ليّت اللِذي خَلق العُيون السُود ... خَلق القُلوب الخَافقات حَديد

البارت السادس والعشرين

انهارت الميلا تضحك بكل قوتها وهي حاضنه وسادته ، ابتسمت وهي تمسح دموعها وتسمعه يقول : دوم لبى روحتس دووم !
الميلا بأبتسامة عريضة : تدووم لي يبو كنوز
ضحك بصوت عالي وقال : ابو كنوز !!
الميلا : ونعم !
اسر ابتسم وقال : لا تنامين ! انا جاي
الميلا هزت راسها بنعم وقالت : تم معليك
اسر : ودعناتس الله
سكر بدون م يسمع ردها ، مشى لغرفة عقاب وكان نايم مو اول مره يشوف فيها عضيده مهلّوك لأخر لحظة ، نايم ومن نومته واضح م يبي احد يزعجه ويصحيه ، تقدم بهدوء وسحب اللحاف وغطاه ، باس راسه وانفتحت عيون عقاب بخفه ونطق : علامك يالعضيد ؟ حنّيتك ع حَرمك نفداك !!
اسر ابتسم وضحك بخفه وقال : وانت حَرمك م هي حولك قلنا نعبرك شوي ولا وش تشوف ؟
عقاب بحدة : ابو عايض ! اشوف انك تذلف مني
اسر جلس وقال : نام نام يعقيب نام لك ساعة ولا ساعتين ارتاح
انسدح وهو يبتسم ورجع غمض عيونه ونام علطول ..
" في بيت جديد بيت ماهر "
دخلت الصالة وعينها عليه قاعد يرقى الدرج ، صدت بنظرها وسرعان م ارتفع صوتها تصارخ بكل قوتها ، فز من مكانه وقال بحدة : علاااامتس !!
دانه بصراخ وهي تناقز وتضرب يدينها بالكنب : قطو !! فييه قططووو !!!!
ماهر طاح بطوله يضحك ، لفت عليه وهي تصارخ وكأنه بدأت تتشنج وتنطق بخفه : فوبيا ي ماهري فوبيا !!
مشى وميّل للهرولة وهو رايح لها ، حاوطها ورفعها شايلها بين يدينه وصلها للدرج وهو يقول : سلبستر ! ارجع
وقف القطو يمشي لكلامه اللي افزعها انه باللون الاسود بالكامل ، فوق الفوبيا قطو اسود وفاتها ، اول م لامست رجولها عتبَة الدرج ركضت بكل سرعتها للدور الثاني وهي م تدري وين وجهتها ، كان البيت جميل جدًا وطرازه مودرين مشت للغرفة اللي بالنُص ودخلتها وقفلت الباب بإحكام ولفت وشهقت بكل قوتها وهي تشوف قطوة بيضاء تتأملها ، حسّت راسها واذانيها تمَيل للحرارة طاحت ونملّت رجولها هذي نوبات الهلع اللي تجيها ، مدت يدها لقفل الباب وفكته وقالت بصوت باكي : مااهري !
مشى وهو جاي وتذكر ان قطوته الانثى صاحبة الفرّو الابيض داخل غرفته ، فزع لها وفتح الباب قرب منها وصرخت بـ : ابعععد !!
ماهر ابتسم بخوف وقال : والله م تجيتس ولا تقرب حولتس ي بعد حيي !
كانت تبعده وتضربه وتصارخ ، قربها منه وحضنها بكل قوته ورفعها وهو يقول : انتي معي بهاه والله م تجيتس !
حاوطت رقبته وهي تبكي ، وجهها وملامحها وعنقّها ليدينها كسّاها اللون الاحمر كانت مفجوعة وبقوة ، فوبيا من الصغر ولا قدرت تكسرها ابدًا ، مشى وانسدح وهي متوسدة حضنه تحسّ فيه مثل م يحسّ فيها ، زفرت بتوتر بعد م هدأت وقالت : دخلها بغرفة وسكر عليها
ماهر ابتسم وباس راسها بقوة وقال : ازهلّيه !
مشى وتركها بفراشه ، لفت بعيونها تشوف الالوان المعتادة اللي من دخلت وهي تشوفها " ابيض ، اسود ، رمادي ، وشوي بني " ابتسمت وهي تمسح دموعها ، وتشوفه يرجع لها ، بنص الليل وببيته بس محد له كلمه يدري ماهر انها حَرمه ، بس جمعتهم بالغرفة سوا وبالبيت لوحدهم قبل الزواج العلّني مشكلة ، دخل وحاوط خصرها وشّدها عليه وقال بصوته الثقييل : ننام ؟
اقشّعر بدنها م تعودت من وهي صغيرة تحضن " رَجُل " حتى ابوها يدّوب اللحظات اللي تجمعهم بأحضان بعض ، الحين محاوطها وبقوة تحسّ بأنفاسه تضرب نحرها ، هزت راسها بنفي علطول ، ضحك وقال بخبث : كويس فاهمتن علي ؟
دانه فزت وابعدت منه وقالت : انا وانت غلط غلط غلط !!
ماهر رفع حاجبة وقال : شلون ؟
دانه بصدمة وهي تحضن نفسها : م تزوجنا !! باقي
ماهر ابتسم ع جنب وقال : كاتبين كتّاب لا تهبلين فيني
دانه وهي تشتت نظرها وتصرفه عن نظراته : حتى لو !
سحبها مع يدها واصطدمت بصدره ، ضحك وقال : انضجعي تراي انود !
دانه قطبت حواجبها وقالت بخجل : وش يعني ؟
ماهر باس راسها وقال : نامي نامي يبنت نجد !
