မမကြီး လက်မထပ်သေးဘူးလား

အပိုင်း (၁၂၇) သူတော်ကောင်းနှလုံးသား

အပိုင်း (၁၂၇) သူတော်ကောင်းနှလုံးသား

သည်တစ်ကြိမ်တွင် သေဒဏ်မှ နယ်နှင်ဒဏ် ပြောင်းလဲခံလိုက်ရသူ ၁၇ယောက်ရှိလေသည်။ ရှောင်မိသားစုသည် ရုံးတော်တွင် အရာရှိတစ်ယောက်ဖြစ်သူ ဒုတိယသခင်ကြီးရှောင်မှ လွဲလျှင် ဘာနောက်ခံမှ မရှိချေ။ သည်ကိစ္စကို သိသူအများစုက ရှောင်မိသားစုတို့ညီအစ်ကိုမှာ ကံကောင်းသွားသည်ဟုသာ တွေးကြပြီး သည်လိုဖြစ်စေသည့်  အကြောင်းအရင်းကို မခန့်မှန်းမိခဲ့ကြသည်။

“ သေလိုက်ပါတော့၊ သူတို့တွေကို မကြာခင်မှာပဲ ခေါင်းဖြတ်ခံရတော့မှာ သိသာနေတဲ့ဟာကို၊ မင်းကြီးက ဘာလို့ ရုတ်တရက် စိတ်ပြောင်းသွားတာလဲ”

ရွှီအိမ်၏ အစွန်းဘက်ရှိသည် သေးငယ်လှသည့် ခြံဝင်းလေးထဲတွင် ခွမ်း မြည်သံတစ်ခုနှင့်အတူ နောက်ထပ် အဖြူရောင် ကြွေလက်ဖက်ရည်ခွက်တစ်ခု ကွဲသွားတော့သည်။ လက်ဖက်ရည်ခွက်ကို ပစ်ခွဲလိုက်သူအတွက်တော့ သူမသည် လက်ဖက်ရည်ခွက် ၃-၄လုံး ဆက်တိုက်ခွဲပစ်ပြီးနောက်တွင် မီးလိုပူလောင်သလို ခံစားနေရဆဲဖြစ်ပြီး သလွန်ပေါ်တွင် ဒေါသထွက်ထွက်နှင့် ထိုင်ချလိုက်လေသည်။

ရွှီကျီထုန်းသည် ဝင်လာသည်နှင့်တစ်ပြိုင်နက် အမျက်ထွက်နေသည့် မိန်းမလှလေးကို တွေ့လိုက်ရတော့သည်။ သူ့မျက်နှာထားသည် အခိုက်တန့်အတွင်း အနည်းငယ် ထူးဆန်းလာလေသည်။ သူ့မျက်ခုံးများက မသိမသာကျုံ့နေရာ သူသည် သူမိန်းမကို သဘောမကျတော့သည့်နှယ်။ အခြွေအရံပိုင်သည် မျက်တောင် ပုတ်ခတ်ပုတ်ခတ်နှင့် တစ်ဖန်လှမ်းကြည့်လိုက်ချိန်တွင် မမလေး၏ခင်ပွန်းဖြစ်သူ အမူအရာက ခါတိုင်းလိုပင် မပြောင်းလဲပဲ ရှိနေကြောင်း တွေ့လိုက်ရလေသည်။ ထိုအခိုက်တွင် သူမသည် အမြင်မှားသွားသည်ဟုသာ တွေးလိုက်တော့သည်။ ဟုတ်တယ်လေ။ မမလေးက မမလေးရဲ့ခင်ပွန်းကို ချစ်မိသွားလို့ ရှောင်မိသားစုနဲ့ စေ့စပ်ပွဲကို ဖျက်သိမ်းခဲ့ပြီး ရွှီမိသားစုနဲ့ လက်ထပ်ဖို့ သူမရဲ့အဆင့်အတန်းကို လက်လွှတ်ခဲ့တာပဲ။ မမလေးရဲ့ခင်ပွန်းက မမလေးကို ဘယ်လိုလုပ်ပြီး အထင်သေးနိုင်ပါ့မလဲ။ အခြွေအရံပိုင်သည် ထိုသို့ စဥ်းစားလိုက်ရင်း တိတ်တိတ်လေး နောက်ဆုတ်ကာ လူငယ်စုံတွဲတို့ လွတ်လွတ်လပ်လပ် စကားပြောနိုင်ရန် တံခါးငယ်လေးမှ ထွက်လာခဲ့လေသည်။