Part 5

6.3K 277 166
                                    

سبحان الله وبحمده سبحان الله العظيم ♡

(بـيـت الـعـم تـركي-٢:٤٣ اليل )
فيصل من شاف انفعال جده عرف ان موت الوجد على يد جده قرر يتصرف وينقذ الوجد من هالمصيبه وهمس : عمي في دريشه اقدر ادخل منها واطلعها ؟
ابو الوجد عقد حواجبه يبي يتذكر وهمس : اييي تذكرتها موجوده بالله عليك ابيك تطلعها وتحطها اي مكان بالله مابيها تنضرب
فيصل : ابشر ابد ان شاء الله اني اقدر اطلعها بدون لاتفضحنا
الجد يتوعد انه بيسطر الوجد وعمام الوجد يحاولون يهدون الجد
فيصل طلع من البيت واتجهه ورا البيت تحديداً عند دريشه المخزن
الجد بعصبيه: يالمصروعه اطلعي ولا والله ثورت فيتس
الوجد : مابغى مابغى اطلعع كيفي
ابو نواف : يالوجد وانا عمتس اظهري خلينا نتفاهم
الوجد : ماطلع الا تطلعون ذا الشايب !
الجد : انا الشايب؟؟
الوجد سكتت وجلست وضمت رجولها واستمر الجد بوعيده وتهديده
حطت راسها على ركبها وبكت
فيصل فتح الدريشه وهمس : بنت
الوجد رفعت راسها وخافت منه ووقفت ونطق فيصل : لاتطلعيني صوت !
الوجد بخوف : اطلععع
فيصل دخل من الدريشه وصرخت الوجد بخوف منه لكن انقطع صراخها من تقدم فيصل وحط يده على فمها يمنعها من الصراخ ونطق بحده وهمس
: اسكتي لاتفضحينا
الوجد تناظر عيونه وملامحه الحاده الي خوفتها وبكت من قربه
تنهد فيصل وهمس : كم مره اقول لك امنعيني من الدموع؟؟
الوجد عضت يد فيصل الي على فمها
فيصل تحمل الالم ونطق : اسمعي تبين تنضربين من جدي ولا تنجين بحياتك ؟
الوجد تتكلم بس مو مفهوم لان يد فيصل على فمها
فيصل : يلا بطلعك من الدريشه وتروحين لبيتنا
الوجد حاولت تدفه عنها بس ماقدرت ونطق فيصل : مااسمح لك تتكلمين بهالوقت الصعب اطلعي من الدريشه ومايصير لك شي
الوجد تهز راسها بالنفي وهي تبكي
فيصل تنهد: ياليللل عاد والله ل اشيلك ان ماهجدتي
الوجد : مستحيللل
فيصل تنهد وطلع على الدريشه وهو ماسك يد الوجد
نزل فيصل من الدريشه ورفع يدينه للوجد : بسرعه ارمي نفسك وانا امسكك
الوجد : خيرر فيصلل؟
فيصل : ابوك موصيني عليك يالخبلهه
الوجد التفت على الباب وشاف الباب انفتح ماترددت ورمت نفسها من الدريشه ومسكها وحضنها فيصل ونطق: اسم الله عليكك
الوجد مسكت كوعها بألم ونطق فيصل : تعورتي ؟؟
الوجد بألم: انجرحتت
فيصل ابعد عن الوجد ومسك يدها وتخبى هو وياها عن الجد
،
الجد جاب سكروب وبدا يفك الباب وفتحه وماحصل الوجد : وينهااا؟؟
ابو الوجد تنهد براحه انها مو موجوده
ابو بتال: بسم الله الرحمن الرحيم هو انتم متأكدين انها هنا؟؟
ابو نواف : ايي متاكدين
الجد ضيق عيونه بشك وشاف الدريشه مفتوحه وتقدم لها بهدوء ونطق : هربت
ابو الوجد : يايبه استهدي بالله
الجد بتهديد ووعيد : هينن ي وجد والله ان مابكيتك دم ماكون سلطان
،
فيصل قدر يطلع من بيت ابو الوجد ومعه الوجد ونطق : اسمعي بندخل بيتنا وادخلي عند شيهانه ولا احد يدري انك موجوده !
