ليّت اللِذي خَلق العُيون السُود ... خَلق القُلوب الخَافقات حَديد

البارت الرابع والعشرين

مشت وهي مستعجلة تبي تلحق البندري ، صدمت بسهم وطاحت الصينية اللي بيدها ع الارض ، دخل مستعجل اول م جاه اتصال من العقيد سعد واكيد انه يطلبه ، شاف الرجال داخلين للمجلس ومشى للمقلط ياخذ راحته فالمكالمة ، م شاف البندري وهي طالعة ولا انتبه لها حتى طارت عيونه اول م شافها ضمّ راسها لصدره يحسّ برجفتها قلبه معها وعقله ومسامعه مع حضرة العقيد ، كانت مثل عوايدها متلثمة وتطالع فيه بصدمة شلون وصلها ودخل للمقلط وهم للحين م حضروا العشاء فالصحون بس جهزوا الملاعق والسلطة والمقبلات والعصير وغيرها ، هي بنفسها قالت بنادي ثامر اذا حضرنا العشاء هو ليه جاء ومن بدّ الناس كلهم ، ابعدت يده بخفه ونزلت بجسدها لرجوله تشيل الصينية نزل معها واصطدم راسه براسها ضحك بخفه وقال بصوته الثقييل وهو قريب منها : ابشر وامرك !
سكر المكالمة وقال : يحييّ الله وضحى
ضحى رفعت حاجبها وقالت : وضحى ؟!
سهم ابتسم وقال : ايه ؟
ضحى ضحكت بسخرية وقالت : عزتي لتس ! صرتي ي ضحى وضحى !
سهم شال الصينية وقال : اطول الموضوع معك ولا اخسّي انسى اسمك !!
ضحى سحبت الصينية من يده ومشت ، سحبها لحضنه من جديد وقال : تدرين ان عيونك تجذّب وتخلي الواحد يخرج عن طوره يقوم يسوي اشياء يندم عليها بعدين تدرين ولا م تدرين !
استنشقت عطره ، انتفضت برعب ريحته اخترقت حاسّة الشم عندها ، ريحة م عمرها بحياتها شمّتها نطقت برعب وقالت : وش قااعد تسوي ابعد مني !!
سهم كان شّاد عليها وتركها اول م دفعته بقوة ، قالت بصوتها المهزوز يكّرهها له الحين : الله ياخذك يحقيير !! يحثالة شلون تلمسننيي !
سهم توسعت عيونه ورفع حواجبة بعصبية وقال : اووب اووب ي ضحى ؟ اهدا م سوينا شيء !
ضحى وهي ترجف اخذت الصينية وبكل قوتها ضربته ع رقبته وخّلف راسه ، شهقت اول م طاح وركضت داخل البيت ، شافها ثامر وهو تاكي ع العتبة اللي عند باب المجلس فز من مكانه وقال : وضيحي !!
م ردت عليه ومشى ودخل للمقلط كان فاضي ، سهم فز اول م سمع صوت ثامر م وده يفهمونها غلط وهم م سووا شيء ، بنظره مجرد حضن من طرف واحد حتى هي م بادلته اهم شيء ان ريحتها وريحته ارتبطوا ببعضهم وبقى هو وهي ، طمّر من الشباك وطاح برا البيت زفر براحة ونفض يدينه وملابسه ودخل من البوابة ، ثامر حكّ راسه وقال بهمس : هي اول مره تركض كذا فيه شيء شافت شيء ؟
لف لسهم اللي داخل من البوابة وابتسم وقال : ابو سلطان !
سهم بلل شفايفه وقال بربكة : ارحب ؟
ثامر : وينك ؟
سهم : وصلني اتصال طلعت ارد وجيت ليه ؟ تامر شيء يالنونو ؟
ثامر بحدة وعيونه بعيون سهم : افا عليك نونو والشنب خّط وجهي !؟
سهم ضحك ومشى للمجلس ، ثامر دخل وراه وشافه يجلس جنب فلاح ..
" فالرياض تحديدًا قصور مساعد "
اسر وهو يضرب بباب جناح عقاب ، طلع له وهو يحاول يفتح عيونه وقال بصوت الضخم : عّلة !
اسر بحدة : تعّلك عّللت بي مشييينا المعسّكر !!
عقاب تفتحت عيونه علطول وقال : كم الساعة !؟
اسر : تسع ونص اخللصص !!
عقاب ترك الباب مفتوح ، هو صحى وم شافها جنبه وتوقع انها نزلت قبله ، طلعت من الحمام وصرخت من شافت اسر عند الباب يطالعها ، صّد وقال : الله ياخذك يعقااب !!
عقاب انفجر عصبية وقال : يكللبب اططلع بررا !!!
اسر قفل الباب ومشى وهو يهاوش عقاب بالكّلام ، طلعت بالروب وشعرها مبلُول عضّت شفايفها السُفلية وقالت : بتمشي ؟
عقاب وهو يلبس بدلته مستعجل هز راسه بالأيجاب ، مشى ولبس شوزه الطويل وربطّ الحبال ، قام يركض واخذ سلاحه واغراضه هي شافته يلبس الدرع من جديد م تحبه ع انه يحميه بس يعطيها سبب اكيد انه بيدخل بين الرصاص ، مشى وباس راسها بقوة وقال : انتبهي لتس زين طيب ؟
الجود ابتسمت بهدوء ولحّيها يرجف من البرد : طيب
عقاب مشى للباب وقال : بتروحون للديرة جوالتس معتس اذا بغيتي شيء دقي
طلع يركض واستوقفه صوتها وهي تقول : عقاب !
