جذبني فمك البني

البارت الثاني والثلاثون

٣٦٥ يومآ في السنه الميلاديه ....

شهور

اسابيع

ايام

ساعات

دقائق

ثواني

لحظات

ومن ثم ذكريات

فيما بعد عرفت بأني املك فرصه جميله بالحياة كان يجب ان لا اتجاوزها لاي سبب كان ربما لاسباب نفسيه او اجتماعيه او لاجل اشخاص ما ؟

عش حياتك كما تحب لا تتأثر ولا تستمع للأصوات الناشز ولا تجامل احد على حساب راحتك الجسديه والنفسيه والعقلية...

ان احببت اعترف وان كرهت ابتعد وان تمارضت ابحث عن وسيله للشفاء اترك العيب من الناس وتمسك بالخوف من الخالق...

٣٦٥ يوم عشها كما تحب نفسك لا كما يحب الناس...

ادهم _ سيلين

بقلمي عبير ادريس
______________

سيلين : انت وين تريد توصل بكلامك يعني شتريد توصلي فكره؟

فهد : انتي لو غبيه لو تستغبين الوضع،،، تره كلشي واضح ...

سيلين : الواضح تصرفاتك الما بيها معنى وكل يوم تحاول تفتعل مشكله احنه بغنه عنها وخلي ابالك حتى وان طلب عمو نسكن بيت وحد ما راح اقبل لان مريم متعلقه بيه وبأيفين شايفتنه مثل خواتها لهذا شيل افكارك من راسك ونظف كلبك لان مو كل اصابعك سوه ولا كل البنات مثل العرفتهن انت..

عكد حاجبه وتقرب مني واني ضليت واكفه بمكاني متحركت ورافعه راسي وعيني بعينه منزلتها وهو يخزر وحار شسوه بتعابير وجها عباله يخوفني واني معبرته...

فهد : وانتي شمدريج بالعرفتهن منو حجالج ياسه لو ادهم ؟؟

حجاها ونتر ..

سيلين : وا..

بعدني ممكمله كلام قاطعني صوت عمو التفت فهد عليه واني باوعت جان واكف باب غرفته يعني سمع حديثنه..

ادهم : فهد روح لبيتك وهذا البيت ممنوع تفوتله مره ثانيه.

فهد : والله ..

ادهم : مثل مسمعت..

فهد : ممممم واذا فتت شتسوي تكص رجلي لو تجويني..

ادهم : انت شوكت تكبر وتعقل..

فهد : من انت تنتبه لتصرفاتك وتحسب حساب للناس ذاك الوكت انه اعقل..

ادهم : مو انت التعلمني الصح من الغلط ..

صارو نار ثنينهم احس واحد شايل على الثاني بس عمو يتصرف وياه عادي صح علاقته بيه رسميه بس ماعنده اشكال وياه اله من فهد يتجاوز حدودة يلا يحجي..

ادهم : سيلين لغرفتج بسرعه ..

حجاها بنبره امر واشر براسه وفهد طلع من البيت رحت للغرفه جانت ايفين واكفه وره الباب طبيت وسديت الباب..