عيال لعاد تنتظروني
فلاح بحدة : ترووك وش العلم !
صقر : وهو صادز تحتاج شيء ابششر بنا
تركي ابتسم وقال : ابد ابد
طلع ولفت الميلا بعيونها وكان اسر يضحك بكل قوته ع عقاب اللي معصب ويشرح له ابتسمت بخجل وقالت بنفسها ( يارب الثبااات يااارب م ابيي اطييح له ! ولضحكته اللي ترد الرووح ! ) مشت مع تركي وتقابلوا بنص الطريق
عقاب رفع حاجبة وقال : ماشاءالله طلعت جاي تاخذها ؟
تركي رفع اصبعه واشر ع وجه عقاب وقال : اخذهم لو سمحت
عقاب مسك اصبعه بكل قوته وقال : اصبعك نزلها لا تنكسر !
تركي بحدة : سلاااماااات يبوووي ناااسي اني اكببر منك ؟!
اسر ابتسم وقال : زد ع عمره عمري والله اني افداااه ابو عايض
تركي : ااووه بسس عاااد اقرفتوووني
مشى ولفت الميلا وتلاقت عيونها بعيون اسر وهو يضبط شماغه ويتلطم به غمز لها وشهقت وصدت علطول وابتسمت وقالت بنفسها ( يويليي ماهوو بصاااحي ! يااارب بدييت احسد اشياااء كثيير حوله اولهم عقااب اللي اسر دافع عمرره عشانه !! ) شّدت ع ذراع تركي وكملوا لبيتهم واستوقفهم من الدخول صوت عقاب من وراهم وهو يقول : ولدد تررركي
تركي لف وقال : هااه ؟
عقاب ابتسم وباس خشمه وقال : هووييت في ناار جهنم يالعدو !!
تركي فز وباسوا خشوم بعض وقال : احتزززم يعقييب وشفييك !
عقاب ابتسم ومد يده للجود وقال : ابي انستي شوي اذا تسمح
تركي ابتسم وقال : خذ راحتك
الجود وقفت بصدمة وهي تشوف اخوها واختها يدخلون ويسكرون الباب وراهم لفت لعقاب اللي يطالعها بشكل مُغري
عقاب ناظر بيده وقال : م انتي ناويه تمسكينها ؟
الجود مدت يدها وحطتها فوق كف عقاب اللي علطول شابك اصابعه بأصبعها ومشى فيها وهي وراه مستغربة بلعت ريقها بتوتر وقالت : عقاب
عقاب ابتسم اول م سمع صوتها وقال : يالبييييه يروح عقاب
الجود ابتسمت بخجل وقالت : ماشاءالله صاير رومانسي
عقاب وهو ناوي يحرجها قال : والله من اللطمة والبوسة اللي تحت فكي لا تلوميني
الجود طارت عيونها بخجل واحترقت خدودها وقالت : طيب اس..اسمع ويين بنر..بنروح ؟
عقاب كتم ضحكته وقال وهو عارف انها انحرجت : تعالي وبس
مشى عقاب وشغل الونيت وقال : بتجين معي للعزبة وراي عزيمة لأبوتس بكره وابي كل شيء جاهز
الجود زفرت بعصبية وقالت : اعنببوك انت م فييك طب ولا طبييب ! قلت بيروح يعشيني ويونسني اثاريك ماخذني عشان اشتغل !!
عقاب انفجر يضحك بصوت عالي ودوت ضحكته بمسامعها ابتسمت بكل حب وهي تشوفه قدامها بعد كل اللي صار ومن زود الخفه ركبت وقالت : لكن بجي معك لجل عييين تكررم مديينة
عقاب لف لها بهدوء وابتسم وقال : يجعل عيوني فداتس يالنتفه وبعدين طلعتي خفيفة اجل سهل العب عليتس
الجود تفشلت وقالت : انا ؟ اتحداك اصلاً رحمتك وجيت ولا كلامي قبل مجرد طبطبة ع قليبك
عقاب طيح راسه ع الدركسون يضحك بكل قوته ورفع راسه بألم وقال : ااااه يجودي الله ياخذ اللي م يحبونتس وظني اني اولهم
الجود تركت كل شيء وقال : وشفيك شيء يوجعك ؟
عقاب فك لطمته ووضح لها الفتحة اثر الحجر اللي طار عليه وخيطوا له اربع غرز شهقت وقالت : منن اييشش !!
عقاب تعصّب بشماغه ونزل عقاله ع الطبلون وقال : م يهم
الجود جلست وقالت بهدوء : م تحبني صح ؟
عقاب ابتسم وعرف انها دققت وقال : لا بالله ماني خبل عشان احبتس علطول ولا بعد حسيت بشيءٍ تجاهتس يبنت راشد
الجود ابتسمت بضيق وقالت : معليه احسن لك خلك كذا م ظنتي نكمل مع بعضنا
عقاب : افا ليه ؟
الجود فتحت الباب ونزلت وفز عقاب وقابلها ورا الونيت وقال بحدة : ويين رايحة لحالتس !!
