ليّت اللِذي خَلق العُيون السُود ... خَلق القُلوب الخَافقات حَديد

البارت الخامس والعشرين

مشوا طالعين من المعسّكر للمبنى مشبوه فيه بالمخدرات والتجارة فيها بالممنوعات ..
" بـ مربّط اليمامة للخيول العربية الاصيلة "
دخلت الجود ، كاشفة وجهها لابسة ماسك اسود بس ، بعبايتها البيضاء دخلت مدخل الـ VIP " كِبار الشخصّيات " جلست ع المقاعد تشوف المضمار كامل قدامها ، خلعت خاتم زواجها بعقّاب بعدم وفاء ولأول مره نزعته بغضب منها ، جالسة قدامهم من رِجال ونسّاء م يدرون انها متزوجة حضرة الفريق هو معروف وجدًا بين الناس بطبيعة الحال ، زفرت بتوتر وهي تشوف نظرات شخص غلبّه الشيب ع وجهه ، مقارب لعمر ابوها وقالت بنفسها بقرف ( شفيه ذا يطالع ! عمى صدق ) خزّته وابتسم بأبتسامة مرعبة ، صدت وهي تتنفس بتوتر م وصلها رد منه بعد م قالها " عندي مهمة بعد شوي ومداهمة دعواتتس ودعناتس الله " فجأة بدا التصفيق والصراخ ، اخذت المنظار ورفعته لعيونها ابتسمت بفخر وهي تشوف دانه واقفه ع الفّرس حقتها لابسة الذهب وكل شيء يتلون بالابيض والذهبي ، مطّرز اسمها بالعريض ع وشاحها وعلى لبس المهرة ، كانت المهرة لابسة قناع ومتزينه بكل فرحة ضامنه الفوز ، لفت دانه واشرت لها الجود وهي واقفة ضحكت وقالت بفرحة : اررحبي جوودي !!
الجود وهي تشوفها بس م تسمعها ضحكت وقالت : اكيد ترحب البقى يعيوني !
جلست الجود وضّلت تشوف السباق والتجهيزات ..
" عند اللاين الخاص بالرجال "
ماهر وهو مكتسّي بالأسود ومطّرز اسمه هو ودانه بنفس الشكل ، هو اسود وذهبي وهي عاكسته ، مشى قدام الكل وتقدم وطلع ع الدرج وباس راسها بقوة وقال : موفقة يالغلا
دانه بضحك وهي ترفس بطنه بيدها : ايه وقبل تطقطق علي والله لا اشوف عينك ع الروسية لا اطلعها من مكانها !
ماهر ضّمها له وقال : وشو له اطالع وبعيوني دانه ؟ لؤلؤة ماهرها !؟
دانه ابتسمت وباست خده وقالت : دعواتك نوصل للنهائي وانافسك يحلو
ماهر : بضيع بعد البوسة الله وكيلتس ! بالتوفيق ي لؤلؤتي !
مشى ماهر والكل يطالعونهم بحُب ، الجود صرخت وهي تبعد المنظار وقالت : واااه ذا ماهر يجنن يجنن !!!!!
رفست الطاولة بهدوء وضحكت بخجل وكملت تقول : بس عقاب اجمل حقيقة !
سكتت وهي تكمل تتأمل دانه ، انطلق الرصاص معّلن بداية سباق الاناث انطلقت الخيول والفّرس مع الرصاصة ، دانه زفرت بتوتر وقالت بقّرب من المهرة : مهرتي حنا قدها وقدود اضرربي وشّقي البيداااء يبنتي !!!
انطلقت المهرة وهي تسمع تحفيز وتعزيز دانه ، والكل يسمعون المعلقّ وهو يقول : الفارسة سيلين جونثان متقدمة فالسباق ! خلفها بالضبط الفارسة السعودية دانه ال سليمان !
الجود بحماس وهي تشّد ع عبايتها صرخت وقالت : دااانتي يالله !!
ديم من اطراف المضمار تصارخ بأعلى صوتها وتقول : علييتس بالوردييية تكفييين ي شييخة ال سلييمااان !
هتان وهو جنبها : معلييك واضحة لدانه
ديم لفت له وقالت : اه طمني تكفى ي هتان
ابتسم بهدوء وقال : مبروك المركز الثاني ي ديم
ديم بتوتر من دانه : بجلدك بعدين يصاحب المركز الاول !
ضحك هتان وتكى جنبها يراقب تحركات دانه المخيفة فالميدان تربك خصومها دايم ، سيلين ضربت بكل قوتها وانطلق خيلها بكل سرعته ، لفت وراها وشافت دانه تلحق خطواتها وسوت اكبر غلطة بحياتها ، خيلها ثقيل ويترك اثره وراه وبالجهة الثانية فّرس دانه انثى م تخلي اثر وراها ابد وسرعتها فاقت سرعة " جيمس " خيل سيلين ، صرخ المعلق وقال : الفارسة السعودية دانه ال سليمان تتقدم وتصبح الاولى فالسباق !!!
صرخوا كل الموجودين فخر ببنت بلادهم ، والجود شوي وتطير بحماسها وتصارخ والكل مثلها ، ابو دانه ميت فخر وفرح ببنته ، قطعت النهاية فايزة بالمركز الاول بتكنيك ذكي منها داهية بنت ملهم ال سليمان ، رفعت خوذتها ورفعت علم السعودية وهي ترجف وتضحك ، ركض من بين الناس اللي يصارخون ويصفقون ، حضنها وشالها بين يدينه وهي ترفرف بالعلم وتصارخ ، نزلت عيونها له وقال : شاطرة بنتي شاطرة ! محدن ينافسها اصلاً
دانه ببكي : ماااهري فززت فزززتت !!!
حاوطت راسه وباس كتفها وهو يضحك ويقول : لأنتس م انخلقتي للمراكز الثانية ! انتي الاولى سواء بقلبي ولا بالمسابقات
دانه بصراخ : اااه احبببك احبببببك !!
ماهر توسعت عيونه وضحك وقال : ييويل حالي ارفقي بي يبنت ملهم ! اعشقتس واهواتس !
ابو دانه تقدم وقال وهو يبكي ويضحك بالوقت نفسه ، ترابطت وتخالطت مشاعره بالفخر لبنته ووحيدته ، نطق وقال : يبنتي !
دانه نزلت وركضت وحاوطت ابوها وهي تبكي معه ، شّد عليها وقال : مبروك الفوز وتستاهلين رفعتي راسي وهو مرفوع بيضتي وجهي يبنتي ! من قدومتس للدنيا وانا مرفوع الراس ! يعساني م انحرم منتس م حييّت !!
دانه ببكي ورجفة وفرحة : ي بابا احببك وش الكلام اللذيييذ ذا شلون تبيني ارد الحين يكبر حظوظي فيييك !