الوجد بخوف ودموع : فيصل والله خايفهه من جدي والله مايرحم
فيصل : انتي بس امنعيني من هالدموع ومايجيك شي ان شاء الله
الوجد مسحت دموعها ونطقت : شك.....
قطع كلامها صوت جدها الي وراها : يالمصروعه تعالي يالخايبه
الوجد تجمدت مكانها وفيصل يفكر وشلون يحميها من جدهم المصروع
الجد : يابنت ال** اجل انا تفشليني؟ تعالي
الجده طلعت على اصواتهم هي والحريم والبنات
الوجد ثابته مكانها قبالها فيصل الي يناظر هدوئها
تقدم الجد ومسك شعر الوجد: هينن والله لاحرمك من اغلى ناسك
الوجد تبكي بألم : والله ماتلمس احد من اغلى ناسي! اذبحني عقبها اخذ اغلى ناسيي
الجد شد على شعر الوجد : تهددينن؟؟
الجد دف الوجد وطاحت بالارض وتلطخت بالتراب والجد يضربها
فيصل تقطع قلبه على منظر ابو الوجد الي واقف مو قادر يسوي شي يدري انه مايقدر ونزل انظاره للوجد الي تنضرب من الجد وصراخ الوجد الي يرن براسه وقلبه وصياح البنات
سحب الوجد الي بالارض وحطها ورا ظهره ونطق : والله ماتجيها كانها بتصير حرم لي !
الجد يلهث بتعب : ابك انت صاحي؟؟ اقول لك فشلتنا فشلتنا وماتبيك
الوجد ماسك ثوب فيصل بقوه وكأنه املها الوحيد
فيصل يسمع صياح الوجد وتنهد وهو اكثر انسان مايحب البكاء
نطق الجد بجديه : البنت هاذي ماتعقل الا نزوجها واحدً يربيها وبزوجها مشاري
فيصل نطق بحده : باخذها طرق عن الجميع ، الوجد حرم فيصل !
الوجد وهي تبكي : مابغى احد
فيصل شد على يدها بمعنى "اهجدي ترى مجرد كلام "
ابو الوجد بضيق وترجي: تكفى يايبه تكفى طالبك طلبه لاتزوجها مشاري
ابو نواف : يبه مشاري مو بصاحي وبيدمر البنت!
الجد : بتتزوج غصب
الوجد : مابغىى !
الجد بتحدي : ماتبين؟؟ طيب ، عهود جيبي ميلا
عهود بدلع متصنع : ابشر ي جدو
الوجد طلعت من ورا فيصل : وش تبون فيها؟؟
الجد : اعلمك كيف اقص لسانك انا
الوجد : والله ماتلمسونها احرقوني واذبحوني ولا تاخذونها
فيصل بهمس : خلاص اهجدي محلوله
جت عهود وهي تسحب ميلا الي تبكي
الجد تقدم ومسك فك الوجد بقوه ونطق بعصبيه : بوديها العم طارق
الوجد وقفت مكانها وارتخت اطرافها تحس الدنيا تسكرت بوجهها بمجرد ذكر العم طارق وبدت تفرك باطن يدها من استرجعت الماضي القاسي
ترجع ١٣ سنه للماضي ..
الوجد عمرها ١٠ سنين راجعه من المدرسه والابتسامه شاقه وجهها ولكن اختفت الابتسامه من شافت جدها مقبل عليها واعصابه تالفه
الجد بعصبيه : ايا بنت اللذينا اجل تلعبين بالمزرعه وخربتي الخضروات ؟
الوجد بخوف : مافهمت
ابو الوجد : جوجي حبيبتي ركزي معي انتي لعبتي بالمزرعه حقت الخضروات؟
الوجد هزت راسها بنفي وملامحها مليانه خوف
الجد : عقابها تروح للعم طارق !
