Wonderland Magical Academy: Touch of Fire (Cloak PopFiction)

Chapter 36: Memories

CLAUSS

Itinulak ko ang brick na nagsisilbing switch ng secret passage papunta sa underground cell. Ang kulit kasi ni Claudette dahil paulit-ulit niyang sinasabi na huwag na akong mag-isip dahil hindi makakatulong, lalo na sa kalagayan ko ngayon. Ayon sa kanya, wala na ako sa katinuan.

Naglalakad na kami pababa sa hagdan. Napansin ko ang dalawang guwardiya na nagbabantay sa pinakaibaba ng hagdan. Bumulong sa 'kin si Claudette na hiramin ang mga susi at sabihing utos ni Enzo.

"Siguro patulugin na lang natin. It's better that way. Hindi na sila makakapagsumbong kung anumang kalokohan ang gagawin natin dito," suhestiyon ni Xavier.

Tahimik lang ako. Bakit ba isinasali nila ako sa plano? Akala ko kailangan lang nilang malaman kung nasaan ang underground cell? Lagot ako kay Enzo kapag nagkataon. Napailing ako habang naglalakad nang biglang umakbay si Claudette sa 'kin.

"It's okay. Sundin mo lang kami para hindi ka magsisi sa huli," seryosong wika ni Claudette. Inalis niya ang pagkakaakbay sa 'kin at tinapik ako sa balikat. "Ako muna ang sundin mo ngayon. Huwag ka munang gumamit ng utak dahil lalo ka lang malalason at maguguluhan. Gagawa tayo ng paraan para maibalik ang alaala mo," nakangiting dagdag niya. Napabuntong-hininga ako dahil wala naman akong magagawa. Malapit na kaming makarating sa pinakababa ng hagdan. Nakaharang na sa dadaanan namin ang dalawang guwardiya.

"Ako na ang bahala sa kanila," mahinang wika ni Xavier. Tumango si Claudette. Tumungo sina Xavier at Claudette at kalmadong naglakad pababa.

"Ano'ng ginagawa niyo rito?" seryosong tanong ng isang guwardiya. May hawak silang espada at handang lumaban anumang oras.

"May bibisitahin lang," sagot ko. Hindi ko alam kung ano ang binabalak nina Claudette. Napansin ko ang dalawang set ng susi na nakasabit sa kanang bahagi ng baywang ng lalaki. Iyon ang susi sa mga selda. Nagkatinginan ang dalawang guwardiya na tila nag-iisip kung papapasukin ba kami o hindi.

"Sino ang bibisitahin niyo? Hindi pinapayagan ni Enzo ang pagbisita ng kahit na sino sa underground cell," naghihinalang wika ng isang guwardiya. Lalong humigpit ang pagkakahawak nila sa espada. Biglang sumugod si Xavier sa dalawang guwardiya na ikinagulat ko. Si Claudette naman, kalmadong nanonood sa bawat kilos ni Xavier.

Lumingon sa 'kin si Claudette at napangiti. "You don't have to worry, kuya Clauss. He can boost his strength and his body is as hard as steel. Hindi siya tatablan ng espada lamang. And he's the heaven power user. No power can touch him," kalmadong wika niya. Napailing ako dahil nabasa na naman niya ang iniisip ko.

Paglingon ko kay Xavier, natutulog na sa sahig ang dalawang guwardiya. Hawak na niya ang mga susi. Hinila niya ang mga katawan ng mga guwardiya sa gilid ng hagdan para walang makapansin sa kanila. Iniwan namin silang nakaupo at nakasandal sa dingding.

That was fast, naisip ko. Lumapit kami kay Xavier.

"Sila lang ba ang nagbabantay rito?" tanong ni Xavier. Napakibit-balikat ako. Hindi ako sigurado kung merong iba pa dahil hindi ako hinahayaan ni Enzo na pumasok sa loob.

"Siguro marami pa," sagot ko. Itinago ni Xavier ang mga susi sa ilalim ng cloak niya.

"Sana nandito ang hinahanap ko," mahinang sambit ni Xavier. Inayos niya ang hood bago muling naglakad. Tahimik kaming sumunod kay Xavier. Lumiko kami sa isang daan na patungo sa mga kulungan. May kadiliman ang lugar. Ilaw mula sa mga lampara na nakadikit sa pader ang nagbibigay liwanag sa daan. Sa kalagitnaan ay may nakita kaming nag-uusap na guwardiya. Nagtatakang napalingon sila sa 'min habang naglalakad kami palapit.