بيـــن وصـــالك أوصاف ؛
أستغفر الله العظيم وأتوب اليه 🩶
*
ومن أشرقت شمس الصباح , وعلى صوت الصياح , نزلت ايبادها ونزلت لتحت تشوفهم واقفين برا المجلس كلهم يحاولون يفتحون , عقدت حواجبها بستغراب : شفيه ؟
مشت لها وديم : ابوي وابوك تهاوشوا
دانه : على وش هالمره بعد ؟
وديم : على أرض , وعليك
دانه : صعدو الموضوع ؟
تنهدت تهز راسها : بزياده
سكتت تسمع صراخ سيف وثامر , هم من كثر صياحهم ومعركتهم قفلوا الباب ! ثامر وسيف بوادي وابو سيف وابو سعود بوادي ثاني , واما بداخل لحظه ناظرهم عبدالعزيز مو فاهم شيء وهم توهم سحبوه من نومه يصحونه على صياحهم ! , ابو سعود : بنتك مالها دخل فيك ! كل هوشه تبي تأخذها !
ابو سيف : ماتستاهلها لا انت ولا ولدك !
ثامر : حشم !
سيف : اقطع واخس !
رفع راسه عبدالعزيز يناظر يوسف الساكت : وش السالفه ؟
ناظره يوسف يتنهد : باعوا أرض برياض وتهاوشوا على فلوسها , بعدين مدري ابوي شفيه ويبي ياخذ دانه منك
عبدالعزيز : وهي شدخلها بالارض !
يوسف : مدري ! شبكوا كل المواضيع ببعضها
صرخ ابوه يناديه : رح نادها !
عقد حواجبه سعود : وين يناديها , خالي لا تدخلها بمواضيع مالها صلاح فيها !
ابو سيف : مال امك دخل , اطلع منها ! الموضوع بيني وبين ابوك !
عبدالعزيز : بينك وبين ابوي دنو شدخلها ! تدخلها !
ابو سعود : صم حلقك انت !
ناظرهم بذهول , مستحيل يكونون طبيعين اليوم مستحيل الطمع اعماهم وكثره الفلوس الي بين يدينهم اغرتهم ودخلتهم بمليون موضوع ماله دخل بموضوعهم الرئيسي ! جابها يوسف معاه , يدخل وهي بجنبه تعقد حواجبها من صرخهم : تعالي !
مررت انظارها عليهم وثبتتها على ابوها من شد يده على كتفها : اخر من يجمعنا انتي حرام حرم الدم اني معد اشوف ولا واحد فيهم !
توسعت انظارها بذهول , يصرخ ابو سعود بصدمه من نطق "واذا جلستي عندهم ؟ معد انا شايفك معهم " : مجنون ! انت ! انهبلت ! ولا عقلك فصل !
شد على كتفها زود يناظرها مايرد عليه : ان اخترتي غير اهلك اهل قل مقدارك ! الدم مايصير ماء يادانه مهما صار ! مايصير
دانه : وش اسوي انا طيب الحين ؟
ابو سيف : ردي لهلك ولا تختارين غيرهم ! واحد يسب ابوك وماحترمه ولا عطاه حقه وفلوسه ترضين تجلسين مع ولده ؟
رفعت نظرها لعبدالعزيز خلفه واقف يناظرها ولا يسمعها , مايسمع الا ضجيج سيف وثامر المتقابعين خلفه , ورجعت تناظر ابوها : بابا انت مو ناقصك فلوس
ابو سيف : دانه هذا شيء مايخصك
دانه : كل شيء مايخصني اجل , مشاكلكم حلوها بعيد عني وعن حياتي
تركت يده تمشي للباب وتطلع تحت ذهوله منها , ماتفشل بانها دايم تصدمه بافعالها وبكلامها ولا يهمها اصلاً مدى الصدمات الي دايم تسببها له , طلعت لوديم الي مشت لها تمسك يدها : شصار ؟
دانه : ولا شيء , خيروني بين بعض بس
وديم : مين اخترتي ؟
دانه : ولا احد
ضحكت غصب : تعجبيني
صرخ ابو طلال يضرب الباب : فكو الباب فكوه ! قسم بالله انكم انهبلتوا ! فكوه لا اكسره على راسكم !
فتح الباب يوسف لخواله يتركهم يدخلون لجل يفرقون بينهم لان الوضع ! زاد عن حده وخرج عن نطاق سيطرتهم , توسعت انظارهم من انتشر صوت صراخهم وسبهم وشتمهم لبعض , يخرج عبدالعزيز من بينهم لبرا يشوفهم كلهم حول الباب , تصرخ ام سلمان : اعوذو بالله من الشيطان الرجيم اعوذوا بالله من عين كل حاسد ماذكر ربه !
لفت عليه من شعرت فيه خلفها : شفيك !
عبدالعزيز : تعالي
عقدت حواجبها : وين ؟
عبدالعزيز : قريب , تعالي ابيك , بكلمك
مسك ذراعها بلطف مايترك لها مجال لرفض , ومشت معاه لان الصدق ؟ حتى هي بتكلمه بعد , طلع سيف يستوقفهم من رمى شماغه على كتفه وتقدم لها : فكها
عبدالعزيز : سيف اذا في راسك شر رح طلعه على ثامر
سيف : بيطلع عليك وعلى اخوك , اتركها
سكت مايرد , وتقدم يتنفس بتعب معد فيه حيل يعصب : فكها يومين ثلاثه لين ابوي يهدى بعدين تعال اخذها
مسك وجهه فهد يلفه لناحيته : لا تزيد النار حطب فكها الحين وبعدين يصير خير , والله ابوي بيذبحك ان شافك والله
بعد يده من صرخ ابوه يناديه , يشعر فيها تمسك طرف ثوبه بدون شعور , تشتت افكارها تسمع الصراخ من حولها ولا تدري وين مصدره الأساسي لان القضيه الأساسيه أرض وفلوس ! بس كل الي هي تسمعه الحين اسمها , اسمها الأول واسمها الثاني , واسمها القديم ؟ هو الي فار بدم ابوها من جددوا عليه ذكرى جروحه , عقد حواجبه بنزعاج من صياحهم , ينحني لها : تبين تروحين لهم ؟ ولا نكمل وتجين معي ؟
هزت راسها بنفي : مو مع احد
عبدالعزيز : من تبين اجل ؟
دانه : الجني
عبدالعزيز : اعتبريني جني طيب وتعالي معي
دانه : مايحتاج اعتبرك لانك من الأساس جني
عبدالعزيز : طيب يعني بتجين مع الجني ولا لا ؟
دانه : لا
سكت لوهله يشوفها ترددها من نطقت تصارحه بشعورها : بس يعني ودي انحاش من هذا كله الصدق
عبدالعزيز : والله انحشك منه وابعدك عن ابو جده بعد بس تعالي
دانه : والله اول من انحاش منه انت , لا تقولي تعالي
عبدالعزيز : يعني وش ؟
دانه : يعني ماني جايه معك ولا رايحه معاهم , بنحاش لوحدي
ام محمد : لا اخذها معاك وروحي معه .
