ليّت اللِذي خَلق العُيون السُود ... خَلق القُلوب الخَافقات حَديد

البارت السابع والعشرين

صدّ وطرق بوري وطلعت له البندري تركض وركبت وقال : انا اوريتس !!
البندري ضحكت وقالت : حبيبي مالي شغل نشبت وحلفت م اطلع
عقاب : انطمي !
مشى للعزبة هو والبندري عسّاس الغداء اللي بيصير فيها ..
" فالرياض تحديدًا بيت ابو عبدالعزيز "
عبدالعزيز دخل بعد صلاة الظهر وقال : يبه بنمشي الديرة ؟
ابو عبدالعزيز رفع عيونه لولده وقال : ليه وش العلم ؟
عبدالعزيز جلس وسحب شماغه من ع راسه وحطه ع الكنب جنبه ونطق : م شفت القروب !
فتح ابو عبدالعزيز وشاف رسالة عقاب وكان محتواها يعزم الجماعة كلهم ع ذبايح لسبب حمّل الجود وبمناسبة سلامة عقاب ، ابو عبدالعزيز ابتسم وقال : لا بالله بـ نلبّي الدعوة هذا عقاب ابو تميّم ماهو حدن ثاني !
عبدالعزيز ضحك وقال : اشهد بالله ! الا يبه
لف ابو عبدالعزيز بعد م سكر جواله وقال : سمّ ؟
عبدالعزيز : سمّ الله عدوينك م كلمت امال ؟
ابو عبدالعزيز : لا بالله بس الليلة ان شاءالله نتمم فالعزبة وشقولك ؟
عبدالعزيز بحماس : تم !!
ضحك ابو عبدالعزيز ودخل عبدالهادي وقال : بنمشي !
ام عبدالعزيز دخلت وراهم معصبة وقالت : اعجبوا ابطيت ع اهلي !!
ابو عبدالعزيز : يووه امشوا سعاد بتنجلط لو تتاخر دقيقة وحدة ع عايض وعياله
ام عبدالعزيز شهقت بقوة وقالت : كأنه ودك !!!
عبدالعزيز انفجر يضحك وقال : م جاتس الا العافية امشي
طلعوا ومشت امال ولف لها عبدالعزيز بحدة وقال : ايوه ؟ وعسى الشيخة تبي تطلع بالعباية الوردية ؟!
امال توسعت عيونها بصدمة وقالت : عزيز ! لا احسن تتدخل !!
عبدالهادي لف وقال : عزيز وش تبي فيها ! تلبس اللي ودها
عبدالعزيز بحدة : يبه !!
ابو عبدالعزيز صدّ وقال : مالي خلقكم وراي خط
امال طلعت لسانها تقهره ومشت ورفعت شيلتها ع راسها ، استغفر ومسح وجهه وشنبه وقال بهمس : عزّ الله م بيعدلها الا ابو سالم !
مشى وطلعوا الين وبيسان يركضون وشعورهم تلعّب بها الرياح الجافه والحارة فالرياض ، ركبوا السيارة واتجهوا للديرة ..
" في قصور مساعد "
حسين مشى ونطق : كل شيء جاهز لبعد اربع ايام ؟
رئيسة الخدم عذبة : ايه نعم طال عمرك !
حسين هز راسه بمعنى " فهمت " ومشى وطلع ، هو جاته توصيات من الشيبه عايض " ابو فهد " عسّاس ثاني يوم رمضان بيكون الفطور هنا ، من العادات والتقاليد عند ابو فهد اول فطور لازم يكون في بطحاء عزبته ، وكلم حسين شخصيًا وقاله انهم بيجون ثاني يوم يغيرون جو طبعًا توصيات ام فهد وغالية اللي م يرفض لها طلب ابدًا ..
" فالعزبة ع الساعة ٢ الظهر "
عقاب برَك فوق العنز وقال بحدة : بندري !
البندري وهي تحزّم بطنها بالقميص نطقت : لبيه ؟
عقاب : امسكي يدينها ورجلينها وياني وياتس تفلتين !
البندري ضربت صدرها وقالت : افا علييك يبو تميّم !!
جلست جنبه وضحك عقاب وهو لطالما حبّذ انه يطلع من ضيقته مع البندري اللي م تكترث ابدًا ولا تسأل ولا تضايق اهم شيء ترسم الابتسامة ع اللي معها وانتهى ، هو يحبّ ضحى بس ضحى تداري واجد وتزيد الهم همّين من كثر م تعيد وتزيد بالسالفة وم تسمح للشخص اللي معها ينساها لمّا يفضفض ويتخطاها تمامًا ، مسكتها بعزّم وبقوة وشافت عضيدها واخوها وسندها يكبّر ويسمي بالله ويذكي الشاه بين يدينهم ضحكت وقالت : ع تمايم الشيخ تميّم ان شاءالله
عقاب والدم انتثر ع ثوبه ووجهه ضحك وقال : وانتي حاضرة يالشيخة !
قامت البندري تساعده ، علق الحبل فالعضّه وبدأ يسلخ الذبايح ، لفت له وقالت : ادري انك تعرفني م احب اسأل
عقاب لف عليها وقال : ايوه ؟
البندري بتوتر : فيه شيء بينك وبين الجود ؟
عقاب كان عاضّ ع السكين بين شفايفه وهز راسه بنفي ، سكتت لثواني وكملت تقول : طيب ليه دخلت تبكي ؟
عقاب رمى السكينة فالصحن عند رجوله وقال : بندري البخي !
البندري هزت راسها بنعم وقالت : ابشر
مشى عند الوايت يغسل وجهه ، فتح الصنبور وانتشر الماء ع يدينه وتحّول للون الاحمر اثر الدم اللي بيدينه ، غسل كويس ونثره ع وجهه وشنبه وعوارضه ، دعى اسمها وهو يقول : بندري المناديل !
مشت له وقالت : اف شفيك كذا صاير ؟ الله يكون بعونها مزيييييون !
ضحك وهو يمسح وجهه ولحيته الخفيفه وشنبه الكثيف المرتب حوالين شفته ، مشى للشبك ودخل وحلّب الناقه وشيّك ع البكره وطلعت فعلاً ملقحه ع كلام عكاشي ، طلع بسطل الحليب وقال : بنت !
مشت له وهي تركض وقالت : اف اهلكتني وش ؟
عقاب وهو رافع الجوال لأذنه يتصل ع ابوه وبيده الثانية السطل المليان حليب والرغوة طالعه منه ، نطق وقال : الحليب امسكيه !
البندري تلثمت وقالت : وعوه يارب لك الحمد والشكر !!
مشت واخذته ونزلته عند قعدة الرجال ، لفت عليه تسمعه يكلم ابوها ركضت وقالت : عطني اكلمه
عقاب : ابشر ..، لا جعلني فداك خلصت كل شيء ..، اسمع يابه البندري تبي تحاكيك
مد الجوال لها ورجع يدخل الشبك بتوصيات من ابوه ، نطقت وقالت : يبه
ابو فهد بحدة : نعم ي بندري نعم !