لف مع الدرج ورجع يركض لها ، قبّلها بكل حب وبادلته علطول ابتسمت وحطّت يدينها ع صدره ونطقت : انتبه لنفسك يحبيبي والله يسدد رميك ويثبت خطاك ويرجعك سالم انت واللي معك الله يحفظك ي بطلي !
عقاب ابتسم وعضّ طرف خشمها وقال : برّدتي ادخلي
نزل يركض ورفع بريهيته لها ورفرف بها ، ضحكت وارسلت تحية قوية له من فوق الدرج وسمعته يقول :
استريحي يالجود مامن جديد
العهد باقي وانا مازلت انا
عيونتس اللي تراقب من بعيد
ياعساها ماتشوف الا الهنا
-
طلع وقفل باب الصالة للقصر الرئيسي وراه ، ضحكت بحب وهي تحسّ انها عرفت عقاب من توو وهو بالمثل ، ركب وانطلق اسر وهو اللي يسوق ابتسم لأخوه وقال : جاهز يالعضيد ؟
اسر رفع حاجبة بثقة ونطق : خلهم يجهزون جاييهم النقّيب بيثبت حضور وبيترقى بغضون سنتين لعقيد !!
عقاب فز وباس راس اسر وقال : حاااااي يالعضييد !
اسر شّد ع كتف عقاب وقال : حيي نباااك نفدااك
ابتسم اسر وهو تذكر كيف ودع الميلا ..،
" قبل ساعات من اللي صار ، بجناح اسر "
دخلت وشافته يجهز شناطه وقفت بكوب قهوتها وقالت : م كانه بدري ؟
اسر : ابي اخلص
الميلا : ايه بس عقاب نايم من العصر وللحين ماله حسّ !
اسر ابتسم وقال : خلصت انا وش علي فعقاب ؟ وش عليتس بعقاب !
الميلا جلست ع طرف السرير تراقبه بنهاية الغرفة : اقصد عشانك وعشان م تستعجل
مشى لها وباس خدها بهدوء وشاف غمازاتها بانَت دليل ابتسامتها وشامتها اللي فوق مبسمها ، ضحك ورجع يبوس خدها وقال :
مبسمٍ مابين غمازتين ودقّ خاااال
‏اذبحتني لعنبوها على ابو جدهااا !!!
-
ضحكت بخجل وقالت : صح لسانك بس ابعد خلاص !
كان واقف بشورته بدون تيشيرت ، ابتسم وقال : بدخل اتروش
الميلا رفعت عيونها له وقالت : طيب ؟ نعيمًا
اسر مرر اصبعه ع كتفها ونزل كُم فستانها المخملي وضحّ له كتفها كامل ، ابتسم وقال : قبل اروح لازم يكون فيه سبب ارجع !
الميلا قطّبت وهي احتّرت بدون سبب ، لمساته وكلامه لعبّ بموازينها كمل وهو يقول : مثل العضيد ان م فهمتي ؟
الميلا طارت عيونها بصدمة وقالت : تستهبل ! ابعد
اسر حاصرها من كل جهة وقال وهو يكرر كلامها : اسر تكفى بس لاحقيين والله ؟ الحين معاد فيها لحق ي اطلب القرب والوصل يبنت عمي ي اروح وادافع عن الوطن واموت في سبيله !
الميلا حضنته بهدوء وقالت : لا ان شاءالله ترجع بخير
حسّت بأصابعه تلامس فخذها ، انصعقت شلون رفع فستانها للحّد ذا ، التهّم شفايفها وخضعت علطول هي تحَبه وهو يحّبها تعرفه مستحيل يخون وهو يعرفها بالمثل ، طلب الوصل من مرة ووافقت عليه ، صارت " حَرم آسر " قُول وفعل ابن عايض ! ابعد وباس راسها بقوة وقال : يعساني م انحرم منتس !
غمضت عيونها بخجل ونامت علطول ، ضحك بخفه ودخل اخذ دش سريع وطلع جفف شعره ووقف يضبط لبسه وشاراته " ثَلاث نجُوم " ع كتوفه ، ضحك اول م تذكر شارات عقاب فبداية مشواره من " نجّمة " لـ " سِيفين ونجّمة وتَاج " تحفز وبقوة وحالف يوصل للفريق مثله مثل اخوه ويذكر اسمه فالميادين ، صحت واخذت دش رفض يطلع من الغرفة قبل تجيه ، انتهت من الشور وجددت روحها وطلعت بالروب مشت له وتقدمت وحاوطته من وراه وقالت : بتروح ؟
لف لها بهدوء وابتسم وقال : م بطول !
عبّست بملامحها وقالت : اعرف م تقوى بعادي
اسر ابتسم وباس جبينها وقال : اي والله م اقوى العيد يكُل اعيادي وانا معتس !
الميلا رفعت رجولها وباست راسه وقالت : الله يحفظك يحبيبي انت وهاك امسك
حطتها بيده ضحك بصوت عالي وقال : وش النووونوو هذااا !
الميلا انفجرت تضحك وقالت : خيير ؟ انا مين يعني ! تركي قالي انه عطى عقاب صورة جودي وهي صغيرة والحين دوري
اسر باس كتفها وهو يحضنها وقال : الله يجعلني قبلها يعرب !