دانه تجرأت وباست دقنه وهي تخلخل اصابعها فيه ونطقت : م اقدر انام يولد حايل وانت بهالقّرب !
غمض عيونه وارتخى بدنه وانتظم نفسه بين يدينها ، بين احضانها ، بين صوت تنفسها وريحة عطرها ، حسّ انه نعيم وم يبي يصحى منه ابد ..
" قدام بيت ابو عبدالعزيز "
طلعت تركض وركبت وقالت : جاكم خبر من عقاب ؟
تركي وهو ميت تعب : ايه
الجود : طمني !
تركي مشى لبيت ابوه فالرياض وقال : ابد طيب وبخير ويسلم عليتس
الجود ابتسمت براحة وقالت : كويس !
سكتت لثواني ورجعت تنطق : اسمع تركي
تركي اكتفى بالهمهمة ، كملت وهي تقول : عندي مقابلة الاسبوع الجاي عادي توديني
تركي ابتسم وقال : شكلتس ضيعتي بيني وبين عقاب ! وش فايدته كلميه يوديتس
الجود : تروك ! تعرف عقاب واسلوبه م يخليني حتى اناقشه
تركي : واللي اعرفه بعد ان عقاب كان محّرم عليتس الجوال مره ثانية وهذاني اشوفه معتس وش يدل ؟
الجود ارتخت ورجعت ظهرها ع المرتبة تسمع تكملة كلامه : يدل ان عقاب م يقوى عليتس وانتس احد نقاط ضعفه ! هذا وانا معاشره طول عمري م هقيت ان عقاب ممكن يلين بس انتي جالسة تبنين جدران بينكم لو تروحين وتكلمينه م ظنتي يقوى يقول للجود لا !
سكتت وم ردت طول الطريق وهي تفكر بكلامه ، دخلت بيت امها وابوها بحكم رفض امها ترجع تسكن فالديرة وتركوه كـ بيت صيفي لهم ..
" في سيارة اسر "
وقف عند المحطة وهو يعبي بنزين ، لف لعقاب اللي نايم قدام ابتسم وقال : جعلني قبلك وجعلني م اذوق حزنك ولا اذوق كسرتك يالعضيد ! جعلني م ابكيك ولا تبكيني
كان جالس وفاتح باب سيارته ، رجل برا تلامس الزفلت تحته والرجل الثانية عند الدواسة والبريك ، فتح بجواله السباق وابتسم وقال : تكفى ي عزوز !
فتح عقاب عيونه بهدوء وهو يشوف جوال اسر مثبت ع شاشة المسجل اللي قدامه ، ولف بعيونه وهو يشوف اسر ينزل عشان يدفع ويمشي ، رجع عينه للجوال وشافها ! شاف حَرمه بالعباية البيضاء ووجهها الجميل الانثوي اللي م يحّق لأحد يشوفه غيره ، توسعت عيونه بصدمة وقطّبت حواجبه جنب بعضها دليل فَرط عصبيته ، ولعّت نيران لها فترة خامدة شّبتها بدون رحمة ، تكهربت عروقه وبرزت كان مخيف ومرعب واقل م يقال عنه وحش ! ، سحب الجوال بكل عنف وهو يحسّه بينكسر بين يدينه ، عاد اللقطة وفجأة سواد ، طلعت له كلمة " الفيديو الحالي غير متاح " صرخ بصوته المرعب : اسسسر !!!
قرب اسر من السيارة ونزل براسه وقال : علمك ؟ ويش هو
عقاب بحدة : الجود وينها !!؟
اسر رفع كتوفه بعدم معرفة وقال : لعنتك انت ! وش فيه ؟
عقاب بصراخ : اخلصص عليي !!!
اسر ركب وقال بحدة : عقيب !
ضرب بكل قوته الطبلون قدامه وكمل بحدة : يحييوان !! اذا م تعرف اللي فييني لا تتكلم وانطق وانطقق !
اسر مسك كتوفه بكل قوة وقال : عقيب ! الكلام بالصراخ ومدّ اليد عمره م كان حل !! جربت تسمعها وتشوف وش فيها وتداري خاطرها ؟؟ ولا بس فالح انك تتمّرجل عليها وتبرز رجولتك ع ظهرها !؟
عقاب اشتّب بعد كلامه وقال : تشك برجولتي !!!
اسر رجع يشّد عليه وقال : ولدك ببطنها ! لا تخلي غضب ممكن م اعرف سببه بس الاكيد انه غيرة ! من نظراتك عرفت لا تخليه سبب في انك تكسرها في ولدها وتكسر ظهرك في بكرك ! الجود وطلعت حامل والميلا وصلت لي العلم ارفق يالعضيد ع جودك !
ارتخى علطول من كلام اسر ، من لحظتها حلف يمين م يمسّها بشيء يوجعها زفر النيران وهو يستغفر وقال : طيب بس بكلمها وينها فيه ؟
اسر : مشينا الديرة والله يجيب الخير
مشوا واسر يضحك ويغير الجو وعقاب رغم الآلم اللي يحسّ فيه كان يبتسم لعضَيده ، وتفكيره ليش خانت حُبه وتركت الخاتم اللي يكون اكبر دليل انها حَرمه ، مستوجع وبقوة م يحسّ بالآلم الجسدي اثر الانفجار كُثر الآلم الشعُوري تجاهها ، انهلك وجدًا حضرة الفريق ..
" فالديرة "
تركي وصل وشاف سيارة اسر ابتسم وتقدم له ، دق الدريشة ونزل عقاب وقال تركي : ارحب يفريقنا !!