البندري ضحكت بخفه وقالت : اسمع يبه تكفى لا تقولي لا
ابو فهد لف ع صقر اللي ضاع بعد صوتها ، له فوق الشهر من اخر مره قابلها وسمعّ حكيها ، صدّ من لف عليه عمه وقال : امري يالعنقود
البندري بفرحة : يووه يبه يحبني لك صدز ابي تجيب اغراض ومفرحات من الدكان تكفى
ابو فهد : طيب طيب عاوني عقاب وساعديه
البندري ضحكت وقالت : ابد !! خلصت حتى اني حلبت الناقه
لفت لعقاب اللي يناظرها بحدة وضحكت ضحك معها ابو فهد وقال : حيّ والله بنتي !
صقر عضّ شفايفه بحُب وقال بنفسه ( يعني فوق الزين ذربه وسنعة ! الله يثبتني ) سكر ابو فهد ولف وقال : اطمر يالصقر
صقر لف عليه وهو يشّد عصبت راسه ونطق : لبيه يعم ؟
ابو فهد : جب اغراض للحريم تعرفهم انت من خواتك
صقر اشر بأصبعه ع خشمه وقال : ابشر ع خشمي
نزل صقر يركض يبي يجيب الاغراض للبندري ضحك وقال : اليوم اجيب اغراض لها من توصيات عمي بكره اتقضى انا وياها حاجات بيتنا ونواقصه
ضحك من بدأ يتخيل ويبحر بالخيالات اللي كُلها عن البندري ..
" في بيت ابو فهد "
اسر دخل وقال : بسم الله !! انت شلون تطلع كذا فجأة من يعزمك العن والديه !
هلال بحدة : هذا بدال م تحّب راسي تراني خال حَرمك
تركي ضحك وهو يدخل وقال : هلاااال !
هلال بقرف : اييوو ترركي !!!
تركي انفجر يضحك ورفعه بين يدينه واخذه يدور فيه ، اسر مسح وجهه وشنبه وقال : اعنبوه يسترجل لا اتوطى بطنه !
طلعت الميلا وقالت : كويس جيتوا !
اسر لف من سمع صوتها وقال : ميالتي تعالي معي
هلال ضحك بسخرية وقال : ميالتي ؟ سوري م نعرف الا ميلو
الميلا ضحكت وقالت : وبعدين تمون ؟
اسر : امشي ولا يكثر خليني اوصل الغرفة وانتي م دخلتيها
مشى اسر وزفرت بعصبية ومشت بس استوقفتها يد هلال وقال : خير ؟ وانتي بتتبعينه بالسهلة خليه خروف وراتس !
تركي ناظره بحدة وقال : وبعدين م بتنفعها اذا صار بينهم شيء اركضي وراه بسرعة
الميلا انفجرت تضحك وقالت : هلالي صادز ! م بروح
تركي جلس بقلة حيلة وقال : اللهم اني بلغت اللهم فأشهد
وصل اسر ولف وشافها تسولف مع هلال ولا هي معبرته ، دخل وقفل الباب بالمفتاح وراه وفسخ ثوبه وركض للحمام واخذ دش سريع وتقدم للمراية وحلقّ دقنه وبقى الشنب ، ضبط شكله وطلع ولبس ثوبه واخذ شماغه وطلع للمطبخ ، ضحى لفت له وقالت : اسيّر اقرب تبخر
اسر ابتسم وقال : يجعلني م اخلا ولا اعدم !
تقدم وتبخر ونسّف شماغه ع شكل كوبرا ، ضحكت وقالت : وحشتني الرسمية ذي !
اسر : نبي نعّود ع عهدنا القديم
لف وشاف الجود ابتسم وقال : حيّو ام تميّم !!
الجود ابتسمت وقالت : البقى ابو كنوز !
اسر : وشحالتس ؟
الجود : والله بخير وانت طمنا عنك ؟
اسر ابتسم وطلع وهو يقول : ع م يسرتس
مشى وشاف ناصر يدخل غرفته رفع صوته وهو يقول : نويصر اعجل ودنا نلحق عقيب نخلص معه
ناصر هز راسه بمعنى " تم " ودخل غرفته ، غزيل قامت وقالت : العزيمة لمين ؟
ناصر وهو يسحب شماغه ويبقي الطاقية ع راسه : سلامة عقاب
غزيل توسعت عيونها وقالت : اعقب !! وعقاب اللي يطبخ سلامته ؟
ناصر مسك فكها وباس خدها بهدوء وابعد وقال : اعقبي انتي !
غزيل ابعدته وقالت : منجد عسى م شر ليه جالس انت وفهد والرخمة اسر !
ناصر : اذا قد الكلمة قوليها بوجه اسر
غزيل ضحكت وقالت : يووه لا والله ماني قدها محد ناقصه اكثر واحد مهبول ! بيجي ثامر ولد فهد ؟
ناصر : السربوت قصدتس ؟ مدري والله
غزيل : منزمان عنه وعن حصة وسديم مختفين
ناصر ابتسم وقال : هم كذا دايم يروحون لبيت خوالهم
غزيل : ومنزمان عنك انت بعد
ناصر مشى لها وحاوط خصرها وشّدها عليه وقال بصوته الثقييل : اييه هذا الكلام ولا بلاش !
غزيل حاوطت رقبته وقالت : احبك
ناصر حط جبينه يقابل جبينها ونطق : اخ منك عيديها !!
غزيل ابعدت وهي تضحك وقالت : لا عاد شوي هيبة لبنت عبدالملك.
ناصر سحبها وشّدها عليه من جديد ونطق : عيديها انا قلت !
غزيل ضحكت وركضت ترفع شيلتها وتطلع من الغرفة ، ضحك ومشى للحمام ومثل م سوى اسر سوى ناصر وخلص وتروش وتبخر وطلع بأجمل حلّة ، طلع ع اصواتهم وصراخ سحاب اللي تبي تركب قدام مع جدتها واسر اللي يسوق الجمس ، وهوشة البنات ع ترتيبهم بالمراتب الاخيرة ، زفر وقال : يالله يارب !! ايش علمكم
اسر بحدة : سحاب ولعنة تلعنتس ياذي البزر اللي اشغلتنا اركبي ورا لا احول عليتس !!
غالية بنفس الحدة : اسر خيير احترمني اقلّها بعدين بزر وتبي امي وش حارقك !؟
الميلا قطبت حواجبها وقالت : بس عمتي توجعها رجولها ! ليه تخاصمينه عجزت افهم !؟
ضحك بخفه من بدأت تدافع عنه ، وسكتت سحاب واخذتها الميلا بحضنها وهي تطالع فيه ، صدّ وهو اساسًا م رفع عينه لها مشوا للعزبة يلحقون عقاب والبندري ..