الجود اشرت بيدها ع بيتهم وقالت : بيت ابوي قريب شكرًا سمعت اللي ابيه
عقاب : والعزبة ؟
الجود رفعت رجولها ونزلت عقاب وهمست بأذنه وقالت : لييتك تذوق طعم الشوق والهوى اللي حسييت فيه وانا مالي فالهوى ولا لي فالحب ي ليييتك تحس فيني ولو شوي
ابعدت وسحبها عقاب من خصرها وشّدها عليه ونزل نفسه وقال بصوته الثقييل وهو يهمس : واشتقت لتس بالمكابّر كيف اقولها ؟
الجود حاوطت رقبته وقالت : تقدر تقولها بدون مكابّر
عقاب ابتسم وكمل وهو يقول : م هم قالوا القلوب عند بعضها وراتس م حسيتي فيني وفي شوقي لتس ؟
الجود بعدت منه وم زالت يدين عقاب ع خصرها وقالت : عقاب قاعد تناقض نفسك ابعد مني
عقاب سحبها له وقال : العني ابليس وتعالي معي
الجود مسكت يدينه بكل قوتها وابعدته بعنف ومشت وقالت : يليتني م جيت معك وليت صورتك جلست مثل اللي بخيالي
عقاب ابتسم ولف بعيونه وم شاف احد ركض لها وشالها بين يدينه ضحك وقال :
يحق لتس يا صغيرة السن تتكبر
‏الا على اللي يحبٌك يابعد حالي
ع حبيبتس يالجود تكفى لا تتغير
وتصيرين لي معنى اسمي وعقابي
-
الجود شهقت ومسكت رقبته وصرخت برعب وقالت : صصح لسساانك نززلننيي
عقاب كتمها بيده وهو يضحك وقال : ابو طبيع م يجوز عن طبعه للحين مصّره تصارخيين
الجود طارت عيونها اول م ركبها عقاب معه من باب السايق وكانت مستقرة بحضنه ضحك وقال : بأخذ دييني منتس
الجود بتوتر وخجل وضح ع صوتها : هاه ! اي ديين ؟
عقاب ابتسم ولف وجهها له وشال البرقع وقال : انتي عارفة وش مقصدي وابعدي الغيمة اللي حجبت ملامح القمر عن عيوني
الجود كان قلبها يدق بكل قوته ووجهها تقلبت الوانه خجل من تصرفات عقاب اللي توضح لها انه هايم فيها وجالس ينكر بلسانه ويفضح عمره بحركاته ..
" عند اسر فالمقلط "
ابتسم وهو يتأمل السقف وقال : اااه عزتي لي معاد الا انا لحالي خلوني واعرسوا وانا ظني ان سالفتي مطولة وزود
قام ومشى ودخل داخل البيت ودق باب غرفة امه وابوه وفتح الباب بهدوء وكان ابوه نايم وامه خلصت صلاة وجالسة ع سجادتها ابتسمت وقالت : تعااال يحبيب امك
دخل اسر وباس راسها بكل حب وهو يستنشق ريحتها ابتسم بحب وانسدح ع فخذها مثل م تعّود وقال : حلوة اللبن واحشتني جددددااا
ام فهد مسحت ع راسه بيدينها اللي برزت التجاعيد عليها موضّحه لنا كُبر عمرها ابتسمت بحنية وقالت : م يوحشك غالي يوليدي وانا اعرفك م تجيني وتنسدح الا وخاطرك متكدر من اللي مزعل جنيني ؟
اسر رفع عيونه اللي تلمع اثر الدموع اللي تجمعت وقال : يمه انا طحت فالحب ولا سمّي علي
ام فهد توسعت عيونها بخفه وقالت : ومن سعييدة الحظ ؟
اسر همس وقال : الميلا
ام فهد ابتسمت بحب وحطت يدها ع قلبه وصارت تقرأ اذكار وتحصنه وانتهت وقالت : يارب طمن قلبه باللي يبيه ويارب ان كانت خير له فأجمع م بينهم ع خيير وحب وطاعة وان كان خير لها فالمثل ويارب ان كان ذا الحب بيشقي قلب ولدي اصرفه وعوضه باللي احسن
اسر فز ومسك يدها ع قلبه وقال : لا يجنتي قسم بالله لا اشقى واحب الشقى لعيونها يمه لا تحرميني منها
ام فهد قطرت دمعتها ع خدها وقالت : الله يجمعكم على خير يوليدي
اسر ابتسم ان امه مهتمة لخاطر الميلا ودعت لها مع اسر باس جبينها اللي امتلى تجاعيد تعب السنين وقال : يالله يارب انك لاتحرمني اميمتي والله يجعلني قبلها
ام فهد حضنته وقالت بكل حب : الله يجعلني فداك ي اسيّر ولا يحرمني حسّك ووجودك بدنيتي م حييت
اسر حاوطها وشّد عليها وقالت : يااارب ولا منتس يرضاي فالدنيييييا ذي كلها يدنييتتيي
ام فهد ابتسمت وقالت : رح الله يرضى عليك ويناولك مرادك
اسر قام وباس يدها بكل قوته وتبعها ببوسة ع راسها وقال بصوت مهزوز وعيونه اللي تغورقت بدموعها : اللهم اميين
طلع وسكر الباب بكل هدوء وفز ع مسكة ضحى له من خصره ولف عليها وقال : وضضييححيي