ابعد وباس راسها بقوة وقال : م يحتاج غلاتس واجد يبنت ملهم !
" قبل دقايق من الفوز "
اول م صرخ ووصلت لخطّ النهاية معلنه للكل انها المركز الاول بجدارة ، صرخت ديم وحضنت هتان وهي تضحك وتقول : فاازت دانتي فااازززتت !!
هتان وهو ميت فرح : ايييه والله جابتها بنت ملهم !!!
حاوطها ونزل راسه ع كتفها ، استوعبت فهاوتها وشهقت وابعدت وهي تقول : هتاان ! اسفه اسفه اسفه
هتان ابتسم وهو م ترك خصرها وقال : شدعوة ؟ م صار شيء كله من الحماس اللي براسك
ابعد وهو يتنحنح ويمشي مبعّد عنها ، عضّت شفايفها بتوتر وفشلة وصرخت وهي ترفس الارض برجلها : حماااارة !!
دانه وهي تركض بالميدان والمهرة تتراقص معها والكل يصورون المنظر وصلت واشرت بيدها ع الجود وقالت : تعالي يالدنيييا تعالي !
الجود ابتسمت ونزلت بهدوء قدام الكل ، شالت الماسك وبان وجهها الجميل جدًا ضحكت دانه وركضت والمهرة تركض وراها ، حضنت الجود بكل قوتها ، حاوطتها بيد واليد الثانية ماسكه حجابها لا ينزل هي لافته كويس بحيث م يطلع شعرها بس احتياطًا ، ضحكت وقالت : كلبة سويتيها !! واو اجوائكم حماس وانا محبوسة فالديرة اه م تدرين قد ايش اشتقت للحياة هنا مبروك ي دنوستي مبروك تستاهلين كل خييير !!
دانه وهي تضحك : انتي الخييير كله ! واييه حبستس التبن ذاك العريض عقابتس المهم ي سعّد حظي من شفتتس قدامي وااه يجووودي !!
الجود ضحكت ولفت بخجل والكاميرات تصور والناس تهاتف بأسم بنت ال سليمان ، ضحكت دانه وانحنت للجمهور وانحنت مهرة معها ضحكت وقالت : ديييم !!
ديم مشت وحضنتها وقالت : ماشاءالله بدّيتي الناس كلهم علي !
دانه بسخرية : م ابدّي المراكز الثانية انا !
ديم انفجر وجهها صدمة وقالت : حييوانه ! وربي م اسامح
دانه انفجرت تضحك وضمتّها بقوة وقالت : شدعوة بيبي ؟ امزح يمعشوقتي انتي
مشت واخلوا الميدان لسباق الرجال ، حرثّوا الارض بشكل جيّد ومُتقن عشان الخيول والفرّس اللي بيحين دورها بعد نص ساعة ، الجود ابتسمت وقالت : انتهى دوري
دانه وهي تشرب موية وقاعدين بالغرفة : وي شدعوة يبوي ! تروحين الحين باقي عيال عمتس وعمتتس
الجود عقدت حواجبها وقالت : ايش ؟
هي نسّت لما قالها تركي ان اسر ابلشهم بالسباق ، شهقت برعب وقالت : ييمهه ! عيال عمي موجوديين !!
دانه ابتسمت بأستغراب وقالت : ايه واذا ؟
الجود بحدة : تستهبلين !! لو شافوني وقالوا لعقاب
دانه بصدمة : لا عاد !! عقاب م يدري ؟!
الجود هزت راسها بنفي وهي تعضّ اصابعها بتوتر : مين فيه ؟
دانه وهي قرأت اللائحة بالاسماء نطقت وقالت : عبدالعزيز وفلاح
الجود بتوتر : بدق ع تركي يجي
دانه ابتسمت براحة وقالت : كووويس دام جيتي مع تركي محد له حق يتكلم !
الجود ابتسمت بسخرية وقالت : محد له حق صح ! بس عقاب يحط حقوقه ويفرض قواعده ولحد ينطق بعد كلمته بحرف !
دانه بتهدئة للجود : لا معليتس حبيبي ! مستحيل يسوي شيء وهو بمهمة بيرجع بعد شهرين ع قولتتس اكيد بينسى وش البعيير ذا
الجود بضحك : هاهاهي !! هذا عقاب يهبلة ! والله م ينساها بس ان شاءالله م يدرون اني جيت م اتوقع يعرفوني
دانه : خلاص طمنيني اذا ركبتي مع تركي واذا م يرد انتظري تطلعين معي انا واهلي
الجود هزت راسها بنعم وقالت : تمام
مشت دانه تشوف سباق الرجال واستدعت الجود معها ، وقفوا بمكان م ينشافون فيه وقالت وهي تأشر بيدها : هذيك الخوصاء فرس اسر وعليها عبدالعزيز ! واللي بجنبه هذا فلاح وعلى الادهم الخيل حقه
الجود بفخر فاجأت دانه فيه : عزز يعييال عمي !! المراكز الاولى لهم
دانه طارت عيونها بصدمة وقالت : ماشاءالله !! والخوف قبل شوي ؟ وبعدين لا ان شاءالله ماهري الاول
الجود بصراخ : ماهرتس يجنن !! التناسق بينكم اسر قلبي والله مقدرر !!
دانه انفجرت تضحك بخجل ووردت ملامحها لوهلة ونطقت وهي تقول : خلاااص يحيوانه وترتيني !!
تقدموا ع الاسوار ، انطلقت الرصاصة معلنة بداية السباق الثاني ..
" فـ مكان ما فالصحراء "
نزل ضيدان ضخم وهيبة من الدروع والسلاح اللي بيده ، نطق باللاسلكي وقال : طويل العمر ؟
عقاب رد بسرعة وقال : هلا ي الضبع ؟
كانت هذي القاب بينهم ، حيث تسمى " ضيدان بالضبع " وعقاب " طويل العمر " وقداح " الشعلة " وضارب " القنبلة " ، كمل كلامه وقال : متى دورنا !
عقاب : اذا عطيتك اشارتي بدخل لحالي..
قاطعه ضيدان وهو يقول : لا تخسّي ! م تروح لحالك رجلي برجلك !!
عقاب ابتسم بخفه وقال : يالضبع تخاف ع سبّع !
ضيدان ابتسم وقال : تكفى نفسك ونفسك ونفسك يطويل العمر تكفى !
عقاب نطق بعد م سمَى بالله : قُلْ لَنْ يُصِيبَنَا إِلا مَا كَتَبَ اللَّهُ لَنَا هُوَ مَوْلانَا وَعَلَى اللَّهِ فَلْيَتَوَكَّلِ الْمُؤْمِنُونَ ، دعواتكم وان كاني م رجعت انتوا تكفون وتوفون يرجال !
ضارب : بتعّود يطويل العمر بتعّود !