لفوا عليها بستغراب , وناظرتهم : اخذها وروحو من الناس المهبل هاذي , ابوك وابوها مهوب مرتاحين لين يذبحونكم , روحو وحلوا مشاكلكم وعللكم بعيد عن الناس , وانتم جايين ؟ جيبو لي حفيد معكم
ناظرها بستغراب : ومن وين نجيب !
ام محمد بستخفاف : مدري يمكن من الحُرمه الي بجنبك
رجع يناظرها , وهزت راسها بنفي : والله ماجيب
ام محمد : اجل نزوجه غيرك
دانه : ابد زوجيه عشره غيري لو تبين بعد
بعدت تمشي راجعه لفوق , تنهي الموضوع قبل بدايته , وطلع خلفها ! يدخل الغرفه معاها ويسكر الباب خلفه , رفعت يدها تنبهه : عزيز تراها غرفه امي ! اطلع
تقدم لها يرفعها على الطاوله مايهتم ولجل تساوي طوله جلسها يناظرها امامه : واحد وعدتك مليون مره ماتزوج غيرك لو اموت , ثنين جدتي تمزح , ثلاثه لازم الحين نطلع من البيت حفاظاً على سلامتك وسلامه اعصابك
دانه : واحد انت كذاب , ثنين جدتي ماتمزح ! , ثلاثه مراح اطلع معاك , اربعه انـ..
قاطعها : اخر كلامي , بتنزلين ولا والله شلتك ونزلتك غصب
رفعت يدها لصدره تبعده , على لحظه دخول امها الي عقدت حواجبها : طيب مو بغرفتي !
دانه : ماسوينا شيء اساسا جالسين نتهاوش ! بلا اسائه ضن !
سكرت الباب : ماقلت شيء انا !
عبدالعزيز : تعالي اقنعيها تجي معي
ام فيصل : وين تجي
عبدالعزيز : لمكان
ام فيصل : بتتفاهمون؟
عبدالعزيز : لا بنتهاوش
ناظرته بذهول من نطق : شرايك انتي !
ام فيصل : اعوذو بالله من الشيطان الرجيم ! شفيكم انتم من معطيكم عين ! وش النفسيات الخايسه هاذي ؟
عبدالعزيز : خالتي يلا !
رفعت يدها تصفقه : وش خالتي يلا ! ماسمعت كلامك انت بسمع كلامها هي يعني !
ناظرتها بصدمه : لا غصب عنك بتسمعين كلامي ! امك انا ! بعدين انت واقف تشاورها ! اسحبها وانقلعوا عن غرفتي بنام ! يكفي من صباح ربي وابوانكم يصايحون فوق راسي ماخلوني انام بسلام !
~ الأسفــل , الصـاله ~
في عالم موازي كانوا الاثنين غارقين بعالمهم الثاني بعيداً عن الصياح والمشاكل بعيداً عن كل شيء غارقين بالحُب المعطوب لأنهم كل دقيقه والثانيه قافطينهم وعاطبين لحظتهم السعيده ! ومع ذلك صامله تكلمه وصامل يحلل اجازته معاها ، وفعلاً محد حلل الاجازه مثله , ريان من جا وهو منصرع تعبان وعليه حراره وعبدالعزيز ماطول متعاقي يومين ولحقه ترتفع حرارته خمس ساعات وتنزل خمس دقايق , وهذا هو بالمجلس متكي بيدينه الثنتين يتاملها قدامه تسولف له وش سوت هي وشهد للمره المليون تحاول تخلص سالفتها الي لها ثلاث ايام تقولها بس لانها بكل لحظه توشك على ختامها يدخل باسل يلعن اصلها واصله وتنقطع السالفه بدون ختام , وحالياً هم يستغلون كل لحظه مايكون فيها موجود بالبيت , وابتسمت بتساع : وبس كذا والله خلصت السالفه الي مابغت تخلص
مازن : وليتها ماخلصت
فجر : خير ! تعبت وانا احاول اخلصها لك ترا , وانت تبي تتعبني زياده !
مازن : لا ابد مو هذا القصد
فجر : وش القصد اجل !
مازن : ابي اسمعك زياده ماشبعت منك
فجر : ادور لك سالفه ثانيه , السالفه هاذي طفشت منها , تعبتني
مازن : سلامتك من التعب
ابتسمت بتتكلم , الا ان الباب انفتح وطلت عليهم رهف تقولهم ان باسل جا , وتنهد : ياخوك هذا الي ودي اقتله واتخلص منه
هزت راسها بنفي : الا بسبوستي مازن !
مازن : بسبوستك قاتل لحظاتي الذيذه
فجر : عادي , والحين حفاظاً على سلامتك اطلع
مازن : طرده
فجر : لا محشوم , بس اخاف عليك
مازن : فديتك
رهف : ياجدي اخلص اطلع قبل يجي ويذبحك
مازن : انتي للحين هينا !
رهف : ايه بكلم فجر
مازن : وش تقولين لها
رهف : شدخلك , اطلع واسكت
سمعوا صرخته من المدخل يناديه , وعضت شفايفها فجر : مازن اطلع !
طلع تطيح عيونه عليه : وينك !