الوجد كانت طفله ماتدري وش كان ينتظرها من العم طارق
ابو الوجد : يايبه استهدي بالله واتركها
الجد سحب الوجد بقوهه ووكبها السياره : بتجلسين اسبوع عند العم طارق ياربه يقدر يربيتس يالموذيه
الوجد ماكانت تعرف وش الجد يقصد بكلامه وكأي طفل عباله بيروح البقاله او الملاهي ..
وقف الجد عند بيت قديم ونزل وترك الوجد بالسياره وطق الباب الجد وطلع طارق كبير بالعمر لكن شكله كان مرعبب
الجد : اسمع عندي بنت عجزت اربيها !
طارق وهو يسمح على شواربه : ايي زين زين عطني ياها اسبوع وتطلع لك سيده
الجد : تم تم
طارق وهو يمسح على بطنه او بالاحرى "كرشه" : على المبلغ الي اتفقنا عليه
الجد : الله الله يوصلك اليوم قبل بكرى
طارق : تم يابو جابر هاتها
الجد اتجهه للوجد الي بالسياره تبكي من شافت شكل طارق كان مرعبب كان جسمه كبيرر وله كرشه وشواربه كثيره وعينه مسكره والثانيه مفتوحه ووجهه مليان ندبات
الجد: انزلي
الوجد ببكى : مابغى انزل عند الوحش هاذا
الجد كشر وسحبها ونزلها من السياره ونطق : بنتجلسبن مؤدبه عند العم طارق ولا ترى بياكلك
الوجد ببكى : ابغى بابا
طارق يسمح على شاربه : هاذهي؟؟ ايهه سهله سهله
الوجد غمضت عيونها بخوف من شافت شكله عن قرب : مابغى مابغى
الجد تركها وركب السياره وتارك الوجد الي تبكيي وطارق ماسكها
ودخلها البيت الكئيب المظلم رغم وجود الشمس الا انه مظلم
اول مادخلت الوجد البيت وهي تبكي طارق صرخ عليها وفتح عينه الثانيه
: اسكتيييي
الوجد شافت عينه الثانيه مافيها عدسه وبكت وفركت باطن يدها بخوف ومن هنا صارت عاده بالوجد اذا خافت تفرك باطن يدها
واستمر طارق اسبوع كامل وهو يهاوش ويصارخ ويجوع الوجد الطفله الي كان عمرها ١٠ سنوات فقط ..
نرجع للحاضر ..
فيصل عقد حواجبه وهو يشوفها تفرك باطن يدها بقوه : الوجد؟
الوجد رفعت راسها للجد وصرخت : والله ماتاخذهاا
الجد : كانك ماتبين اختك تتأذى تتزوجين مشاري !
فيصل بحده : الوجد حرم فيصل
عهود : فيسلل !
فيصل سحب الوجد ونطق بعلو صوته : الوجد محد يجيها وبكرا العصر وحنا مملكين !
الوجد بدموع : خلاصص مابغىى احدد
فيصل بهمس : اسكتي شويي
الجد : طيب يالوجد ان مانومتك بالمستشفى ماكون ابو جابر
فيصل : ي جد خلاص اعتق البنت
الجد كشر وراح والتفت فيصل ومسك كتوف الوجد : اسمعي لازم نتكلم !
الوجد بدموع : وش تبغى انت بعد؟
ابو الوجد تقدم : يالوجد لازمم تتزوجين فيصل
فيصل : بس شهر ولا شهرين
الوجد : مستحيل
فيصل بحده : والله وبالله وتالله والذي رفع السموات بلا اعمده بعزته وجلاله الله الواحد الاحد الذي لااله الا الله اني لااخذك وعيونك دموع حلفت بالله باخذك طرق وغصب عن الكل وعنك! والله وتالله لااخذك ودموعك اربع اربع
الوجد اتسعت عيونها بصدمه : تخسى
فيصل بعصبيه : وعدنا العصر
ابو الوجد : خلاص يالوجد بتتزوجينه غصب !
