Drifting with the Waves (Elyu Series #1)

Chapter 11

"Bakit tayo may Edukasyon sa Pagpapakatao? Ibig sabihin ba, hindi tayo asal-tao?"

"Ikaw, Karlo, asal-hayop ka," pambabara ni Yari sa tanong ng kapatid.

"Hindi nga! Seryoso ako," inilapag ni Karlo ang textbook niya at itinuro ang question roon sa quiz. "Tingnan mo 'tong question na 'to..." itinaas ni Karlo ang textbook at binasa nang malakas ang question kaya lahat kami napatingin. "Upang makatulong sa mga nasalanta sa bagyo, nagboluntaryo sina Ana at Grace na tumulong sa pagbibigay ng relief goods sa mga tao. Anong katangian ang ipinakita nilang dalawa? Alam niyo ba kung ano ang choices? Mapagbigay, mapagkawanggawa, mapagmalasakit, matulungin... lahat ng answers parang tama. Pag namali ba ako dito, ibig sabihin, hindi ako makatao?"

"Pucha, Karlo, ang ingay-ingay eh!" reklamo naman ni Celeste. "Bagsak ka siguro sa ESP no?"

Imbes na tahimik lang dapat kami ay nagsimula na silang magbangayan ulit. Ang seryoso lang atang nag-aaral dito ay si Lulu at Avery. Naka-focus sila sa mga libro nila habang si Ivo naman, imbes na mag-aral ay kinukuskos ng kung ano yung surf board niyang nakapatong sa hita. Malaki iyon at kumakain ng madaming space kaya walang makatabi sa kaniya. Lahat kami, nakaupo pabilog sa coffee table nila.

"Hoy, Ivo, mag-aral ka nga! Kanina ka pa d'yan, ah," sa wakas ay puna ni Lulu.

Nag-angat naman ng tingin si Ivo, mukhang na-disturbo pa sa iniisip na malalim. Binalingan niya ang librong kanina pa hindi pinapansin at bumuntong-hininga. Itinabi niya ang surf board niya at kinuha iyon.

"Ano nga ulit ang coverage ng exam?"

Si Lulu na ang nagturo sa kaniya sa mga chapters na dapat basahin lalo na sa Araling Lipunan dahil napakataas noon at maraming pangalan at dates na kailangang i-memorize. Nagsusulat lang ako ng notes dahil hindi gumagana sa akin yung technique ni Lulu na ih-highlight lang sa iba't ibang kulay ang mga keywords na dapat niyang tandaan at i-memorize.

"Lulu, paturo ako nito... paano ba 'to?" narinig kong tanong ni Ivo habang nilalapit ang math book niya kay Lulu.

"Ivo, sa 15 years na magkakilala tayo, alam mo namang hindi ako marunong sa math, diba? D'yan ka kay Raya magpaturo, oh! 9/10 siya sa quiz ni Sir last time..."

Nanlaki ang mga mata ko nang bigla kong marinig ang pangalan. Huh? Bakit ako?

"Chamba lang yun," bulong ko naman.

"Solve-solve yun, eh! Hindi yun chamba!" nagulat nalang ako nang sa akin na lumapit si Ivo dala ang math book niya. "Paano ba 'to, Raya? I-simplify daw ang algebraic expressions using law of exponents..."

Napalunok ako. Hindi pa ako nakakapagturo sa ibang tao bukod sa mga kapatid ko. Kinuha ko ang libro ni Ivo at tumitig doon sa gusto niyang ipaliwanag ko.

"Kung gusto mong i-simplify ang algebraic expression, dapat mo munang i-memorize ang laws of exponents. For instance, any number raised to the power of one is the number itself."

"Meaning?"

Kumuha ako ng papel at isinulat iyon para mas lalo niyang maintindihan. "For example, seven raised to one... is simply seven."

"Easy lang pala 'to, eh!" mayabang niyang wika. "Ano pa?"

"Merong pitong laws of exponents, kailangan mong i-memorize lahat yun."

"Ang dami naman!" reklamo niya.

"Oo nga, tapos hahanap-hanapin lang si x!" birit naman ni Celeste. "Kapag x, wala na! Huwag nang hahanapin!"

"Kaya ka bagsak sa math Cel, kasi ganyan ang ugali mo..." kunwari ay malungkot na komento ni Karlo kaya hinampas siya ni Celeste.

"Bakit, may ex ka na ba, ha?!"