ضحى ضحكت وقالت : تعال تعال معي معاد الا انا وانت اللي صاحيين
اسر ضربها بخفه وقال : طيررتي عقلليي
ضحى ابتسمت وقالت : بسم الله ع قلبك
حضنها اسر ومشوا برا فالحوش وجلس مع اخته ع فرشتهم
ضحى : حبيبي فيك شيء ؟
اسر تلطم بشماغه وضبّط عقاله عليه وقال : م فيني شيء فيني اشياااء
ضحى مسكت ركبته وقالت : افا وانا اختك ! وشفيييك
اسر حط يده فوق يدها وقال : اخوتس يوضيحي ضاايقتن به الدنييييا ودتس تخاويني ؟
ضحى ابتسمت بضيق وهي عرفت انه ضايق عشان الميلا وقالت : اييه يالله وين ودك نروح ؟
اسر قام ومد يده لها ومسكتها ضحى وقاموا مع بعض وطلع اسر مع الباب الخلفي وقال بحماس : وشرررااايتس ؟
ضحى توسعت عيونها بصدمة اول م شافت سيارة اسر الحديثة سيارة سوداء تنعكس انوار الديرة البعيدة عليها جديدة اكياس الوكالة عليها فزت بفرح وقالت : ماشاءالله تباااارك الله هذيي لك الله يععطييك خييرها ويكفيييك ششرها !!
اسر ابتسم وفتحها بمفتاح عند بعد شهقت ضحى بحماس وركضت تجيب عبايتها واسر يضحك ركب وشغلها وشوي وطلعت ضحى تركض وركبت وقالت : يمه ييمه ي اسر الشعور غرريب تعودت ع كرسيدا ناصر وونيت عقاب وشذا التطور يحبيبي انت !!
اسر ابتسم ومسك يدها وقال : صح اني تمنيت انها معي وتكون اول من تركبها معي واشوف ردة فعلها وجمالها وعيونها السود
ضحى ضحكت وقالت : يوسخ وانا !
اسر باس يد اخته وقال : وقسم بالله انتس غييير وحبي لتس حب ثاني بس م وصل مواصيل حبي لها
ضحى بمعنى انها تنسيه الميلا شوي قالت : اقول مشينا وين بنروح ؟
اسر : ابد بنروح للرياض ونمسي فيها ونرجع بكره
ضحى : كوويس لأني كلمت امي يوم دخلت اجيب عبايتي ووصتني بغريضات لرمضان
اسر ابتسم وقال : الا صدق كم باقي عليه ؟
ضحى : شيء وعشرين يوم
اسر رفع يدينه وقال : اوووه ياااارب م يجي رمضان الا وانا معها يالله يارب
ضحى رفعت يدينها معه وقال بضحك : اممميييييننن عاااد ياااربي اححبب الميييلا
اسر مشى وقال : يحظ الميلا دامتس تحبينها
ضحى ضحكت صارت تشوف السيارة وتركز بأدق تفاصيلها ووصلوا بعد مدة طويلة والساعة وصلت ٣ الفجر للرياض دخلوا داخل شوارعها واصوات الناس اللي تدل ان الرياض مدينة تضُج بالسكان ابتسمت ضحى وقالت : هييه اسر
اسر : يعيوني ؟
ضحى : ابي قهوة يخي
اسر ابتسم وقال : الحييين تبششرين بألذ قهوة
مشى اسر ووصل لمقهى معروف وطلب من طلبات السيارات واخذها ومشى ووقف جنب المقهى اول م شاف بسَطة عجوز تبيع ورد ابتسم ونزل من السيارة واخذ باقة كاملة واشتراها وفتح باب ضحى وقال : يلييق فيتس الورد ويلييق بتس تزهرييين
ورفع راسه اول م سمع صوت وراه يقول : اااسر ؟!
اسر توسعت عيونه وقال : ارررححببب
سهم تقدم وقال : يمررحبااا
سلموا ع بعض وكان سهم خويي اسر فالدوام ولف سهم وطاحت عينه بعيون ضحى والورد بحضنها ويدينها الرقيقة حاضنته واساورها وخاتمها واظافرها الناعمة كانت جميلة وم اجمل منها الا عيونها الوساع صدت بسرعة ولف بوجهها
سهم تنحنح وقال : ايييه يبو عايض ويش مناسبتك جاي وجايب معك انسه تهديها ورد وهي ارق منه ؟
اسر طارت عيونه وقال : هيييييه ! يبو فيصل كأنك فليتها !!
سهم ابتسم وقال : تزوجت يوسخ ؟
اسر انفجر يضحك وقال : لااا اللي معي اوخيتي
سهم غمز له وقال : زييين يعني فيه مجال ؟
اسر مسك كتفه بقوة وقال : اعققل وخلنا حبييبة
سهم : اجل والله م تردني واني عازمك
اسر فز وقال : لا والله ي سهم م بيننا وابشر المرة الجاية بجي انا وعقاب لكن الحيين مرره م ينفع
سهم باس خشمه وقال : اللي يريحك يبو عايض لكن عازمك ولا تنسى
اسر ابتسم وسلم خدادي عليه وقال : تبشر يبو فيصل
سهم مشى ولف بعيونه يسترق نظرات من ضحى اللي كانت صادة ومتقرفة منه ابتسم وقال : اااه يالقهر !