ابتسم بعبط : عند اختك
صفقت جبهتها فجر تسمعه , وضحكت رهف : يبي يموت هو حالف مايطلع من بين يدينه حي , معليك منه
سدحه بنص الممر قدام المجالس والصالات يتصافقون بصياحهم المُعتاد عليه والي صار منظمن روتين يومهم لذلك معد احد ينخرش من الصراخ العالي الي كله سب وشتم باسم "مازن" , نزلت من الدرج تشوفهم , وتعدتهم بدون ايء رده فعل تمشي لصاله الي تظم بنات خالاتها وبعضاً من خالتها , تدخل لهم وتجلس بجنب شهد الي حضنتها ترخي ظهرها على الكنب : وينك مختفيه ؟
دانه : مشقلبه نومي
شهد : وليه مشقلبه نومك ؟
دانه : عشان ماشوف واحد يبدا اسمه بحرف العبدالعزيز , وعشان ماسمع صياح الصباح الي معد له بدايه ولا نهايه
ضحكت تلعب بشعرها : معليك الي يبدا اسمه بحرف العبدالعزيز منصرع بصاله الثانيه مع ريان من ثلاث ايام وهم الحراره لاعبه فيهم تسمعين هلوستهم من الدور الثاني , واما المشاكل حلوها خوالي وباعوا أرض ثانيه وتقاسموها بدون مشاكل , بس طلعت مشاكل ثانيه
هزت راسها : ايه ادري , مازن وباسل اشوفهم كل شوي متقابعين
شهد : باسل يقبع بمازن , مازن مسكين ماسوى شيء
دانه : مازن مسكين ؟؟ , مازن سكين يستاهل كل الي يسويه باسل
عضت شفايفها تضحك : دنو ! انتي بعد شفيك عليه !
لفت من حست بفجر تجلس بجنبها : تسولفون بدوني ؟
شهد : نحش فيك وانتي الصادقه , نحش فيك ونحش بالهازبند حقك بعد
انحنت تبوس خدها , وضحكت دانه تشعر بعُمق قُبّلتها تسمع شهد تقولها : فجر اقولك تحش فيك !
فجر : تغار علي هي , ماتحش فيني
دانه : صحيح
شهد : طيب انا تغارين علي ؟
دانه : اغار عليك من مين ياحضي ؟ انتي حتى مُعجبك سحب عليك
صفقتها تبعدها عن حضنها , وتعالت ضحكاتهم من عصبت : مايضحك !
دانه : امزح ! حبيبي انا اغار عليك من ضلك حتى بس تعالي
رفعت حاجبها تشك بمصداقيه كلامها , وضحكت فجر : انتي زوجتها الثالثه , اكيد بتغار عليك اكيد ليه الحساسيه
شهد : ليه مين الأولى !
فجر : انا !
شهد : والثانيه
فجر : عزوز
شهد : وانا الثالثه ! ليه مو انا الثانيه وعزوز الثالثه !
عقدت حواجبها ام ريان تسمعهم : الله يرزقكم سوالف زينه وانا خالتكم
ودخلت الجوهره على نهايه كلامها تدعي : والله يرزقني مشروع زين انا بعد , امي
دخل خلفها سلطان ينزل الاوراق ويجلس , وعقدت حواجبها ام محمد تشوف وجيهم المصفوقه وسكتوا كلهم ينتظرونهم يتكلمون , حك حاجبه سلطان يبدا بالكلام : بنينا عماره بس بالغلط طاحت والرجال يبي تعويض
صرخت ام رعد بصدمه : بنيتوا عماره ! وبالغلط طاحت !
الجوهره : ماضبطنا الوزنيه زين
رمشت مزون ماتستوعب مصايبهم الي كل يوم وهم يعيشونها وكل وحده أقوى من الثانيه , غطت فمها لاراء : عسى ماصار لحد شيء
روان : فيه احد مات ؟
رغد : والله الي بيموت هم , كم قيمه التعويض ؟
الجوهره : 345
شهقت الماس بصدمه : الف !
سلطان : اجل ريال !
مسكت راسها وسن : الله لا يخسف بنا
لفت الجوهره لـ امها تكلمها : امي لازم نعطيهم المبلغ ذا الاسبوع ولا بننسجن
ام محمد : ازين انسجنوا
فجر : محد يبيكم والله
شهد : مامنكم فايده , تبنون عماير وتكسرونها على الناس ليه ؟
وجدان : ياحسافه الفلوس الي راحت على بعثتكم والله
لف سلطان مايرد عليهم : امي تكفين ماودنا ننسجن وحنا بزهره شبابنا , بعدين لسى للحين ماعشت حياتي ولا تزوجت ! ولا صرت مُهندس مشهور
اسيا : مشهور بالفشل والله
دانه : تبي نصيحتي ؟
هز راسه : اثق في غبائك
دانه : انسجن وانحاش وجوجو معك , وتزوجها بسجن وعيشوا زهره شبابكم لوحدكم محد محتاجكم , واذا على الشهره ابد معليك انا أشهر فيك وفي ابو جدك بعد
الجوهره : كلي تبن انتي محد محتاج رايك
سلطان : تصدقين اقتنعت شوي , شرايك جوجو
الجوهره : من زين وجهك اتزوجك ! ولا مُهندس فاشل بعد ليتك مهندس زين
امتنان : تراك منتي ببعد منه
الجوهره : اسكتوا عني بس , والله اخر مره ادخل معك شراكه في مشروع , وانتي امي ! بتعطينا المبلغ ولا ادور غيرك يعطيني
ام محمد : دوري غيري يعطيك
قامت تهز راسها : طيب
طلعت ولحقها باوراقه لخوانه يطلبونهم يد العون رغماً انهم سفلوا فيهم لحد الصبح الا انهم بنهايه سددو تعويض خسارتهم , وضحكت ام محمد من قامت مزون تشغل رقيه شرعيه في كل زوايا القصر والبيت لان الجنون الي ركبتهم موب طبيعيه , وبنهايه اليل هدت شياطينهم ولله الحمد عدت عليهم ساعتين بدون صوت عالي لاول مره من زمن طويل , طلع ريان وهو الي توه يصحصح من الحمى الي ركبته ثلاث ايام خلصت اجازته وهو ماستمتع فيها ! وحتى يوم صحى لقاء شياطينه مربطه من صوت القران يعقد حواجبه : عسى ماشر من انسحر ؟ من مات ؟
ابو ريان : اعوذوا بالله يافالك الخايس !