الميلا ضربته بخفه وقالت : الله يطول عمرك ليش تقول كذا !
ضحك وقال : م ودي افقد زولتس يبنت عمي !
الميلا ضحكت بسخرية وقالت : و بتفقد زولي وانا بنت عمك !
اسر باس راسها بقوة وتركها وطلع برا الغرفة يصحي عقاب ..
" فالديرة "
هلال بكتمة : الله يخسكم ليه جبتوني معكم !
الجود ضحكت وقالت : وشفيك هلالي مسوي فيها فتى المدن ؟
هلال ضربها بخفه وقال : انكتمي !
نزلوا وضحك ناصر وقال : يعريس لحقنا العشاء ؟
تركي قام وهو متلطم وعوّد الاسنان بين شفايفه ، نطق وقال : ابشرك لحقتوا باقي م حضروا
الميلا ابتسمت وقالت : مبروك يحبيبي انت وتستاهل تاليني وشسمه بنات كويس لحقنا امشوا جودي وغزل نساعد ونعاون وضوح
غزيل : ايه يالله
رفعوا عبّيهم وكانوا بالقمصان ، اقتمصّوا الدور علطول واللي يشوفوهم يقول استحالة انهم طالعين من قصور وعزّ ودلال ، ناصر دخل تركي تحت ذراعه وقال : وحشتني !
تركي ضربه وقال : وش تدق علي وتسأل عن اهل قاضي له ؟
ناصر انفجر يضحك وقال : جبنا سيرتهم وسألت م يهم دخلنا ؟
تركي هز راسه بنعم وكمل يمشي مع ناصر ، دخلوا وارتفع صوت ناصر وهو يقول : ارحببووا يرجال !
فهد وابو فهد فزوا يحبون طاري اهلهم ، عيالهم ، احفادهم وحتى بناتهم ، ثامر ضحك وقال : ارررحب انت !
ناصر مشى وسلم ع ابوه وعلى عمانه واخوه وحضن ثامر وقال : انت يالسربوت واحشني اكثر منهم كلهم
ثامر ابتسم وقال : سربوت ؟ معليه تمون ويجي منك اكثر
ناصر ضربه وقال وهو يضحك : شف شف اللي يتحسسون
تركي ضحك وقال : نويصر تعال جنبي
فلاح صغّر نظره ونطق وهو يقول : ايه مسرع بعتني ؟
تركي انفجر يضحك وحضنه وقال : اخسّي الا نعم !
ناصر ركض وجلس بينهم بكل قوته ، فلاح بحدة : عّلة كسرت جنبي !
ناصر وهو يأشر ع نفسه وعلى تركي : عادي عندكم دكاترة !
فلاح وهو يستهزئ فيهم : ااه امحق دكاترة
عبدالعزيز دخل من عند الحمامات وقال : اررحب نويصر !!
ناصر ابتسم وقام يسلم عليه وقال : البقى شخبارك ؟
فلاح وهو يضحك : لطمته وراح يشكي عند عمتي
عبدالعزيز خزّه وقال وهو يطلع لسانه : اصلاً تدعيك امي رح شوفها يويلك
فلاح قام ومشى ودخل وقال : ي ام عبدالعزيز !
لوهلة ظنّت انه عبدالعزيز ، مشت تركض وقالت : عززيييز شاحنك في سياارت..
انقطع صوتها ونفسها وهي تشوف فلاح تاكي عند الباب وجالس ع جواله ، رفع عيونه وشافها هو بدأ يتخطاها وبدأ ينساها ليه الحين قررت تطلع قدامه وكأنها تقوله " والله م تنساني ! " ابتسم بهدوء وقال : تبين شاحن ؟
هو حلّل الموقف وشاف جوالها بين يدينها ، وسألته عن شاحن اكيد تبي ، من الرعب صارت تتجاوب معه وقالت : ايه
فلاح يعرف ان اهل عمه عايض م عندهم جوالات ، والاكيد ان عبدالعزيز ولد المدينة عنده بسيارته عشان كذا سألت وم بتقدر تسأل ناصر وهو م يحّل لها ولا تركي برضو ، مدت جوالها وقال : بشحنه فالمقلط ادخلي انتي وشوفيه
امال بهمس : فلاح عطني الشاحن طيب ! انا اشحنه داخل
فلاح هّام وضاع بعد م سمع اسمه من منطوقها ، ابتسم وقال : يعين فلاح م فيه افياش البيت من طين وعمي توو سوا المجالس قبل فترة وحط فيها كهرب
امال تدري وزين ان البيت قديم بس من التوتر طرحت الفكرة ، ضحكت بخفه وهي ترفع شيلتها ع راسها هي م تتغطى فالمدينة عشان كذا م فرق معها ، وشافها فلاح للمرة الثانية ووش يطلعها من راسه الحين نطقت وقالت : طيب يولد الخال تصرف وانتبه لجوالي !