قداح : اضرب فيهم اكلهم اكل وخل لنا العظم ! نحلله تحلّيل
ابتسم وسكر اللاسلكي معلن دخوله لجدران المبنى الهزيل صار يتلفت يمين ويسار ، سمى بالله وخطى اول خطواته داخله تحت انظار فريقه ، مشى وهو يتنفس بصعوبة من سوء الرائحة داخل ، الدم منتشر ع بعض من الاثاث اللي موجود دليل نزال صار فيه ، او ممكن تحرش ووصل للدم ، صد ودخل ووقف اول م نطق اللي وراه وقال : ارحب حضرة الفريق عقاب شيخ آل مقّبل !
عقاب لف عليه بكل سرعته وطلق وم كان فيه احد وراه ! انفجر يضحك وقال : لعبت علييك هاه يفريييق !
عقاب غمض عيونه بهدوء وهو يتنفس ونطق بنفسه ( عقيب هذا فخ هو ماهو موجود ومركب سبيكر انتبه ) وصله صوت ضيدان من السماعة وهو يقول : طويل العمر فييك شيء ؟!
عقاب بهمس : لا
ارتاح ضيدان واستراحوا الوحوش ضارب وقداح ، مشى وهو يسمعه يهذري ع راسه ، نزل بعيونه وكان داعس ع خيط لغم ، شّد ع قبضته وقال : اااه يعقاااب يحمااار !!!!
انفجر غانم يضحك وقال : دعسسته يفريق ودعناك الله وعظم الله اجر اهلك فيك !
عقاب كان مركز بس لعب فيه غانم اللي يسولف ، لف بأنظاره يلحق خيط اللغم وكان مثبت ع جدران المبنى ، زفر بضيق وقال بهمس : تسمعني يالضبع ؟
ضيدان فز وقال : اسمعك امرني ؟ ندخل
عقاب بحدة وعيونه تطلع شرار : اسمع كلامي كامل ولا تقاطعني امر مني عليكم !
ضيدان حسّ بقلبه ينقبض وقال : سمّ ؟
عقاب : الان تحركون المبنى فاضي وفي بضاعة كنت اجمعها وفضيت المبنى كامل وحطيتها لكم عند المدخل شيلوها وصلوها للمعسّكر سامعني ؟
ضيدان بربكة م وده يسمع الموقف اللي عقاب موجود فيه ابدًا : تبشر وانت وينك ؟
عقاب ابتسم بحرقة وهو ينزع خوذته وينطق : انا معاد لي رجعة بالدور السابع وداعس ع خيط الغام بحركة بسيطة مني بيتفجر المكان
قداح ضحك وقال ببحة صوته : عيب يطويل العمر ؟ معك متخصص الغام وتقول كذا
عقاب : انا داعس ع لغم المدمر ي الشعلة !
ضارب ضرب بيده الطبلون وقال بعصبية : عقاااب م بنخليييك لو نمووت سوا !!!
عقاب : ودعناكم الله
سكر اللاسلكي وضيدان جسد بلا روح ، يحسّ بثقل ع صدره زفر وقال : وش السواة ؟
قداح رفع كتوفه بعدم معرفة وقال : مصيره واحد بيموت وهذا الارجح اقلها ناخذ الممنوعات وم يروح موته هباء
ضارب مسك ياقته بيده اليمين وقال : تستتهببل !! والله م يمووتت الفريييق !
قداح بحدة : انت اللي تستهبل !! عقاب بالطابق السابع لو هو بالطابق الاول بينجو علطول ممكن يتكسر وممكن تصير مضاعفات بس بينجو !! اما فالطابق السابع بيطير ويختفي هو يقول داعس ع لغم المدمر محد فينا سمع بعسكري نجى منه !!
لفوا ع ضيدان اللي راجع لهم والممنوعات بيدينه ، ركبها ورا ورجع لهم ، ضارب صرخ وقال : ضيداان !!
تلطم بوشاح باللون العسكري وعيونه غرقانه بدموعها ، سكر باب المركبة وحرّك وضارب مصدوم شلون تخلى ضيدان عن عقاب بذي السهولة ، كان بيفتح الباب وينزل لعقاب حتى والمركبة تمشي م كان مهتم لكنه انفجع من صوت الانفجار المرعب وكيف طاحت الطوابق طابق على طابق ، شهق ضيدان ونزلت دموعه بكل حرقة وحزن ، شّد قداح ع كتفه وقال : عظم الله اجرنا في فريقنا !
صوت بكاء ضيدان المرعب والمخيف والموجع لهم ، شلون بيقول لآسر الحين ! وشلون بينقل اسر الخبر لأهله كيف بيقوله " اخوك مات " ! انهار ضارب يرجف ومصدوم يبكي بصمت ودموعه متمسكة برموشه ترفض النزول ، عضّ طرف بدلته وقال : عقااب ماات !!
قداح بحدة : تستهبل انت ! ضارب مانت بصاحي اجل بيعيش كذا !!
وصلوا للمعسّكر ووقف ضيدان بعيد عنه وقال : حنا حتى م تكلفنا ناخذ جثمانه !!
ضارب ضحك بسخرية وسط انهياره ونطق : جثمانه ؟ تحللت من الانفجار هذا زين اذا حصلنا اصبع واحد منه !!
اسر شافهم ومشى لهم وهو يماشي كاسر ، كاسر : تهقاهم رجعوا ؟
اسر هز راسه بنعم وقال : ايه شوف سيارتهم وذاك ضيدان
كاسر : اسمع اسر تجي معي ابي اخذ موية ونروح لهم
اسر ابتسم وقال : مشينا اجل
كاسر دخل اسر تحت ذراعه وقال : يحلوك صدق !
اسر بهمس وهو يطالعه : تمرجل !
ضحك كاسر ومشى مع اسر للمخازن ، فيها من الاسلحة النارية م لذّ وطاب من اشكال وانواع ، سحب موية من الكراتين وقال : يالله طلعنا ؟
طلع اسر اول م مسك الموية اللي مدّها كاسر له ، ضيدان دخل مستعجل لمقر الزلازل والمتفجرات ، اسر بصوته الثقييل : ضيدااان !
ضيدان انقبضّ قلبه ومشى تارك اسر يناديه ، دخل وقال : وش العلم ؟!
بندر : سمعنا انفجار لغم يبعد عننا بعشرين كيلو ! انتوا طيبين ؟
ضيدان وقف بكل ثبات وضرب تحية وقال : الفريق عقاب عطاكم عمره !
العقيد بندر فز وقال : لا حول ولا قوة الا بالله !!!
اسر من وراهم تمسّك ببدلة كاسر بكل قوته وقال : هاه !
كاسر طار قلبه بصدمة وقال : انا لله وانا اليه راجعون !!