عقاب ابتسم وباسوا خشوم بعض " سلام الرجال " وقال : البقى ي مرحب وين جود ؟
تركي : فالرياض يحلو ليه ؟
عقاب قطب حواجبه وقال : ايش !
تركي : ايه وش ايش ! في بيت امي وابوي
عقاب ربّت ع كتف تركي ومشى بمعكازه ، اثر رجله المكسورة ضحك وقال : انا والكسور قصة عشق لا تنتهي !
اسر وهو يسكر سيارته بعد م وقفها ورا البيت ضحك وقال : وانا والطعون قصة عشق لا تنتهي !
ضحكوا وهو واقع ، اكثر واحد انطعن اسر لدرجة انه كان بيفقد حياته من طعنة ، وعقاب بالمثل انكسر مليون مره ومستحيل تمر سنة عليه بدون م ينكسر ، تركي مشى ودخل معهم بحكم ان اهله ماهم موجودين والبيت مسكر ، ناصر فز وغطى غزيل وقال : وولد !!!
عقاب نزل راسه ومشى لغرفته بدون م ينطق بحرف ، اسر شهق وقال : اعنبو غييركم انت وعقيب !! كل شوي تطلعوني قدام حَرمكم ويين الغييرة والله اللي عقبتوا يعوال عايض !
تركي مشى وضربه وقال : اكرمنا بسكوتك تكفى مصدع وابي انخمد !
ناصر انفجر يضحك وقال : وش جابك عندنا رح بيت زوجتك !
تركي استوعب وضحك وقال : يخي استحي منهم وخصوصًا امها عجزت افهمها
اسر ابتسم وتكى فالقعدة اللي بالحوش وقال : اقلط يبن راشد البيت بيتك والمحل محلك !
جلس تركي وانسدح ع المركى ونزل شماغه ع عيونه وقال : اكرمكم الله يعيال عمي
ناصر جلس وقال : كيف عقاب ؟
اسر بهمس : قنبلة موقوتة !
ناصر قّرب وقال : افا ليه ؟
اسر : يخوي لعنته معاد فهمت له ! والله م الوم البنت لا هجّت منه !!
ناصر صّب شاهي له ولآسر وقال : الجود ؟
اسر هز راسه بنعم وكمل وهو يقول : تعامل زيرو ! اخلاق زيرو ! مواساة زيرو ! اعنبوها مدري كيف للحين متحملته !!
ناصر ابتسم وقال : حرام عليك ي اسر والله انه عسول !
اسر : عسل طعمة حامض !
ناصر انفجر يضحك وقال وفز تركي وهو يرميه بالقدوع ، ضحك اسر وقال : ادخل المقلط يخوي !
قام تركي ومشى للمقلط ، لف اسر ع عقاب اللي جاي وجلس بهدوء وهو بالقميص الاسود والشماغ الاحمر كامل ، ابتسم وقال : وش علمكم ؟
ناصر : يشكي منك عشان الجو..
كتمه اسر وهو يضحك برعب وينطق : يبوي نسولف سوالف عادية
ناصر لف بعيونه لآسر اللي يتحلف فيه ، صدّ وهو يضحك وقال : وش مسوي يعقاب ؟
عقاب وهو ماهو فاهم شيء قال : ويش هو ؟ وش تهرجون فيه انت وياه
اسر وهو يبي يطير الموضوع : سلاااامتك يالعضييد !
عقاب صدّ وقال : وين حريمكم ؟
ناصر : داخل
اسر قام وقال : ببدل واسلم عليها واجيكم
دخل اسر ولف ناصر ع عقاب اللي ناداه ، ناصر : سمّ ؟
عقاب وهو معقّد حواجبه ونظرته مرعبة : وش كان يحكّي ؟
ناصر : يقول انك شفت شيء م عجبك او انه جاك علم عن الجود و..
قاطعه عقاب وهو يقول : لا تقول اسم محارمنا يمسلم ! انت تشوفني اقول اسم حَرمك !!
ناصر : ايه بس يعقاب حنّ اخوان م بيننا هالسوالف والغيرة ! عيب يالصغير عيب !
عقاب بحدة : انتوا ليه م تفهموني !؟ ليه محد يفهمني ! صعب عليكم ولا وش !!
ناصر بنفس الحدة : انطق طيب !! خلنا نفهمك يالجدار !
عقاب زفر بعصبية وهو يضحك وقال : جدار ؟ وشلون تبي تفهمني وانت تقولي جدار !
ناصر : لا تصير حساس واخلص علي لا اشوتك
عقاب : انا يخوي م اداني الحب واشوفه ضعف وبشوف عيني شفت كيف ضعفوا رجال ضباط برُتب عشانهم تزوجوا !! صرت اخاف اقع له ويآسرني طول عمري ! واللي خفت منه صار من شفتها فالعزبة ذاك اليوم وهي تتهوى من الحّر ، لعبت بموازيني وقلبتني فوق تحت ! طلعت مهمتين بس عشان انسى الشعور بس م قدرت شفتها تحضن خالها !
قرب من ناصر وعيونه بدت تتغورق وكمل بصوت مهزوز : خالها ي نويصر والله خالها ! ليه احترقت قدام عشر الاف عسكري !!! وليه خرجت عن طوري محد يدري تعبت لدرجة اني نمت وطنشت الناس كلهم ! جيتها اليوم اللي بعده بلهفة مشتاق وجيت بورد ! اللي ولد بين الشوّك والحرارة والبر والبل والحياة القاسية !! وكبر ومشى بين الدم والرصاص والجثث يدخل عليها وبيده ورد ؟
ناصر تكى وهو ميت حب من المنظر عقاب واقع وبشّدة ، ابتسم وقال : اسلم كمل !