براء : ارجع ابوي نام ارجع
مشى يجلس معاهم على طاوله العشى : لا انا مصحصح
ام سعود : خويك ماقام
هز راسه بنفي : لا اشوف حرارته مرتفعه
فيصل : ايه معليه خله يهلوس , يكب علومه شوي
لفت عليها رهف : ايه روحي اسأليه الحين كان يخونك مع مين يوم كان بمكه
وديم : استغليه دنو
ماردت عليهم تاكل , وضحكوا من صرخت مزون : اسكتوا وتعشوا ! واسمعوا للقران وانتم ساكتين
لف عليها ريان : صدق فيه احد صايره له شي
مازن : محد صار له شيء , بس تبي تهجد الجنون الي فوق راسك شوي
ابو عناد : محد جنونه كبر راسه الا انت ياحمار تعش واسكت من اليوم وحنا نسكتك ماتسكت !
ام ريان : لا معد هو ساكت صحى خويه
باسل : لا بيسكت غصباً عنه
مازن : مهوب انت الي تسكتني
صرخت ام محمد تضرب الطاوله قبل يبدون معركه ماتنتهي : حتى القران ماهجد شياطينكم !
قطعوا الصوت يسكتون احتراماً للقران واحتراماً لوجودها , وبينما في الطرف الآخر قامت تنهي عشاها وتتوجهه لمكانه , تشوفه نايم بصاله ومكان ريان بجنبه فاضي , تقدمت له فضول مو اهتام وانحنت له مستغربه مو رغبه , ورفعت يدها لجبينه تلمس اناملها حرارته , وهي تذكر انهم قالوا لها أنه تعبان بس ماجته الا الحين ولا قابلته من اخر موقف , ميلت شفايفها من ابتسم : بوسيني واتعافئ
دانه : لا تتعافى مبيك تتعافى انا
رفع يده ينزل يدها من على جبينه يقبّلها : اجل شجايبك لي
دانه : مالك دخل
ابتسم بدون رد يغمض عيونه من مررت اناملها على عُنقه تستشعر حرارته : ليش مرضت ؟
عبدالعزيز : هواجيسي فيك
عقدت حواجبها بستغراب : شدخل ؟
عبدالعزيز : هي الي تعبتني
دانه : والله انك تهلوس
عبدالعزيز : اهلوس
دانه : ماتدري شتقول
عبدالعزيز : أدري بك بس
دانه : تبي مويه طيب ؟
عبدالعزيز : ابي شيء غير المويه
دانه : وشهو
عبدالعزيز : ريقك طال عمرك
توسعت انظارها بصدمه : وجع ! مريض انت !
عبدالعزيز : ايه ماتشوفين علي حراره ؟
ضربت كتفه تبعد : قليل ادب
مشت للباب بتطلع لكنه تقفل ! تعقد حواجبها بصدمه : هيه !
وقفت خلف الباب ام محمد تكلمها : اجلسي عند زوجك اهتمي فيه تعبان
دانه : جده بلا استهبال عاد افتحي الباب !
ماردت تاخذ المفتاح من الباب وتبعد , وضربت الباب تشعر بخطواتها تبعد : جده !
عضت شفايفها ماتبي تصرخ زود ويسمعونها خوالها ويحطون فيها النون ومايعلمون وبعدين هي اساساً كانت رايحه تجيب له كمادات تخفف حرارته وتفك هباله وهلوسته , ماراحت تهج ولو انها كانت من ظمن الخطه الا انها بالاول كانت بتجيب له كمادات ! , رجعت له تجلس بستسلام : قفلت الباب
عبدالعزيز : اطلعي من البلكونه
رفعت نظرها للبلكونه : اذا راحت تنام
هز راسه يرخي راسه على المخده ويترك لها نصف الحاف لجل لو بردت تتغطى فيه : اطلعي زين لا تطيحين
ميلت راسها له تشوفه يغمض عيونه وينام , ماتدري هو بوعيه ولا مو بوعيه بس الاكيد انه بنص وعي , لانه ترك لها نصف الحاف ونبها تطلع زين ولا تطيح , وهاذي افعاله الي يسويها وهو صاحي , سكرت الانوار تجلس بجنبه تنتظر الوقت المُناسب الي تطلع فيه لكن ماطال انتظرها من غفت معاه وخربت خطتها كلها , حتى نومها الي كانت مشقلبته عشان ماتشوفه تشقلب زي نومه وخلاها غصب تشوفه , في صباح صحى فيه مصحصح شوي ولقاها نايمه بجنبه على قد مانه استغرب كيف نايمه جنبه ؟ على قد ما ضحك من لقاء الباب مقفل وفهم ان جدته ورا كل هذا , شالها يريح جسدها على فراشه ويميل ثغره لعُنقها يقبّلها قبل يستقيم بوقفته : اجل جيتك حقيقه ماكانت حلم ؟
تحركت ومال وجها لثغره تجبره يقبّلها منجديد , يقبّلها بشكل مطول وشعور مشتاق , وحدوده ماكانت الا بين خدها ونحرها , وان تعدها وصحت ؟ احتمال عزاه اليوم , ضحك يقبّلها القُبله الأخيره ويوقف يمشي للحمام الي بآخر الصاله يمين , وماقصرت جدته ابد بانها تترك لهم الاكل عند الباب وملابس له بعد , كريمه ام محمد كريمه واجوديه ماتقصر , تروش بماء بارد ينزل باقي الحراره عنه , بماء بارد يصحصح به وينشطه , ومن طلع يجفف شعره ؟ لقاها صاحيه : صح النوم