" فالعزبة الساعة ٥ العصر "
الكل تجمعوا وبدأت الفعاليات من بعد الغداء ، الجود طلعت ولمحته طالع من الشبك ومتشمّر ومثبت طرف ثوبه ع خصره ، مشت له وقالت : عقاب
رفع عينه لها وقال : م بتستوعبين صح ؟
تقدمت ووصلت له وقالت : بتسمعني غصب عنك سامع !
رفع حاجبة وكان بينطق بس سبقته وقالت : تذكر سالفة الهنوف !؟
عقاب ارتخت ملامحه وسكت وكملت تقول : انا سمعتك وم صدقت عليك حكّي الناس كلهم ومفروض اني اكون متأذيه منك خلاص يخي خلااص ! غلطت واسفه بس لا تعاملني كذا وانا حامل واحتاجك جنبي بكل ثانية اقضيها !
عقاب : جود انا م غلطت بسالفة السلقة ذيك ! بس انتي رحتي بأرادتتس وغلطتي بحقي ! وين دبلتتس ؟
رفعت يدها اليسار وحركت اصبعها وقالت : شوفها
عقاب : هاتيها
الجود قطبت حواجبها وقالت : عفوًا ؟
عقاب : م تبينها ولا تحتاجينها
الجود زفرت بعصبية وقالت : اوووف اقوله ثور يقولي احلبيه !! خلااص يثقييلل وخلااص ي صاحب الكبرياء !
عقاب ابتسم بخفه وقال بهمس : يحلوتس
مشى من جنبها ووقفت لثواني ونطقت : ايش ؟ عقيييب
لفت له وكان بعيد متجهة لخيمة الرجال ، صارت تناقز ميته فرح هذي علامات الرضى اكيد ابتسمت ومشت دخلت للخيمة الخاصة بالحريم ..
" عند الرجال "
ابو عبدالعزيز : فليييح
فلاح قام وقال : سمّ ؟
ابو عبدالعزيز : عاد لك شّف في امال ؟
فلاح : اييه نعم !
اسر فز وقال : ابو كنوز !!
فلاح ضحك وقال : ونعم !
اسر بصدمة : فليييح يالسلوقي ! بتعرس
فلاح رفع حاجبة وقال : م هو انت معرس وقد بيجيك ورع ؟
اسر : معليش ورعة !
ضحكوا كل من فالمجلس وكمل اسر : ايييه وامال بعد ؟ معاد لك نيّة بضحى ؟
فلاح ضربه بخفه وقال : انطم
ضحك اسر وقال : اجل متى بتتم ؟
فلاح لف ع ابو عبدالعزيز وقال : الليلة ؟
ابو عبدالعزيز : شور البنت ي فلاح
فلاح ابتسم بفشلة وهو حسّ انه طاير بزيادة وقال : اكيد خذ راحتك
مشى عبدالعزيز وناداها : امااال
مشت ركض وطلعت وقالت : هلا عزيز ؟
عبدالعزيز : نادي اني وتعالي معها
امال دخلت وقالت : مامي تعالي شوي
قامت ام عبدالعزيز ومشت برا وقالت : هلا عزوز ؟
عبدالعزيز : فلاح طلب امال ع سنة الله ورسوله !
توسعت عيونها وطاح فكها من هّول الصدمة ونطقت : ايش !
عبدالعزيز : وش اللي ايش ؟ رجال ويستاهلك وتستاهلينه !
ام عبدالعزيز بحدة : كأنه ماهو عاجبتس يبنتي ؟
امال بصدمة : تمزحوووون !!
ام عبدالعزيز : وي وش فيها ذي ؟
امال ودموعها اخذت مجراها : يويلي يويلي وشذا ياربي !
عبدالعزيز : بنت !!
امال بحدة : كم عمره هاه كم عمره !!
عبدالعزيز : عمره العمر م كان عائق ! شوفي جود وعقاب كم بينهم !!
امال بنفس الصدمة : تسع سنوات تقارنها بـ احدى عشر سنة !! بيني وبينه احدى عشر سنة !
ام عبدالعزيز ضربتها بخفه وقالت : وخير يطير بيني وبين ابوتس اثنى عشر سنة !
امال مسكت شعرها وشّدته وهي تبكي : ماما !! هذا قبل تكفيين وفلاح بعد !
عبدالعزيز : اخلصي تبينه ولا وش !
امال مسحت دموعها بعنّف وقالت : انتظر ! بستخير
انفجر يضحك ع امه وهي تضحك معه ، ابتسمت بكلافة وقالت : عزيز دز لا ادعسك !
لف عبدالعزيز بيمشي وارتفع صوت ترحيب الرجال بضيدان وسهم اللي جاو سوا ، مشى لهم وهو يبتسم ودخل وقال : ارحبوا يرجاااال !
ضيدان ابتسم وقال : البقى ي رجال !
سهم : البقى ي مرحب !
مشى وسلم عليهم ، اسر ضحك وحضن سهم وهمس له : خاطب عندنا وانا مختفي ؟
سهم قرص اذنه وقال : وانا جيت للمهمة وانت رايح منها !
اسر انفجر يضحك وقال : يجعلني فداك ي ابو سلطان
سهم : دامك تكلمت شكلك موافق وبتساعدني
اسر بحدة : اعقب !!
سهم بلع ريقه وقال : بسم الله علامك !
اسر ابتسم وغمز له وعطاه رده المعتاد : الله يجيب الخير
سهم : امين امين
جلس وقال : وضيدان يدخل جو مع عقاب علطول !
اسر : حاسدهم ؟
خزّه وضحك اسر ، ضيدان وهو يسولف معه : شخبارك ؟
عقاب : بخير وانت ؟
ضيدان ابتسم وقال : خارجيًا بخيير
عقاب : وداخليًا ؟
ضيدان : احترق واحس قلبي يعورني
عقاب قطب وقال : علامك ؟
ضيدان : تركي خطب ؟
عقاب هز راسه بنعم وقال : ايه وملّك بعد
ضيدان ابتسم بضيق وقال : الله يوفقه بس خذا من ؟
عقاب رفع حاجبة وقال : ومنتظرني اقول اسمها ؟
ضيدان بصدمة : يغييور ماهي من محارمك !! ارحمني !
عقاب ضحك وقال بغلّطة : دالين ؟
ضيدان شّد ع قبضته وقال : بكسر وجهه واجيك
عقاب بحدة : وش عندك ؟!
ضيدان : هي اللي لعبت بموازيني وهي اللي تجرأت وتوسدت حضني وقت م انخطفت..
عقاب قاطع كلامه وقال : لحظة ! بس تالين م انخطفت ؟
ضيدان مسك راسه وقال : ابو تميّم وش تقول انت !
عقاب حكّ راسه وضحك وقال : تالين اللي خذاها تركي تالين
ضيدان زفر براحة وقال : يارب لك الحمد !!!
عقاب : اثقل ي ضيد
ضيدان بسخرية : لا علمت نفسك علمني يالخفيف !
عقاب انفجر يضحك بصوت عالي وهو يتغيّر موده مع ضيدان ، ابتسم وقال : دوم يبو تميّم دووم !