عقاب عدّل جلسته وقال : حضنتها وشمّيت عنبرها ومسّكها وياسمينها ! واشهد بالله ان الورد قدام حضرتها ماله مقام !! حبيتها واعترفت بكل شيء طحت بين احضانها والحين اشوفها قدام الملايين فالسباق من اجانب وعرب ورجال حرام وبنات حرام بدون نقاب !! وبكامل زينتها !
ناصر فز وقال بحدة : ابو عايض !!!!
تركي من المقلط طلع وقال : ابوو رااشد !!
عقاب مسح وجهه وشنبه واستغفر وقال : هذا اللي فيني ي نويصر
ناصر بحدة : وش تقوول انت !!
تركي تقدم ولف وجه عقاب وصفقه بكل قوته وقال بصراخ : م اسسمح لك تهيين بأختي عشانها زوجتك !! والله م اسمح لك تعقب تعقب يالحرمة م سوت كذا !! اختي انا اللي موصلها بنفسي للمستشفى وبعده لأهلي !!!
ناصر فز ودفع تركي وقال : تركي استهد بالله يخوك حنّ م عندنا علم ولا نقدر نكذب عقاب !!
احلام ضحكت بسخرية وقالت : والصور ذي لمين ؟
لفوا للصوت وكانت بقميص النوم والروب بعدّم خجل ، صدّ عقاب وقال بحدة : ابو تميّييييم صدز !!!
تركي صدّ بصدمة وهو يقول : يويلي ويلاه !!
ناصر بقهَر : لا ياربي اخذ اثم ع عجوز قريح يلعن ابو الحالة !!
اسر طلع وهو يسمع اصواتهم ، هو دخل وشافها نايمة باس راسها وبّدل وطلع مشى وشاف احلام بنص الحوش وبالمنظر نفسه شهق وضرب راسه فالباب وهو يقول : ابو كنوز ! العلم ويش هو يرجال !!!!
احلام ضحكت وقالت : الجود رايحة للسباق وبالشكل ذا
نزلت الايباد حق سديم ومشت داخل ، عقاب لف بهدوء وفز للأيباد قبل يطفي ، صار يقلب ويشوف الصور بشكل واضح وقريب هي والله انها هي وبالشكل الموجّع ذا ، مشى تركي يشوف معه لف بالايباد علطول وقال بحدة : وللدد ..، تركي امسك شوف والله لا يندق وجهك يكلب
تركي قرب وقال : اقول هات بس
صار تركي يشوف الصور ويحلف بالله انه متفشل وم يدري وين يودي وجهه بعد اللي صار ، لف علطول وباس راس عقاب اللي دفعه وقال : وخر مني !
تركي بصدمة : والله العظيم اني منزلها بعبايتها السوداء ونقابها !
عقاب وهو يكّبر ع الصور شّد ع الايباد وقال : وخاتمي !
تركي قرب وقال : خاتم ؟
عقاب هز راسه بنعم وقال : خاتم زواجنا اللي م انتزع من يدي هذا وانا فالميادين ! وهي باردة مبردة تسوي كذا !! وينها فييه وقسم بالله لا اكسر البيت عليهاا !!!
اسر بحدة : عقاب صّل ع النبي !! وش قلنا فالسيارة
عقاب جلس اول م حسّ بالهبوط في دمه وضغطه ، فزوا له يمسكونه ، نزل عكازه جنبه وانهار ! انهار عقاب يبكي بين يدين اخوانه ، ضحى سمعت وهي ماره من السيب وركضت علطول وهي تقول بصوت باكي : يمهه عقيييب وشفيييك !!
تركي فز ومشى وطلع برا البيت ، تقدمت له وهي تبكي علطول معه ، حضنها ودفن وجهه بكتف اخته ، بكى بشكل مرعب يشاهق كأنه طفل وهي ترّبت ع ظهره وتبكي بخفه ، اسر عضّ شفايفه بقهَر وقال : حرام دموعك يالعضيد !!
شّد ع قبضته وهو يقاوم دموعه ، ناصر مصدوم عقاب شلون ضعف كذا طلع كلامه صحيح مية بالمية ! الحب يهلك ويضعف وهذا اللي قاعد يصير لعقاب ، ضحى وهي تبكي ابعدت وجهه وهي محاوطته بيدينها وقالت : من اللي مبكيك جعله بعمري !؟
عقاب وهو يضرب قلبه ويقول : اوجعتني بحبها !! بصدّ بس ماني قادر حبها اهلكني !! اهلكني يوضيحي
ضحى حضنته وهي تضحك وتقول : اخيرًا طحت يعقاب وذقت الحب !
عقاب وهو يبتسم بخفه ويمسح دموعه اللي بللت دقنه وشنبه : ذقته وطعمه مُر يوضيح ! عساتس م تجربينه الا مع اللي يصونتس !
اسر ابتسم وقال : تسمح لي اقول ابيات ؟
عقاب وهو يبعد ضحى ويجلسها جنبه بحضنه ، ابتسم وقال : شفتوا انهياري ولا يطلع من بيننا واسلم يبو كنوز
ضحى قطبت حواجبها وقالت : كنوز !!!
ناصر : ايشش !! وانت تعال من تميّم !؟
عقاب : حَرمي حامل والظاهر ان بكري ولد بسميه تميّم ع معاليه سيدي الله يرحمه ويغفر له
اسر : الفريق اول تميّم ؟
هز راسه بنعم وهو يشوف فرحة اخته فيهم وهي تضحك وتمسح دموعها وتقول : خربطتوا مشاعري !! فوق الدورة !
فزوا كلهم وضحكت وقالت : اووب اسفه !