رجعت راسها للكنب تغمض عيونها : لا تكلمني
عبدالعزيز : ترا انتي الي جايتني
فتحت عينها تناظره وضحك بستعباط : جيتيني ونمتي جنبي بعد
دانه : متعافي اليوم ماشاء الله
هز راسه يجفف شعره : ايه عطيتيني بوسه
عقدت حواجبها بستغراب : متى عطيتك بوسه ؟
عبدالعزيز : الصدق انا الي عطيتك بوسه
دانه : ايه قول الصدق لا تكذب
رفعت يدها تبعد شعرها عن نحرها تشعر بحراره عُنقها من بوساته , وجلس بجنبها يميل جسده نحوها : شسويتي انتي عشان تقفل الباب ؟
دانه : تبيني اهتم فيك وانت تعبان , مسكين انت ماتقدر تهتم بنفسك
عبدالعزيز : ماشوفك اهتميتي فيني عاد
رفعت حاجبها , وضحك : اهتمي فيني يلا عشان تطلعين
دانه : اطلع , من البلكونه اطلع من فوق الدولاب اطلع من كل مكان الا اني اهتم فيك عشان اطلع
عبدالعزيز : لذي الدرجه زعلانه
هزت راسها بايجاب : وبزود بعد
عبدالعزيز : وش يرضيك طيب ؟
دانه : ولا شيء
عبدالعزيز : لا اطلبي , لازم اراضيك قبل ارجع الميدان
لفت عليه بستغراب : متى راجع
عبدالعزيز : بعد يومين
عقدت حواجبها : ومتى بتجي مره ثانيه ؟
رفع انامله لشعرها : الخميس الجاي
سكتت تناظر عيونه , وابتسم : اطلبي عيوني واعطيك بس لا تخليني ارجع وانا ماضميتك ولا راضيتك
دانه : طيب هل انت تشوف نفسك غلطان ؟
عبدالعزيز : اكيد
دانه : تشوف اغلاطك تستحق الزعل ؟
عبدالعزيز : تستحق , من حقك طال عمرك تزعلين , ومن حقك اراضيك
ميلت جسدها له ورفع كفه لخدها يتاملها : واقولها لك بصريح العباره أنا آسف
رفعت يدها لكفه الي على خدها تتامله من انحنى لها يهمس : على كل شيء , وعلى كل شعور وشك دخل قلبك بدن قصد
مسح على خدها يفتح لها موضوع ماقد جاب طاريه : على وصالك الي كل الناس درت فيه , وعلى كل كلام قالوه لك انا اسف , انا ادري بك وادري بنفسك وقلبك , ادري برغبتك وش ودك , هم مالهم دخل فيك , حتى لو قالوا لك تمنعينه قولي هو راضي بالمنع مالكم دخل
قاطعته : عزوز انا مامنعك !
عبدالعزيز : ادري
دانه : لا تقول انا امنعك طيب , والله مامنعتك انت تقدر تجي وتأخذ حقوقك بنفسك بس انت ماتجي
عبدالعزيز : وانتي تتوقعين اني اذا ماجيت مبيك ؟ طيب تدرين اني بالموت ارد نفسي عنك ؟ دانه كوني معي صريحه انتي ماتخطيتي تجربه امك وابوك ومن بعدها فكره الزواج عندك تدمرت , اشوفك واشوف ترددك بكل لحظه يطري على بالك ابوك فيها وتنتظرين بس متى انتهي من حياتك واصير زي ابوك , واخونك , اشوفهم من يقولون لك يخونك يخونك ! ماتستغربين ولا تعصبين ولا تنكرين لأنك حاطه ببالك ان بيجي اليوم الي بتلقين فيه قلبي ممتلي بغيرك , بس اقسم لك يمين ونذر ان قلبي يبيك انتي وبس والله مالتفت لغيرك لو يحطون على رقبتي سيف القصاص , ولا اجيك الا وانتي راضيه أتم الرضى وفاهمه اني ابيك وصل قلوب مو وصل اجساد
رفعت يدها لصدره تسكر زراره ثوبه : عطيني فُرصه أحبك فيها منجديد
رفع كفوفها لثغره يقبّلها , ورفعت عينها له تتامله يقبّل اناملها لوقت يسترد فيه روحه ويطفي شوقه لجل يرتب كلامه في باله بس , وتنفس بعُمق يتامل عيونها ويدينها ؟ بقُرب ثغره يقبّلها بين حين وحين : اخاف الحين اقول أحبك وماتصدقيني واخاف ماقول وتضنين اني ماحبك , عشان كذا عطيني فرصه جديده واطوي صفحات بالك وماضيك وخليني أبدا أحبك منجديد وافهمي اني ماستغلك واني بس أحبك بدون سبب وبدون مصلحه , وبدون شيء ثاني أبيك دانه , وابيك دنياء , دنياي انا بس مو دنياء احد ثاني مهما بلغ كرهك للاسم بضل اناديك فيه لين تستوعبين اني اشوفك فيه شيء ثاني ماشوفك فيه دُنياء سميه حبيبه ابوك , انا اشوفه اسم ثاني وعالم ثاني ودنيا ثانيه وحياه ثانيه , يوصفك حيل ويوصفني معك لما اكون بين جيدك وسلسالك وعينك واهدابك كيف ان الحياه تنتهي فيني قبل أغرق بابحارك واصير في دنياك غريق
رفعت اناملها تمسح على خده , تسمعه يعلمها كيف انها بقلبه غير وكيف انها لروحه حياه ثانيه وقلبها الرهيف ماتحمل كلامه ! وسكرت فمه بيدها , وضحك يبوس يدها , يسمعها : اسكت خلاص
عبدالعزيز : باقي مشاعر !
