စေရာ(Complete)

အပိုင္း(၁၂)ေမ်ွာ္လင့္ခ်က္အလင္းေရာင္ေလး ႐ွင္သန္ခြင့္ေပးပါ....။

Unicode

အပိုင်း(၁၂)

မျှော်လင့်ချက်အလင်းရောင်လေး ရှင်သန်ခွင့်ပေးပါ

ကုမ္ပဏီရုံးခန်းထဲတွင် သူတစ်ယောက်တည်းသာ ရှိသဖြင့် တိတ်ဆိတ်နေသည်။ ငြိမ်သက်သော ပတ်ဝန်းကျင်တွင် ရှိနေသော်လည်း သူ၏ စိတ်အခြေအနေသည်တော့ လုံးဝကောင်းမွန် မနေပေ။

မနေ့က လွန်းငယ်နှင့် ထပ်၍ စကားမများချင်တော့သောကြောင့် သူ ဟိုတယ်တွင် သွားအိပ်ဖြစ်သည်။ မနက်ခင်း အလုပ်သွားရန် ပြင်ဆင်ပြီး သုသုလေးအား ကျောင်းလိုက်ပို့ရန်ပြင်စဉ် မိုးဆီမှ ဖုန်းဆက်လာသည်။

ကားစက်နှိုး၍ မရသောကြောင့် ဆေးရုံသို့လိုက်ပို့ပေးရန် တောင်းဆိုခြင်းဖြစ်၏။ နာရီဝက်လောက်ကြာလျှင် အရေးကြီးလူနာတွေ့ဆုံစရာရှိသည်ဆိုသောကြောင့် သူ မိုးအား သွားခေါ်လိုက်သည်။ အချိန်ရသေးသဖြင့် သုသုအား အရင်ကျောင်းလိုက်ပို့ပေးမည်ဟု အသိပေးပြီး အိမ်သို့ပြန်လာခဲ့ခြင်းဖြစ်သည်။

ကျောင်းသွားရန် အဆင်သင့်ဖြစ်နေသော သုသုက မဖြစ်နိုင်သော ကိစ္စအား တောင်းဆိုလာတော့ သူ အံ့အားသင့်သွားရသည်။ သူ၏ကားပေါ်တွင် သူ၊ လွန်းငယ်နှင့် မိုးတို့အတူတူရှိမနေနိုင်။ နေရခက်ကာ မျက်နှာပျက်စရာများသာ ဖြစ်နိုင်သည်။ လွန်းငယ်နှင့်လည်း ထပ်၍ စကားမများချင်တော့သောကြောင့် သုသုအား လွန်းငယ်မပါဘဲ ကျောင်းသွားရန် ပြောလိုက်မိသော်လည်း လက်မခံပေ။

တစ်ခါမှ သူ့စကားအား မငြင်းပယ်ဖူးသည့် ကလေးက သူ့အား ငြင်းပယ်လာတော့ သူ့အနေဖြင့်လွန်စွာ ဒေါသထွက်သွားရသည်။ လွန်းငယ်အား ထိုကလေးအရမ်းခင်တွယ်နေသည်ကို မြင်မိတော့ အဆုံးရှုံးမခံနိုင်စိတ်၊ မနာလိုစိတ်တို့်ဖြင့် သူ ဘာမှမမြင်နိုင်တော့။ တစ်ခါမှ နာကျင်အောင်မလုပ်ဖူးသည့် သုသုအား အကြမ်းပတမ်းလုပ်မိသည်ထိ သူ၏စိတ်တို့ လွတ်ထွက်သွားခဲ့သည်။

နာကျည်းမိသော စိတ်အစဉ်က ချစ်စိတ်အနည်းငယ်အား တိုက်စားသွားတော့ သူ၏ အပြောအဆိုတို့သည် ပို၍ ဆိုးရွားသွားရသည်။ နှလုံးသားနှင့် နင့်နေအောင်ခံစားခဲ့ရသောကြောင့် ပြသနာစတင်ရာ ထိုကောင်လေးအား မုန်းမိသော်လည်း ကိုယ်ထိလက်ရောက် နာကျင်စေမှုမျိုး သူ မလုပ်ရက်နိုင်ပါ။