اسر بحدة : بنت ! اوزني حكيتس !
عقاب بضحك : اسلم يبو كنوز
اسر عدَل جلسته وتكى ع المركى وقال :
تباً لقلبي احبك واذلني
‏اسعى لوصلك وانت لا تسعالي
‏عجباً لعقلي كيف لايدرك
‏ان الحبيبُ محالاً ان يصفالي
‏احببتُك حباً يفوق طاقتي
‏لاغبت عن عيني ولا عن بالي
‏وددتُ لو تشعر بما اشعر به
‏تاللّه ان تشفق وترحم حالي
‏تمنيت قُربك والاحلام تبخرت
‏اوجعت قلبي جعلك السلالي !
-
ضحكوا كلهم وقال عقاب : جعلني السلالي بدالها تكفى يالعضيد !
اسر انفجر يضحك وقال : يووه معاد معك طّب ولا طبيب !
ناصر ابتسم وهو بيبدأ يتسيمج : الا الطبيب انا وشوفني معه
ضحى بقرف وهي تخّزه : يعوووه روح موت !!
ناصر وهو يسحبها مع شعرها بخفه : يكلبه حاقدة علي !! ولا عشان سهم
ضحى صدت وهي حمّرت بدون سبب : ايش !! لا طبعًا
اسر قطب بحواجبه وقال : سهم ؟ ولد سلطان !
ناصر : ايه جاي يخطب بضحى
عقاب وهو يقوم بيروح ينخمد : والله ونعم الرجال ! وش قال ابوي ؟
ناصر بحدة : رفضنا طبعًا !!
اسر فز وقال : اقطعّ واخس !! لييه ؟!
لفوا لعقاب اللي يمشي وهو يقول : لحد يصحيني للصلاة
ناصر : ابوي بيفجر فيك اذا جات اربع وانت باقي م صحيت
عقاب : خله اربّني اموت واشيل الحمل اللي علي
ضحى بحدة : عقاب وجع فال الله ولا فالك !!
اسر : العلم ويش هو ! انطق
ناصر : الزفت ذي صاير بينها وبين سهم شيء عجزت افهمه وهو يعطيني اجابات مبهمة !!
ضحى بصراخ : يككلب !! م صار بيننا شيء شافني وانا طالعة من المقلط واكيد قال يالبييييه ! ذي سنعة وابيها مرتن لي !
انفجروا العيال يضحكون عليها ، زفرت بعصبية وقالت : اسر !
اسر وهو ميت ضحك نطق وقال : لبيه يوضيحي ؟
ضحى بحدة : انصفني وانت تضحك !
اسر : شلون انصف ؟ تبيني ازوجتس سهم ؟
ضحى هزت راسها بنعم وقالت وهي منزله راسها ومشابكة يدينها : مو عشان شيء بس انت وعقاب تقولون انه رجال ! وانا اثق وبقوة فيكم
لف ناصر لها وكملت تقول بضحك : يارب سامحني ع الكذبة
طاحوا مره ثانية يضحكون وهي معهم ، بعد ثواني نطق ناصر وقال : تدري وشهو يقول ؟
اسر وهو متكي : وش ؟
ناصر وهو يقّلد سهم : باخذها بحّب خشوم ولا كسر خشوم ! وييلل امه م يستحي
اسر انفجر يضحك وقال : والله اللي وسبعة انعااام يبو سلطان !
ناصر ضرب راسه وقال : انا بروح اكسعَ لي شوي قبل يجي التفجير من الوالد
مشى ودخل داخل لغرفته مع غزيل ، ضحى : بتوافق ؟
اسر رفع يدينه فوق راسه وغمض عيونه وهو يقول : الله يجيب الخير يبنتي ادخلي انخمدي
مشت تركض وهي متفائلة بردّ عقاب واسر ع سهم ، عمّ الهدوء ودخل تركي وشاف اسر نايم فالحوش ، ضحك ومشى بهدوء ودخل وفتح باب غرفته وشاف اخته نايمة ضحك وانسدح جنبها وهو يقول : مرتاحة يتبن ع السرير !!
الميلا حضنت تركي وحاوطها وهو يضحك ، ناموا اهل بيت ابو فهد ع هالحال ، الا عقاب اللي م طّب عينه النوم عجز ينام ، سحب جواله وفتح صورتها بالسباق نقلها لجواله من الايباد وحذفها منه ، رفع عينه اول م وصله اتصال منها ، تنحنح وقال : الو ؟
الجود فزت وهي ترجع شعرها ورا اذنها : عقاب ؟ شخباركم ؟
عقاب بحرقة تكلم وقال : جود ؟ شخبارك ! شعلومك والخاتم اللي مرمي فالغرفة !؟
الجود برعب : انت فالبيت ؟!
عقاب : انا استاهل صح ؟ كل اللي سويته كذا تجازيني واستاهل م طعّت عقلي باللحظة ذيك واعترفت وعطيت م وراي ودوني واخرتها ؟ اطلع بدون علم عقاب ووجهي مكشوف وعباية فاضحه !
انهارت تبكي بصمت وهي عارفه انها غلطانة مسحت خشمها الاحمر ودموعها بعنّف وقالت : والله ؟ كل م زانت بيننا هربت للمهمات تحسبني م اقرأ !! كل شخص يبي يصفي ذهنه وشعوره وينسى يروح لمهمات وهذا اللي انت تسويه ! م عمرك فكرت تسمعني هذي هي شخصية الجود وانا راضية باللي سويته وجدًا ! وم زلت زوجتك وم زلت احبك..