دانه : خلها بقلبك
عبدالعزيز : انتي قلبي
دانه : لا تخليها فيني اجل
هز راسه يبتسم , يعدل جلسته ويفتح لها حضنه , وتقدمت له بجسدها من حاوط خصرها وراسها , يخلل انامله بين خصلات شعرها ويشعر فيها تغلق عيونها من انحنى لخدها وفكها وعُنقها وشعرها , يقبّلها قبُلات لطيفه عشوائيه تطفي نار شوقه وشوقها , الي مهما جحدته واضح , وغمضت عيونها بستسلام تلمس عُنقه وشعره من الخلف تشعر بقصره الشديد بحسوفه على ايام كانت اناملها تضيع وسطه , ولا انتبهت انها زمّت شفايفها من زعلها على شعره الا من لمست انامله ثغرها , وانحنى يقبّلها مايحكم نفسه ابد , بذات انه بحضنه ساكته مُعجزه ربانيه ذي , غرق في بحر تقبّيلها يقبّلها مره ومرتين وثلاث وهو تعبان وعطشان وهلكان ! , تعبان جسد وعطشان وصل وهلكان منها ومن حلاوتها ولذّتها الي يحرم نفسه منها .. تنفس هوى قُربها من عدت عليهم الساعات وهو غارق في بحر ثغرها , يغلق عينه بستسلام ويرخي جبينه على جبينها يسمع صوت مكبرات الاذان , تصحيه من عالمه وترده لواقعه لجل يستوقف نفسه احتراماً للاذان , ومن انتهى حاوطت وجهه هي ترجع تقبّله , القُبله الختاميه , الي هدت قلبه من حلاوتها , وقبّلته بدون كلام وبدون رده فعل توقف بعدها وتتركه يرتخي على الفراش يغلق عينه ويدرك واقعه من طلعت وتركته لجل يستوعب دخول وقت صلاة الظهر ويلحق على المسجد لانها لو جلست معاه دقيقتين زياده نسى الصلاه , حتى هي بتنساها , عقدت حواجبها مزون لانها كانت واقفه عند الباب ! لتوها فتحت القفل عشان تدخل وتصحي عبدالعزيز بس هي طلعت قبل تفتحه , طلعت ولا انتبهت عليها حتى ! تقدمت ام محمد : فتحتيه ؟
هزت راسها بستغراب : فتحته وطلعت دانه ! اكلمها ماترد
ام محمد : ايه مهيب معك , خلاص روحي انا اصحيه وشوي اقولك السالفه كلها
هزت راسها بايجاب تتركها تدخل وتشوفه منسدح بفراشه : عبدالعزيز
رفع البطانيه عن وجهه , وضحكت : مصحصح اليوم ماشاءالله
عبدالعزيز : سكران والله ماني مصحصح
ام محمد : مايخالف السكره الحلال ماتضر
وقف يناظرها : ترا حركات الاستقعاد هاذي ماحبها
ام محمد : بدال لا تشكرني !
عبدالعزيز : اشكرك بس شوي
ابتسمت غصب تهز راسها : انا ادري انك ماتعافيت الا منها بس تسوي فيها انا الي مايجيب راسي شيء
~ الحديقـه , بعد الصلاة ~
لحظه مامتلت الحديقه بوجودهم , ابتسم ابو عزام : يلا على وش مجمعينا اليوم الحلوات ؟
وقفت اوتار تبتسم وتفتح صناديق الحلا : صديقتي فتحت محل حلويات ولازم ادعمها
سلطان : عشان كذا مقويتنا اليوم
اوتار : ابو نايف ! لا تصير جحود عاد كل يوم وانا اقهويك
سلطان ² : سميي جحود وانا خالك سكبي له معليك
راشد : ياليل ذا الخال الورع سكتوه بالله
عقدت حواجبها هيفاء تفقده : ريان وين ؟
فهد : يصلي
مزون : ماصارت صلاه هاذي
دخل , وضحكت ريما : الذيب على طاريه
شهد : قطوه والله مو ذيب
رفع سبابته يرد على جدته : الواحد لازم يخشع بصلاته !
لف على شهد يرد عليها هي بعد : انتي القطوه مو انا , انا ذيب وسط المعارك
ابتسم ابو ريان بتساع : بعّدي والله ولدي !
ضحك ثامر ياخذ ولده من بين أيادي لاراء يبوسه , وعقد حواجبه عبدالعزيز توه ينتبه على الورع الجديد , وضحكت اديام تنتبه لعيونه : لولو ولدت
عبدالعزيز : أسالك بالله !
اديام : والله صرت عمو للمره الثانيه , بس لغير عيال شادن هالمره
ضحك بغرابه يوقف بجنب ثامر الي ضحك بذهول يستوعب انه توه يدري انه عم ! لانها ولدت بايام رمضان لحظه ماكان بالميدان بعيد عنهم وهم نسو يقولون له : من كثر الأحفاد نسينا نعلمك , تشيله ؟
هز راسه بنفي : لا فكني بس ببوسه
انحنى يبوسه برفق , وابتسمت امه : عقبال تبوس عيالك
ام فيصل : ياربي امين
دخلت لتوها تجي وعلى حظها دخلت على دعواتهم له تستغرب : مين الي ياربي يبوس عياله
شهد : دنو صمي حلقك
ريوف : دنو انتي الي تنكبين نفسك بنفسك ترا
رمشت تستوعب منهو : خلاص والله مايحتاج تقولين لي مين خلاص خلوه مجهول مايحتاج اعرفه
تعالت ضحكات خوالها وخالاتها عليها , وجلست بجنب وديم الي لفت عليها تضحك : ملقوفه
دانه : جداً
سرعان ماعقدت حواجبها بذهول من وقفها فيصل يجلس مكانها : سلامات !
فيصل : مكاني , روحي دوري لك مكان ثاني
حاوط اكتاف وديم يصد لخواله الي انتشرت سوالفهم ومواضيعهم , ترفس رجله وتمشي مالها مكان الا بين جداتها ولأنها اساساً تبي تتفاهم مع ام محمد جلست بينهم تلف عليه : وش الحركات هاذي !
عقدت حواجبها تستغبي : ايء حركات ؟
دانه : ايء حركات ! والله اوريك انا
توسعت انظارها بصدمه : تهدديني !
دانه : ايه , وانا اعرف كيف اخليك تنشغلين عني وعن حياتي
لفت تنادي ريان : ريان
ريان : هاه
دانه : امالي فيك كبيره
ريان : ازهليني
دانه : ابي شايب
ريان : تتزوجينه ؟
دانه : أخذه الثانيه ؟
ريان : ممكن
عبدالعزيز : ريان انت ياما زوجتني ياما زوجتها !
عض شفايفه مازن يضحك : ريان !
عقدت حواجبها ام عبدالله : شتبين باشايب انتي ؟
دانه : بزوجه امك عشان تفكني منها
توسعت انظارهم بصدمه , ورجعت تناظر ريان : شايبين ريان واحد لها واحد لمزون
ريان : ابد ابشري , تبينهم مزايين ولا معهم فلوس ؟
دانه : الاثنين عشان يغرونها ويشغلونها وبالمره اذا ودهم بوراعين يعني يجبون لنا لان حنا بعد نبي خوال مو بس هم يبون احفاد
ايلان : منطقي والله
صرخت من لفت مزون تدور عصاها , وناظرتها ام فيصل : لسانك متبري منك انتي
لقت عصاها تلف وتلقاها قد وصلت لخر كنبه وابعد مكان : تعالي !