الوجد : على جثتي اتزوجه
فيصل غمز : العصر
وراح فيصل ونترفزت الوجد واتجهه للبيت ولكن صادفت بطريقها عهود
الوجد ضربت كتفها بكتف عهود وتعدتها ودخلت بيت ابوها
عهود : وعع كريهه
الوجد طلعت من البيت: لاتخليني اسدحك تقلعي
ودخلت الوجد البيت
،
فيصل دخل غرفته ولزم الا لياخذ الوجد غصب وعناد فيها اخذها لسببين
اخذها عشان جده والسبب الثاني اخذها عناد فيها
فيصل شغل السوني ونطق بتهديد: طيب يالوجد ان مابكيتك ماكون ولد محمد
شيهانه دخل : ماشاء الله ي ولد محمد طحت بغرم البنت بكل هالسرعه؟
فيصل التفت ونطق : باخذها عناد
شيهانه : اسمع ياولد ابوي وامي كانك تبي تاخذها عشان تأذيها من الحين اقولك ترى البنت ماتتحمل واتركها
فيصل : خلي عنادها ينفعها لعنبوها قاعد ادافع عنها واصرفهم بالكلام تقول مابغاك؟ لا ماشاء الله انا الي ميت عليها وبكرا وعدنا ان شاء الله
شيهانه : فيصلوه ياويلك تأذي الوجد!
فيصل : لا وابشرك بحط فوق راسها وحده وبشوف نهايه عنادها وراسها اليابس
شيهانه : وجع فيصل ليش قاسي كذا؟؟
فيصل : والله ماكنت ناوي اخذها ولا ابيها ولا احبها لكن حطيتها براسي والله محد يقدر يطلعها من راسي الا ربي
شيهانه تكتفت : فيصل مافهمتك انت تحبها ولا تكرهاا ولا وش سالفتك محد فاهمك هي حطيتها براسك حباً فيها ولا وش؟؟
فيصل بحده : الا اكرها ولو لقيتها صفقتها
شيهانه : وليش تدافع عنها اذا تكرهها؟
فيصل : اشفق عليها عاني اليوم تفرك يدينها تقول مسكينه
شيهانه بعصبيه : فيصلل ! ماسمح لك البنت مو محتاجه شفقه ! واذا عن حركه يدينها فهاذا جدك المتسبب بخوفها وهلعها !
فيصل : كانك تبين تدافعين عنها بالله اطلعي ماني فاضي لالك ولا لها !
شيهانه بعصبيه: طول عمري وانا اشوفك مناسب لها وبتكون عزوه وسند لهاا لكن خاب ظني من تفكيرك هي دايم تقول انها تخاف منك وماتناسبك لكن انا خبله ماكنت اسمع كلامها المسكينه واصر عليها انها تناسبك !
فيصل بحده : وليش تخاف شايفتني وحش؟؟
شيهانه بعصبيه : تشوفك انت وجدي واحد كلكم نفس الخباثه بس الفرق بينك وبين جدي ان جدي الكل يعرف خباثته لكن انت بالسر خباثتك تلدغ زي العقرب !
شيهانه جت على جرح فيصل "تشبه جدي" وانفعل فيصل
فيصل بعصبيه : يرحم والديك لاتشبهيني بجدي طول عمري ماكنت اشبه جديي وكنت سند وعزوه لكم وهاذي جزاتي اذا انا باخذها عشان احميها من الي تسمينه جدي!
شيهانه بعصبيه : بس انت مااخذتها عشان تحميها انت اخذتها عشان تأذيها !
دخل ابو نواف على صراخهم : علامكم وش صاير لي اصواتكم واصله لاخر الديره؟؟
شيهانه سكتت وتعدت ابوها وطلعت ونطق ابو نواف : وش مسوي ل اختك؟
فيصل : ماسويت شي لها
ابو نواف : اجل تعصب من غير سبب؟؟
فيصل : يبه اكيد في سبب! اسالها
ابو نواف : ان شفتك رافع صوتك على بنت قطعت لسانك ولا اسمع لك حس عند بنت بتحرمها وتعتبرها اختك ايي بنت !