عقاب مسك كتفه وقال : تدوم ايامك حبيبي
ضيدان : ورع ! حبيبي قّلها لها انا شكو !
طاح يضحك عليه وضيدان يضحك معه ، اسر : عقاب امش
قام عقاب يمسح ع شنبه من فرط الضحك ، مشى جنب اسر اللي يمشي وقال : علمك ؟
اسر : ينادون للقهوة والشاهي وانا وانت اصغر عيال ابوي صعبة اقوم نويصر
عقاب رفع حاجبة وقال : لا بالله ؟ انا اللي طابخ الغداء !
اسر : يرجال م مت امش
دخلوا وكانت الميلا والجود هم اللي بالمطبخ ، اسر ضحك وقال بخبث : اختلينا فيهم بدون مجهود !
طارت عيونهم بصدمة وم زادها الا ضحك عقاب وكلمته اللي جلطت الجود : ليتني م استعجلت كان معي فرص كثير
اسر ابتسم وقال : معليك الخير جاي بعد تميّم وكنوز
الميلا بصدمة : وش الوقاحة ذي !!
الجود بصدمة وملامحها توردّت : مو صاحيين الله يقرفكم !!
عقاب : اهجدي يالنتفه اهجدي
اسر : وين القهوة ؟
الميلا بحدة : الخبث معاد خلاك تشوفها !
اشرت بيدها ونزل نظره للغاز وانفجر يضحك وقال : مقدر عاد جيتتس ومعي عقاب يوووه الله يعين مسامعكم يبنات راشد !
الميلا : دز بس انت وعقاب ! محد ناقصكم
الجود مشت واخذت البهارات وقالت : احترموا اننا زعلانين !
الميلا : منجد !
اسر ابتسم وقال : اعرف ارضيتس
عقاب : اووه لعبتي الرضاوة معليك ان رضت طيب ولا غصّب !
الجود وهي تشمّر يدينها : حلوه الثقة ! جاهزة ميلو ؟
الميلا بحدة : انا وجودي قررنا قرار !
اسر تكى ع الباب وقال : نسمعكم
عقاب جلس ع عتبة الباب وقال : عساه خير بس ؟
الجود مسكت ذراع عقاب وسحبته يجلس وبالمثل سوت الميلا وجلسوا دائرة حول بعضهم ، ابتسمت الميلا وقالت : الحين اول مره نجتمع كلنا بجلسة
عقاب : بس وقتها غلط ابوي ينتظرنا !
اسر لف لعقاب من نطق وقال يتفق معه : وعقيب صادز !
الميلا : انا اعرف عمي معليكم اذا تأخرتوا بيرسل غيركم
عقاب ابتسم ع جنب وقال : وحن م نرضى لنا بديل !!
الجود شّدت ع ذراعه وقالت : اف عقاب لا تصعبها وهي سهلة !!
عقاب سحب يده منها اول م استوعب انها ماسكتها ، صدّت وقالت بضحك : اوه انت للحين زعلان وان عبالي كلامي سووا شيء وغيير حاجات داخلك
اسر : جود اللي سويتيه ماهو بهين وعقاب زعله شين ومن حقه اني شايفه ومستوعبة الشيء اللي سويتيه
الميلا قطبت حواجبها وقالت : لحظة لحظة ! فيه شيء صاير
لفت ع الجود اللي سكتت ونزلت راسها ، قدّم ذراعه ومسك دقنها يرفع راسها وينطق : راستس لا ينزل وانتي ع ذمتي ! اكسر خشوم ورقّاب وانزل رؤوس رجال عشانتس !
الميلا ابتسمت بحنّية وقالت : والله ونعم الرجال !
اسر تنحنح وقال : ورجَلتس تراه نعم الرجال بعد
عقاب لف عليه بقرف وقال : مسوي تغار يالصعلوك ؟
ضحكت الميلا وكمل اسر : الصعلوك اللي تقوله انت بنفسك م قدرت عليه !
عقاب قام وهو يعّدل شماغه وينسفه وقال : لا سّروا العرب بنتجمع هنا سامعين ؟
اسر قام معه وقال : تم والله بخلي نويصر يرجع الاهل ونجلس انا وميالتي وانت والجود
عقاب لف عليها وقال : بيننا حكي ي جودي
طلع بدون م يسمع ردها ، اسر ابتسم وقال : جويد !
لفت عيونها له وقالت : سمّ ؟
تقدم اسر وجلس ع ركبه وقال وهو قريب منها : تراه حنّين والله ان فيه حنّية لو توزعت ع اهل نجد كلهم كفّت ووفت ! بس افهميه الليلة انا حالف يمين م نرجع للبيوت الا وانتوا متراضيين طيب ؟
الجود عضّت شفايفها تمنع نفسها تبكي وقالت : بس انا اعتذرت ي اسر والله اعتذرت منه !
اسر : يبنتي والله زعله شيين قد زعل علي شهرين مستوعبة !
الجود بكت علطول وقالت بصوت باكي : م اقوى بدونه شهرين !
اسر : يعقب ! م ظنتي يقوى عليتس بس اسمعيني وخليتس مستعدة لأي شيء اذا م رضى عقاب الليلة استحالة يرضى بعدين !
الميلا حضنت اختها وقالت بهمس : شكرًا هذا اللي كان ناقصها !
اسر تقدم وباس خشمها وقال : وانتي مسوية زعلانه ؟ يالطيبة انا اللي مفروض ازعل
الميلا ضحكت وقالت : م تقوى !
اسر : وتدرين اني م اقوى يجعلني فداتس
مشى وطلع من المطبخ ، ضحكت الجود وقالت : يجنن مره لطيف مقدر !
الميلا بعيون تتلألأ : تشوفييين ! قلت له مره واكلني يقول الشنب ومدري وشو
طاحوا يضحكون وطلعوا من المطبخ بعد م تأكدوا ان عقاب واسر خذّوا القهوة والشاهي لفوا ع جيّه ثامر اللي قال : سلامي ! شخباركم بنات جدو ؟
الميلا ابتسمت بهدوء وقالت : بخيير ثموري شخبارك ؟
ثامر وهو يبتسم : عز الله توو صرت بخير وطبعًا م اعتبركم زوجات لعماني الحمير عشان كذا اناديكم بأسم جدي
الجود ضحكت وقالت : لا يسمعونك بس !
ثامر مسح ع كتفه وقال : واذا ؟ تتوقعين يسوون لي شيء عمومًا اسمعوا فيه واحد خكري هناك واحلف بالله ان اذا طول فالقعدة بينفجر عمي عقاب عليه !
الميلا رفعت حاجبها وقالت : مين هو طيب ؟
ثامر : م اعرفه اقولتس !
الجود عضّت شفايفها تقفل فمها عشان م تضحك ونطقت : لا يكون هلال !
