Just Your Liability (Accounting Series #2)

Chapter 16

Hindi ko alam kung insidente lang ba iyong madalas na naming pagkikita at pagkakasalubong ng landas ni Luke. I mean, kung noon ay sobrang iniiwasan naming mag-krus ang landas naming dalawa, bakit parang ngayon ay kung nasaan ako ay nandoon din siya?

Sa tuwing pumupunta ako sa canteen, sa library, sa Activity Center, maging sa mga karinderya, mall at saang sulok ay palagi ko siyang nakikita. At dumagdag pa itong walanghiyang unknown number na panay ang padala ng mga text messages sa akin. Nagtatanong kung kumain na ba ako, nagpapaalala na mag-ingat ako palagi, ang ganda ganda ko raw at kung anu-ano pang kaekekan sa buhay. Like duh, hindi na naman kailangan pang ipaalala iyon. Anong akala niya sa 'kin? Hindi kumakain sa tamang oras? Gugutumin ko ang sarili ko, gano'n? Anong akala niya sa 'kin, tatanga-tangang hindi marunong mag-ingat? Kulang na lamang ay ipaalala niya rin sa 'kin na malapit nang mag-expire ang load ko.

At isa pa sa pinoproblema ko ay ang paulit-ulit niyang pagsesend ng math solutions na hindi ko naman naiintindihan. Sa tingin ko'y iisang tao lamang iyong nagtext sa akin noong pasko at iyong nangungulit sa akin ngayon ngunit ibang number na ang ginagamit niya.

"Saan kayo ni Gab?" tanong sa akin ni Joana.

"Papunta kaming Library. Sama ka?" sagot ko naman habang nagsusuklay sa harap ng maliit na salamin na baon ko.

Naglagay din ako ng powder at lip tint para naman hindi halatang stress na stress na ako sa mga gawain dito sa school. Mayroon ulit kaming Activity at si Gabbie muli ang ka-partner ko. Papunta kami ngayon sa Library. Masarap kasing tumambay at magpalipas ng oras doon dahil sa malamig na aircon at mayroon pang libreng WiFi. Class hour naman kaya siguradong hindi punuan ngayon doon.

"Ano, sama ka? Tara?" anyaya kong muli sa kaniya.

Tamad siyang tumugon, "Pass. Kayo na lang. Ingats!"

Nagkibit balikat ako at nagpaalam na sa kaniya. Nilapitan ko si Gabbie na kanina pa nag-aabang sa akin sa labas ng silid. At kung hindi ako nagkakamali, namataan ko pa si Miguel sa labas ng classroom nina Bluie. Ewan ko sa dalawang 'yan kung ano na ang mayroon sa kanila.

Naglakad kami patungo sa Library at tama nga ang hinala ko na hindi punuan ang mga table. Inilibot ko ang tingin ko para humanap ng magandang pwesto ngunit sa hindi inaasahan ay nakita ko na naman ang grupo nina Luke sa isang parihabang table na malapit sa may hagdan. Wala naman silang ginagawa, halatang nakatambay at nagpapalipas oras lang.

"Girlfriend ba niya iyong katabi niya? Napapansin ko lang na palagi silang magkalingkis, eh," pabulong na saad ni Gabbie habang nakatingin din sa table nina Luke.

I lazily shrugged my shoulders. "Hindi ko alam"

Totoong wala akong alam at wala akong balak alamin pa. Kung ano mang mayroon sa kanila, wala akong pakialam. Wala talaga.

"Doon tayo umupo sa katabing table nila," bulong ko kay Gabbie.

Napangisi na lamang siya at tumango rin kalaunan. Matunog kong hinigit ang silya dahilan para mapalingon ang grupo nila sa amin.

I faked a laugh and hit Gabbie's arm.

"Ang funny mo!" I uttered, still chuckling.

Nagtatakang kumunot ang noo niya sa akin kaya pinandilatan ko siya ng mga mata na para bang binabantaan siyang makisabay na lang sa ginagawa ko.

He nodded his head afterwards before faking a laugh too.

"Ang funny ko ba? J-Joke 'yon, eh!" Pagak siyang tumawa at nanggigigil na pinisil ang aking pisngi.

Hinampas ko ang kamay niya at sabay ulit kaming tumawa nang peke. Kung hindi pa kami sinamaan ng tingin ng librarian ay hindi pa kami titigil dalawa sa katangahan namin. Inilapit ko ang aking upuan sa tabi ni Gabbie. Mukha naman siyang gulat na gulat sa ginawa ko kaya bahagya kong sinulyapan ang direksyon nina Luke na kasalukuyang tumatagos hanggang kaluluwa ang masamang tingin sa amin.