مشى وركب سيارته ومشى من قدامهم وركب اسر وقال : طولت عليتس ؟
ضحى بحدة : رجعنا الديرة هنا رجالن ماهم ع السنع والواحد منهم عييونه زاايغة !
اسر ابتسم وقال : والله ان قلبه طيب ونظيف
ضحى : م سألتك عود بي للديرة !
اسر انفجر يضحك وقال : يبنت اصبري !
ضحى بعصبية : ااسسسييرر وربيي لا اككللم اببووي
اسر : ابشري بكيفتس
مشى اسر واخذ الدوار راجع للديرة ومن سوالف وتلذذ ضحى بالقهوة اللي م تشربها كل عام واسر مستمع بكل حب لها وكل م سكتت خذته السجة للميلا وملامحها اللي شافها من قريب ابتسم وشّد ع الدركسون ودعس البنزين مع خط طوييل بصحبة رفيقة دربه اخته وريحة القهوة والورد ..
" في الديرة تحديدًا بيت ابو الهنوف "
الهنوف : واخر حل بنمشي !
ابو الهنوف بحدة وهو سأم من كثر م ضربها قال : وقسم بالله لعاد اسمع صوتك فشلتييينيي عند العرب !!!
ام الهنوف ببكي : واذا هي غلطت ويين بنروح !
ابو الهنوف : اركبوا الموتر واقصروا الهرج !
مشوا كلهم وركضت الهنوف وهي ناوية تودع عقاب لأخر مرة وهي تعرف اصرار ابوها وكيف يكون وصلت وقفت بصدمة اول م شافت الونيت ماهو موجود شّدت ع قبضتها وقالت : ااه يعقيييب ويينك فيييه !!
مشت تركض ووصلت بعد كم دقيقة للإسطبل ودخلت وفتحت البوابة وشافت المرتجز فتحت له وركبته بهدوء وضربت عليه وركض فيها وابتسمت بكل شراسة وقالت : تروح مني والله لا اجييك !
طلعت بالمرتجز وتركت البوابات فاتحة مما ادى لخروج الخوصاء والادهم وابعدوا من مكانهم بالحيييل فالصحراء الواسعة ...
" فالعزبة "
عقاب ضحك وقال : والله ان تنزليين معي م فييه
الجود عضت يده وانفجر عقاب يضحك بصوت عالي وحضنها وقال : قلت لتس م فيييييه لاا يعني لا
طفى الونيت ونزل وهو شايلها وصرخت بصوتها الانثوي وقالت : ويييمييين بالله يعقيييب لا تودييني للشبك !!!
عقاب رفعها ورفع راسه يناظرها ابتسم وقال : شدعوة الصراخ والخوف ذا كله ؟ معي معي تتوقعين بيجيتس شيء ؟
الجود كانت حاطه يدينها ع كتوفه ابتسمت وقالت : اييه واضح تبيني اثق وتغدر فيني تراني مؤمنة وم بنلدغ من نفس الجحر مرتين !
عقاب مشى فيها ووصلها للصندوق وفتحه بيد وهو شايلها بيده الثانية انصدمت الجود من قوة عقاب وضحكت وقالت : وش بتسوي يبطلي ؟
عقاب ابتسم ع جنب وقال : بطلتس ؟
الجود : اقصد الابطال ماهم اقوياء وكذا !
عقاب نزلها ع الصندوق ومسك خصرها وقال : ايه ؟
الجود : انت فتحت باب صندوق الونيت الثقيل بيد وانت شايلني بالثانية وخلاص بسسميك بطلي
عقاب ابتسم وفز ناوي مبسمها ولفت الجود بكل سرعتها وردة فعلها لخمت عقاب وانحط منطوقة جنب شفايفها باسها بعُمق وقال بهمس : ليه ابعدتي ؟
الجود كانت ترجف وهي من قوة التوتر حسّت بالبرد فجأة صدت بوجهها وقالت بصوت مهزوز : لأنك للحين م تستاهل
عقاب ركب الونيت وضبط فراشه وفراشها جنبه لف عليها وقال بحدة : اللي ودتس
انسدح وغطى عيونه بشماغه حاجب عليها معرفة اذا كان صاحي ولا لا واضطرت تقرب وتنسدح جنبه لكن بينهم مسافة كبيرة رفعت عيونها للسماء ومُقلتيها ترجف بحب ودموعها اخذت مجراها ابتسمت ومسكت قلبها اللي يرجف ويدق بكل قوته وقالت بنفسها ( يارب نكون من ذا الحال واحسن مع بعضنا يارب لا تريني فيه مكروه يبكيني يارب احفظ لي زوجي وسخره لي يارب ) غمضت عيونها ونامت بكل فرحة ..