دانه : عشان تكسرين عصاك على ظهري !
مزون : ايه الحين رجع لك لسانك الي مترين قدام , يوم جاك ولا شحليلك الثلاث شهور الي راحت ساكته ماتراددين !
جلست بجنبه من ترك لها مكان يكفيها , وضحكت امجاد : يمكن هو الجني الي مجننها ليه تحطون كل شيء فيها !
اوتار : لا صدقيني هي الي مجننته
ابتسم يشوفها مبتسمه بعبط , لانهم فعلاً مايقدرون يسون لها شيء وهو موجود معاها يمكن لأنها تحتمي فيه بزود حتى وقت قامت مزون تدور عصاها راحت له هو ! رغم وجود اخوانها واهلها كلهم الا انها طارت لعنده بدون شعور , ويمكن لأنها متأكده انه مراح يقول لها شيء بعكس اهلها الي ممكن يصفقونها اكثر من مزون , جلسها بجنبه يحاوط كتفها وعُنقها من الخلف , يسمع مزون : ترا ان قمت كسرت العصى عليك وعليه عادي مستفزعه فيه وهو بينجلد اكثر منك
دانه : عادي انجلد جماعه ولا انجلد لحالي
عازم : ايه هذا البلاء انك تنكبين أناس معاك
خللت اناملها وسط انامل كفه الي على كتفها تميل وجها له : انكبك عادي صح
عبدالعزيز : صح
مازن : متى اتزوج انا بعد ؟
تنهدت امه بتعب : مازن انت كلما شفتنا متجمعين فتحت الموضوع
مازن : زوجوني واسكت , شوفو عزوز تزوج وسكت
محمد : حتى انا بعد تعبت وانا ساكت , ابي اتزوج واكمل سكوت
مازن : يلا والله نوفر عليكم بعد نحط زواجنا مع بعض
عقدت حواجبها ام محمد : من تبي ؟
مازن : انا ؟
صبا : انت كل الكون عرف مين هي , اسكت
مازن : ابشري
رفع سبابته محمد يرمي اخر كرت اوراقه وينكب نفسه ! وياشر على رغد , الي بجنبها شهد والي كلهم صرخوا بصدمه : شهد !
توسعت انظار ريان بصدمه : يعقب !
هز راسه بنفي بذهول : لا ! , الي بجنبها
رمشت رغد بصدمه : انا !
محمد : ايه تكفين
ريان : وانا ابي حجز شوشو مسبقاً
لفوا عليه بذهول وابتسم بوهقه : والله بس مُسبقاً يعني متى ماخلصتوا من محمد ومازن وفضيتوا لي اتزوجها , بس حجزتها عشان اخاف احد ينط الحين وياخذها بعد
خالد : زودتوها والله
محمد : مازودناها نبي الستر حنا !
ابو طلال : حرمه انت !
لف مازن على جدته : تكفين والله اخر طلب , تكفين لا تفرقين بينا !
ام محمد بذهول : متى فرقت انا !
رائد : الا فرقتي , زوجتي عزوز وهو أصغر منا وحنا اكبر منه
عبدالعزيز : اعوذوا بالله من الحسد
رائد : على وش عاد ! على زوجتك المهبوله ؟
دانه : ولد !
عقدت حواجبها امه تستغرب دخوله معاهم بنقاش : رائد ؟ مين تبي ؟
رائد : لا ضمنت انكم بتزوجوني قلت لكم
ابو رعد : طيب اهدوا الحين وخلونا نتفاهم بشويش لان موضوعكم انتم كبر بزياده
سكتوا يصغون لمزون الي نطقت : الزواج الجاي زواج فيصل وديم , قدنا جهزنا له
محمد : ماعندنا مشكله ننتظر
مزون : الي بعده رائد ومحمد
مازن : لا والله !
مزون : ايه والله , انت مع ريان بعدين
مازن : لا موب على كيفك انا اول من قال !
ام عناد : مازن لا خلصت تدريب نزوجك خلاص ! الحين خلنا في رائد ومحمد ! توظفوا وخلصوا وانت للحين ماعندك شيء
مازن : والله مالي دخل انا اول من يتزوج ولا والله اخطفها قدامكم كلكم
باسل : ولد !
وقف , وعقدت حواجبها مزون تسمعه : بتزوجيني معهم ولا اخرب كل شيء !
ام سالم : زحمه كذا مازن ! ثلاثه بيوم واحد !
ريان : ايه عادي مافيها شيء
ابو سلطان : لا مايصلح
ريان : طيب على الأقل ملكه
سكتوا يفكرون , وهز راسه مازن بموافقه : ايه خلاص املك واسكت , حتى زواج ماعندي مشكله تاجلونه لين بعد اربع سنين اهم شيء تصير حلال
ضحك ابو ماجد بسخريه : حبيبي انت ملكتك بتصير زواج من ثاني اسبوع تجيني بنتي بطنها مترين قدام !
توسعت انظارها بصدمه , وضحك مازن : عادي ! حلال !
صرخ ماجد بذهول : وناوي بعد الكلب ! مافيه زواج ولا فيه ملكه فارق ياقليل الادب !
عقدت حواجبها بستغراب ماتفهم : وش يعني ؟
لف عليها من كان السؤال موجه له : يخليها حامل
توسعت انظارها بذهول : قبل الزواج !
ضحك , وهزت راسها بنفي : مايصلح
عبدالعزيز : الا يصلح عادي مدام صارت حلاله
دانه : لا مايصلح مو على كيفك ! امسك خويك لا امسكك معه
عبدالعزيز : شدخلني أنا !
ام ماجد : مازن انت نحط عرسك بعد ملكتك على طول مايصلح نحطها بعيد عنه
مازن : طيب خالتي تكفين حلليها لي
ام ماجد : اعوذو بالله الحلال بيد الله
مازن : ثم بيدكم ! عطونيها واوعدكم تعيش بسعاده ابديه
ابو عناد : مازن حنا قصتنا مو مع السعاده , حنا قصتنا مع الوقت المناسب , وانت إلى الآن ماجبت لنا وقت مناسب !