فيصل تنهد بغضب وجلس على طرف سريره وطلع ابو نواف
كشر فيصل ونطق : طيب يالوجد طيب
،
شيهانه جالسه على سريرها ومو مستوعبه قساوه اخوها الي طول عمرها تضحك معها منين جاب الحقد والقساوه كلها وليش الي ياكل هالقساوه والحقد الوجد ليش هي بالذات ليش مو عهود ؟ ولا عشان عهود مندفع وفيصل مايحب المندفع ولاعشان الوجد تعانده وتجادله كثير؟ ولاعن ايش بالضبط؟
دخل ابو نواف : شيهانه يابوك وشفيكم انتي وفيصل تهاوشتو ماخبر بينكم هواش
شيهانه : يبه ماقدرت تحملت قساوه قلبه وماجادله
ابو نواف جلس جنب شيهانه : وش صاير وليش قسى عليك؟؟
شيهانه : ماقسى علي بيقسى عليها المسكينه الي مسطره من الحياه
ابو نواف : تقصدين الوجد ؟
شيهانه : ايي يبه مارضى عليها طول عمري وانا ادعي ان الوجد لفيصل عشان فيصل كان حنون وطيب معي والان ادعي ان مايتم زواجهم يبه فيصل مو فيصل الاول !
ابو نواف : يابنتي لاتشرهين عليه المسكين مجبور يتزوج لاتلموينه بيكرهها فتره وعقبها يتقبل وجودها معه
شيهانه تنهد بضيق : بس انا خايفه على الوجد خايفه ماعاد اشوف الضحكه عليها خايفه اشوف دموعها خايف عليها من فيصل يبه الوجد امها تركتها جدي حاط دوبه بدوبها اختها الصغيره ٢٤ ساعه على الايباد ولا عمي تركي المسكين الي ماله كلمه على بنته وكل مانطق بحرف قالو منت برجال !
ابو نواف : والله اني ادري بحالها هالبنيه واكيد اننا بنوقف معها ولانسمح لفيصل يخوفها
شيهانه : الله يستر
ابو نواف ابتسم وطلع
،
الوجد جالسه بغرفتها تبكي وفي حاله انهيار
العنود دخلت : جوجي
الوجد بدموع : نوديي
العنود تقدمت وحضنت الوجد : ياختي لاتبكين بتمشى الحياه مو واقفه على احد
الوجد ببكى : افف تعبتت تعبتت
العنود : جيت عشانك وامي تقول جيبو الوجد تنام عنديي
الوجد : اهخخ جدتيي احبهاا
العنود : ايي وهي تحبك وتبغاك
الوجد : تمام بجيها
العنود : رجلي على رجلك يلا امشي
ضحكت الوجد بخفه وطلعت من البيت متجهه بيت الجد تحديداً مجلس الجده
الجده عمشه بفرحه : يامرحبا بالحبيه الوجد وشلونتس يابعد تسبدي
الوجد بأبتسامه : الحمدلله تمام
الجده عمشه: اسمعيني بالوجد تجاهلي جدتس المتوخ ذا ترى موب صاحي لاتبكين لسواد عيونه
العنود : اوهه بتقوم حرب بين امي وابوي
الجده : وبعذري حلالات بس من سطره
الوجد حضنت جدتها وابتسمت
الجده : العنود يامتس انهظي جيبي زنجبيل ولا حليب شاهي ولا اي شي حار يدفي حفديتي وجيِد
الوجد كانت تحب اسمها من جدتها "وجيِد "
قامت العنود : بسوي شاهيي مازن بجيي يشوف جوجي
الوجد حطت راسها على فخذ جدتها
الجده عمشه سحبت بطانيه وغطت الوجد كويس : تدفي يابنتي
الوجد ابتسمت وناظرت الدفايه واخذتها الهواجيس ودموعها تنزل على خدها
مازن دخل : السلام عليكم ورحمه الله وربركاته نرحب كلن بأسمه الوالده عموشه وبنت الاخو جوجي
الجده : اصص استدار راسي اهجد البنت رقدت
مازن : بس يمه هي تهوجس مارقدت
الجده رمت علبه المناديل على مازن : لعنبو هالفره تغالطني ؟؟
مازن مسك علبه المناديل : لا محشومه بس البنت بدوامه هواجيس مو راقده
الجده : كرهه وجهه طالع على ابوك
