السيرة النبوية باللهجة العامية

17

17
يلا صلوا على النبي 💜

وقفنا المرة اللي فاتت ان المشركين لما فشلوا في الجدال مع النبيﷺ بدأوا في تعذيب المسلمين عشان يردوهم عن الإسلام بطريقة تقطع القلب..
كل واحد كبير في القبيلة بقا يعذب المسلمين اللي فيها ..

-بلال بن رباح رضي الله عنه كان مملوك(عبد) عند أمية بن خلف ، فكان أمية دا بيحط حبل حول رقبة بلال ويعطي الحبل للعيال الصغيره يشدوه ويلعبوا بيه وبلال يقول : أحد أحد ..

كان بيخرج بيه في عز الظهر والرمال مولعة من شدة الحرارة ثم يأمر حد يجبله صخرة كبيرة سخنة يحطها على صدره ويقوله : لسه عايز تموت كده ولا تكفر بمحمد وتعبد اللات والعزى ، فيرد بلال بكل ثبات : أحد ،أحد..

وفي يوم أبو بكر مر فشافه وهو بيتعذب بالطريقة الوحشية دي فاشتراه من أمية واعتقه لله.. والحمد لله اتعتق بلال من العذاب دا ومن العبودية كمان لثباته على الحق..

-عامر بن فهيرة كان بيتعذب لحد ما يفقد وعيه ويهلوس وبيبقى مش عارف هو بيقول ايه!

- أبو فكيهة وكان اسمه أفلح، كان مولى (عبد) عند قبيلة بني الدار ، كانوا يخرجوه في نص النهار في شدة الحر ، ويربطوا رجليه بحديد ويجردوه من ثيابه ، ويرموه على الارض وينيموه على بطنه ويحطوا على ظهره صخرة كبيرة عشان ميتحركش ، فيفضل كده لحد ما يتجن ويهلوس ، وفضلوا كل يوم يعذبوه كده لحد ما هاجر للحبشة الهجرة الثانية ازاي؟

كان مرة بيعذبوه كده وزادوا في عيار تعذيبهم فربطوه بحبل وجروه على بطنه وخنقوه وتركوه فظنوا أنه مات فمر أبو بكر الصديق رضي الله عنه وشافوه بالحال دا فاشتراه واعتقه لله..

- خباب بن الأرت كان اتاخد ايام الجاهلية سبي من الحرب وكده فاشترته أم أنمار بنت سباع الخزاعية ، وكان حداد ، فلما أسلم عذبته بالنار.. كانت بتجيب حديدة محمية مولعة نار وتحرق بيها ظهره عشان يكفر بمحمد ﷺ فكان كل ما يتعذب اكتر يزيد إيمانه وتسليمه ، مش بس كده!

المشركين كانوا بيعذبوه بردو كانوا بيشدوه من شعره جامد لحد ما رقبته شويه وهتتقطع وبعدين يرموه على فحم مولع نار ، ويحطوا عليه صخرة ثقيلة عشان ميقمش..

- زنيرة كانت أمة(عبدة) أسلمت فاتعذبت لحد ما راح بصرها واتعمت ، فقالولها : أصابتك اللات والعزى ، فقالت : لا والله ما أصابتني ، وهذا من الله وإن شاء كشفه ، فصحت الصبح بتشوف ورد الله لها بصرها ، فقريش قالت : هذا بعض من سحر محمد..

- أم عبيس كانت جارية عند بني زهرة ، فكان الأسود بن عبد يغوث المالك بتاعها بيعذبها وكان من أكثر أعداء رسول اللهﷺ والمستهزئين به..

- جارية عمرو بن مؤمل من بني عدي ، كان عمر بن الخطاب بيعذبها ، وهو كان مشرك ، فكان يفضل يعذبها لحد ما يزهق ، فيتركها ويقول : و الله ما أدعك إلا سآمة ( يعني انا مش سايبك غير لأني مللت وزهقت ) فتقول : كذلك يفعل بك ربك ( يعني ربنا هيعمل فيك اللي انت عملته فيا )..

- النهدية وابنتها وكانوا جواري عند امرأة من بني عبد الدار فاشتراهم أبو بكر واعتقهم كما اعتق بلال وأبا فكيهة ، وقد عاتبه أبوه أبو قحافة وقال :أراك تعتق رقاباً ضعافاً فلو أعتقت جلداً لمنعوك ( يعني انا شايفك عمال تعتق ناس ضعيفة لو كنت اعتقت حد قوي هيمنعوك )

فرد أبو بكر: إني أريد وجه الله ، فأنزل الله في سورة الليل { فَأَنذَرْتُكُمْ نَارًا تَلَظَّى (14) لَا يَصْلَاهَا إِلَّا الْأَشْقَى (15) الَّذِي كَذَّبَ وَتَوَلَّى (16) } وهي آيات تذم أمية بن خلف..