ثامر ابتسم وقال : هلال ولا النصر ؟
انفجروا يضحكون وثامر معهم ، لف ع صوته عمه ناصر وهو يقول : يالسربوت يويلك من عقاب وين التمر اللي موصّيك فيه !
ثامر ابتسم وقال : جايكم جايكم
ناصر مشى متجاهل الرد وتوجهة لخيمة الحريم ، ثامر ابتسم وقال : التمر يزوجته لا هنتي
تقدمت الجود ورجعت داخل تجيب التمر ، عقاب كان جاي ومعصب من هلال وتأخير ثامر زاده ، ثامر طار عقله وقال : اشهد ان لا اله الا الله ! وشذا يرجال !!
رفع طرف ثوبه وركض بكل سرعته لناصر ، عقاب بحدة : حرام بالله ان اسلمتك !!
الميلا مشت برعب وراحت للخيمة ، دخل المطبخ وصدم فيها وهي طالعة بالتمر استغربت وقالت : ليه جيت وين ثامر ؟
سحبه من يدينها ومشى بدون اي جواب ، صدّت واستغفرت ومشت للخيمة ..
" قبل دقايق فـ خيمة الشعّر "
عقاب : وانت من انت عليه ؟
هلال ضحك وقال : ليش تبغى تعرف ؟
عقاب وقف وقال بتحّشير : نبي نعرف خال حَرمنا منهو منه
هلال حط رجل ع رجل وقال : م يهمك لا تعرف !
ابو فهد بحدة : وشذا العلم وقعّدة النسوان !! اقعد زين ولا قم اذلف برا !!
هلال : ضايقتك جلستي ؟ اتركني براحتي الله اكبر !
فهد رفع الصوت وهو يقول : هلال ! اقّلها احترم الشيبه !
هلال ضحك وسحب جواله يجلس عليه ، اسر بصدمة همس له وهو جنبه : بتتمرجل ولا تتصفق ؟ من الاخر ترا !!
هلال سكت يخاف يعرفون حقيقة صلة القرابة بينه وبين بنات راشد وتركي اللي حتى هم م يعرفون ، عقاب بحدة : قمّ !
قام هلال وقال بحدة : خيير انت ؟ تصارخ ع اصغر عيالك !
ابو تركي قام وقال : هلال تعال عندي هنا
تركي بحدة : علامكم يرجال !
سهم مسح وجهه وشنبه وقال : يكرهي للأجواء ذي احس اني اتدخل فيهم !
ضيدان بهمس : تشووف ! نطلع نمشي ؟
سهم : وشو عقبه خلاص بيهجد بعد كلمة الشيبه الثاني
مشى هلال وجلس جنب تركي ، صدّوا عيال عايض وقال اسر : فليييح يواحشني !
فلاح : ان لله وانا اليه راجعون ! يخوي وش تبي مني ؟
اسر حضنه وقال بهمس : لا تنكر العشرة لا امسح بوجهك الارض !
فلاح ابتسم وهمس له : تخسى وتعقب !
اسر : منهو ؟
فلاح : ذي عندك اللحية !
اسر بحدة : اقطع واخس يكلب !
انفجر فلاح ضحك وحط راسه ع صدر اسر ، وم لقى منه الا انه يحاوطه ونطق : جاتك الموافقة ؟
فلاح هز راسه بنفي وكمل اسر : غريب اجل م ودها ؟
فلاح : حرام اني م اعلم لكن بكيفها الشور شورها والحياة حياتها محد بيجبرها علي !
لف اسر وقال : عزوز انت رحت تسأل البنت ولا عاد جانا علم !
فلاح قام وقال بهمس : اسسر !
عبدالعزيز ضحك وقال : لو تشوفون ردة فعلها بس تموتون ضحك !
عقاب بطرف عينه : محد مهتوي لعلوم الحريم عطنا الرد وقفلنا !
مقصده الاكيد انه ماهو مهتوي بعلّم غير عن علومها وطاري غير عن طاريها هو مهتوي فيها لحالها حتى هي للحين م تدري وش تعني لعقاب ، عبدالعزيز تفشل وقال : سمّ طال عمرك ابد يفليح تقول بستخير واشوف وبنرد لك خبر
فلاح ابتسم وقال : ع قولة اسر الله يجيب الخير !
اسر ابتسم وقال : اميين
عقاب بحدة : الزفت ثامر وينهو غدّا !!
لف ونزل الدلال ومشى يدور لولد اخوه اللي ابطى عليه ..
" عند البنات "
جلسوا الجود والميلا مع كل البنات ورا شبك الابل ، ضحكت غزيل وقالت : وضيحي وش تسوين ؟
ضحى كانت عند صخّال الخرفان تلعبهم وتضحك ، لفت ولمحت تركي طالع مع هلال ونطقت تالين : بنات تركي ذاك صح ؟
الميلا لفت وقالت : ايه مع خالي هلال
تالين مشت له وضحكوا كلهم ونطقت دالين : يحلوه خالهم معه ! عوّدي
مشت ووصلت قريب منه وقالت : تركي
تركي لف وقال : ارحبي ي خلّف معاليييق قلبي !!
تالين ضحكت بخجل من قال كلمتها ومشت له ، حضنها بكل قوته وباسها بخفه وقال : م قلت لتس اني بسويها ؟
تالين ضحكت وقالت : ونعم ! والله
تركي : امريني ؟
تالين شبكت يدينها بيدينه وقالت : طولت السالفة متى بنروح نجهز ونختار ؟
تركي : شوفي زواجنا ثانية العيد يعني بعد شهر تقريبًا وبالنسبة لويّن بيكون الزواج بيكون فالرياض معليتس تطمني وجهزي اغراضتس انتي بس ومتى م بغيتي تجين معي تشوفين القاعات كلميني ؟
تالين ضحكت وقالت : ماشاءالله اجل اثق ؟
تركي وهو يحضن كتفها بذراعه : ثقي يبنت سالم !
فلاح طلع وقال بحدة : ابو سالم ابوه !!
تالين انخرشت وبدون سبب لفت وغمزت لتركي وركضت مبتعدة منه ، تركي بحدة : والتبن !! وش تبي ابي افهم زوجتي !!
فلاح تقدم وضرب راس تركي وقال : والتبن بلحيتك يالورع !
تركي : دز بس
مشى تركي راجع لهلال اللي حلّف يرجع للرياض ويحاول تركي يقنعه يجلس ، فلاح رفع صوته وقال : معلييييه ي توته بيننا حكّي
تالين ضحكت وقالت : اعلى م في خيلك اركبه !
فلاح توسعت عيونه بصدمة وقال : وانا ابو سالم !
مشى وراها وضحكت وركضت للبنات وفلاح م يدري انهم قدامها وكمل ركض وراها ، امال وهي طالعة من الخيمة وتشيل الصينية حقت الحلى معها نطقت بصوت عالي : اوووب ارجع البنات هناك !!
فلاح وقف ولف عليها وقال : وين هناك ؟
امال تقدمت وقالت : عند الشبك خلصت الاماكن طبعًا !