مازن : اناا والشيخ سلطان؟؟؟
دخلت العنود ومعها الشاهي والكاسات : اهلاً اهلاً
مازن : ياهلا بالمحمول يالبى شاهي بأخر اليل
العنود ضحكت ونطقت : وشلون جوجي ؟
الجده تمسح على شعر الوجد ونطقت : شوفه عينتس البنت مبحره بهالدفايه لها ساعه
مازن : عزتي لها كانها بتتزوج فيصل بتعيش بهواجيس معه
العنود : مازن! لاخوفنا عليها
مازن : ماقصدد شي اقصد فيصل راعي هواجيس ولا انا ادري ان فيصل مستحيل يأذي الوجد
الجده : صبي صبي شاهي
العنود صبت الشاهي ومدت لـ الجده ام جابر : سمي يايمه 
الجده ام جابر : سم الله عدوتس يابنيتي صبي للوجد
العنود مدت الكاسه للوجد : الوجد
الوجد فزت : هلا
الجده ام جابر : اسم الله على قلبتس عاني اشربي هالشاهي
الوجد اخذت الكاسه وجلست وشربت وهي تهوجس
مازن : تشرب هواجيس واههه يارب انك تعينها
وحاولو يضحكون الوجد ولكن تضحك لهم مره وترجع للهواجيس
الين اخذهم النوم جميعاً كلهم بالمجلس الجده ام جابر ومازن والعنود والوجد نامو
،
صباح يوم جديد ..
فيصل ومازن عند الحلال والبل جدهم كارفهم من صباح الله .
فيصل بتهديد : والله يامازن لااكفر فيك جودها زينن جدي يبي حليب نياق طازج!
مازن : ياخوي ورا مانشتري من البقاله ولا من اي محل حليب وانتهينا وش لنا بالشقى ؟؟
فيصل : صاحي انت؟ تبينا نطلع عن شور جدي ؟
مازن : هو انت طول عمرك طالع عن شور ابوي ضافت هالحين؟؟
فيصل : جود جود الناقه زين بس لاترفسك تودع
مازن : طيب طيب
،
مجلس الحريم
الوجد لازالت نايمه على الكنبه رغم الازعاج الا انها من التعب ماتحس بالي حولها بس كان نومها متقطع تحس بالي حولها بس نايمه
ام نواف وهي تناظر الوجد النايمه : قلبي بيتقطع على هالبنيه
ام بتال : اي بالله هي واختها الصغيره
ام نواف : اقول ل ابوهم عطني ياهم اربيهم مع شيهانه بس ماشش رفض
شيخه : اقول مانحتاج لتس ولا لتربيتس انتي لو تعرفين تربين كان ربيتي عيالتس القليلين حياء فيصل يحتسي لي كأني عدوته موب بعمته وشيهانه عاني شعرها كيف تقل ولد !
العنود بهمس : مالومه لو ماحترمك
ام نواف بأنفعال : لااله الا الله من صباح ربي تبيني افرشتس هنا عشان اعلمتس التربيه ؟؟
الجده عمشه : لاحول ولاقوه الا بالله ابك انتم ماتهجدون ؟ اركدو اركبدو وانتي ياشيخه البخي وسدي حلقتس يمال الي ماني بقايله قل خيراً او اصمت ، عوذه
ام بتال : ي جوري انهضي قهوينا
جوري : ابشري
وقامت جوري تقهوي الحريم وهي ماقامت طيبه منها لا قامت تاخذ العلوم تبغى تنقلهم للبنات
العنود ضحكت بخفه ودخلت شيهانه : سلام عليكم
الكل : وعليكم السلام ياهلا
شيهانه اتجهت وجلست جنب العنود ونطقت العنود : شيهانوه ؟
شيهانه : هلا
العنود : وشفيك اخلاقك وسط اليوم فيك شي؟
شيهانه : لامافي شي المهم الوجد متى تقوم ؟
العنود : والله شكلها مطوله لاننا سهرانين امس مانمنا الا حول الفجر
شيهانه: يالخاينه انتي وياها تسهرون بدوني ؟؟
العنود بجحده : امي الي سهرت انا مالي دخل
شيهانه ضحكت وقطع ضحكتها اتصال من فيصل وتنهدت بضيق وحطته صامت
العنود عقدت حواجبها : افاا وش فيك عليه؟ فيصل هاذا !
