تانى مجرة ع اليمين

البارت الاول

اللهم اهدنا فيمن هديت و عافنا فيمن عافيت و تولنا فيمن توليت
1
نوڤيلا
تانى مجرة ع اليمين
البارت الاول
الاول احب اشكر حبيبتى أم دعاء  على الغلاف الجديد الجميل اللى اهدتهولى ، و بقولها تسلم ايديكى و مانحرمش ابدا ،
كانت قاعدة مربعة رجليها الاتنين على صخرة كبيرة و هى بتنفخ و بتقول بزهق : و بعدين بقى .. احنا هنفضل قاعدين كده كتير
مسعد و اللى كان قاعد جنبها بكسل و بيلعب بشوية زلط صغيرين فى ايده : و عاوزانا نعمل ايه بس يا بسنت ، ماحنا لازم نستنى وائل و رامى على ماييجو عشان نمشي معاهم بالمكوك اللى هييجوا بيه
بسنت و هي بتبص لفوق و بتشاور بايديها على نجمة بعيدة : الوقت اخر اوي يا مسعد ، ده حتى المجرة كلها شكلهم ناموا
مسعد : لا ماتقلقيش ، لا ناموا و لا حاجة ، بس تلاقيهم متجمعين عند جمعة عشان يتفرجوا على الفقس من اوله
بسنت اتنفضت من مكانها و هى بتشهق و بتجري و بتقول : هو الفقس النهاردة و دلوقتى كمان ، قوم يا حلو قوم ، يبقى وائل راح على جمعة و سايبنا احنا ملطوعين له هنا زى الهبل
مسعد و هو بيجري وراها : طب افرضي روحنا و مالقيناهومش هناك ، و جم على هنا بعد مامشينا ، هيخصموا لنا احنا الاتنين
بسنت وقفت و زي ماتكون بتوزن الامور بدماغها و بصت لمسعد و فالت : و افرض خصموا لنا ، هو انت مش محوش لك و لا بيضة حتى
مسعد بسخرية : هى العيال بتخلي يا بسنت ، ما كله على يدك ، انتى بس عشان وحدانية مانتيش عارفة العيشة شكلها عامل ازاى
بسنت : خلاص ، خليك انت هنا و انا هروح ابص عليهم عند جمعة ، لو مالقيتهمش هرجعلك تانى ، و لو لقيتهم هنفخ لك البوق نفختين من بتوعي .. اتفقنا
مسعد : ماشى ، بس خدي بالك على روحك ، اوعي تقعدى تتنططي ع السحاب زى عوايدك ، مش ناقصين حد يشوفك و يفتن عليكي لجناب الكوماندا المهم
بسنت : لا ماتخافش ، انا هروح من ناحية شط الثقب الاسود ، ماحدش بيبقى هناك دلوقتى ، انت بس طرطق ودانك عشان لو نفخت فى البوق تسمعني
مسعد بقلق : ماشى يا بسنت ، بس خدي بالك على روحك .. الوقت اخر و المجرات كلها دلوقتى بيقطعوا الطريق على بعض ،  و لو لحقتي الفقس ابقي حوشيلي نايبى
بسنت و هى بتجرى : من غير ماتقول يا مسعد ماتقلقش

نفهم بقى … 👀👀
سنة ٣٠٠٠ الارض ضاقت بناسها .. بعد الحروب و النووى و الصراعات العنص/رية ، و رغم التطور الرهيب اللى حصل للبشرية الا انهم ماقدروش يلاقوا حل للزيادة السكانية ، فالحكام بتوع الارض بعد ما زهقوا من كتر الحروب و المجاعات اللى زادت بسبب زيادة اعداد البشرية بطريقة غير معقولة ، قرروا انهم يصدروا البشر للخارج
طب فين الخارج ده و اصلا مافيش و لا كوكب ثبت انه يصلح للحياة غير المريخ واللى كان هو كمان اتملى بالبشرية اللى صدروهم هناك بداية من سنة ٢٥٠٠ و اللى كان برغبة البشر نفسهم انهم يهاجروا لهناك  ، لكن المرة دى كانت غير ، دى ماكانتش هجرة ، دى كانت نفي اجباري ، و طبعا ماحدش هيوافق ابدا انه يتنفي عن الارض و المجرة  كلها بلا رجعه ، يعني مش مجرد غربة كام سنة وخلاص ، لا .. دى غربة اجباري و للابد
و لاول مرة على مر التاريخ يتفق كل حكام الارض مع بعض على قرار واحد 👀