عقاب بحدة : احلفي ؟ بعد م احرقتي قلبي بالنار تجين تقولين احبك ! اجمعي رماد حُبي لك اذا قدرتي !!
الجود بكت وقالت بحدة : وش بتخليني بنص الطريق !! وانا حامل بولدك !!
عقاب ببرود : سهلة ولدّي بالسلامة واخذ ولدي وتوصلتس اوراق الطلاق لبيت ابوتس ولا تشيلين هم ! عقاب م فهمتس ولا سمع لتس ليه مجبرّة عمرتس فيني ؟ واسألي نفستس بعد قولي هل الجود عمرها سمعت لعقاب !
الجود انهارت تبكي بحرقة وقالت : عقيب لا تخليني تكفى !!
عقاب شّد ع المفرش تحته وهو يقول : ليه ي جودي ليه !! ليه تسوين ذا كله ! ليه صرتي كذا !! الله يلعني من يوم عطيتس الجوال والله ياخذني يوم فكرت اعترف لتس حرقتي قلبي الله يحرق قلبتس !!
الجود ابتسمت لهلال وهو يوصلها لبيت ابو فهد ، نزلت وهي تبكي وتقول : طيب نتفاهم ؟
عقاب : وش بقى ؟!
الجود وهي تمشي وتوصل قدام الباب حق غرفته ، فتحته بهدوء ودخلت وسكرته وراها مشت للداخل وقالت : اسمعني
لف لها ولا شعوريًا ركض وحضنها بكل قوته ، شهقت برعب وهي تحاوطه بكت علطول وقالت : عقيييب !
عقاب كان يتلمس كل انش فيها ويشّدها عليه ، دفن وجهه بنحرها وهو يبتسم بهدوء طبع قّبلاته بهدوء ع نحرها ، حاوطت ظهره وشّدت عليه وقالت : بتسمعني ! تكفى لا توصل للطلاق يعقاب لا تنهي اللي بيننا..
ابعد وهو يسحبها له يقّبلها بكل شعور قهر وحسرة وغضب فيه ، طلع حسرته بالقُبل والاحضان وم قصّر ابدًا ، يدري لو يسمعها بينفجر عليها وبتنتهي قصة حُبهم قبل تبدأ ، دخلها حضنه رغم اغلاطها بحقه وهمس بأذنها وقال : اخذ حقي بالطريقة ذي وبعدها كل واحد يشوف طريقه
ابعد ومشى ، لبس ثوبه وطلع من الغرفة تاركها تحضُن المفرش ع جسدها وتبكي ، تبكي بحسرة وحرقة ع اللي يصير لها وتعلن تحت انفاسها عساف والاتفاقية ، هي م عرفت ان احلام السبب الرئيسي بتولّيد الغضب واشعال النيران داخله من جديد لو تدري ذبحتها ولا ابّت لعيالها ! غمضت عيونها وهي تستنشق ريحته جنبها ، شّدت ع المخدة وقالت بهمس : اقلّها انتي باقي بسريره وزوجته وبأحضانه ويعطيتس من البوسات نهر جاري ! بتزيين والله بتزييين وبسعى عشان تزيين لو اضحي بعمري
سكتت لثواني ونطقت بآبيات جميلة وقالت :
ان قالوا لاجل عين تكرم مدينه
ماني بقايل لجل عينه تكرم مداين
وشهي المداين عند رمشه وعينه ؟
الا تطيح ارقاب عند عقاب وتعتق رهاين !
-
نامت بعد م قالتها وهو واقف عند الشباك اللي عند راسها ، نفسه الشباك اللي شافها غامد منه ، ونفسه الشباك اللي طلعّ وولعَ بغيرته لأول مره ، سحبّ دخانه وهو يستنشقه ويزفره ابتسم وقال :
ياواحدٍ جابك الله حلم .. و أعجوبه
الأرض ماتليق بك خذ موطنك صدّري
قبلك حياتي ترى ماهييييب مرغوبه
وشلون جدد وجودك رغبتي ؟ مدري
عن عيني الناس ملغيّه ، ومحجوبه
ماشوفك إلا سماي وكلهم حدري !
-
فتحه بهدوء وهو يشوفها نايمة براحة ولا كأنها توو خلفت مشاعر وهدمت جدران قلبه ، نايمة بريئة من ذنب اقترفته بحقه وحق قلبه ، جلس بعد م سكر الشباك ومشى للمسجد ، يبي يشكي همومه كلها لربه تعب من كل شيء ، واتجاه المسلم عند الضيق والشّدة والضياع ، ربه ! والنعم بالله ، توضئ بمساعدة الجدار هو فجأة قرر يمشي بدون معكازه ، صح انه بجانبه لكنه يخلص اموره بدونه ، دخل وفرش سجادته وصلى ، خلص صلاته وطلع مشى وجلس عند عتبة بنُص الحارة وقال :
يا دعوتي باوّل وتالي صلاتي
ويانيّتي ما دام بالحب نيّه
ياحلم صحواتي وغفوة مباتي
ويارغبتي من بين كل البريّه
أحاول اجمع في غيابتس شتاتي
بعضي معتس عيّا يفارق خويّه
أرواحنا بالحب متعانقات ِ
وقلوبنا بالشوق والوجد حيّه
وشلون تقوى سيف زينتس عصاتي
يا بو عيونٍ سودٍ كلها جاذبيّه
خذ من حبيبتس كل عمري وهات ِ
بلسم جروحي يا حبيبي عطيّه
-
لملم وجهه داخل يدينه وغمض بقوة وقال وهو يضحك بخفه ع حاله : قالوها قبلي عشان اشوف ان محبتتس تكسّر بخاطري والله لا اقفي عنتس استغفرالله !