مدت جوالها وسحبه فلاح وهو يطلع ، كانت تناظر في قفاه وظهره وطوله وعرضه ، مخّيف ومهُيب بالنسبة لها مشت تركض وقالت : يمه استريحي راح
ام عبدالعزيز جلست وقالت : وي شعنده ؟
امال ضحكت بخجل وهي تتذكر اللي صار وقالت : فلاح يمه ماهو عزيز ترا
ام عبدالعزيز فزت وقالت : في ذمتتس ؟
امال مشت وطلعت ام عبدالعزيز هي م شافت احد غريب ودخلت للمجلس ، فزوا العيال يسلمون عليها ، كان عشاء عائلي بمناسبة ملكة تركي ع تالين ، محد انتبه لسهم اللي يطالع فيها تبتسم وتسلم عليهم والعيال فازعين لها ويتحالفون ع راسها ومن يبوسه اول ، ابتسم بخفه وقال بهمس :
فارقه عن جميع الناس والفرق كَايد
‏مثل فرق النجوم الباقيه والثَريـا !
-
كان يقصد ان ضحى فارقه عن اهلها كلهم ، م شابهت احد بملامح صح فيها من اسر لكن ماهو ذاك الزود ، هو كره انه م شاف وجهها كامل بس م ندم ع اللحظة لأنه حضنها وللحين ريحتها بشماغه وثوبه ، ابتسم وكمل وهو يقول بهمس : كأن اللثام لوجهها مخّيط !
ضحك وقال : يولد !
فزوا وغطوا عمتهم وهو مصدومين ، ضحك وقال وهو يمسح ع لحيته : عيب عليكم يرجال كبر امي وتغطونها ؟
ام عبدالعزيز ضحكت بسخرية وقالت : وشقصدك يولدي ؟ تراني صغيرة
ناصر بحدة : اصه يرحم والديتس !!
انفجر سهم يضحك وقال : عيب عيب !
مشى وطلع وركضوا يدخلون عمتهم ، لمح ناصر سهم ماشي صرخ وقال : يبو سلطان ! طلاق م تمشي قبل العشاء !!
سهم مسح وجهه وشنبه واستغفر وقال : يبن عايض ! ليه الطلاق
ناصر بحدة : ادخل ! طلاق بالثلاث م تمشي
سهم سحب ناصر مع راسه وباسوا خشوم بعض " سلام الرجال " وقال : تبشر ع خشمي !
ناصر ابتسم وقال : علييه الشحم نفداك
طلع سهم وسحب بوكيت دخانه ، ولّع السيجارة واحرق جوفه وهو يسحب الدخان لها ، زفره وهو يبتسم وقال : ادمنت ! ابي اشوفها واحضنها م ابيها تقوم من حضني !! وش سوت فيني بنتهم
ثامر بحدة وعيونه تطلع شرار من وراه : منهي !!!!
فز سهم واقف وقال : ولعنة !!
ثامر بنفس النبرة : منهي ؟ انطق يحمار !
سهم خنق ثامر وصدم بظهره الجدار وقال بحدة : يولد فهد لا تغلط !! والله لا اندمك سامع انت سمعت شيء مفروض م تسمعه انسى !
ثامر دفع سهم منه وقال : من اللي تقصدها !!
سهم بربكة : بنت اخوي !
ثامر قطب بحواجبة وتذكر الكلام وارتبط بمخه انها طفلة ، كمل وهو يقول : المعذرة يبو سلطان
مشى وهو يسمع سهم وراه يقول : معذور يولد فهد !
رمى سيجارته وهو يرجف ، حمد ربه ان ثامر اللي سمعه لو هو ناصر ولا فهد وش يفهمهم ، دخل وجلس بنفس مكانه يتعرف ع اهلها حُبًا فيها ويسمع حكاويهم ..
" عند البنات "
تالين بخجل واضح : اف خلاص تجمعوا خواته ع راسي !
الميلا انفجرت تضحك وقالت : استحت يوييلل حالك ي تروك طحت لك ع قمر !!
دالين وهي تتأملهم بعيدين منها ، صدت منهم وهي تغطي كامل وجهها بيدينها ، الجود بضحك : تجننيييننن مقدر !!!
تالين بصراخ : وووه خلااااص !!!
انفجروا البنات يضحكون عليها ، امال وهي تترقص : يكبر حظك ي تركي ويااا سعّد حظتس ي تالين !
فزوا خوات تركي متماسكين ويرددون : ياااا كببررر حظظظك ي تركي ويااا سعّد حظظظتس ي تالين !
البندري : بس يغبيات !!
الين وبيسان يترقصون ورا اختهم امال ، والجود والميلا يتحاضنون فرح م هم مصدقين ان تركي اخذ تالين ، غزيل لفت بنظرها وشافت ضحى سرحانه وتشتغل بهدوء ، ولفت للجهة الثانية وكانت دالين بالمثل تنفست بهدوء وقالت : ضحى دالين خير ؟ شفيكم
ضحى لفت وشهقت اول م انقطعت اصبعها وقالت : حسيبتس ربي ي غزل !!!
غزيل فزت برعب لها وضحكت وقالت : محد قالتس !
ضحى بحدة : احلفي بس ! ليه تناديني
دالين رفعت حاجبها وقالت : وش بغيتي ؟
غزيل سحبتها وقالت : اجلسوا معنا
دالين ابتسمت وقالت : اجييك يسلم راسك وشلوون م اجييك !!
غزيل باست خدها وقالت : يمعشوقتي انتي !!
تالين وهي تضحك انه اخيرًا دالين قررت تتخطى السالفة ، ابتسمت ومسكت يدها وقالت : وااه ي داليني الله يطول بعمر الاياام اللي اشوف فيها ضحكتتس !
دالين باست راس اختها وقالت : والله يطول بعمر الايام اللي اشوفتس مبسوطة فيها والله يتمم ع خيير يقمري
الجود زغرطت بكل فرحة وقالت : واااي يالفرحة !!
