The Deal With A Demon King

Part 15

လွန်ခဲ့သော နှစ်ပေါင်းတစ်ထောင်ခန့်က

" ဒီတစ်ခေါက်ကရော ဘယ်နေရာမှာလဲ။"

"လူ့လောက ကလျဲ့ဝှမ်းဖူတောင်ကြားမှာပါ။"

ယွင်းရန်က သူ၏ဖက်လက်စရှေးဟောင်းစာအုပ်အထူကြီးအား ပိတ်ချလိုက်သည်။ ယနေ့သည်ကား သုံးလောက၏ စွမ်းရည်ပြိုင်ပွဲနေ့ပင်ဖြစ်သည်။

အနှစ်၅၀၀တွင် တစ်ကြိမ်ကျင််းပပြီး အနိုင်ရရှိသည့်သူသည် မည်သည့်မျိုးနွယ်ပင်ဖြစ်နေပါစေ သုံးလောက၏ အလည်ဗဟိုကိုချိတ်ဆက်ကာထားသော ဝင်ပေါက်အား အနှစ်ငါးရာအုပ်စိုးပိုင်ခွင့်ကိုရရှိနိုင်သည်။သုံးလောကသားတို့၏  အသိအမှတ်ပြုခြင်းနှင့်ပြောစမှတ်ပြုခြင်းကိုခံရသည်။သူရဲကောင်းတစ်ဦးကိုရွေးချွယ်ကြသကဲ့သို့ပင် ထိုသူသည်တော်ဝင်သော မိစ္ဆာမျိုးနွယ်အဖြစ်ခံယူခွင့်ရနိုင်သလို ကောင်းကင်ဘုံကိုရွေးချယ်ပါကလည်း ကောင်းကင်ဘုံတွင် နေရာတစ်ခုရနိုင်သည်။

ထို့ကြောင့်ပင် အဆင့်နိမ့်သောမိစ္ဆာများ၊ ကျော်ကြားလိုစိတ်ရှိသောသူများ ၊ မိမိစွမ်းရည်ကိုအသုံးချကာ အောင်မြင်လိုသောသူများက ဤသို့သောပွဲမျိုးကိုစောင့်ဆိုင်းလျက်ရှိကြသည်။ သို့သော်လည်း ဤသို့သောယှဥ်ပြိုင်မှုမျိုးသည်က အမှန်တကယ်အင်အားကြီးမားသော သူနှင့်တွေ့လျင် ထိုအဆင့်နိမ့်သောသူတို့သည် နေစရာနေရာပင်ရှိလိမ့်မည်မဟုတ်။ ဤသို့ပင်ဆိုစေကာမူ အားလုံးသည် တုံးအသော သူများကဲ့သို့၊ ပိုးဖလံတို့မီးတောတိုးသကဲ့သို့ သူတို့ကိုယ်စွမ်းရှိသမျှ ဝင်ရောက်ယှဥ်ပြိုင်နေကြဆဲဖြစ်သည်။ ကောင်းကင်ဘုံသည်ကတော့ အမြဲလိုလို တည်ငြိမ်သောအသွင်အပြင်ဖြင့်ပင် စည်းလုံးသည့်အမူအရာကိုပြသည့်အနေဖြင့် ထိုသို့သော ကွဲထွက်နေခြင်းများမရှိပါချေ။

" ဒီတစ်ခေါက်ရော ငါတို့ဘက်က ယှဥ်ပြိုင်မဲ့သူတွေများလား။ ဘယ်နယ်မြေကသူတွေလဲ။"

ယွင်းရန်က စာအုပ်အထူကြီးကိုကိုင်ကာ မတ်တပ်ရပ်လိုက်သည်။ သူ၏လက်တစ်ဖက်သည်က နောက်ကျောဘက်ရှိ ခါးနားတွင် ကပ်ကာထားပြီး တစ်ဖက်ကမူ လက်ထဲတွင်ကိုင်ထားသော စာအုပ်အားရုတ်တရက်ပင် အပေါ်ဘက်သို့ပစ်တင်လိုက်သည်။ စာအုပ်သည် လေပေါ်တွင်ဝေ့ဝဲနေပြီးနောက် မည်သည့်နေရာကိုမျှလွင့်စင်ခြင်းမရှိဘဲ သူနှင့်မနီးမဝေးတွင်ရှိသောစာအုပ်စင်ကြီးမှ ဆွဲယူခြင်းခံလိုက်ရသလို ဒေါင်လိုက်စီကာထားသော စာအုပ်စင်များ၏ လစ်ဟနေသော နေရာတစ်ခုတွင် တည့်မတ်စွာပင် အစားထိုးဝင်ကာ နေရာတစ်ကျဖြစ်သွားလေ၏။