حضن اسر بكل قوته وهو يشّد ع شعره وينطق : لا تجزع يبن عايض تمسك بالله وتثبت بأسمه !! الله يجبر كسرك في عضيدك ويرحمه ويغفرله !
اسر شّد ع كاسر وشهق بكل قوته وقال : لااااااا عقااااب م مااات عقااااب م يموووتت !! ضيداااان يععقبب كذاااب م ماااات عقاابب م يروووح ويخليينيي ويخليي اهله وراه وولده !!
ضيدان طاح يبكي ع كتف بندر والكل مفجوع ، دخل رعد بكل قوته وقال بحدة : وجع انت وياه ! وش العلم ؟! فجعتونا
منصور بحدة : انطقوا يرجال !
كاسر ودموعه بعيونه ، مشى له رعد وشّد ع كتفه وقال : يالكاسر ! وشفيييك يالعضيد
اسر استوجع من الكلمة وانهار يبكي ، طاح من يدين كاسر وفز له وقال بحدة : رعد !! ساعدني
رعد مشى وشال اسر اللي ميت الم ومستوجع وجدًا ، رعد بهمس : وش فيه عقاب صار له شيء !
ضارب بحدة : عقاب عطاك عمره يالرعد
رعد طارت عيونه بصدمة وقال : لا اله الا الله !! يرجال انتم صادقيين !!
مشى ورا العسكر اللي شايلين اسر بدال كاسر ورعد ، كاسر عضّ شفايفه بحزن وحضن رعد وقال : تكفى لا تخليني م ابي اذوق اللي ذاقه اسر !
رعد حاوط اخوه وقال : افا ! لا تتفاؤل واسر عنده اخوان غير عقاب انت مالك الا انا !
كاسر انهار يبكي وقال : بس م بيجي مثل عقاب والدليل انهياره
رعد شّد ع اخوه وقال : خلاص يالكاسر لا تكسرني وتكسر خاطري !
مشى كاسر مع رعد يشوفون اسر ..
" قبل الانفجار فالمبنى "
كان يتعّرق بخوف وقال : والحين وش الحل ؟ ان حركت رجلي شبر واحد ودعت وان قطعت الخيط ودعت !!
صار يتلفت يمين ويسار لوقت طويل ، بعد مدة م تقل عن خمسة عشر دقيقة شاف حجر كبير داعس ع الخيط من فترة طويلة ، ابتسم بأنتصار وقال : م انفجر للحين لكن دعسّي له سبب له حركة بحاول اشيل رجلي والله يكون بعوني !
سكت لثواني وزفر بحرقة ونطق : اشهد ان لا اله الا الله واشهد ان محمد عبده ورسوله !
رفع رجله وشهق اول م ثبت ، توسعت عيونه بصدمة والسؤال اللي راوده ليه م انفجر ، استوعب وسحب سلاحه وركض بكل سرعته مع الدرج حصل كسر فالجدار وطمّر علطول من المبنى من الدور الثاني ، عضّ شفته السُفلية بآلم وقال بحدة : يبن عايض م يأثر عليك الكسر !!
ركض وطار فالسماء اثر الانفجار اللي صار ، طاح وهو م يحسّ بنفسه ابدًا وجهه غرقان بدمه ويده م تتحرك ، غمض عيونه وترك نفسه وطاح بعيد جدًا من المبنى ..
" فـ مربّط اليمامة للخيول العربية الاصيلة "
الخوصاء وعبدالعزيز عليها اول الناس ، تحت صدمة اللطيم وماهر هم فالمركز الثاني وهذا شيء مؤكد بحكم ان الخوصاء بعيدة كل البعد عنهم ، عبدالعزيز وهو يضحك : عششتي يالخوصاااء !!
فلاح ابتسم وقال : حيي والله عييينك ي عزوز !
ضرب الادهم وقال بحدة : دورنا نوصل للمركز الثاني !
انطلق الادهم ع خطى الخوصاء ، خيّل اسود وفّرس ابيض يلاحقون بعضهم ، ماهر طارت عيونه بصدمة من تعداه فلاح بكل سهولة ، صرخت وقالت : عيييااالنا فاازووا !!!
من نطّق المعلق : المركز الاول من نصيب الفارس السعودي الآسر بن عايض بن مساعد ال مقّبل ، والفّرس الخوصاء ، والمركز الثاني من نصيب الفارس السعودي فلاح بن سالم بن مساعد ال مقّبل ، والخيّل الادهم ، المركز الثالث والاخير من نصيب الفارس السعودي ماهر بن طلال الفيصل ، والخيّل اللطيم
صرخت وقالت : عييااال ال مقّبل قفلوا السباق !!
دانه بصدمة : شلون كذا !! شلون م فاز ماهر بالمركز الاول !
الجود وهي تضحك قالت : استحالة يفوز حياتو ! الخوصاء والادهم فالميدان
دانه صفقت مع الناس وقالت : جوجو بنزل انا تمام ؟
الجود وهي ترفع جوالها وتشوف اتصال تركي : ايه تمام
ردت وقالت : هلا ؟
تركي : خلصتي ؟ برجع للديرة وقلت امر عليتس
الجود هزت راسها بنعم وقالت : ايه ايه بطلع لك
تركي : اعجلي انا عند البوابة اللي نزلتي ودخلتي منها
سكرت الجود ومشت للحمامات ، نطق وقال : خلص الشو ؟
الجود لفت وشافت الشايب هو مو شايب لكن شيّب بوقت مبكر ، كان واقف وراها وقالت بحدة : خيير ؟
عساف ابتسم وقال : الجود بنت راشد بن مساعد حَرم الفريق عقاب ؟
الجود طار قلبها ومشت تركض ، دخلت الحمام وقلبت عبايتها واكتسّت باللون الاسود لبست نقابها ، ومشت طالعة لتركي برا ، ركبت وقالت : مشينا ؟
تركي حرّك ومشى وشاف الساعة بجواله وفجأة وصله اتصال ، رد وقال : هلا ؟
فارس : تركي ؟
تركي : ايه نعم من معي !
فارس : انا الدكتور فارس بن نادر وينك فيه ؟
تركي ابتسم وقال : حياك الله موجود ليه ؟
فارس : كادي مريضتك ؟
تركي هز راسه بنعم معتقد انه يشوفه وقال : اي فيها شيء
فارس بجدية : انتكست حالتها ومسكوني حالتها واحتاجك معي الان
سكر فارس ولف تركي راجع لطريقه مع احياء تجهلها وقف وقال : انزلي
شافت بيت م تعرفه وقالت : مو من جدك !