اتفقوا انهم هيلموا عدد كبير من كل دولة و يحطوهم فى الات إشعاعية تم اختراعها زى بوابات الزمن كده ، بس دى كانت بوابات للعالم الخارجي، او للمجرات الاخرى ، و اللى طوروها بشكل انها تبقى باب باتجاه واحد رموز فتحها بايد اهل الارض لوحدهم ، يعني سكة اللى يروح مايرجعش
و ابتدت كل بلد تحضر الناس اللي هتوديهم او هتنفيهم هناك بعد ما عرفوا هيودوهم فين بالظبط 
وجههوهم لمجرة بعيدة تم اكتشافها و لقوا انها بتشبه المجرة بتاعتنا لحد كبير بس فيها كوكب معين فيه حاجة مختلفة عن باقي الكواكب و ماقدروش يعرفوا سببها ، ان الكوكب كله يعتبر بين السحاب ، السحاب مش بس فى سماه ، لأ ، ده كمان فى طرقه و قريب اوى من سطحه ، لكن ما اهتموش بدراسة الظاهرة دى ، لان كل اللى كان فارق معاهم انه يصلح للحياة و بس
لكن قرروا انهم قبل ما يبعتوا الناس اللى قرروا نفيهم للمجرة دي ،  انهم يبعتوا الاول حد يمهد لهم العيشة على المجرة دي
فقرروا ياخدوا من كل بلد كل اللى محكوم عليهم بالاعد/ام و المحكوم عليهم بالسجن مدى الحياة ، و بعتوهم عشان يهيأوا للعيشة هناك بعد ما وعدوهم انهم هيبعتولهم بعد كده كل حبايبهم
المحكوم عليهم رغم صدمتهم و قلقهم الا انهم فرحوا انهم هياخدوا فرصة تانية للحياة ، و طبعا كان تقريبا فيهم كل المهن اللى عرفتها البشرية من بداية الخليقة لوقتها
و طبعا كان فيهم البرئ و فيهم المذنب ، و حتى المذنبين كان فيهم الكويس و اللى ظروفه اجبرته على الاجر/ام ، و فيهم المجر/م بطبعه
لكن الحكو/مات مافرقتش دول عن دول و بعتتهم كلهم تحت اشراف متطوعين من كل دول العالم و اللى قسموا المجرة بعد كده بينهم ، و كل واحد اخد جزء يحكمه ، و شعبه هم نفسهم المحكوم عليهم من بلده
كانوا فاكرين الدنيا هتبقى سهلة ، لكن الواقع كان حاجة تانية خالص ، و اتفاجئوا ان حكام الارض حولوا المجرة الجديدة لس/جن كبير بتنفي فيه كل الخارجين عن القانون
المنفيين لما نزلوا على المجرة اكتشفوا ان عليها اكسجين  و جاذبية يصنعوا حياة زى الارض بالظبط
و ابتدوا يقسموا المجرة بينهم و بين بعض كالتالى ؛
فبريكان .. و اللى كتير احتاروا فى معنى اسمه ، فيه اللى قال ان اسمه جاى من الفابريكا يعنى المعرض ، و فى اللى قال ان كلامه كله فبركه و انه عمره ماعرف الصدق
فبريكان ده كان اكتر واحد فيهم واخد أحكام بالاعد/ام و اللى شرط عليهم ياخد معاه كل ولاده فى نفس الرحلة و اللى كان معظمهم زيه و نفس اجرا/مه لكن فى نفس الوقت متعلمين فى كل المجالات ، لكن للاسف كانوا دايما بيوجهوا علمهم ده للشر مش للخير ابدا
و كانت النتيجة انه حط ايده على جزء كبير من كواكب المجرة و رسم حدود كمان لملكيته هو و ولاده
و كتير غيره عملوا زيه .. اللى كان شايف ان ده الصح ولازم تبقى قوي عشان تقدر تعيش زى ابو الروس اللى كان دايما بيقف ضد فبريكان و هو بيحاول يبان انه احسن منه و ساعات حتى بيقف قصاده و لو لمجرد انه يبقى ضده و هو كمان حط ايده على اكتر من كوكب
و فى اللى كان بيقلد و عاوز ينافس و يعمل لنفسه هو كمان وضع زى صاين ، اللى كان عاوز يبقى له اسم وسط ابو الروس و فبريكان ، و كانت حياته عباره عن انه يقلد فبريكان شوية و ابو الروس شوية ، لكن شوية بشوية ابتدى يشغل دماغه و ينافسهم فى كل حاجة