" بعد م يقارب النص ساعة  "
عقاب فز من سمع صوت ضرب الخيل فالبيداء ورفع شماغه من عيونه وتعصّب فيه وشاف زول المرتجز وعليه انثى شعرها يصَافق الريح فرك عيونه بصدمة ونزل من الصندوق
الهنوف سحبت اللجام بكل قوتها وقالت : اف عقااب !
عقاب طارت عيونه وقال بحدة : انتتي وش تسسوويين هناا ! وكييف لتس وجهه تدورريين عليي وتلاحقيينيي !!
الهنوف نزلت من المرتجز وتوسعت عيون عقاب من جديد وكمل وهو يقول : المرتجزز !!!
الهنوف مشت له وصار عقاب يرجع بخطواته ويسمعها وهي تقول بترجي وبكى : تكفى يعقيب ابوي بياخذنا بعيد ولعاد بنرجع للديرة ومن نظرته والله انه صارم في قراره تكفى سوو اي شيء تكفى !!
عقاب ركض بعيد منها وقال بصوت عالي : جووودي
الهنوف طارت عيونها ولفت ع الجود اللي كانت واقفة ع الصندوق وتقول : بسسم الله ويينك انت !!
عقاب صار يأشر بيدينه وهو عارف انه راح بعيد فالظلام وكمل وهو يقول بنفس طبقة الصراخ : الكلبة عندتس تكفييين ابردي حرتي فيها مقدر اشوفها م تحل لي ولا كان دقيت خشمها دق !
الجود مسكت راسها وقالت : وش ذا وش تهابد انت !!؟
لفت الجود بعيونها وشافت الهنوف واقفة مصدومة وهي م توقعت تحصل الجود مع عقاب نزلت من الصندوق وقالت : انتي م تتوبين صح ؟
الهنوف ضحكت وقالت : وش بتسوين يالنتفه ؟
الجود نزلت واخذت حجر كبير ولفته بشيلتها وصارت تدور فيه وضربته بكل قوتها ع راس الهنوف وطاحت مغمى عليها وراسها ينزف
الجود وقفت ع راسها وقالت بفرحة : عششااان ي التسلبة معاااد تفقشيين رااس بططلي !!
عقاب تقدم وهو صاد وشاف الجود تغطي وجه الهنوف وصل عندهم وناظر فيها عند رجولهم وقال : تهقينها ماتت ؟
الجود بحدة : مووت جدي اللي مات ولا دفنوه ان شاءالله
عقاب ابتسم وقال : يالنصابة م عندنا جد مات ولا اندفن
الجود زفرت بملل وقالت : يوووه لعاد تدقق عاد ودور لنا صرفة وين نوديها ؟
عقاب تكى ع كتفها وقال : مدري والله نرجعها لبيتهم ؟
وفزوا اول م كحت الهنوف وقالت بصراخ وآلم : راااااسسي !
الجود شهقت وصرخت برعب وقالت : يييممهه سببع ارووواح
عقاب فز وكتمها وقال بحدة وبغيرة ع صوتها : جوود ! لعاد تصارخيين انذار انتي كل م صار شيء فتحتي حلقتس !!
الجود اشرت باصبعها ع خشمها وابعد عقاب يده وقال : وانتي اركبي الله يشغلتس بنفستس
الجود لفت وصرخت بكل قوتها وقالت : وووححششش !!!!!
عقاب طار قلبه وقال : ووجعاااااااه يالجود بنت راشد وجعن يوجعتس !!!!
الجود ركضت برعب وهي تصارخ ولف عقاب وشاف المرتجز ضرب راسه وقال : الله يخلف علي يارب
مشى لها وهي تراكض وتناقز برعب مسكها مع رسغها وقال : بنتت !! امسسي ووجع ذا الخييل حقي
الجود وقفت بصدمة وقالت : انت ؟ وخيل ؟ مستحيل حبيبي تلعب ع مين !
عقاب ابتسم وقال : وش الكلمة اللي بعد مستحيل ؟
الجود قطبت وقالت : ايش ؟
عقاب حاوط يدينه حول خدودها وقال : وش قلتي ؟
الجود رفعت كتوفها بمعنى " مدري " وقالت : مدري وش !
عقاب نزل لها وحط خشمه بخشمها وقال بهمس : حبيبي ؟
الجود توسعت عيونها وابعدت بسرعة بفشلة وقالت : ايييه هذي اقولها للبنات وللعيال يعني م تفرق
عقاب تركها وركض بكل سرعته ووصل ورا الونيت وم كانت الهنوف موجودة لف بعيونه واختفت وكأن م كان لها اثر رجع للجود وقال : بنت امشي بنخمد انا
الجود رفست الارض برجلها وقالت بصراخ : لا لاا عقااب طار النوم منيي بعد صرختك لاا والله م تنخمد !