{وَسَيُجَنَّبُهَا الْأَتْقَى (17) الَّذِي يُؤْتِي مَالَهُ يَتَزَكَّى (18) وَمَا لِأَحَدٍ عِندَهُ مِن نِّعْمَةٍ تُجْزَى (19) إِلَّا ابْتِغَاءَ وَجْهِ رَبِّهِ الْأَعْلَى (20) وَلَسَوْفَ يَرْضَى (21) } وهي آيات تمدح أبو بكر الصديق..

- عمار بن ياسر وأمه وأبوه رضي الله عنهم وكانوا حلفاء بني مخزوم يعني معاهدين لهم انهم ينصروهم ، فكان بنو مخزوم وعلى رأسهم أبو جهل يخرجوهم لما الرمال تسخن على الاخر وتبقى حامية فيعذبوهم في عز الحر ، وكان النبيﷺ يمر عليهم ويقولهم " صبراً آل ياسر موعدكم الجنة ، اللهم اغفر لآل ياسر "

ياسر أبو عمار مات تحت التعذيب دا ، وأم عمار سمية بنت خياط كانت عجوزة وضعيفة أبو جهل -عليه من الله ما يستحق- طعنها في فرجها فماتت رضي الله عنها وكانت أول شهيدة في الإسلام..

أما عمار فثقل عليه العذاب فالمشركين شويه يلبسوه حديد ويحطوه تحت الشمس في يوم نار من الحر، ومرة يحطوا عليه صخر أحمر ثقيل ، ومرة يغطوه بالماء ، لحد ما قال بلسانه بعض اللي هم عايزينه وقلبه كان مؤمن فأنزل الله { مَن كَفَرَ بِاللَّهِ مِن بَعْدِ إِيمَانِهِ إِلَّا مَنْ أُكْرِهَ وَقَلْبُهُ مُطْمَئِنٌّ بِالْإِيمَانِ وَلَكِن مَّن شَرَحَ بِالْكُفْرِ صَدْرًا فَعَلَيْهِمْ غَضَبٌ مِّنَ اللَّهِ وَلَهُمْ عَذَابٌ عَظِيمٌ } ..

- مصعب بن عمير كان من أنعم وأغنى الناس فلما دخل في الإسلام منعته أمه من الأكل والشرب وطردته من البيت ، فبقا جلده زي جلد الحية وبقا خشن و فيه جرب..

- صهيب بن سنان الرومي اتعذب لحد ما فقد وعيه وأصابته هلوسه..

- عثمان بن عفان كان عمه بيلفه بحصير ورق النخل ويولعه من تحته..

- أبو بكر وطلحة بن عُبيد الله أخدهم نوفل بن خويلد وقيل أخدهم عثمان بن عبيد الله أخو طلحة وربطهم في حبل واحد عشان يمنعهم عن الصلاة والدين ، فلم يردوا عليه ، واتفجع لما شافهم مطلوقين وبيصلوا ، وسميا بالقرينين لأنهم اتربطوا بحبل واحد..

وكان أبو جهل لما يسمع أن واحد أسلم وله شرف وقبيلة تمنعه وتقف في ظهره يروح يذله ويعاتبه ، ويخسره تجارته ويشوه سمعته وينزل من مكانته ، ولو كان رجل ضعيف ضربه واهانه..

محدش دخل الإسلام إلا وناله من أذى المشركين..
التعذيب دا كان لضعفاء المسلمين وعامتهم ، أما لو أسلم حد من كبار وأشراف القبائل كان مش بيتجرئ عليهم إلا الرؤوساء والأشراف زيهم مع بعض الحذر منهم والاحتياط..

شوفوا ازاي تحملوا التعذيب دا كله ولم يستسلموا!! واحنا عشان شويه شهوات نستسلم ولا نحاول نجاهد أنفسنا مش عارفين نستحمل شويه وهم استحملوا اد ايه!!!
الله المستعان

أما النبي ﷺ فكانوا بيعملوا معاه ايه....؟!
دا اللي هنعرفه المرة الجاية إن شاء الله تعالى

#السيرة النبوية باللهجة العامية
#خدمة حفيدات النبي ﷺ 😍💙
#بنات وبس👑💜
_____________

للإنضمام:
إرسال رسالة صوتية بإسمك لـ:
+201210204190