الميلا بضحك : والله لو يسمعتس عقاب الله الوحيد اللي يعلم وش بيسوي فيتس !
الجود خافت لوهلة وقالت وهي معصبة : يحيواانه انا ليه قمطت !!
انفجروا البنات يضحكون كلهم ، ضحى وهي تحاول توقف الدم الخفيف من اصبعها ، قامت وطلعت متجهة للمجلس تبي ناصر دكتورهم ، فزت برعب اول م شافته يغسل لمحها من المراية ولف وقال :
ياقبلة الله عليك وعلى عيونك الكبار
‏اللي هدبها جعلني من مساجينها
‏لو تسحبين بس الغطا وتنزلين الخمار
هو بذاته سهم رمشك طرحني في ميادينها
-
ضحى صدت وهي تضبط لثامها ع وجهها بيدينها وقالت : ياليت م تحلم كثير !
سهم ابتسم وقال : وش قلنا الحين ؟
ضحى بحدة : مدري ليه فكرت فيك اصلاً بس كويس جات منك وعافك الخاطر !!
سهم : الخاطر م يعوف عشيقه ! م دام فكرتي فيني هذي اول انطلاقاتي ي وضيح !
ضحى طارت عيونها وقالت : لا تناديني كذا م يحق لك !
سهم : عيونك تقوله وقلبك يقول يحق لك وم يحق لغيرك
مشت وهي كل م طالت الحديث معه بتكشف اوراقها له ، لف وشاف اصابتها مشى لها وسحب يدها وحطها بين كفوفه وقال : تعورتي ؟ من مين ؟!
ضحى بآلم وهي تشوفه يلعب بموازينها بقربه ، بصوته ، اهتمامه المفُرط فيها ، دلاله لها كذا كثير ع قلب انثى م جربت الحنّية من اقرب اخوانها ولا من ابوها حتى ، ابتسمت بخجل وقالت : ابي ناصر
سهم وعيونه بعيونها : اصير لك نويصر واصير لك طاقم طبي كامل !
سحبت يدها ومشت راجعة للبيت ، هي تأكدت انها تحبه وزود بعد وهو أكد لها انه يعشقها ، ابتسم من بعيد وقال بصوته الرخّيم : اذا حبك عسكري يشوفك وطن ! ومن فينا قد سمع بعسكري خان وطنه ؟
دخلت وهي ميته فرحة م تدري وش فرط المشاعر اللي تحس فيها ، احتواها وهي محتاجة احد يحتويها من فترة طويلة جدًا نست ضحى فيها الدلال من وقت م كانت ذات الثمان سنوات وقفت تدلل وبدأت حياتها تتوضح لها بشكل متعب وبشكل يرهقها ، م تشوف نفسها كأنثى ابدًا م عمرها وقفت قدام المراية وهي تتدلع وتحط ميكب كانت ابسط احلامها عيشة القصور وعاشتها بيومين ورجعوا يذكرونها بواقعها ، مشى بخطواته للمجلس وقال بصوت عالي : يبو فهد
ابو فهد لف له وقال : سم ؟
سهم جلس وقال : سم الله عدوينك والله يعمي مالكم فالطويلة انا طامع في نسبكم وطالب قربكم
ابو فهد طارت عيونه بصدمة وقال : وش تقول !؟
سهم : ادري ممكن تشوفوني مستعجل لكن ابي اخذ العلم الوكاد وارجع لأبوي واجيبه المره الجاية
ابو فهد بحدة : بس م عندنا بنات للزواج !!
ابو فلاح طارت عيونه وقال : اووب ي عايض استهد بالله وانا اخوك ولا توقف بنصيب بناتك عندك قمّرين جاهزين وزود ! والكل طامعن فيهم اولهم فلاح !
فز فلاح من مكانه وقال : ايش ؟
هلال بهمس : شبّوا ببعضهم ! انا وش جابني
ابو فهد : ايه فلاح قريب ويستاهل ضحى
سهم حسّ بنيران تولع داخل جوفه ، وكأنه يسحب دخان ويزفر حريق ، شّد ع قبضته وقال : بس يعم..
قاطعه ابو فهد وهو يقول بسخرية : وانت يفليح من اول رفض هجيت لك سنتين ! ارجع وتمم يولدي
فلاح دارت الدنيا فيه ، هو يشوف نظرات سهم وكأنه يخترق ضلوعه بسهام حقد وحزن ، لف ع عبدالعزيز وابو عبدالعزيز وم فيه الا حل واحد يسعفه ويسعف سهم ، فز واقف ع رجوله وقال : يبه تبيني اتزوج ؟
ابو فلاح بعدم اهمية : بكيفك اللي تشوفه انت
فلاح تنحنح وقال : انا طالب بنتك آمال يعمي ع سنة الله ورسوله
فز ابو عبدالعزيز وعبدالعزيز وعبدالهادي مع بعض ووقفوا وقال ابو عبدالعزيز : الشور شور بنتي وابشر بالخير ي فلاح
فلاح ابتسم وقال : ابد خذ راحتك واسف انها جات ع كذا
عبدالعزيز بصدمة وهو يضحك : شدعوة تعتذر !!
صد عبدالعزيز بيده عن الرجال وهمس لفلاح : جعله م يسلم من اسلمك يحيوان !