عقاب تكى ع الصندوق وقال : وش تبين نسوي طيب ؟
الجود : مدري بس لا ننام
عقاب ركب الصندوق ومد يده وقال : تبين احكي لتس قصص صارت لي ؟
الجود مشت ومسكت يده ورفعها عقاب وجلسوا مع بعض وقالت الجود : زي ؟
عقاب ابتسم وبدأ يسولف لها وهي تتأمله ولا قدرت ترمش كان يبتسم وفجأة تتحول ملامحه لجدية تحت انصاتها وحبها له وكأن عقاب ع فارق العمر اللي بينهم ابوها وم تبي تتدلل الا عنده ومنه ..
" عند الهنوف "
وصلت بعد ركض دام اربعين دقيقة وطاحت قدام بيت ابوها وركض لها حامد وقال : هننووف !!!
ابو الهنوف بحدة : ووش جاايبه لنا من مصييبة ذي !!!
ام الهنوف بخوف ع بنتها : انت م انت ابوها وشلون تقول كذا وراسها ينزف !
ابو الهنوف بعصبية : عقاب نزف راسه وانكسر ظهره وانظلم منها غااامد تعال امسكها
غامد مسكها مع حامد وركبوها السيارة ومشوا ووقف ابو الهنوف ونزل رسالته من اعتذار وكلام ممكن يمحي فعلة بنته من عقل كل من فالديرة ومشى وهو حالف معاد يرجع بعد م سكر الباب اللي م تمنى يسكره ابد ..
" في يوم جديد فالرياض "
دانه نزلت وهي تركض وقالت : بيوصلون ؟!
ام دانه : اييه استعجلي
دانه كملت ركضها للمطبخ وصارت تشيل مع الشغالة وتحضر معها ووقفت علطول اول م ارتفع صوت ام ماهر وهي تقول : يالله عساه عرس الدهر يوليدي
ماهر ابتسم وقال : اللهم اميين
ابو دانه ابتسم وقال : ماهر ترا من عاداتنا وسلومنا م فيه شوفة شرعية
ماهر شّد ع قبضته بحسرة وقال : معلييه اللي ودك يعمي نملك ونطلع اصلاً
ابو دانه توسعت عيونه وقال : ابدن ! بتتغدون معنا ولا ابي اسمع كلمة ثانية !
ماهر ابتسم وقال : اللي ودك
دخلوا الرجال ووقع ماهر ودخل ابو دانه للمقلط وشاف بنته بكامل زينتها ضحك وقال : يالبييييه ي دانه ابوتس ماشاءالله ماشاءالله تبارك الله والله يوفقتس يبنتي
دانه تقدمت وباست راس ابوها وقالت : وياك يالغالي
ابو دانه : اذا موافقة وقعي هنا
دانه غمزت لأبوها ووقعت وباس راسها وقال : مبروك يبنتي الله يجمع بينكم على خير
دانه ابتسمت بخجل وقالت : اميين
طلع ابو دانه وانكتبت دانه زوجة لماهر في ظرف وقت قصير وبدأت التباريك من خالاتها وعماتها ومن اهل ماهر كلهم كانت الفرحة تعُج بالبيت كامل من صراخ وزغاريط ديم ورقص عبير مع دانه والكل مبسوطين جدًا
" عند الرجال "
ابو صابر : مبروك ي ماهر يوليدي مبروك عقبال سابر
ماهر ابتسم وقال : الله يبارك بعمرك وامييين
سابر ضربه بخفه وقال : وش اميين انت بعد م ابي يخوي !
ماهر ضحك وقال : مصييرك تعرس
سابر لف بنظره للمجلس المليان وكانوا ناسهم موجودين من عمان وعيال عم وخلاّن وعيال خوال وناس م مّيزهم سابر وكان يشوف فيهم من بعض ابتسم وقال بنفسه ( ماشاءالله يكبر عايلتهم ماشاءالله والحين صرنا منهم ) صد ومسك فنجاله وكمل يشربه بهدوء تحت انصياغه للتباريك والسوالف ..
" في بيت ابو فهد الساعة ٤ ونص الفجر "
دخلوا اسر وضحى من ورا البيت بكل تختل وصَمت
اسر بهمس : الورد لا يشوفه ابوي زبّنيه بأي محل
ضحى بنفس طبقة الهمس : ازهله ابوي م يدخل غرفتنا
اسر توسعت عيونه وقال : ونوني !! لا تشوفه بتزعل علي
ضحى مشت وهي تضحك وقالت : عاد ذا بينك وبينها
اسر مشى يركض ودخلوا وكل واحد طار لغرفته وسكروا البيبان وراهم
اسر زفر براحة ورفع العقد الخاص بالميلا وابتسم وقال : يارب اقابلها اليوم عند الاسطبل واعطيها امانتها
وابتسم وسكت شوي وقال : لا لا بعطيها اذا خطبتها
مشى وانسدح معلن تعبه واستسلامه للنوم ..