مازن : الا فيه وقت مُناسب بكره !
صرخوا بصدمه : بكره !
هز راسه : اجيب الشيخ ونملك ملكه خاصه , واحضنها واودعها وارجعها لكم وانا ارجع الميدان
عناد : والله ماتفكها خل احضنها وارجعها
مازن : والله افكها بس خلاص معد فيني صبر
تقدم له ريان يحضنه يضحك : حرام والله مسكين زوجوه
لفت ام عناد لـ ام محمد : وش تقولين
هزت راسها ترحمه : نملك له بكره
مازن : لا شوي فليل
ابو فيصل : مازن !
صفقه ريان : ولد اسكت مدام زانت !
ابتسم بتساع من لفت مزون على عيالها : اجل كلموا الشيخ يجي بكره
لف عليها يدورها بعيونه مايلقاها , وضحكت رفيف : انحاشت هي ورغد
تنهدت ام محمد تشوف ريان يحضنه : ريان انت معه بعد
توسعت انظارهم بصدمه , وعقدت حواجبها ام ريان : خالتي !
ام محمد : مازن وعزوز يتزوجون وهو لا ؟ لا ابد قلبي مايطاوعني !
تعالت ضحكات عبدالعزيز يشوفهم يناقزون من فرط فرحتهم : والله وزانت حياتكم
لف عليه ريان بحده : قل ماشاء الله لا تحسدنا !
قامت شهد وقامت معاها دانه يركضون لفوق ينادونها , وفتحوا باب لغرفتها يشوفون رغد معاها مصدومه : قسم بالله مادريت ان الي يحبها فيها انا !
دانه : يوه رغد محمد دايم يلمح لك بس انتي بقره
رغد : كنتي تعرفين !
دانه : من يوم دخلت البيت وانا داريه , المهم معلينا منك الحين حنا بمازن , فجر ملكتكم بكره
توسعت انظارها بصدمه : كذابه مستحيل !
شهد : والله حتى انا معاك !
رغد : تستهبلون ؟
جلست شهد ماتستوعب : لا والله صادقين
طلعوا لهم البنات محد يستوعب ان بكره ملكة الاربعه الي ماتخيلوا في حياتهم يتزوجون , وابتسمت اميره تحضنها بغرابه : عمري انا الي بيتزوجون !
ايلان : موافقين انتم اول ؟
ريهام : حبيبتي موافقين من قبل يتكلمون حتى
ايلان : فجر موافقه بس شوشو ماندري
ريما : شوشو مايصلح تتزوجين خويك ياشوشو
شهد : بطني يعورني
كيان : خلي بطنك بعدين قولي لنا انتي الحين موافقه ولا لا
هزت راسها بايجاب , وضحكت ابتسام : اكيد بتوافق فجر بتتزوج وتسحب عليها تجلس لحالها ليه !
ضحكت وسن ترد على خالاتها وتقولهم انهم موافقين , ورفعت راسها فجر لشهد : كيف وافقوا عليك ؟
رفعت كتفها بعدم معرفه , وجلست دانه بجنبها : جدتي ماتبي تظلمهم معانا
فتحت يدها لها وابتسمت شهد تنحني وتحضنها : حبيبي انتي , والله مبسوطه مره مبسوطه
فجر : لي ولا لك
شهد : لك طبعاً ! انا مشاعري خربوطيه
لفت تبوس خدها , تنتشر اصوات الزغاريط لهم ولفرحتهم فيهم ! وتحت كذلك ! تنتشر اصوات ضحكاتهم بغرابه منهم ! كيف قدر وحده عليهم ! كيف جلس شهور يطلبهم مطلب واحد فقط وبكره بيحققون له مطلبه , ويحقق لخويه بعد , عض يده باسل مايبي يصفقه لانه جالس يستفزه كل لحظه وثانيه يمد لسانه ويقول "باخذ اختك" لكن الحين ؟ سحبتهم ام محمد بعيداً عنهم كلهم تاخذهم ثنينتهم على جنب لجل تكلمهم بعقل ومنطق : مازن وريان
ريان : ياعيوانهم
مازن : ياقلبهم ياروحهم ياحياتهم !
ابتسمت غصب ماتقدر تكتم ابتسامتها من عبطاتهم الي تضحكها , وابتسم ريان : اطلبي النجوم ونطيحها لعندك طال عمرك اطلبي الي تبين
ام محمد : مبي الا انكم تترفقون فيهم ولا تملون , ترا والله اني عطيتكم ثنتين يسوون عيوني
مازن : والله انا فجر بعيوني مازعلها لو اموت ، بس ريان مادري عنه
ريان : لا معليك انا بعد بحطها بعيوني واوعدك احفظها بروحي لو تبي
هزت راسها تثق فيهم : اعطيكم الي تبون واعطوني السعاده الي ابيها , وسعادتي هي شوفتكم وانتم مرتاحين
نطق بغباء من فرط تعبيره : والله اسعدك وأملي بيتك وراعين
ضحك ريان بصدمه , وضحكت بذهول : لا لا ! مبي منك وراعين
مازن : تبينها من عزوز بس !
ام محمد : ايه
ريان : ساحرك عزوز
ام محمد : حبيب قلبي هو
رفع حاجبه مازن : وانا !
ام محمد : انت حبيب عيوني
ريان : وانا !
ام محمد : انت العين الثانيه
عبدالعزيز : وانا !
مازن : انت شجايبك
ضحكت ام محمد : توني اقولهم انك حبيب قلبي طيب !
عبدالعزيز : ماسمعتك
تقدم لها يبوس خدها : وانتي حبيبه روحي
ام محمد : لا عاد انت كذاب
ضحك : تعرفين من حبيبه روحي
ام محمد : ايه دنياك المهبوله
عبدالعزيز : فديتها والله
ام محمد : مهبوله
عبدالعزيز : احلا مهبوله , بعدين انا كم مره اقولك خليها على راحتها !
ام محمد : مخليتها انا ماقولها شيء ! مزون الي تقولها
عبدالعزيز : كلكم لازم احاسبكم
..................................|☆
انتهئ , عطوه حقه ودمتم سلامَ ❤️