فلاح ضحك وطلع لسانه وهو يقول بهمس : توو قبل شوي تحرض عمتي علي م تدري وش صار ورجعت لك بدون قلب
عبدالعزيز بجدية وهو يشّد ع كتف فلاح : دامك طلبتها ع سنة الله ورسوله معناته م ترضى لها الرذيلة يفليييح !
فلاح : اخسّي والله م ارضاها ولو ايش م صار !!
عبدالعزيز : والله اللي ونعم الرجال
سهم قام وقال : اجيك يعمي المره الجاية وعساك م تنشبني مع رجال ثاني اوزن امورك وانا تحت امرك جايك وشاريها
ابو فهد قام بعكازه ونطق : خير خير
سكت لثواني ورجع يكمل : العشاء يرجال اقلطوا
ثامر مشى وعينه ع سهم ، تقدم وسحب ناصر وقال : لا تعطونه !
ناصر قطب وقال : يالسربوت وش شايف !؟ انططق
ثامر بحدة : هو وعمتي ضحى صار بينهم شيء والله اعلم والرجال نيته ماهي بطيبة !
ناصر وهو يغّلي : شفتهم !!
ثامر هز راسه بنفي وقال : لا يعمي ! م شفتهم بس الحين استوعبت كل شيء
ناصر : واللي هو ؟
جلس ع العتبة وجلس ناصر جنبه وقال : تكلم وانا عمك !
ثامر : كنا داخلين ولمحت سهم يدخل وهو يكلم للمقلط ودخلتوا وانا جلست عند العتبة انتظره يطلع عشان ادله وفجاة طلعت وضيحي وهي تركض ومرعوبة ووجهها مصفّر سألتها م ردت ولحقت اشوف وش فيها وكان المقلط فاضي وسهم دخل مع البوابة
ناصر مسك راسه وقال : يويله مني لا يطلع لامسها حرام ان يمسي في قبره !!
ثامر : والله م الومك لحقته وسألته ورد علي انه عندي اتصال ومن ذا الحكي يحسبني ورع عنده ! ويوم رجعت للمقلط كانت الدريشة مفتوحة كاملة وفيها اثر رجول مع الطّب تصير
ناصر باس راسه بهدوء وقال : لو يشغلونك تحقيق وجنائيا بتفوز !!
ضحك ثامر وقال ناصر : معليه هو تقدم اكيد م يرضى الشيطان بينهم وبسأل ضحى واحشرها واشوف اعرفها زين م تعرف للكذب ولا تماشيه
مشوا للعشاء وعيّن ناصر ع سهم ، اللي خلص وقام علطول غسل يدينه ولحقه ناصر وقال : بتسري ؟
سهم بحدة لف وقال : وطلاق م تقول شيء !
ناصر ابتسم وقال : تطلق من ؟ ضحى وانت للحين م كتبت عليها
سهم حسّ بالتهديد بكلام ناصر وانه قافطهم او ان ثامر الورع نطق بشيء خلا ناصر يتهجم ، نطق وقال : حزامي وسلاحي
مشى واستوقفه ناصر وهو يقول : وش سويت انت وياها ؟
سهم ابتسم بتحدي وقال : وش بكون سويت مثلاً ؟
ناصر بحدة : لا تلعب بالنار ولعنّاك بالنار !!
سهم بنفس الحدة : تخسّون وانا ولد آل طالب !
ناصر بكل حدة : حرام حرم الدم ان تحرم عليك ضحى هيّا اسر مني هناك
دفعه سهم ومشى وقال : باخذها بحّب خشوم ولا كسر خشوم !
مشى سهم وطلع من البيت وركب سيارته وعلى الدعسة للمعسّكر بحكم انهم طلبوه بعد يوم وهو عجّل يبي ينسى ، نيرانه تاكل داخل جوفه ، سحب سيجارته وولعّها وزاد اللهيب حطب ، زفره بعصبية وحرقة ونطق : ي انا ي هم ي هي لي ي تموت عانس !
دعس طاير للمعسّكر وناوي ينسى كل هم وراه يبقى وراه ..
" فالمعسّكر "
اسر هو يتجول مع حازم ابتسم وقال : ذاك منهو ؟
حازم : مدري والله م اعرف احد يعني ي دوّب ناس معينين
اسر مشى له وقال : م انت لابس مثل لبسنا ؟! انت مع حلَف الطيران ؟
كاسر رفع عينه لآسر وقال : ايه نعم طال عمرك تآمرني ؟
اسر : سلامتك والله ي..
نزل عيونه ع اسم كاسر اللي معلق ع صدره " كاسر بن محمد آل قاضي " ابتسم بهدوء وقال : كاسر ؟ اخو رعد
كاسر هز راسه بنعم وقف وصافح اسر وقال : استاذنكم
مشى كاسر وابتسم اسر وقال : من ال قاضي
حازم بجدية : هنا م يهم الكُنية كثر الرتُبة ! يعني انت ولا شيء عندهم مقارنةً بحضرة الفريق عقاب
اسر : لنا الله ي النقباء
ضحك حازم ومشى اسر ومرّ ع مكتب عقاب ، ابتسم لحازم وقال : كمل الباقي لحالك
حازم : تمسّ ع خير
دخل عند عقاب وقال : قاطعت حديثكم ؟
ضيدان ابتسم وقال : دق تحية لا ادق عظمك
اسر بتحدي : تقوله قدام عقاب ؟
عقاب سكر المكالمة وقال بحدة : دق تحية وتفضل سعادة النقيب اسر امرني ؟
اسر تفشل وانفجر ضيدان يضحك وقال : هنا م فيه علاقات واخوة ومدري وش الرتُب تلعب دور
عقاب بحدة : دق تحية علامك !!