ضحك وقال : روحي اجلسي معهم طيب
امال : ايه كنت معهم بس جبت الحلى اللي سويته بغصبهم ياكلونه
فلاح : وانا مالي نصيب ؟
امال ابتسمت بخجل وقالت : اوف شدعوة ! اكيد لك مو انت بتصير زوجي المستقبلي !
فز قلبه وقال بصدمة : امال !! وافقتي ؟
هزت راسها بنعم وقالت : استخرت والحمدلله اخذ قريب ولا ياخذني بعيد والله يكتب اللي فيه كل خير يارب
قطعت له جزء ومدته له ، ابتسم وهو حسّ ان الحياة ضحكت له اخيرًا بعد وفاة امه م ذاك خير فلاح وطيرته الحياة بين طيّات الزمن القاسية ، ابوه ابتعد وخديجة السبب في بعاده ومعاد قوى يرجع ولا عاد عطاه ابوه فرصة ، ابو فلاح صار يحسّس فلاح انه عنده ولدين بس وهم صقر وهيثم ، مسح وجهه كامل وقال : الله يجعلني م اخلا منتس ! انتي املي فالحياة ذي من بعد اليوم !
امال ابتسمت وقالت : تبشر بي يولد الخال !
سكت يتأمل وجهها المكشوف ، بطبيعة الحال امال م كانت تتغطى ابدًا ، ونطقت وهي تناظره : عاد جهز نفسك !
فلاح تكى وهي تعطيه الحلى ياكله وقال : لأيش ؟
امال طارت عيونها بقرف وقالت : اايييوو فلاح !! سكر فمك وسولف !!
فلاح ضحك وقال : شلون اسكر فمي واسولف مهبولة ؟
امال وهي تصدّ : مو مهم عمتك م تبيني اخذك والصدق والله م حط الفكرة براسي الا اني اعاندها
فلاح : عمتي ؟
امال : ايه ام تالين !
فلاح بعصبية : تخسى وتعقب م جات عمتي !! وبعدين وش قالت لتس
امال جلست ع الحطب الموجود وقالت : بقولك السالفة ..
" قبل دقايق "
وقت دخلت امال تجيب صينية الحلى ، تقدمت ام تالين وقالت : اسمعي يبنت
امال رفعت عينها بقرف وقالت : خير ؟
ام تالين : الله يجيب الخير
جلست وقربت من امال وقالت : سمعت ان فلاح خطب فيتس ؟
امال رفعت حاجبها وقالت : وش يهمتس ؟
ام تالين ضربتها بخفه وقالت : اهربي يبنت !! الولد ماهو كفو ولا هو رجال تتكلين وتسندين ظهرتس عليه !!
امال ضحكت بسخرية وقالت : صحيح ختمّوا عيالتس المرجلة !
ام تالين قطبت حواجبها وقالت : يعني موافقة ؟
امال ابتسمت ابتسامة عريضة وقالت : اي نعم موافقة !
ام تالين وقفت بصدمة وقالت : لحد يتندم بعدين قدمت لتس النصيحة والباقي عليتس !
امال : دزي بس !!
مشت وطلعت وقابلت فلاح يركض ورا تالين ..
" عند امال وفلاح "
امال : وبس هذي هي السالفة
فلاح ابتسم وقرب ومسح طرف شفايفها اللي عليه شوكولاتة اثر الحلى ، توردّت ملامحها او بالاحرى تفجرت لون احمر ، ضحك بخفه وقال : كل ذا عشاني قربت ؟ امسك حدودي ؟
امال قامت وقطعت المسافة بينهم وقالت : لا ! شدعوة بس اكتب كتاب وبعدها تعالي احتويك صح
غمزت له وهي تضحك بخجل ، هالدلع والغنج والحلاّة كثير ع قلب بدوي مثل فلاح تعصف به الرياح للخيل وترجعه للعزبة والكرف وان هاه قررت تغيير الاتجاه راحت به عند البترول والحّر والشين ، مسك قلبه وقال : اعنبوتس الا نعم !! يويل قلبك يفليييح !!!
مشى وشاف اسر وجنبه عقاب يضرب ثامر بخفه وثامر يضحك ..
" عند البنات "
ضحى شلّت الصخّل بين يدينها وركضت راجعة للبنات ، صرخوا كلهم وركضوا مبعدين عن الجلسة وعن الضوّ حولهم من جابته لهم وقالت : عّلة انتي وياها !! اش علمكم صخّل م بياكلكم ترا !!
الجود برعب : ضحى !! ابعديييه وانتبهي يطيح فالنار !
دالين ضحكت وقالت : وه يالنونو وسو هادا !!
ضحى ضحكت بسخرية وقالت : جاتكم الثانية ! انتوا اما حبّى ولا انبطح ؟
دالين شلته بشكل مهذب وقالت : يجنن !!!
الميلا ضحكت وهي تصور وتقول : شوفوا بناتنا مع صغير العنز اللي يشبه غزل بالضبط
غزيل طارت عيونها من انفجروا البنات يضحكون عليها ، سحبت التراب بيدها ورمته ع الميلا اللي صرخت تركض وغزيل وراها تتحلف فيها وتقول : حرام م اسلمتس يالتسلبة !!
الميلا برعب : عييونني يوسخة عدمتيها !!!
غزيل سحبت شعرها وقالت : اعلمتس كيف تقولين لي صخّل !!
الميلا طاحت تضحك وتقول : خلاص وي اسفه !!
غزيل تركتها وهي ترفسها والميلا تضحك ، مشت راجعه للبنات وهي تشوف دالين وضحى يقومون راجعين للشبك ، جلست وهي تشوفهم ، ضحى : بفتح لتس الباب ونزليه ونرجع ؟
دالين ابتسمت : تم ولازم ارجع البيت اتروش مو طبيعي ريحتي كيف انعدمت
ضحى بضحك : عيّني من الله خير ! وامسّي
دالين : يووه ي وضيحي وش قلت ؟
ضحى مسكتها وقالت : وقفي من ذولا ؟
دالين رفعت عينها للشبك وكان ضيدان وسهم واقفين عنده ، فز قلبها من عرفته من ظهره ، هي تعمّدت واجبرت نفسها تنساه وتتناسى كل شيء صار بينهم وبدأت تتخطاه وتتخطى اللي صار من خطف ، طلع قدامها وسحبها للقاع بكل قوته وهو م طالع فيها حتى ، لفت لضحى وقالت : مدر..مدري !!
ضحى قطبت حواجبها وقالت : علامتس !!
دالين : ضحى امشي نرج..
قاطعها صوت سهم وهو يقول : ي حيّ الله ضحى !!
طارت عيونها بصدمة ورفعتها له ومشى لهم ، ضحى بحدة : وقف !! بمحلنا وبين اهلي وتجيني كذا ؟؟
سهم : ايه اجيك وش يهمني فيهم ؟
دالين بحدة : تستهبل انت !!