شيهانه : لابس متهاوشه معه امس
العنود : افااا بقوم العن خيره الا شيهانتي !
شيهانه : لااتركيه اخاف يسطرك بلياه معصب وانتي تعرفين فيصل يفقد اعصابه
العنود : يسطر مين ياماما ؟ انا عمتهه عمتهه
شيهانه : اجلسي اجلسي مابي شي منه ولا ابيه يراضيني ابيه يفكر بالي قلت له
العنود : وش قلتي له ؟؟
شيهانه: دافعت عن الوجد وعصب مني وان....
قطع كلامها رساله من فيصل وكان محتواها : ادري انك زعلانه مني وزعلك مايهون علي وبراضيك بس مافي وقت اليوم مضغوط اعذريني واسمعي انا بدخل انا ومازن للمجلس عندكم قولي للحريم والبنات يتغطون
شيهانه شافت الرساله بس مافتحتها ونطقت بعلو صوتها : تغطو فيصل بيجي
والي تغطى بس جوري والباقي عادي لانهم جدته وامه وعمته وحريم عمامه والمفروض ان الوجد تتغطى بس انها نايمه وناسينها
قامت جوري من الحريم بعد ماجمعت من العلوم وحطت طرحتها على وجهها وتغطت وجلست جنب العنود من الجهه الثانيه ونطقت : بناتت جبت لكم علومم
العنود : يالبيههه اليوم بتصير جلسه حشش
شيهانه تناظر الوجد النايمه وتحس قلبها يعورها بتختفى ابتسامتها دامها بتتزوج فيصل
تنحنح فيصل ومازن يتنحنح معه مسوي خوي ودخلو معهم حليب نياق وكراتين تمر
فيصل اول مادخل طاحت عينه على الوجد النايمه وصد عنها ونزل الحليب والتمر عند جدته ونطق : يقول جدي واحد ل ابو سعيد والثانيه ل ابو طلال والي مع مازن ل ابو متعب
الجده : اي زين هالحين اخلي الوجد وجوري يودنهن لهم
فيصل عقد حواجبه : لا الوجد ماتروح !
شيهانه : وشدخلك فيها؟؟
فيصل : العصر ملكتها
الجده بصدمه: اليوم؟؟
فيصل : ايي
عهود تناظر فيسل وماشالت عينها عنه
الجده : كانها ماتبي وماتاخذها !
فيصل : ياجده حلفت ل اخذها غصب عن الجميع !
شيخه : وشتبي فيها؟؟ للزين ولا اخلاق
فيصل يقصد عهد: عاد اشوى من الي ترسل صور غيرها وتنسبها لنفسها
عهد اتسعت عيونها بصدمه ونطقت شيخه بعصبيه : وش تقصد ياقليل الحياء!