" في بيت ابو تركي "
كان الصوت مشوش اثر الصحوة والنومة كانت تسمع صوت امها فوق راسها وهي تقول : اييه ان شاءالله م يحصل الا كل طيب وهزاع يستاهل كل علمن طيب
الميلا فتحت عيونها بصعوبة وقالت بهمس وصوت متقطع : يمه و..وش تقولين ؟
ام تركي ابتسمت وقالت : ابشري ابشري ي نوير
ام هزاع فالجهة الثانية من السماعة : اجل نجي الليلة ونخطب الميلا لولد خالتها هزيع
ام تركي بكل فرحة بحكم منصب هزاع فالعسكرية وكان مقدم ابتسمت وقالت : ان شاءالله اجل نتقابل فالليل
الميلا سدت اذنها وغمضت عيونها وكانت تكرر هالكلمة داخلها ( حلم حلم حلم...) وم تدري الميلا انها فالواقع وهذا كله بيصير فالليل وانصعقت اول م ضربتها امها بالمخدة الصغيرة وقالت بصراخ : ميييلو قووومي !
الميلا فزت برعب وقالت : بسم الله ييمه وش العلم !!
ام تركي بفرحة : خالتتس جايه اليوم
الميلا صدت بقرف وقالت : من يهتم ؟
ام تركي بحدة : بننت اعدلي لسانتس وترا اذا م انتي عارفة طلعت علوم كبيرة وكثير عنتس ويقولون ليه زوجوا الصغيرة والكبيرة للحين عندهم واحمدي ربتس انه ساق لتس هزاع يخطبتس الليلة
الميلا مسحت وجهها بيدينها وقالت : يمه وش قاعدة تسوين ووش قاعدة تقولين ؟
ام تركي سحبتها ووقفت الميلا ع رجولها وقالت ام تركي بحدة : تسمعييني انتي ولا لا ؟ خطبتتس الليلة من هزاع والكل عرفوا وجايين
الميلا طارت عيونها وقالت بصدمة : هااااااه !!!!!!
ام تركي تركت بنتها وطلعت وهي تقول : اجهزي خلصيني
الميلا حست الدنيا لفت فيها وحست انها تدوخ جلست بسرعة ع سريرها ومسكت راسها وقالت : ايش ! خطبتي الليلة والكل يدري ؟
انسدحت وقالت بنفسها ( اكيد حلم ارجعي نامي ) غمضت عيونها وفجأة من العدم دق قلبها وقالت بصوت هامس : اسر لا يدري !!
فزت ودخلت للحمام وغسلت وجهها وتوضت وصلت وركضت ولبست وتلثمت وكحلت عيونها وضبطت شكلها وطلعت ركض للإسطبل..
" في بيت ابو فهد "
ام فهد بصوت عالي : يغالية يبنتي جيبي جوالي له ساعة يدق
غالية ابتسمت وتقدمت لأمها وقالت : امسكي يجنتي
ام فهد ردت ع ام تركي وقالت : هلا يصباح ؟
ام تركي بكل فرحة قالت : ارحبي سلام عليكم
ام فهد ابتسمت وقالت : وعليكم السلام يهلا
ام تركي : بما انكم اهلنا وقرايبنا عازمينكم الليلة ع خطوبة الميلا بولد خالتها هزاع
ام فهد مسكت ركبة بنتها بكل قوتها وقالت بصوت مهزوز : صب..صباح وش تقو..تقولين !!!
غالية برعب : ييمه وشفييتس !!!
ام تركي : قمراء وشفيتس ؟
ام فهد ابتسمت بكلافة وملامح الحزن تطغي ع بسمتها وقالت : الله يتمم ع خيير وابشري
ام تركي ابتسمت براحة وقالت : يالله انك تسمع منها واشوفكم الليلة كلكم تعالوا
ام فهد بغصة واضحة : ابش..ابشري
سكرت وطاح جوالها وقطرت دمعتها تحت صدمة غالية اللي شهقت وقالت : اافااا ي اميي ليييه الدمووع !!
ام فهد مسكت بنتها وقالت : غلو يبنتي الليلة خطوبة الميلا لا يدري اسر ولحد يصحيه اول مره يطول بنومته خلوه !
غالية ابتسمت وقالت : ابشري بس وشدخل اسر فيها
ام فهد : بعدين اقولتس اجهزوا يالله ودقي ع عقيب يجي
غالية هزت راسها بنعم وقالت : الله يستر
ومشت لغرفتها وصحت سحاب بنتها وطلعتها معها تفطر ومنها تتصل في عقاب ..
" فالعزبة "
فتحت الجود عيونها بهدوء وكان خشمها يلامس خشمه توسعت عيونها اول م شافته صاحي ويتأملها وفزت برعب وقالت : ييممه شفيييك قريييب كذا !!؟
عقاب غمض عيونه وهو يبتسم وقال :
مع الفجر شوفتتس قبل حتى صباح الخير
‏و قبل يغادر طير الاغصان من عشّه
‏اهيمتس كثر ما هبّ نسمه و غرّد طير
‏مع إن المشاعر خلف الاضلاع منخشّه
-
الجود غطت وجهها بيدينها وقالت : صح لسانك ي بطلي
عقاب ضحك بخفه وقال بصوته الثقييل اثر الصحوة من النوم : يزيينتس وبطلي ذا
الجود فزت اول م استوعبت وقالت : لحظظظة !!!
عقاب فتح عيونه وقال : وش علمتس ؟
الجود قربت منه وحطت يدينها ع صدره وقالت : تهييمنني !