ضيدان كان ع جواله ولف علطول وشافها ، بجلابية كحلية وتزينت باللون الفضي ، شيلتها ع راسها وبرقعها يبرز محاجرها بشكل فاتن ، وبيدينها صخّل بني صغير ، صفّر من مكانه ولف سهم ولفوا البنات عليه وقال : مشينا للرجال يبو سلطان عيب بحقهم نختلي بحريمهم !
سهم مسح وجهه وشنبه وقال : واحشتني ترا !
مشى وضحى مصدومة ، دالين لفت لها : بنت !! وش قاعد يقول ذا ؟
ضحى انكرت علطول ووجهها تبّدل حاله : مدري !!
دالين رجعت تناظر بضيدان اللي رفع لها تحية ومشى ، يجدد العهد بحركته ويجدد مشاعرها له ويجدد حُب نشأ بينهم قطعته الظروف بقسوة وقطعته كلام دالين عنه ، مشت ضحى راجعة وقالت دالين : شوي واجي
صدّت ضحى وم ردت ومشت ولف عليها واشرت له ، ابتسم وصّرف سهم ورجع بخطواته ، دخلت الصخّل الشبك وفز الفحل عليها يركض ومنزل راسه ، هي ابدًا م انتبهت له عكس ضيدان اللي شافه وركض وسحبها من خصرها وشّدها عليه وقفل الباب علطول وارتفع صوت الصدمة بالشبك والفحل اللي كان سبب فيه ، توسدت حضنه من جديد تحت ظلام الليل وم يشوفون الا ظلال بعضهم ، ريحته دخلت عروق قلبها ونبض حبه في شراينها من جديد ، صُغر حجمها بين احضانه سبب له مشاكل كبيرة ، نزل نظره من رفعت راسها تناظر فيه ونطقت : انت سبب انقلاب حالتي ! هذا وانا معرف الا اسمك !!
ضيدان بثقّل صوته وفخامته : م احّل لك يبنت سالم !
ابعدت عنه وقالت وهي تصدّ وتشد ع ذراعها : انت اللي سحبتني !
ضيدان : ايه م ابي الفحل يطيرك
دالين : مو مهم قبل انسى اسفه اني قلت كلام مو زين عن اهلك وانت فاقدهم والله يرحمهم ويجبر قلبك
ضيدان ابتسم وقال : الجبر انتي ماهو في غيرك !
دالين ابتسمت ومشت وضحك ضيدان ، هم اثنينهم تجدّدت المشاعر فيهم وزود واتجهوا لأماكن مختلفة لكن تفكيرهم ببعضهم متوافقين فيه ..
" في خيمة الحريم "
صقر من عند الباب وهو نسى ينزل المفرحات : يمه !
ام تالين فزت وقالت : لبيييه يولدي ؟
البندري رفعت عينها لصوته وصدّت ، مشت وقالت : سمّ ؟
صقر وهو يحكّ راسه : امسكي ذي وعطيها البندري
فزعت من قال اسمها وقالت بنفسها ( يمه !! ماهو بصاحي وش جايب لي ياررررب !! ) لفت ع دخول ام تالين وتوسعت عيونها من رمّت الاغراض عليها وقالت : امسكي يالشحاذة !! م حصلتي الا ولدي تطلبينه عمى يعميتس !!
البندري امتلت عيونها دموع ونطقت بحدة : طالبة ابوي وحلال ابوي !! وش تقوليين انتي وش بيني وبين ولدتس اخر حبه عشان اتطلب منه !! اخواني واجد وابوي حيّ اوزني حكيتس لا اندمتس سامعة !!!
ام فهد بصدمة : خلاص بندري خلاص يبنتي !!
البندري : وع بس شغالة مدح فعيالها ترا سمعنا وش قلتي لآمال !! وابشرتس محد يبيهم ! فلاح وارجلهم والباقين خليهم وراتس !! وامدحيهم عند خوالهم
ام عبدالعزيز بصدمة : وشدخلتس في بنتي ! وش قلتي لها
ام تالين بربكة وصدمة : هاه ! م قلت شيء
ام تركي : ادحرّوا الشيطان وامسّوا
ام تالين بصدمة : تتوقعين اجلس بعد الكلام ! بزر تهاوشني وانتوا ساكتين !!
ام عبدالعزيز بصراخ : هيييه ! انتي البزر اللي تقولينها م الجمتس الا وهي ع حق ومحلي ومحل اخواني يتعذرتس !!
شهقت وسحبت شنطتها وقالت : تالين تخسّين تاخذينها لولدتس ! وانتي اسوي الهوايل واطلع عيونتس في امال وفليح !!
ام تركي بصدمة : الرجال وعطيناهم الكلمة وبنتتس ع ذمة ولدي !
طلعت من الخيمة وهي تسمع ام عبدالعزيز تقول : اعوذبالله منتس !!
اتصلت ع ابو فلاح ووصلها صوته وهو يقول : هلا خدوج ؟
ام تالين بغنج وبكي : سااالم تعالل لي بسسرعة !
صقر كان واقف ورا الخيمة ، عرف وحلف يمين ان البندري طارت من يدينه كيف لا وهو سمع الكلام منها وتشكيكها برجولته ، عضّ شفايفه بصدمة وقال : يمه
لف ام تالين وحضنته بكل قوتها وهي تقول : ودني البيت
صقر حاوطها وقال : ابشري العني ابليس !
البندري مسحت دموعها بعنّف ومشت برا للبنات ، شافها ومشى وراها تارك ومتجاهل صوت امه وراه ، نطق بصعوبة وهو يحسّ انه مخنوق وانه اثقل الجبال اللي شوفها قدامه متوسد صدره بدون رحمة : بندري !
لفت له بصدمة وقالت : صقر !!
صقر فتح ازرار ثوبه وكمل بصعوبة : تكفين لا ! تكفين الكلام اللي سمعته منتس انكريه قدامي قولي ماقصدي وقولي كنت معصبة تكفين يالبندري
البندري توسعت عيونها من عرفت انه سمع كل شيء قالته ووقفت مصنّمة م تتحرك ، نزل شماغه ع كتفه وترك الطاقية والعقّال ع راسه وقال : انتي م تشوفيني رجال ؟
ظلت من قوّ صدمتها ساكته الجّمها وعجزت تنطق بحرف واحد هي حتى م تكلفت تهز راسها بالنفي ، عضّ شفايفه بحسرة وقال : انا هنا وبس اكتفيت وخذيت اكثر من اللي كنت متوقعه منتس بعد كلامتس وعدم تبريرتس لا تظنين ان القلب بيرجع يداريتس فمان الله يامن لتس بقلبي مرتع وموطان
صدّ ومشى تارك البندري وراه ، هي م عطته فرصة حتى ولا فكرت فيه بجدّية وم كانت تشوفه قدامها ابدًا ليش تحسّ بالذنب م تدري ..
