عجاف القلوب

بارت 14

اسعد الله اوقاتكم بكل خير احبتي ❤️
  البارت ( 14 )
#عجـاف_القلـوب ..
#بقلمي_شمـس_السعدي ..

طلعوا الزلم ..
صحيح مرتاح وسدي امين لأن الشيخ واگف وياي ..
بس الي قهرني ابوي وعمامي ..
بأي حق يجون ويطالبون بگعدة ويگاومون وهمة الي باعونة وشمورنا ..
استحيت من الشيخ لأن صار بموقف گدام الناس والعشاير ..

ردنا نطلع گتله بويه ..
التفتت ..
- ها وليدي گول
- يمكن احنه ورطناك ويانا ..

الشيخ .. مو حلوة هاي منك وليدي واني اگول امير يفهمني قبل مااحجي ..
ها الشغله ماتمسني ولاتلطخ جبيبني ..
اني جبيبني ابيض امام الله ومادام الي سويتة مقتنع بي مااخاف من تاليه .
هسا احنه هينة. من يمنة ..
بس امك اذا درت شوف شراح تسوي ..

ضحكنا وطلعنا ..
وصدگ حجي الشيخ اول ماحجيت وي امي ..
لطمت على وجهها ..
يمة ياامير يبني .. وهسا شنسوي ..
عرفتها ماتعدي ..
بس اني الصوج بيه ..
اني الاخذتكم ..
ودور شافوا الشيخ بالجنازة وعرفوه ..
الشيخ .. ولج ياقوت قابل اني خايف ومااجي .. اني اجيت الاج والولدي وخلي يعرفون مكاني ..
الى متى تبقى الدفاتر مسددة ..
لازم يجي يوم وتنفتح وكل واحد يتحاسب اعله اخطائة ..

يوسف اشرلي وطلعنا ..
يوسف-شبيك يخوي ضايج.. جنت من زمان تريد هيج فرصة تجيك وتاخذ حقك منهم ..
امير -يوسف اني ماضايج عليه .. بس ابوي وعمامي مايخطون خطوة اذا مابيها فايدة الهم ..
وهاي سالفتهم لازم وراها شي ..
يوسف .. خلي نشوف غايتهم شني وذيج الساعه نتصرف امير .. خايف على درة منهم .. بعدهي صغيرة وحساسة وتتأثر بسرعه ..
واذا طالب بيها ورادت تروح شلون ؟؟

ضحك يوسف .. معقوله امير انت هيج تحجي ولك هاي درة الي ماتشوف واحد غيرك بدنيتها وتعتبرك المثل الاعلى مستحيل تتأثر بواحد غيرك ..
وهي متعلقه بعمتي وماتعوفها ..
وبعدين هي بكيفهم ياخذوها .. والله لو تصير دم مايمسون شعرة منها ..

التفت علي امير بأستغراب ..
رديت بسرعه ..
درة عندي مثل سدن والماارضاه لأختي ماارضاه الدرة ..
ضحك وضرب على كتفي ..
-كفوا منك يااخوي ..

يوسف ..
احساسي اتجاه درة مختلف .. دخلت للجامعه وشفت بنات بس من اشوفها تتغير نضرتي وتبقى بس هي ببالي ..
احسها نقيه وصافية وبريئة ..
ماعندها خبث وحيل البنات ..
بس دوووم احسها تتجنبني او ماعندها احساس اتجاهي
ويمكن لفارق السن بينا ويمكن تشوفني اكبر منها او امير بالنسبة الها ..
لهذا مااريد اتقرب الها والوث برائتها واخليها تفكر وتفتح عينها على الحب بهذا العمر وتالي ياخذها غيري مني ..
مخليها تكبر وتتفتح مثل الوردة گدامي ..
يله اخطي خطوة اتجاهها ..
ومن جهة ثانية امير .. اخوي وصديقي واعرف طبعة صعب وثقته بالناس محدودة ..
ماردت علاقتنا تخرب ويتصور اني حاط عينه على اخته الصغيرة واتلاعب بمشاعرها ..
وهالشي حسيته من تعصبت وگتله اسويها دم اذا مسو شعرة منها ..
استغرب ونضرلي نضرة ماتتفسر. .
لكن الله ستر وگدرت اغير الموضوع وگتله مثل اختي ولو هالكلمة صعبه حيل علية وتزرف گلبي من انطقها ..
ادري طريقي طويل بس لازم اصبر واتحمل الى ان تكبر وتصير من نصيبي ..