تربينا كلنا ببيت جدي ... اني واخوتي و جهال عمي ويانا ... بيت جدي صغير بس جان شايلنا كلنا ... بضحكنا بقهرنا بلعبنا بعركاتنا بأكلنا بشربنا شايلنا ... صح جان الوضع تعبان بس جنا نضحك و نحس بطعم الضحكة ... من جان يصير موقف رغم الهموم الي شايليها اهلنا بس جانو يضحكون من كل كلبهم ...
مرات جنا نلتم كلنا نكعد بالصالة ... كلنا نتابع فلم السهرة لو المسلسلة ..
احنا الجهال جنا نكعد يم الرجلينات ونتابع وياهم الطالع بالتلفزيون ... بهل الوقت تحديدا جان ممنوع الضحك و ممنوع الحجي لان الكبار مندمجين وي الاحداث ...
احنا الجهال مرات تلزمنا الضحكة و اذا نضحك ننضرب هههههههه .. و اذا واحد بينا تحصره ضحكة يركض بره بالممر الي يطلع على الباب الورى يضحك ..
و مرات جنا نباوع عليهم اذا يضحكون وي موقف بالمسلسله كلنا نضحك ضحكة قوية علساس وياهم متابعين المسلسله بس جذب والله .. احنا جنا نضحك هيج لواكة على كولة عمي ...
جانت سوالفنا بسيطة لا انترنت لا ستلايت لا موبايلات ..
احلى شغلة جنا متونسين بيها هي المرجوحة البرى .. مرجوحة مسويها بالنبكة مال الحديقة .. اكو نبكة جبيرة بالحديقة جدي الله يرحمة جان رابط بيها حبل ثخين .. حبل مال شر هدوم بس ثخين مو مثل حبال هالايام بس ينجر شوية ينكطع ..
لا ..
حبل من هذا الي يشبه القيطان مال الاحذية الرياضية (مكرم القارئ) .. بس ثخين كلش و قوي ..
رابطة بالنبكة البرى و مخلي مخدة عليه و كلنا الجهال جنا نلعب هناك .. مو بس احنا ..
حتى امي جانت مرات تصعد ونسوان عمامي هم وحتى عمامي ...
هاي جانت احلى لعبة عدنا ..
حياة بسيطة و الكلوب نظيفة و كلنا كلب على كلب ... مجانت اكو مشاكل بين نسوان عمامي ولا حتى عمامي وابوية .. كلنا نلتم بوقت العشا نتعشى سويا ..
بس الريوك والغده لا ..
لان اوقات الشغل و اوقات الدوام مترهم ..
بس العشا كلنا موجودين ..
جنت من بين جهال عمامي اقرب شي على كلبي بنت عمي الاصغر مني بأربع سنين ... جنت اكثر وحدة ادافع عنها و اللعب وياها .. يعني اذا واحد بجاها حتى لو جبير واعرف المعركة بيني و بينه خسرانة و شبه محسومة لصالحة .. هم افوت بيها و اضربه و اشبع كتل و بعدين اروح ابجي يم جدي ..
جدي جان اكثر ثنين يحجيلنا قصص اليا والها .. جان يكعدنا يم راسه ويلف المخدة جوى راسة ويطفي الراديو مالته الاسود و يكعد يحجيلنا قصص ..
و كل شوية نكمز نكله زين ليش هيج .. زين هو سبع .. زين هي حلوة .. يمكن القصة من خمسين سطر بس اني وياها نسألة خمستلاف سؤال وهو خطية مجان يتعاجز و يجاوب ...
حبيتها و هي حبتني و حبنا كام يكبر ويانا سنة ورى سنة .. فتحت عيوني عليها وفتحت عيونها عليا ...
من دخلت متوسطة جنت يوميا اخر درس انهزم حتى اروح ارجعها من دوامها للبيت ومحد ميصجمها ..
الصبح جنت مأمن عليها لان عمي يوديها .. بس بالرجعة الا اني ارجعها بيدي ..
حبيتها و عيوني مشافت غيرها ولا راح تشوف ...
جدي توفى و احنا كبرنا وبعد البيت الي جان شايلنه مكدر يلمنا ولا يكفينا اصلا ..
كل واحد من عمامي وابوية هم صار بمكان .. جانت اصعب لحظة على كلبي هي هاللحظة الي انتقلنا بيها لغير منطقة ..
بنت عمي شلون اشوفها بعد و صرنا بعيدين .. صح ببغداد بس بعيدين من منطقة لمنطقة ...
توسلت بأبوية نكعد بنفس منطقتهم بس المشكلة بالفلوس الي عند ابوية متكفي .. وخطية عمي هم بالكوه لكه البيت ..
شلنا ..
اني ردت انفصل من كثر ما اروح يم بيت عمي .. كلت لابوية طك بطك اريد فلانة اتزوجها .. ضحك بوقتها كال ترى كلنا ندري بيك تحبها وحتى جدك الله يرحمه جان يكلي هذا يتزوج هاي ..
خجلت بيومها كلش .. كال ابني لاتخجل بس غير اول شي تنجح و تتخرج وتشتغل .. الزواج مو لعب جهال .. وتعرف انت ظروفي اني وعمامك ... نساعدك منقصر بس الاهم انت تساعد حالك ...
من ورى هالحجي مال ابوية صارلي واهس انجح وادرس .. كمت اجيب معدلات قوية و الحمدلله نجحت و دخلت كلية ..
هي هم دخلت كلية و يابوية المسكينة شكد سويتلها مشاكل بكليتها .. جنت كل ما اروح اذا اشوفها واكفة وي شباب لازم تصير مشكلة .. مو بيدي اغار عليها والله ...
هي جانت تتفهم موقفي و اخر شي كامت تتحاشى كل وكفة بيها شباب بس علمودي لان ممعلوم بيا وكت اطب عليها .. جانت جياتي كلها بدون وقت معين وبدون موعد .. على غفلة افوت لكليتها .. و تخرجت قبلها اني وتعينت ...
بس تعينت وراها فترة تقدمت عليها .. بس قبل ما اتعين بنيت غرفة فوك لان البيت ميكفي .. الغرفة جهزتها تجهيز و ما اشتري ولا كشايه اذا ما اسألها لو نروح اني وياها سوية نشوفها للشغلة .. جنت افوت بسلفة وي الموظفات واطلع من سلفة ..
والحمدلله والشكر بوقتها الله شلون دزلي موظفة جبيرة بالعمر واقدم وحدة هناك بالدائرة .. بس حجيتلها ظرفي و شلون احب بنت عمي كامت تساعدني هواي .. و هي علمتني على سالفة السلف .. و خلتني اشترك بسلفتين و اني اول اسم استلمهم .. هي حجت وي المشتركين بالسلفة ..
#يتبع