عقاب فز واعتلاها وقال : اهيم ؟
الجود مثّلت انها تختنق وقالت : قممم مقدرر اتنفس
عقاب ابتسم ع جنب وقال : وخري بسوي لتس تنفس اصطناعي
الجود طارت عيونها وقالت : خلاااص تنفسسست
عقاب انفجر يضحك بصوت عالي وطاح جنبها وقامت بكل توتر وقالت : جوالك يدق !
عقاب بدأت تتلاشى ضحكاته لبسمة خفيفة وبعدها تحولت ملامحه لجدية ورد وقال : ارحبي يالشيخة
غالية فالجهة الثانية ابتسمت وقالت : عقيب ترا تكنسل غداك عمي راشد عنده خطبة الليلة
عقاب : ماشاءالله تركي ؟
غالية : لا الميلا بولد خالتها هزاع
عقاب كح بكل قوته وقالت بحدة وحزن : هااه ! مييلا
الجود فزت برعب وقالت : يمه وشفييها اختي !!
غالية : يخي شفيكم انت وامي ؟ ايه ميلا
عقاب : سكري سكري
سكرت غالية ولف عقاب ع الجود اللي تهزه وتبي تعرف مسكها وقالت : اهجدي !
الجود برعب وعيونها تغورقت بدموعها وقالت : وش فيها ميلو
عقاب قام وبدأ يرتب فراشه ويرفعه وقال : يبنت الحلال بتعرس ميلو ع قولتتس
الجود شهقت وقالت : ااايششش اسسسر خططبب !!
عقاب لف لها بصدمة وقال : تعرفيين عنهم !؟
الجود قامت وقالت بصرخة : ااايشش انتت اللي تعررف عنهم !!؟
عقاب والجود بالوقت نفسه ضربوا رؤوسهم بخفه ولفوا لبعضهم وابتسموا وقال عقاب : ايه اعرف اخوي وم تخفى علي عنه خافية
الجود ابتسمت وقالت : واختي والمثل
عقاب : اجل امشي نلحق ونعدل اللي بيتعدل
الجود نزلت وركبت الغمارة وشوي وركب عقاب ومشوا للديرة ..
" في غرفة اسر "
قام بصعوبة بالغة وفتح جواله جنبه وقال بصوته الثقييل : يوووه باقي شوي ع اذان الفجر وعزيمة عقاب !!
قام يركض وطلع من غرفته ودخل الحمام اللي جنب المطبخ وخلص واخذ دش سريع وطلع ولبس ثوبه الاسود وضبط شماغه اللي كساه اللون الاحمر كامل وطلع يركض ومر وشاف خواته يتجهزون ابتسم وقال : بسبقكم انا
ركض وفزت ضحى وقال بصوتها العالي : اسسسر انتتظظر
اسر م سمعها وكمل وركب سيارته ومشى متجهة للعزبة وبعد مدة قصيرة وصل للإسطبل وكانت الابواب منفتحه توسعت عيونه بصدمة وقال : اخووو العيييااال وش العللم !!
دخل بسيارته اسوار الاسطبل وطاحت عينها عليها وهي تبكي فز بكل قوته ونزل وركض لها وقال : مييلاا !!
الميلا مسكت كتوفه بكل قوتها وقالت : اسسررر !
اسر بكل حب وشوق قال : يعييونه ودنيته وطوايفه كلها
الميلا : اسمعنني ويين الخوصاء !!
اسر لف بعيونه ورفع صوته وقال : يالخوووصاااااء
م وصله صوتها ولف للميلا وقال : وش مبكيتس ؟
الميلا بعدت منه وقالت : بقولك وش مبكيني بس اوعدني وعد انك م تسوي شيء ولا تتدخل ولا تلمس ولا تحرك ساكن !
اسر نزلت يدينه وهو يتأمل عيونها ولامس خصرها وفزت قلوبهم لبعض وسحب يدينه بسرعة وقال : اسسف
الميلا رجعت للجدار وقال بحزن : اوعدني يالآسر
اسر لف لها وقال : وعد م اتدخل اذا م تبين واذا الشيء عاجبتس وحابته اوعدتس م اجي ولا احرك ساكن
الميلا طاحت دموعها بحرقة وصارت تشاهق وقالت : اسفه اني انا اللي خذلتك والله اسفه
اسر تقدم وقال : ميالتي وشفيتس !
الميلا مشت متجهة خارج الاسطبل وقالت : الليلة خطبتي من هزاع
ووراها حّس اسر برمح ثقيل اخترق قلبه وكسر ضلوعه عجز يتكلم ويرمش حتى كان يشوفها تبتعد لين اختفت الميلا من انظاره وشّد اسر ع عقدها اللي بيده ركب سيارته تحت صدمته الكبيرة ..
::::::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد ، اشهد بالله اني اشتتققتت لكم لكن والله انشغلت بالجامعة وم زلت وغير كذا صرت انزل انستا عشان الحقوق واول م تكتمل اجيكم احبببكم استمتعوا فييه وابي اشوف ترحيييب يرد الروح عاد لي ٩ ايام قاطعة 🫶🏻🫶🏻🫶🏻🫶🏻! )