اسر وقف بأعتدال وضرب تحية وقال بهمس : الله ياخذك يعقاب !
عقاب وقف ودق تحية مع ضيدان وقالوا بصوت واحد : استريح
استراح اسر وصد وطلع علطول ، سكر الباب رغم صوت عقاب اللي يناديه لكن م رد وكمل طريقه هو استوجع ع انه يدري الانظمة والقوانين فالعسّكر لكن م كان يحق لعقاب ينهّره بالطريقة ذي ، دخل السكن وحط راسه وهو يدعي تعدّي الشهر ونص ذي بسرعة مو مصدق انه اول رمضان له مع الميلا وم بيكون معها الا ع اخر يومين غمض عيونه وانهلك بالتفكير وغطّ بنومته ..
" بمكتب عقاب "
ابتسم بسخرية وقال : تهقاه زعل ؟
ضيدان : م يهم اصلاً لازم يتعود غيرك بينفجر عليه واسوء منك
عقاب : م همني اصلاً اسر رجال ويعرف مصلحته اعرف انه بيدق خشمي لكن يمون العضيد
ضارب وقداح دخلوا ودقوا تحية وقال ضارب وهو تسمّع الحديث : عاد خليت فيها عضيد يطويل العمر ؟
ضيدان : ايه وش جدولنا للشهر الجاي ؟
قداح ببحة صوته المعتادة : ابد واضح انها م بتكون شهر وبيرجعون اغلبنا بدري والباقي بيتكّون لين يأذن الله اكبر صلاة العيد !
عقاب : معليه يرجال كلها فترة وتنقضّي اكلنا اطول منها من سنة وست شهور لشهر ونص ؟ والله ولا شيء
ضارب ابتسم وقال : والله صادق
قاموا وكل واحد فيهم اتجهة لفراشه وراهم يوم وايام طويلة حافلة وشاقّة ..
" بعد اسبوع ونص بدون اي احداث مهمة "
صحت اول م حسّت بالمنبة المزعج يرن والشمس تداعب بشرتها النقية ، تثاوبت بكسل وقالت : اليوم المنتظر اخيرًا !
لفت بنظرها للتقويم وكان مكتوب بالخط الاحمر العريض " يوم السباق العالمي بالرياض " زفرت بتوتر وقالت تشجع نفسها : شفيتس دانه ! انتي اقوى فارسة وبتهزمين الروسية والستين الف كلب وراها !!
مشت ودخلت للحمام اخذت دش سريع وطلعت بعد م جددت طاقتها ، لفت وشافت الخادمة تدخل بالفطور وقالت : شكرا اتركيه ع الطاولة
مشت وهي تلبس لازم يكون كل فارس متواجد بالميدان من الساعة التاسعة صباحًا لجل التدريبات والتحمّية ، اخذت قضمة من السندوتش وشربت الحليب كامل طلعت من البيت ركض وهي تقول : دعووااتكم !
ابو دانه ضحك وقال : متواجدين والله يوفقتس
ركبت سيارة ديم وعلطول الدعسة للموقع والميدان ..
" مربّط اليمامة للخيول العربية الاصيلة "
ماهر وهو يراقص اللطيم تحت الشمس ضحك وقال : حااااي ياللطيم انثبر !!
نزل منه وقال : هتان ذاك ماهو فلاح ؟
هتان لف وشاف فلاح ضحك وقال : الا بالله هو
عبدالعزيز بربكة : يولد متوتر شلون تبوني ادخل سباق بدال اسر !!
فلاح بحدة : وش تبيني اسوي نكبنا بالمهمة حقته ولازم يتسابق طماع ولد العم !
عبدالعزيز : والقابلة بتجي تملّك ؟
فلاح حكّ راسه وقال : والله م اعلم م جاني موافقة من البنت للحين
عبدالعزيز : هي في فترة فاينل ابوي مستحيل يفاتحها بالموضوع علطول بس بخليه يكلمها الليلة
فلاح بثقة : بعد الفوز !
ماهر مشى وقال بسخرية : واثق يولد سالم ؟
فلاح : اكييد ! عيب عليك
ماهر مدّ ذراعه وسلم ع فلاح وسلم ع عبدالعزيز وقال : هذي الخوصاء اذا م اني غلطان وين اسر ؟
فلاح : سالفة طويلة
ماهر تفهم ومشى يحمّي ، ممنوع للرجال يتخالطون مع البنات داخل الا بوقت السباق النهائي والجولة الاخيرة بعد التصفيات ، دانه وهي تراكض بالمهرة ضحكت وقالت : فيها طاقة عجيبة !!
ديم ابتسمت وقالت : قولي ماشاءالله !
دانه بحب وهي تبوس المهرة : ماشاءالله ع بنتي ومهرتي
ديم وهي تنفض يدينها بتوتر : يمه صدق متوترة الف ببدأ فالعصر بقفز الحواجز
دانه وهي تحضنها وكل وحدة ع فّرسها : انتي قدها وقدود محد ينافس السمراء بقفز الحواجز
ديم : هتان !
دانه ابتسمت وقالت : اوووف خصم قوي ولد سلطان لا تستهينين فيه !