" الساعة ١ بعد منتصف الليل "
اسر وهو يعجّل ناصر : ايه ايه ابشر
ناصر بحدة : علامك ! م بتوديهم للبيت ؟
اسر : لا يخوي اسّر وراك
زفر ناصر بملل وهو يشوف عقاب متمسك بأحد حبال الخيمة وزقارته بين شفايفه ، ركب ومشى وم بقى الا الجود والميلا واسر وعقاب ، رجع اسر وقال : شب الضو وانا بضبط لنا شاهي نعناع يحبه قلبك
عقاب رمى زقارته وقال : يالله
لف عليهم اسر وركض وقال : جويد تعالي ساعديني وميالتي اطلعي لعقاب
الميلا ابتسمت وقالت : حبيبي ناسي اننا العكس ؟
اسر ابتسم وقال : م ابيها تقابله الا وهو يشرب شاهي ومروق
الميلا هزت راسها ومشت هي عرفت وش سبب الزعل وهاوشت ونقدت اختها وهاوشت عقاب عندها وقررت انها تكون محايدة وم تدخل بينهم ابدًا لأن كلهم غلطانين ، طلعت له وقالت : اساعدك بشيء ؟
لف عقاب لها وقال : وين اسر ؟
الميلا : مع جودي يسوون شاهي
عقاب جلست وقال : عطيني الولاعة والبنزين
الميلا برعب : اوكيه قلنا عسكري وفريق بس م تفجر فينا وتحرقنا !!
عقاب رفع عينه لها وكملت تقول : تم وينه ؟
ابتسم واشر لها وراحت تجيبه وقالت : انتبه !
اخذه عقاب منها وصب كمية ع الحطب وقال : ابعدي
الميلا رجعت ورا ورمى الولاعة واشتعلت النيران علطول فزت وصرخت وطلع اسر يركض والجود وراه شايلة البيالات وحّب دوار الشمس ، اسر وهو شايل البراد ركض وحطه جنب الحطب وقال وهو يحضنها له : علامتس ؟
الميلا ضحكت وقالت : ارتعبت من النيران
اسر رفس ظهر عقاب وقال : يكلب !
عقاب لف عليه بطرف عين وقال : اعقب عقبت !
ضحك وجلس جنب عقاب ومشت الميلا وجلست عند الجود وقالت : نبدأ ؟
الجود عضّت شفايفها وهي تتأمله عيونه ع الضو ، النيران واللهب منعكسة ع عيونه ، اسر :
ابدأي واضحكي لشفاهي عمر يحيي بداياتتس
وشغف دايم على شانتس يجدد كل بداياتي
-
ابتسمت بحب وقالت : يبعد عمري انت !
عقاب تكى ع المركى وقال : يالعشّاق ارحمونا !!
الميلا : طيب كل واحد يطلع اللي بخاطره وتنتهي السالفة
عقاب : انا قلت اللي عندي لها
الجود : وانا برضو واعطيتك سبب ووضحت لك قد ايش انا اغليك واعزك ! واسمعك بعد
عقاب صدّ وقال : حكّي فاضي !
الجود توسعت عيونها وقالت : ايش ؟
عقاب ضبّط مكان للبراد وحطه فيه ، اسر : عقاب !!
عقاب : لا تتدخل بيني وبينها
اسر بحدة : م بتدخل بس اسمعها !!
عقاب زفر بعصبية وقال : وانا الحين سّاد اذاني منها ؟ تتكلم
الجود : ليه اتكلم وهو حكّي فاضي ؟
الميلا بصدمة : معليش عقاب بس مثل م تزعل وتعصب هي تزعل وتعصب !! ومثل م ترضى وتسمع وتحسّ هي بالمثل
عقاب قرر يبادر وينهي كل شيء هو قلبه متقطع ع حضنها ويدري انها بالمثل تبيه ، اخذ نفس وفتح فروته وقال : تعالي
لفت الجود ودموعها متعلقة برموشها وهمست الميلا لها : ع الاقل بادر روحي
مشت له ودخلت بحضنه حاوط خصرها وشّدها عليه ، باس راسها وقال :
رجعيني للصبا يا أعز وأغلى ما حصلي
‏وإستغلي بسمتتس لرضاي في وقت الملامه
الليالي مالها وجهٍ ضحوك ومسفهلي
‏غير لا منه بدا لي منطوقتس اللي تحته شامه
اقربي لين يتلاشى حزني ويرتاح ظلي
‏من طريقٍ فيه عيفت القدم راس العدامه
واستريحي فوق ديباجتس وفلي شعرتس اللي
‏ودي اقضي عمري الباقي تحت دامس ظلامه !
-
حطت راسها ع حضنه ، فز اسر وقال : الحين نستأذن انا وميالتي ابي اوريها ناقتي
الميلا قامت وهي تضحك ومشت معه ، اسر : احب ناقاتي لي
الميلا : عندك ناقات ؟ حسبتها بس لعمي
اسر : اصلاً ابوي م عنده الا البعير وسكروبة
الميلا انفجرت تضحك وقالت : سكروبة !! خلصت الاسامي
اسر ضحك وقال : وفهد عنده اربع ونويصر وحدة اسمها دكتورة وعقاب تسع وانا ست وثامر وحدة بعد اسمها ثمراء
الميلا ابتسمت بحب وهي تسمع سواليفه فالظلام وراسها ع صدره محتضنها بذراعه حاوطت ظهره ومشت معه للشبك ..
" عند عقاب والجود "
ابتسم وهو يحسّ برجفتها وسأل : بردانه يالجودي ؟
الجود ابتسمت بخجل وقالت : لا مستحية
عقاب : مني ؟
هزت راسها بنعم ودوّت ضحكته الرنانة ارجاء البر وقال : افا ي ام تميّم تستحين وحنّ بنصبح ع جيّة تميّم وبعدها اخوانه من بعده ؟
الجود ضربته بخفه وقالت : ماشاءالله م تساعدني ابدًا !!
لف لملامحها اللي كسّاها اللون الاحمر ورجع يضحك بهدوء ، حضنته بذراعينها الثنتين وقالت : لا تتركني ابدًا
عقاب شّد عليها ونطق :
وشلون أتركتس وأنا أشوفتس بلادي‏
وبلادي انا يعقاب ؟ مُحال إني أودّعها !
-
الجود بحنّية : قولي الابيات اللي قلتها وانت واقف ع الشباك
عقاب توسعت عيونه وقال : شفتيني ؟
الجود : م قويت افتح عيني بس سمعتك وحسّيت فيك
عقاب ابتسم وباس خدها بحنّية وقال : انا في وجه الله وجهتس وعيونتس يأم تميّم لا تفارق عيوني !
الجود غمضت عيونها وقالت : ام تميّم حبيت ! عسى الله يتمم ع خير وانت معي يارب
عقاب ابتسم وقال : الله م يجيب الا الخير
::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني !!! رمضان كريييم والشهر عليكم مبارك ، عُدنا ببارت يحبه قلبكم استمتعوا وعطوه حقه ولا تنسون النجمة انا فداكم 🥹🌟! )