عروسة الميخالي [بالدارجة المغربية 🔞♨️مـكـتـمـلـه]

PART 24

عـروسـة الـميـخـالـي"

             "شـمـس الـضـحى"

     "لن أنسىٰ بشاعة ما أشعرتني به ."

    _______________PART 24_____________

•نشفات شعرها وتريحات ، قادات المايك اب ديالها ولبسات ، رمات عليها لگاپ وخرجات ، لقات ميلودة حتى بدلات حوايجها ، لبسات واحد الجلاله فالأبيض بزويفها وبلغتها ديال الصم ، كحلات عينيها وسكوات فمها حتى كحالت اللثه ديال فمها...ذكرت النبي وتبمسات ، شدات فمرات ولدها وخرجات هي وياها ، لقاو واحد التراكتور مباشي كيتسناهم ، طلعوا فاللور وجلسوا حدا شي عيالات حتى هوما كانو معروضين ، شافو عروسة الميخالي وبداو يتغامزوا عليها ، مهرة عطاتهم النخال ، ماشي خوفا منهم ، غا حيت حاسه بالحريق تحتها وما عندها گانه تسمع نگير عكوزتها لا قلبتها معاهم صباط... وصلوا لدار العرس ، نزلوا ،ستقبلوهم بالزغاريت واللعب ، كلاو تميرات وشربوا شوية ديال لحليب ، ميلودة ما خلات مرات ولدها تدوق من داكشي ، دخلوا للمراح لي كان متيسع ومغطي غا بالميكه باش ما تترونش الدنيا وتتغيس تحت لفراش ، جابوا ليهم أتاي والحلوى ولفاكيه ولبطبوط مدهون بالسمن ولعسل ، البيض مسلوق ، الزبده ، الزيت ، المهم تهلاو فيهم ، دخلوا لعريسات بجوجات ،حطوهم فواحد لقنت ، وبحكم أنهم گليولات كيبانوا تحت دوك ليزور كيف لحميمات ، بدا اللعب ولغا ، الطرح حمى وبغات لالة الزينه تنوض تشطح ،ليعتها ميلودة وهي تتبت...دخلات أم لعرسان بطبق فيه جبانيه كبيرة ديال الحنه مغوضه ، وفجنابها الورد يابس والسواك والريحان ،خلخلات لعريساتها يدياتهم ورجيلاتهم ، وحطات طبقها تما وهي تنابيها ميلوده.

ميلودة: يااام لعريس ، هزي حنتك لخضره وديها معاك...ما مزيانش تتلى وراك ، السم لي فحنة لعروس ما هو ففم اللعفه.

مهرة [بصوت خافت] : علاش زعما!

ميلودة : شحال من عروسه فليلة عرسها تشيرات وتغيرات ،كيدخل عليها الراجل ما كيشوفش جيهتها ، كيقولوا الدقه منين جات ، ما كيعرفوها ، القاديه قدات بجبانيه الحنه وسالات ، كيهربوا بيها ، كيخلطوها مع لمحله لحيه والشبه ، كيسيلوا دم لقنفود فوقها هو و بول لحمار ، كيكمسوها فسريرة ويحفروا ليها قبر جديد ، مولاه يلاه ميت ، كيجبدوا يدو ويصروها فيها ، كيربطوها ويتبتوها بخيط نصو حمر ونصو كحل ، باش تولي حياتهم كلها غا ضرب وصداع وغيار وطلاق ، ويرجعوا كولشي كيف ما كان.... هاد النوع من الناس ،هوما لي قالوا عليهم ناسنا لوالى ،كيقتلوا لميت ويمشوا فجنازتوا.

مهرة: ناري على بنادم كيف داير عـ[قبل ما تكمل كلامها لمحات ماماها داخله كتتمختر هي وعيالات ولدها، بلعات ريقها وأضافت بصوت خافت] ماما!

ميلودة مع دورات عينيها طاحو نيشان فسهليه لي غير شافتها طاح نصها وتبدل لونها... كمشات حواجبها وناضت وقفات ، نوضات حتى مهرة ونطقات.

ميلودة [ببرودة] : يلاهي ، ما بقى لينا هنا جلوس.

مهرة: بلاتي نشوف غير ماما وندوي معاها غير شوية.

ميلودة: إوا خليك معاها ،وسيري رجعي لعندها ، أنا غادا.

تمات غادا خارجه وهي توقفها سهيله من لي شدت ليها فدراعها ، دوراتها لعندها ونطقات وعينيها عامرين دموع.

سهيله: حشومه عليك "أمي" ، خليني غا نشبع عيني بشوفتك ، وإلى بغيتي تمشي سيري.

ميلودة [نترات ليها يدها] : ما تقوليش ليا مي ، أنا ما عنديش لبنات لمسخوطات وطماعات بحالك ، لي غا شافو لفلوس ولجاه ، نساو البيت لي فيه ترباو ومشاو هربوا ، وخلاوني أنا و ولد كرشي كنتصددوا بين لقنات ، والطفله لي حزنا وكبرنا وكبرت معانا ، معرسه بالحاكم ومحنيه ومغنيه وناشطه وما على بالهاش بينا [تبسمات] سحبان خالق هاد الدنيا ، بحق من داني ليك حتى يجيبك ليا ، نتي مشيتي وربي سيفط لينا بنتك.

سهيله: أنا لي عطيتها لخويا طارق ، أنا لي زوجتها ليه.

ميلودة: الحمد لله بنتك ما شبهت ليك فوالو من غير فشوشك وبروديه كتافك.

سهيله ما بقات عرفات ما تقول ، حطتوا ليها فالسطل ، عندها الزهر صوتها كان خافت ، أما كون كولشي على مسنونها طل ، أشارت لعيالات ولدها بصباعها ، حنات راسها وتمات خارجه بالزربة.

مهرة بغات تتخطى ميلودة وهي تشدها ، خنزرات فيها ونطقات.

ميلودة: غدا ولا بعدوا غادي تجي تال عندنا ، وديك الساعه ارى ما تدوي معاها.