تركي : شفيتس ! بيت عمتي سعاد
هزت راسها بمعنى " فهمت " ومشت تدخل البيت وقف وشافها لحتى م دخلت ومشى رايح للمستشفى ، دخلت وقالت امال : اررحبيي !! جيتي بوقتك
الجود ابتسمت وقالت : البقى ليه ؟
امال وهي ببجامة البيت وقلم الرصاص فوق اذنها والكتب بيدها وقالت : عشان عندي درس فالهندسة وعجزت افهمه وبحكم انتس تخرجتي تخصص هندسة وبمعدل عالي ساعديني متهاوشة مع عبود ولا رحت له
الجود ضحكت وقالت : تمام مشينا
طلعوا للغرف وقالت بهمس : نايمين ؟
امال : ايه كلهم نايمين م عدا انا وعبودي صاحي يلعب سوني
مشت وجلست بالغرفة بعد م فصخت عبايتها ، كانت لابسة هاينيك بُني وجينز ابيض ، ماسك ع جسمها تفتن بمعنى الكلمة ، دخلت ومعها كوبين قهوة وقالت : شفتتس بالسباق كيف غيرتي عبايتتس ؟
الجود طار عقلها وقالت : شلون شفتيني ؟!
امال وهي تمدّ لها كوب القهوة : السباق لايف قالنا عزيز نشوفه ونشجعه ع قنوات التلفزيون وفيه مصوريين بينشرون الصور ع الجراييد انتي حاضرة وم تدرين ؟ لا وبعد في اي بي !! م تستاهلينه ماش
الجود رجفت برعب وقالت : يالله نبدأ ؟
امال ابتسمت وقالت : نبدأ يعين عقاب ليه م نبدأ
اهتّز كيانها من طاريه ، يلعب ويعصف فيها وهو مجرد اسم م تدري وين دياره ولا تدري هو بخير ولا لا ، ابتسمت وقالت : ذكرتيني ادق عليه
امال ضحكت وقالت : خذي راحتتس
مشت ووقفت ع الشرفة واتصلت فيه ، كان يحسّ بالجوال يهتّز بجيبه زفر بآلم وقال : جودي
سحبه من جيبه بيده اليسار ورد وفتح السبيكر وطاح ، ابتسمت وقالت : عقاب وينك ؟
عقاب ابتسم وقال : يروحه .. لا تتركيني سولفي علي اربّ اللي باقي فيني ينتهي معتس !
الجود فزت برعب وخوف من نبرة صوته وقالت : عقااب ! فييك شيء ؟ ويينك فيه
عقاب بتعب : بخير لا تخافين لا تخليني اغمض عيوني ويكفيني هالشيء !
الجود بكت علطول وقالت : امااال !!
فزت من داخل وجات تركض وقالت : هلا ! علامتس ؟ يمه بسم الله
الجود ببكي : عقااب تكفى لا تخلييني
عقاب ابتسم وهو يحسّ بالقطع اللي بشفته نطق بهدوء وقال : عجيب امرنا ! م اخذتتس عن حب ولا خذيتيني من هوى ! والحين انا اوصيتس م تخليني وانتي تحرصّين علي م اخلي !
الجود انهارت وقالت : تكفى يعقاب
عقاب : لا تقولين تكفى ! انتي م تكفّيني انتي ينقال لتس سمّي وامرتس ولبيه !
الجود : ولدنا وانا نحتاجك
عقاب بهدوء : شدّي ظهرتس فيه !
سكت وانهارت تبكي وامال مصدومة م تدري شلون تتدارك الوضع ، ركضت وضربت باب امها وابوها ، طلع مقّرن مصدوم وقال : امال ! علامتس يبنتي ؟
امال ودموعها اخذت مجراها : ي بابا جودي تبكي وعقاب تعبان ومدري وينه !!
ابو عبدالعزيز مسَك راسه وقال : وش جودي ؟ ووش عقاب وش تقولين ي بنت !
امال دخلت وابوها معها ، وفزت الجود تغطي نفسها وتبكي ، ابتسم ابو عبدالعزيز وقال : يبنتي عطيني اكلمه
مدت الجود جوالها له وقال : يولدي يعقاب ؟
عقاب فتح عيونه بصدمة وقال : من انت !!
ابو عبدالعزيز يخبَر الغيرة تمشي مع عيال عايض مجرى الدم ضحك وقال : ابو عبدالعزيز
عقاب ارتخى وقال : انا بخير انتبه لجود يعمي لا نوصي حريص
ابو عبدالعزيز : ابشر
سكر عقاب ودق ع اسر علطول ، فتح عيونه بتعب من الدموع ومشى للجوال ضحك وقال : صرت تهلوس فيه بدري يبن عايض !
سحبه ورد وقال عقاب : تكفى يالعضيد !!
فز اسر واهتّزت كل خلية بجسده وقال ببكاء : احتزم جعلني قبل ذا الحسّ وذا الصوت يالبييييه يعقااب !!
عقاب : انا بخيير وطيب بس الحقوني عندي نزيف !
اسر ركض وقال بصوته العالي اللي دُوى بكل زاوية فالمعسّكر : ضيداااان عقاااب طييب !!
ضيدان فز من مكانه وركض للطيارة علطول ، وركضوا الجنود ومن يهمهم امر عقاب معهم ، والاسعافات والطاقم الطبي وراهم ..
" فـ مربّط اليمامة للخيول العربية الاصيلة "
تأهلوا رجال ال مقّبل فالمركزين الاولى وضحكاتهم وفرحتهم بالكاس والميداليات الذهبية والفضية ، بينما حصل ماهر ع الميدالية البرونزية لأول مرة منذ سنوات طويلة ، هو معصب وزعلان لكن كان درس يخليه م يثق كثير ، مشت له ومدت هوت تشوكلت ونطقت : لا تعصب ماهري ! عادي خيرها بغيرها وكويس انك من المراكز الثلاثة الاولى
ابتسمت اول م شافت ابتسامة طفيفة ع ملامحه ، رفعت رجولها وعلطول حاوط خصرها وشّدها وهي تبوس خده ابعدت بأبتسامة عريضة ونطقت : هذي مواساة يصاحب المركز الثالث فالميدان والاول بقلب لؤلؤتك !
ماهر ابتسم وتكى ع السور ، يتأمل الميدان الخالي من الناس ، بأنواره المغلقة والظلام الدامس في ارجاءه ، رجع يطالع فيها ونطق : م بتروحين مع اهلتس ؟
دانه رفعت عينها له وقالت : راحوا اصلاً وديم راحت الله يعينك توصلني
ماهر وهو م زال يحاوطها : الله يعيني ؟ يكبر حظوظي والله !
دانه وهي تترشف من الكوب ضحكت بسخرية وقالت : من الدّ الاعداء لزوجين !!
ماهر : متى صرنا الدّ الاعداء من اول نظرة لتس وانا اشوفتس حَرمي وحلالي وحبيبتي وزوجتي وبنتي قبلهم كلهم !
دانه رفعت حاجبها وقالت : اما عاد ! طلعت انا الوحيدة اللي حقدت بس اننا كنا نتهاوش
ماهر : ع الوردة ؟
انفجرت تضحك بصوت عالي ، كمل وهو يقول : ما ابغضّني لتس ذاك اليوم !