فيصل : قصدي واضح
مازن كان جالس عن جوري يسولف معها وياخذ علوم منها متجاهل المشاكل
فيصل التفت وشاف الوجد وصد وطلع
مازن حط رجل على رجل وعجبه سوالف جوري : ايي قلتي لي ام طلال عندها عشاء؟
جوري : اييي وعشاء كبير بعد ولازم نحضره
ومازن : وسميه زعلانه ؟
جوري : اييي متهاوشه مع رجلها
مازن : انتي كود امسك معك خط تسولفين علي
الوجد قاعده بس عاجزه تفتح عيونها وكانت تسمع فيصل وسمعت كل شي وقامت وجلست واخلاقها قافله
مازن شاف الوجد جالسه ونطق يحارشها : سوالف جوري احلى من سوالف الوجد الي كلها عن المكياج
الوجد ابتسمت وصدت تناظر جدتها تقول : الحقي ياوجيد تقهويي
قامت الوجد وجلست جنب جدتها تتقهوى
،
بعد صلاه العصر ...
فيصل راجع من المسجد وهو مصمم الا لياخذ الوجد غصب عن الجميع رغم ان الجد سلطان رفض زواجهم الا ان فيصل مشى كلمته على جده
وجابو الشيخ ووقع فيصل واخذ ورقه التوقيع واتجهه للوجد
فيصل تنحنح ودخل لمجلس الحريم ونطق : الوجد تعالي
الوجد عقدت حواجبها وهي تشوف الورقه معه وقامت واتجهه له ونطقت
: وشتبغى؟
فيصل رفع حاجبه : ماقلت لك باخذك غصب؟
الوجد : ماتقدر !
فيصل رفع الورقه : عاني
الوجد عقدت حواجبها وهي تقرا اسمها جنب اسمه ونطقت : بس انا ماوقعت
فيصل : بتوقعين الان
الوجد تجمعت الدموع بعيونها : مابيكك
فيصل تنهد ونطق : شئتي ام ابيتي بتوقعين غصب
الوجد بدموع : وجع مو انت الي تجبرني
فيصل : تذكري كلامي امس وقت لك اني باخذك وانتي تبكين
الوجد بدموع : ماتقدر تاخذني !
فيصل : اسمعي اذا ماوقتي جدي بياخذ ميلا ويوديها للعم طارق
الوجد بدموع : بس جدي مو موافق على الزواج كيف تكذب كذاا؟؟
فيصل مسك الوجد من يدها وسحبها وطلعها من قسم الحريم كله
الوجد : فك يديي
فيصل وقفها ونادى جده وفعلاً جاء الجد : نعم خير؟
الوجد ببكى : انت مو موافق على الزواج كيف تزوجني له مو كان اتفاقنا مشاري؟؟
الجد شاف دموع الوجد ودار بباله ان فيصل بيعاملها معامله مو كويسه زي مشاري ونطق : الا موافق وبتوقعين ولا مافي ميلا !
الوجد اتسعت عيونها بصدمه والتفت تناظر فيصل بس فيصل صاد عنها
الوجد ببكى وترجع خطوات لورى : قلت مابغى وهاذا الشي راجع لي وهاذي حياتييي
فيصل مسك عضدها وقدمها للجد ونطق الجد : اجل جيبو لي ميلا وهالمره بعطيها عائله تتبناها وامتس هند احلمي تشوفينها
الوجد ببكى والم من مسكه فيصل : كيف انت امس رافض اني اتزوج فيصل !
فيصل : اقول وقعي بسرعه عندي شغل!
الجد : ميلا مافيه وقعي احسن لك
الوجد اخذت القلم وهي ترجف ووقعت الورقه وماكانت توقع ورقه عاديه وقعت ورقه موتها وسجنها بالنسبه لها
ابتسم فيصل وهو يشوف توقيعها وهو حلف امس ياخذها ودموعها اربع اربع
اخذ فيصل الورقه وراح مع الجد تاركين الوجد الي جلست مكانها تبكي
وبكذا يتم عقد القران لـ فيصل والوجد وبعد اسبوع زواجهم الرسمي

________________________
انتهى البارت ♡
رضيت بالله ربًا وبالإسلام دينًا وبمحمد ﷺ رسولًا ونبيًا)، ♡
حسابي تيك توك :Ot348285
*اعتذر عن الاخطاء الاملائيه*
النجمه تدعم الروايه✨

لاتقارنين حبي لك بأي مخلوق انا حتى بغيابك احبك Where stories live. Discover now