ديم وهي تخزّه من بعيد : يكرهي يكرهي السمراء مصابة وم اعرف اذا بفوز ولا لا
دانه : وي !! اهدا يبنتي اصابتها خفيفة جدًا معليك الفوز من نصيبك بس العبيها صح
مشوا وكل وحدة بطريق دانه للميدان تتسابق وديم بميدان قفز الحواجز تتدرب ..
" فالديرة "
دقت ع تركي ووصلها صوته وهو يقول : هممم ؟
الجود : اليوم موعدنا تمام ؟
تركي : موعد وش ؟!
الجود بعصبية وهي تحاول تمسك نفسها : تركي !! السباق
تركي ابتسم وقال : ايييه متى بيكون ؟
الجود : بنطلع من الديرة الساعة خمس العصر لأنه يبي لنا ساعتين نوصل
تركي اشر بأصبعه ع خشمه معتقد انها تشوفه وقال : ع خشمي
الجود : عليه الشحم يالله بسكر
سكرت وهي تشوف تاريخ اخر مكالمة بينها وبين عقاب كانت قبل اسبوعين ونص وقت طلبته يجي ويطلب اضطراري ، ميلت بشفايفها وعبّست بملامحها اخذت نفس طويل وهي تمد يدها لبطنها اللي تشوفه وتحسّ فيه ، زفرت بتوتر واتصلت عليه ووصلها صوته وهو يقول : هلا ؟
الجود بربكة : عقاب !
عقاب : سمّي ؟
الجود بتوتر وهي تشابك يدينها وبدأت تجرح نفسها : كيف..كيفك ؟
عقاب وهو مستعجل : بخير الحمدلله فيتس شيء ؟
الجود هزت راسها بنفي وكأنه يشوفها وقالت : لا لا
عقاب بحدة : خلاااص بجيييك قفل التبن ذا !!
ضيدان ابتسم بخوف وسكر الباب ، زفر بقرف من حرارة الجو ع انهم وقت ليل وقال : جود !؟
الجود : شفيك تصارخ !
عقاب : م اصارخ عليتس ع الزفت ضيد
الجود ابتسمت بهدوء وقالت : وحشتني
عقاب ابعد الجوال عن اذنه ، شّد بقبضته وقال : عندي مهمة بعد شوي ومداهمة دعواتتس ودعناتس الله
سكر بدون م يسمع ردها ، زفرت بتوتر وهي تبكي وقالت : وجع ليه تقولين له كذا ! اف اف اكرهني والله م اقولها ثاني !!
رمت جوالها وبالجهة الثانية رمى جواله ولبس درعه وخوذته الثقيلة تحمي راسه ، وطلع وهو م ينشاف ولا ينعّرف من البدلة الثقيلة اللي عليه كل شيء منه متغطي بدروع ، م يعرفونه الا بعرّضه وطوله ووقفته والاكيد اسمه اللي معلق ع صدره " الفريق عقاب بن عايض بن مساعد ال مقّبل " اسر ابتسم وهو تاكي يشوف عقاب وكانت نظراته نظرات وداع ، رفع صوته وهو يقول : يبن عايض ! يالعضيد
لفّوا كل الجنود والعساكر بمختلف الرُتب والمراكز ، لف عقاب لصوت اخوه ومشى له وقفوا قدام بعض ، اختلاف كبير فالهيئة والبُنية لكن كلهم كبار وضخمين للحد المعقول ، اسر ابتسم وحضن عقاب بكل قوته وحاوطه عقاب وهو يطيح سلاحه ورا اسر واللاسلكي حقه ، تغورقت عيونه وهو يشّد ع اسر ويسمع صوت اسر المهزوز وهو يقول : الله يثبت خطاك يخوك ويسدد رميك وراك اهلك وولدك فالديار ووراك انا والله م ارجع بدونك انتبه لنفسك ولا اوصي حريص تكفى يعقاب !
اهتز صوته بأخر جملة وابتسم وقال بصوته الثقييل : الله يسمع منك يالعضيد وابشر بالخير واطلق حجاجك وانت عارف اني وراك !!
اسر ابتعد وضرب رجله ودق تحية لعقاب وقال : حااااي يالعضيييد !
عقاب ابتسم وضرب تحية لآسر وقال : ابشششر بعزززك اعنبووو غييييرك !!
صد عقاب ومشى وهو ياخذ سلاحه واسر يساعده ، رعد ضحك بسخرية : وين كاسر خلوني اودعه كذا
كاسر وهو تاكي عند الطيارات بالميدان ارتفع صوته وهو يقول : محد بيجي مثل الرعد والكاسر ارتاح يبو ايهم !
اسر بضحك : افووه يشين الثقة !
ضحك كاسر وركب طيارته يستعد للتحليق ، بالنسبة للفريق عقاب م رد عليهم وهو يشوفه طيّش منهم ، ركب المركبة هو يدري ان رعد ماله دخل بالمهمة والمداهمة ليش ينطق بكلام كذا وكأنه يستهزئ بوداع ! صد وسكر الباب بكل قوته وقال : مشينا !
ضيدان : بسم الله توكلنا ع الله !
ضارب وقداح : ونعم بالله !
مشوا طالعين من المعسّكر للمبنى مشبوه فيه بالمخدرات والتجارة فيها بالممنوعات ..
::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد ، عطوه حقه ولا تنسون النجمة انا فداكم اشوفكم ع خييير ببارت جاي🌟 )