دانه حضنته وقالت : ماااهري !
حاوط خصرها ورفعها بحيث تحاوط رجولها خصره ، ابتسم وهو يتأمل وجهها من ابعدت وقال : نمشي ؟ احس خاطري اخذ راحتي الليلة
دانه قربت وهمست بأذنه : بدري عليك يكوتش !!
نزلت وقالت : ع بيت اهلي ؟ مشينا !
مشى وراها وطلعوا من المربّط لسيارة ماهر ، صرخت وهي تشوف السيارة السبورت اللي كساها اللون الاحمر ، مشت لها وفتحت الباب وجلست وهي تقول : ماشاءالله ماشاءالله تبارك الله هذي لك !
ركب ماهر وقال بكل مصداقية : مستأجرها عشان اصير فخم بين الامراء اللي حضروا ؟
دانه صغّرت نظرها وقالت : وسيارتك ؟
ماهر بأبتسامة عريضة : صح م قلت لتس !
دانه تكت ع الدرج اللي بين السايق والراكب وقالت : اسلم
ماهر : عجلت بالزواج
فزت برعب وقالت : هااه ؟ متى !!
ماهر : بعصبية مني بعد الهزيمة من ال مقّبل ارسلت للجماعة ولأهلي وهذا اللي صار
سحبت جواله وهي تشوف الردود كلها ايجابية من " تم ، ابشر ، امرك ، تم وتستاهل ، مبروك وابشر بالمعونه والحضور " زفرت بعصبية وقالت : مريض انت !؟
ماهر لف عليها وقال : ايش ؟
دانه بصراخ وبأنفعال : معليشش تعصب وتعجل من زواج متزوجة ورع انا وش النظاام المعفن ذا !؟ متخلف قسم بالله معاد فيه كلمة توصفك ومزعجني تقول رجال !!؟ هذا فعل رجال ؟
ماهر بحدة : اووب !! وش تصعيد الامور ذا !!!
دانه لفت وقالت : وصلنا وكلامك مع ابوي داخل !
مشت ووقفت قدام الباب ، مع الاسف م كان فيه رد لا ع الجوالات ولا ع الباب اللي انكسرت يدها تدق فيه ، ابو دانه وام دانه في الاحلام الوردية ولا يدرون عن هوا دارها ، لفت له وقالت : تقدر تطبّ ؟
ماهر ابتسم بسخرية وقال : صرت ماني رجال بنظر زوجتي ؟ والحين تبيني اصير حرامي بنظر حموّي وحماتي لا شكرًا !!
دانه زفرت بتوتر وقالت : م كنت اقصد ! عصبت واسفه
ماهر : تركبين ولا امشي ؟
مشت وفتحت الباب وركبت وقالت : بيت ديم حلنا الوحيد
ماهر : عندي حل وبسويه عناد فيتس
مشى بأطرقة هي تجهلها ووصل قدام بيت جميل فيلا كبيرة ، مزينة بالنخل والاشجار ، كلها زجاج اسود وحواف المنزل بني ، مشى وفتح الباركينق ودخل وقال : انزلي هذا بيتنا ي زوجتي !
سكتت بصدمة وهي تطالع فيه ينزل ويسكر الباب وم كان منها الا التنفيذ ولحقته بصدمة ..
" فالرياض تحديدًا بيت ابو عبدالعزيز "
تبكي بحرقة وترجف بشكل مرعب ، تركتها امال قبلها بساعة عشان تاخذ راحتها ، دقت الاف وعشرات المكالمات ع عقاب لكن م كان فيه جواب ابد وخاضت معارك عنيفة داخل عقلها وافكار تهلكها من فقدانه واصاباته وحتى وفاته ، هو م كان بخير وهذا الشيء اللي هي تعرفه عن ظهر قلب وبرضو هذا شيء اللي موصلها للحالة ذي ، رفعت راسها وابعدت المفرش عن وجهها تشوف جوالها ينُور دليل مكالمة واردة ، فزت بلهفة وشافت رقم مجهول هي مو مسجلته عندها ، ردت ووصلها صوته وهو يقول : آنسه الجود ؟
الجود قطبت حواجبها وقالت : مين ؟
عساف : انا اللي كشفت هويتك طال عمرك
الجود عرفته علطول وقالت بحدة : وش تبي ؟! وشلون جبت رقمي
عساف : بشرح بالمختصر واسمعيني وانتي بكيفك فالقرار واتخاذه م بجبرك لأن كل شيء بقوله في صالحك
الجود اكتفت بالسماع ولا اعطت اي رد ، نطق وقال : انا صاحب نفوذ كبير ولي كلمتي ع القاصي والداني وبطبيعة الحال والوضع اللي احنا فيه انا شايف كيف دخلتي السباق وكيف طلعتي منه ممكن هذي حريتك وانك اخذتي بريك من عقاب وحياة الديرة بس صدقيني العواقب وخيمة ! وكلنا اتوقع نعرف عقاب ونعرف وش بيسوي لك !! يعني رجل عاش على صلابة الارض والصحراء وحرارة الجو بين حلال ابوه والشغل القاسي جدًا وبعدها يدخل السلك ويصير عسكري ورتبة فريق بعد !!؟
كانت مرعوبة وزاد رعبها من كلامه اللي مية فالمية صحيح ، غمضت عيونها بقوة سامحة لباقي الدموع تنزل ، اخذت نفس طويل وزفرته بهدوء وقالت : هذي هي شخصيتي سواء تقبلها عقاب ولا لا و..
قاطعها وهو يقول : خلينا بعيدين عن عقاب شوي ! انتي م كنتي كذا وتعترفين الان بالكلام الصح انا م بضيع وقتي الا وانا عارف انك في مصيبة كبيرة تتوقعين لو شافوا فلاح وعبدالعزيز الصور فالقنوات ؟ اقربها الميلا وهي فالبيت..
قاطعته وهي تصارخ وتقول : يالمنحرف !! كيف تعرف اهلي انت مييين !!!
عساف بجدية : اختصار الموضوع اقدر اوقف المجلات والصحف وحتى القنوات تعرض الحفل بكلمة وحدة بس
الجود ضحكت بسخرية وقالت : اعرفكم يالنوعيات ذي ومتأكدة يمين انك تبي مقابل
عساف اطلق ضحكته الرنانه فالمكان وكمل وهو يقول : اكيد ! لكن مقابلي سهل وبتسوينه بكل رحابة صدر
الجود كانت مصدومة هي تحتاج من يسعفها من نيران وغضب عقاب اللي هالمرة م بيكون بدون سبب فيه سبب وقوي بعد ، ردت وقالت : تم !