كان يتأمل الشمس اللي بدت تظهر وينتشر نورها بالأرجاء ، اصوات الاذان والناس اللي طلعوا من بيوتهم يلبون الاذان ، مشى معهم وهو يشوف اسر وناصر وتركي مع بعض والواضح له ان اسر يهاوش ويتضارب مع تركي ، ابتسم وحط شماغه ع كتفه ودخل يصلي مع الجماعة فالمسجد ..
" قبل عشرين دقيقة "
ابو فهد صحى وطلع ولبس جزمته من عند بابه ، لف بهدوء وهو يسمعها تقول : تراهم م امسّوا بدري عشان كذا بالهون عليهم !
ابو فهد استغفر ومسح وجهه ولحيته اللي كساها اللون الابيض ووصلت لمنتصف صدره ، نطق بحدة : واضربوهم عليها لعشّر !!
مشى وتنهدت ام فهد ، هي شافت عقاب طالع من البيت وهي برضو م جلست معه من جاء تحلفّ يمين انها بتكمل سنة من اخر مره جلست جلسة مطولة تسمع ولدها عقاب فيها ، تدري من عيونه انه يحتاجها وبقوة واجزمت بقرارها وانا بتشوفه اليوم وتسمع له ، دخلت دورة المياه تتوضأ وتجهز لصلاة الفجر ..
" فالحوش "
طلع والجو لطيف مشى بعكازته ينزل الدرج البسيط اللي تسّوى من الطين ، لمح اصغر عياله نايم وهو قاعد تنحنح وقال : اسر !
كان نايم تعبان كمَل فوق الثمانية واربعين ساعة ، قرب ودقه بخفه بالمعكاز وقال بحدة : اسيّيير !
م كان من اسر جواب والمعروف عند ابو فهد قّلة صبره ع عياله ، ضربه بكل قوته ولا رحم جسده الهزيل التعبان ، لأجل الصلاة يهون كل شيء ، فز بكل قوته وقال وهو فاتح عين ومقفل الثانية : لبيه !!!
ابو فهد بحدة : الصلاة يولدي الصلاة !
اسر بآلم وهو يفرك عيونه : ابشر يابه ابشر
مشى ابو فهد وقال بحدة : وين اخوانك !
اسر وهو يمشي ويترنح ، فكَ اول ازرار ثوبه ونزل شماغه وطاقيته وهو صّدع كيف لا وهو نام بالثوب ، نطق وقال : داخل كل واحد عند حَرمه
ابو فهد : ادخل وقّوم نويصر وانا بروح لعقيب
اسر ابتسم بخفه لأبوه ودخل ، ضرب باب ناصر مره ومرتين وثلاث ، طلع له وقال بحدة : نعم ! امدا الفجر يأذن !؟
اسر ضحك وقال : شرّع اللي يسهرون كله من عقيب والفضفضة جعله العافية
ناصر طلع لأبوه ومنها يتوضأ برا ، دخل للغرفة وتوسعت عيونه بصدمة وقال : ابو كنوز !!!
تركي فز وهو كان صاحي وقال : ابو رااشد !!
الميلا فتحت عيونها بكسل وقالت بصوتها الناعس : اطلعوا برا وتعزّووا برا !
اسر بحدة : اعنبو غييرك وش تسوي بسريري !
تركي بنفس الحدة : شكلك ناسي انها اختي !؟
اسر بصراخ وعصبية وانفعال مرعب دليل كبير لغيرة عيال عايض : شكلك انت اللي نااسي حديث رسول الله صلى الله عليه وسلم يوم قال مروا أولادكم بالصلاة وهم أبناء سبع سنين واضربوهم عليها وهم أبناء عشر وفرقوا بينهم في المضاجع !! وركز لي ع اخر شيء !
الميلا بصدمة : اسر خير ؟ اخوي ترا اخوي !
اسر بحدة : انتي انكتمي !! حتى ولو انكم اخوان الرسول وصّى بتفريق الاخوان فالمضاجع !!
الميلا توسعت عيونها وقالت : انا انكتم ؟ طيب
صّدت ورجعت تنسدح وغطت نفسها بلحّاف اسر ، تركي قام وقال : اسر مالك داعي !
اسر بعصبية : انطم !
مشى تركي طالع من عندهم ونطق اسر وقال : راجع لتس !
الميلا بخفوت : يستحسن م تجي ! ماني ناقصتك صراحة
طلع وتركها وراه قفل الباب ومشى يلحق تركي اللي بدأ يستفزه واسر يتضارب معه ..
" في بيت ماهر "
صحى واول مره يشوفها بصباحه ابتسم وقال : والله انتس الصباح وجمّل ربي صباحي فيتس !
فتحت عيونها بهدوء وقالت : صباح النور بنام شوي
ماهر : ابد خذي راحتتس طالع انا
م ردت ومشى دخل الحمام توضأ ولبس ثوبه وطلع صلى وخلص وطلع من البيت ماشي للدوامه ، صحت وابتسمت وقالت : كويس طلع
مشت تتختل ووصلت للباب وفتحت نصه وشافت القطاوة نايمين قفلت عليهم وتقشعّر جسمها ، مشت ونزلت واتصلت ع الجود فيديو ..
" في غرفة عقاب "
انضرب الباب بكل قوته من ابو فهد ، قامت بخرشة وقالت : مييين ؟!
ابو فهد بحدة : جود متى جيتي ووين عقاب يبنتي ؟!
الجود لفت بعيونها يمينها ويسارها وتذكرت انه طلع بعد اللي صار ونطقت : عمي عقاب برا مو موجود وجيت امس مع خالي
مشى ابو فهد وهو حسّ ان عقاب سابقهم للمسجد ، لفت ع جوالها اللي يدق واخذته وردت وقالت : اووه مروقة ؟!
دانه بصراخ وخجل واضح من ملامحها المتورّده : نممت معه !!
الجود توسعت عيونها ولأول مره تفكر بعيد ونطقت بصدمة : سويتيها معه قبل الزواج !!!
دانه صرخت وقالت : هاااا !!! غييييرتس عقاااب يتبن وش النييية ذي يممه منتس !!
الجود كحت بفشلة وقالت : وشدراني فهمت من كلامتس كذا !
دانه : وشخباركم ؟
الجود تنهدت بضيق وقالت : ابد ماكلين تبن لّين شبعنا
دانه شهقت بقوة وقالت : يمه ليييه ؟!
الجود : دنو ولا كأنتس عارفه اني جيت السباق وصار اللي صار
دانه بحدة : يب ومعليش الخطأ خطأتس انتي ! عطاتس م وراه ودونه وتجين السباق بالشكل ذاك م امنعتس وبكيفتس لكن انتي يطبق عليتس مثل اللي يجي من ايده الله يزيده !
الجود زفرت بملل وقالت : ابيتس عون جيتيني فرعون !
دانه : جوود ! معليش والله انتي طيرتي عقاب من يدتس !! تحملي اللي بيجيتس
الجود قامت وقالت : خلاص باي بقفل
دانه : براحتتس وفكري زييين قبل تكلمينه
سكرت الجود بدون رد ورمت جوالها ع المفرش ، لعنت عساف وللمره المليون ومشت دخلت الحمام واخذت دش سريع وطلعت وتزينت وخلصت ومشت برا تلحّق الفطور ولعل وعسى تشوفه ..
" فالسوق "
الكل منتشرين وعيال عايض في دكان ابوهم يشوفون احوال السوق من فترة م رجعوا له ، عقاب وهو يتعصّب بشماغه : يابه البكرة ظنّي انها تلقحت !
ابو فهد حكّ لحيته وقال : ليه فكيتوا البعير عليها ؟
عقاب هز راسه بنعم وقال : عكاشي مكلمني وعطاني العلم
ابو فهد ضرب كتفه وقال : ها انطلق يعقيب رح شوف الحلال واذبح لنا شاه من الشبك اختار السمّان امنعني من الضعاف !
عقاب اشر بأصبعه ع خشمه وقال : ع ذا الخشم يبو عقاب
مشى وطلع ووصل لبوابة البيت وهو يسمع اصوات حريمهم فالحوش دخل وقال : يمه صوتكم جعلني فداكم !
لفت لصوته وهي تحضر مع ضحى ، ونطقت ضحى وقالت : عقيييب !! تعال افطر
عقاب كان يدري بوجودها بس م عطاها حتى النظرة وقال : تفطر معكم العافية انا فالعزبة الغداء ينتظرني وين البندري ؟
البندري طلعت بالخُبز وقالت : لبيه ؟
عقاب : اعجلي الحقيني بتجين معي
البندري ضحكت بسخرية وقالت : هاهاهي !! وزوجتك وش فايدتها
عقاب بحدة : بنت !!
البندري فزت برعب وقالت : ع خشمي انتظرني احشّي لي خبزه واجيك
عقاب : خلصي
طلع وصدّت بحزن ودموعها بعيونها ، عضّت شفايفها بحرقة وقالت بهمس : نوني اتركيه انا بروح
البندري وهي تلبس برقعها والخبزه متوسدة منطوقها ، ابعدتها وقالت : ايييه عشان يذكيني بدال العنز وخري بس !
الجود بحدة : يختي بيني وبينه ! اجلسي انا اروح
مشت الجود طالعة وفتحت البوابة وشافته يدخن ومطّلع راسه من الونيت ، ركبت ولف عليها زفر بعصبية ورمى زقارته وقال بحدة : انزلي !
الجود بتوتر وربكة : م بنزل
عقاب : جود !
لفت عليه وقالت : عقاب !
صدّ وزفر بعصبية وقال بكل حرقة ابيات حسّها توصف حاله وبقوة :
خليني ساكت انا كلي عتاب
خوفي اجرح قلبتس لحكيت
لا تسأليني عن الزعل والاسباب
راجعي افعالتس ان حسبتيني نسيت
عندي سؤال واتمنى منتس جواب
لو تبادلت الادوار بيننا رضيتِ ؟!
-
زفرت بضيق وقالت : اسفه !
عقاب : انزلي ! ولعّاد تشوفتس عيني وافهميني وابعدي عني
الجود قربت وتمسّكت بثوبه وقالت : عقيب ! افهمني انت بعد افهمني
حاوط خصرها وشّدها عليه وقال : بوجعتس ! والله بوجعتس وانا م ارضى عليتس دقّ الشوكة !! ابعدي واتركيني ان زان الخاطر رجعت وان عافتس الخاطر اقفيت !
شهقت ونزلت دموعها بحرقة ومشت بعد كلمته " وان عافتس الخاطر اقفيت " دخلت البيت ومشت لغرفتهم وهي تبكي ، صدّ وطرق بوري وطلعت له البندري تركض وركبت وقال : انا اوريتس !!
البندري ضحكت وقالت : حبيبي مالي شغل نشبت وحلفت م اطلع
عقاب : انطمي !
مشى للعزبة هو والبندري عسّاس الغداء اللي بيصير فيها ..
:::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد ، خفيف لطيف ويعتبر طويل ادعموا ولا تنسون النجمة انا فداكم ! اشوفكم ع خير ببارت جديد 💓 )