عساف ابتسم وقال : المقابل تكونين معاي فالمقابلة مع رجال امريكان م اعرف اللغة الانجليزية واعرفك متمرسة فيها !
الجود بتوتر : طيب متى بتكون ؟
عساف : بعد اسبوع من الان
زفرت برعب وقالت : خلاص تمام بس احذف كل شيء الان !
عساف اشر بأصبعه ع خشمه وقال : ع ذا الخشم يحَرم الفريق
سكرت بتوتر ، وقامت ولبست السليبرز اللي عند رجولها ورفعت شعرها بشكل مهمل ومشت ببجامة امال الحرير باللون الاسود ، وصلت للدرج وانفتحت الغرفة اللي جنبه وقالت بصراخ : بسسسم الله يي..
قاطعها وهو يحط يده ع منطوقها يمنعها من الصراخ وكمل وهو يقول : علامتس انتي !!
الجود طارت عيونها برعب ، عبدالهادي واقف قدامها ولا ماسك رقبتها من ورا ومقفل ع فمها لا تتكلم ، ابعدته بسرعة وقالت : ابعد مني !
مشت وهي تشوفه واقف وراها ولابس سماعة والسماعة الثانية مرجعها ع ورا وبيده اليّد حقت البلايستيشن ، مشى وراها وهو يطالع بخطوات رجوله ، ابتسم هذي ثاني مره يشوف الجود فيها وبرضو هذي ثاني مره يحسّد عقاب عليها مشى وقال : جود ؟
لفت عليه برعب وسحبت جلال الصلاة من الصندوق اللي تحت الدرج وقالت : سمّ ؟
عبدالهادي تكى ع زجاج الدرج وقال : كملتي ماجستير ؟
هزت راسها بنفي وقالت : تكفيني البكالوريوس
مشت واخذت كاس ماء من الصالة ، شربت وخلصت وطلعت فوق وهي تحسّ بنظراته عليها ..
" فالديرة "
الميلا جالسة وغزيل قدامها وضحى بجنبها ، زفرت بتوتر وقالت : يارب متى يجي تركي !!
تالين وهي تجلس : تبيني اتصل عليه ؟
غزيل ضحكت وقالت : ماشاءالله بدينا من الحين نغّريه ؟
تالين ضحكت بخجل وقالت : وشدعوة !
الميلا : بتساعديني مررره !
تالين سحبت جوالها واتصلت ع تركي ووصلها صوته وهو يقول : ارحبي يدهر قلبي ورجعانه !
تالين قامت وهي تبتسم وقالت : البقى ي خلفّ معاليق قلبي !
تركي زفر وهو يفتح اول ازرار بدلته وقال : واحشتني
تالين : وانت بعد ! وينك فيه ؟
تركي : قريب ليه ؟
تالين : جود معك ؟
تركي شهق وقال : يوووه نسيتها ببيت عمتي
تالين ضحكت وقالت : عادي اهم شيء انها بخير خلّ فلاح يجيبها معه وهو جاي
تركي : احلفي ؟ واخليها تجي معه لحالها ! لا انا قريب بجيبها واجي
تالين : استودعتك ربي انتبه لنفسك حبيبي
تركي وهو يحسّ قلبه يناقز بصدره ابتسم وقال : واسألي الله الثبااااات !
تالين ضحكت وقالت : احبك
تركي بحدة صوته : تاليني ! اعشقتس ي اميرتي
سكرت علطول ومشت لهم ، ضحى ساكته من جلست والبنات م يدرون وش فيها ، الميلا بحدة : وضيحي !!
ضحى لفت لها وقالت : علامتس !
غزيل بحدة : السؤال لتس حبيبتي ! علامتس يبنتي ؟
ضحى ابتسمت وقالت : م فيني شيء بس هلكانه من العشاء
تقدمت تالين وحاوطتها وباست راسها وقالت : الله يكثر خيرتس ويجمل حالتس يبنت العم !
ضحى حاوطت ظهرها بخفه وقالت : م سوينا الا الواجب
الميلا : لا والله انه فيتس عّلة !
ضحى بكل هدوء : طحت بواحد ولا سمّي علي ! اعرف انه م بيكتب لي واعترف اني ماني بنت احلامه وبرضو اعرف ومتأكدة ان القدر مستحيل يوقف معنا مثل م بيوقف ضدنا !
غزيل فزت وقالت : اوووب اووب !! وش العلم ؟
الميلا بصدمة : ضحى وتحّب !!! يمه الدنييييا تغييييرت
ضحى ضحكت بضيق وقالت : م يهم اصلاً حبيت طيب ؟ بيجي مثلاً
غزيل وهي تمسك يدينها وتنطق : منهو طيب !!
ضحى قامت وهي تمسح دموعها بهدوء ، هي سمعت كلام ناصر وحقدت عليه تنتظر اسر يجي محد يوقف معها الا هو وتعرفه بينصفها ، مدت يدها للميلا اللي قالت : وضوح قوميني معتس
قامت الميلا وقالت بهمس : تحسبين بخليتس تروحين ؟ والله ان تقولين لي كل شيء
مشت الميلا ودخلت غرفة اسر وضحى معها ، خالفتهم غزيل اللي سمعت صوت ناصر وتالين دخلت للبندري ودالين داخل البيت ، وعندهم سكروا الباب وجلسوا بالسرير : انطقي
لفت ضحى ع الميلا وقالت : خوي اسر
شهقت الميلا وحطت يدينها ع منطوقها وقالت : سهم !!
ضحى هزت راسها بنعم وقالت : ايه سهم
حتى اسمه لما قالته هزّ كيانها ، نبض قلبها ، شّدت ع قبضتها ولفت للميلا اللي تسولف : طيب ؟ هو يحبتس ؟ تبين نكلم اسر ؟
ضحى : ايه ابي اكلمه بس م بندخل صلب الموضوع علطول
الميلا : اكيد !
سحبت جوالها ودقت ع رجَلها ووصلها صوته وهو يقول :
ارحبي جعل العوض فيتس ما هو فالرخوم
‏أرحبي ي ميّالتي ذا الليل واللي قفيه و بعده !
-
الميلا ابتسمت بخجل وقالت بحماس : I miss you !
اسر فز وقال : ويش هو ؟
الميلا ضحكت وقالت : وحشتني حبيبي
اسر ابتسم وقال : صايره تهرجين بكلامن م اعرفه ! علومتس ؟
الميلا : صوتك متغيير شفيك ؟
اسر : والله جاني شيء م جاني من يوم ولدت حسيت بآلم م حسيته طول حياتي !
ضحى برعب : عقاب !!
اسر ابتسم بخفه وقال : وضيحي !! يالله حيّيها
ضحى بحدة : الله يبقيك ويسلمك نفداك !
الميلا خشّنت صوتها وقالت : يوييل امها يضحى !
انفجروا ضحى واسر يضحكون ع صوتها الناعم ووشلون غيّرته وغيرت فطريقة كلامها
ضحى وهي تضربها : وشفيتس يحيوانه !
الميلا : اقلدتس !
اسر : طمنوني عليكم
ضحى : اسر متى بترجع ؟
اسر ابتسم وقال بهمس : ابشركم صيامنا معكم !
فزوا ضحى والميلا بفرحة وقالت وهي تناقز : حبيبي !!! حبيبي ي حبيبي انت
اسر بحب : يعيونه وروحه وقلبه ونبضه ي لبيه ي الميلا !!
ضحى وهي تضحك : اجل السالفة كلها تنقال لك وجه لوجه !
اسر اشر بأصبعه ع خشمه يعتقد انها تشوفه وقال : ع ذا الخشم ي بعد راسي ي اختي
ضحى : لا خلا ولا عدم ! عطني عقيب اسمعه يحكّي عندك
اسر مد الجوال لعقاب اللي يهاوش النيرس عشان المغذي ، لف لآسر وقال : اعنبو غييرك انت وناصر يوم تعطوني اكلم حَرمكم فييكم بلاء !!
اسر انفجر يضحك وقال : م تركنا الغيرة للحين يبن عايض امسك ضحى
عقاب بمزاح : ماش احسبها جودي
ضحى بحدة : كلتبن انت وجودك !
عقاب رد وقال : ارحبي ي خلّف روحي !! ارحبي يبعد راس اخوتس
ضحى ابتسمت وهي تحسّ بحنّية عقاب والآسر عليها ، يكبر حظها فيهم صح ان عقاب ماهو دايم كذا لكن م عمرها شكّت منه يحبها وم يرضى عليها ، ابتسمت بكل فرحة وهي تشوف فرحتهم وقالت الميلا : حيّ صوتك يبن عايض !
عقاب ابتسم وقال : حيّ نباتس يبنت راشد
ولف لنظرات اسر اللي تحرقه ، ضحك بصوت عالي وقال : كويس وحدة منهم تكفيني
اسر فز وقال : اعقب !!!
عقاب كان مهستر من البنج وماهو بحسّه ابد ، ضيدان دخل وقال : اسمع لا تاخذ بكلامه الرجال مبنج
اسر لف له وقال : لا معليك !
عقاب رفع كفينه للسماء وقال : اللهم استرنا بسترك الجميل ولا تفضحنا بين خلقك ولا تُخزنا يوم القيامة !
انفجر ضيدان واسر يضحكون هو حتى البنج م اثر عليه ، باقي بحسّه ، ضحكت ضحى والميلا معهم وقالت : وانا اقول الكلام المعسول ذا م يجي من عقاب وهو بكامل وعيه !
الميلا انفجرت تضحك وقالت : لا يجي بس مع الجود لحالها
ضحك بخفه وهو يسمع طاريها وقال : سكر انت
اسر سحب جواله وقال : بكلم زوجتي وام عيالي شتبي !
عقاب فز وقال : سوييتها !! حااااااااي يالعضيد
ضيدان من عند الباب دخل وقال : وجع وجع صدق ! اصه انت وياه فشلتونا
اسر ضحك ودق تحية لعقاب ومشى وهو ينسّف شماغه ، بدلوا ملابسهم وغيروا ووصلوا لمستشفى فالرياض تكلم وهو يقول : العشاء لملكة تركي ودالين ؟
فز ضيدان حسّ بقلبه يعتصر داخل ضلوعه ، شلون تملكت وانا ابيها ، صدّ بحدة وقال : تتهنون يبن عايض وعسى افراحكم دايمة
اسر ابتسم وقال : اللهم امين يبن حثلين
مشى وقال : منهو ؟
الميلا وهي تسكر الباب بعد م طلعت ضحى : تالين تالين مو دالين
اسر : وش علي تالين ولا دالين اهم شيء انتي !
الميلا ابتسمت وقالت : اسمعني احس اني بحمل وبجيب بنت
اسر ابتسم وقال : ثنتين ميلو ؟ كثير علي والله
الميلا ابتسمت بخجل وقالت : واااي احبك ليش كذا لطيف !
اسر مسح وجهه وشنبه وقال : والله اللي عقبت يبن عايض اخر حياتي والشعر اللي خطّ الشنب بوجهي تقولين لي لطيف !
الميلا وهي تنسدح : يحلوك صدق
اسر : بنت !
الميلا ضحكت وقالت : وش تبيني اقول ؟ رجال سنافي وافي واعيّد مدحتك في ابوي تراه علمني
اسر حكّ راسه وقال : اني اخبّره عمي م يقعد الحكّي فبطنه بس زين انها وقفت ع مدحتي له
الميلا : اسمعني اذا جبت بنتنا وش تبي نسميها ؟
اسر جلس ع الكراسي وقال : اذا ولد بنسميه عقاب واذا بنت بنسميها كنوز
الميلا فزت بحماس وقالت : واااه كنووز !!! تم يجنن يجنن
اسر ابتسم وقال : م هو مثل الميلا ولو جاء مليون اسم !
الميلا : عقاب ؟ م حبيت اسأله شوف بيسمي ولده بأسمك !
اسر ضحك وقال : وش علي منه ؟ علامتس انتي تدورين الزلة !!
الميلا وهي تلعب بشعرها : شدعوة بيب ؟ م قلنا شيء
اسر رفع حاجبة وقال : ويش هو ؟
الميلا : ابلش يولد الديرة ابلش !!
اسر : خفَي يبنت المدن ! ترا خمسين فالمية منتس الديرة
الميلا : طيب اصبر كنوز بنت آسر بن عايض !
اسر ابتسم يتمنى تكون بكّره بنت يعشق البنات ويشوفهم نعمة بحياته ، حضن سلاحه جنبه وقال : الله يرزقنا شوفتها ودام تبينها بنت والله جيتيني من ذراعي اللي توجعني ولويتيها والله انه بخاطري بكّري تكون بنت
الميلا بحنّية : ايه بنت وبنسميها كنوز وبالجمع بعد هي كل كنوزنا بالدنييا ذي كلها صح ان اسمها جنب اسمك كأنها الكوتون كاندي بين الكباب بس معليه
اسر قطب بحواجبه وقال : علي الحرام يوم م تنطقين زين ان اجيتس واعلمتس العنقليزي ذا !
انهارت الميلا تضحك بكل قوتها وهي حاضنه وسادته ، ابتسمت وهي تمسح دموعها وتسمعه يقول : دوم لبى روحتس دووم !
:::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا ادري طولت لكن نكمل بالانستا اذا بخاطركم تقرأون فيه ، واجيكم مستحيل انساكم اول م يكتمل انزل عمومًا هذا هو اذا تبون تجون " Jwuiri " ، لاتنسون النجمة يحباااااني واشوفكم ع خير ببارت جديد 💓💓! )