وبرضة كان فى اللى بيقلد تقليد اعمى بس من غير حتى مابيفكر ايه الصح و ايه الغلط زى قاسم ، و كان دايما تقليده بييجى فى الشكل مش فى المضمون ابدا و ده خلاه على طول اجوف و ماحدش بيهتم اصلا انه ياخد رأيه في اى حاجة
و كان فى اللى بيزقها عشان تمشى و قفل على نفسه بعيد عن كل المشاكل زى عدنان و اللى كان بيحب يتفرج من بعيد و هو فى منأى عن اى حاجة ممكن توجع له دماغه
لكن من وسط كل دول كان فى اللى عاوز يعيش كويس و يبني مستقبل ليه و لولاده .. و ده بقى كان بكر و اللى حظه جه فى الكوكب اللى متحاوط و عايم وسط السحاب ، لكن ما اهتمش و قرر انه يستغل كل حاجة حواليه فى انه يعمر كوكبه .. كوكب بكر
بكر كان من ضمن اللى اتحكم عليهم بالاعدام لانه كان متهم بقتل اخته و عشيقها .. و رغم انها جريمة شرف ، الا انه طول الوقت كان بينفي التهمة عن اخته قبل ما كان بينفيها عن نفسه ، و كان بيحكي انه كان هو و اخته و خطيبها بيحاربوا الظلم و الفسا/د ، و كانت النتيجة ان اخته و خطيبها اتقت/لوا و اتهموه هو بقت/لهم و كمان قالوا انها جر/يمة شرف
و لما حاول يدافع عن نفسه و عن اخته .. ماحدش سمعه و لا صدقه و لما عرضوا عليه يخرج برة مجرة الارض رحب بشدة و قال : الارض ضاقت من الظلم ماضاقتش بينا ، بس خلاص مابقاليش قعاد فيها
كواكب المجرة اتقسمت بينهم ، لكن الكواكب كانت قريبة من بعضها و كانوا بيتنقلوا بينها بالمكاكيك زى ماكان اهل الارض بيتنقلوا بين الاماكن و بعضها بالعربيات و الطيارات
عدى على نزول اهل الارض على المجرة دلوقتى حوالى خمسمية سنة ، و فى خلال الخمسمية سنة دول المجرة اتحولت لما يشبه الارض ، لكن حكام المجرة فى مرة من المرات القليلة اللى اتفقوا فيها ، قرروا انهم يتعلموا من اخطائهم على الارض
و كان من ضمن الاخطاء اللى حاولوا يتعلموا منها ، انهم قرروا مايعتمدوش على الاعانات اللى كانت بتجيلهم من الارض ، فقرروا يعتمدوا على نفسهم فى كل احتياجاتهم ، زرعوا و صنعوا و انتجوا ، استوردوا من الارض الحيوانات المستأنسة و الطيور الداجنة للتربية مش للاستهلاك
و النهاردة كان اهل كوكب بكر بيحتفلوا باول فقس لبيض طائر البهلوان ، و ده طائر ضخم جدا زى الفيل رغم انه كان بيقدر يطير بخفة شديدة جدا
سكان كوكب بكر لقوه عايش بكترة ع كوكبهم بس دونا عن كل كواكب المجرة  
و رغم ضخامة البهلوان الا انه كان لطيف جدا فى تعامله مع البشر و كانت الوانه مبهجة و متداخلة و عشان كده سموه البهلوان
لكن من كام سنة جالهم فكرة انهم يستأنسوه و يربوه زى ما كان اهل الارض بيربوا البط و الوز و الفراخ ، و عملوا البيض بتاعه زى عمله بيقايضوا بيها احتياجاتهم
لكن اخيرا فكروا انهم يجهزوا بيض للتفريخ عشان انتاج الطيور نفسها يزيد و بالتالي البيض كمان يكتر ، و اللى كان يعتبر عملة مهمة جدا فى المجرة و اللى كان كوكب بكر الوحيد اللى بيملكها
و النهاردة كان اول فقس لطير البهلوان و اللى كان فى مزرعة جمعة صاحب الفكرة ، و اللى جمع مجموعة من طير البهلوان و عمللهم عش و مفرخة بعد ما اتواصل مع اهل الارض و اتعلم منهم طرق تربية الطيور الداجنة
بسنت كانت بتجري و هى بتتنطط على السحاب بمرح زى عادتها عشان عاوزة تتفرج على الفقس و فراخ البهلوان الصغيرة و هى خارجة من البيض لسه ، رغم انها شافتهم اكتر من مرة ، بس ماكانش ابدا بالعدد اللى المفروض يفقس مرة واحدة ده
بسنت و هي ماشية لمحت من بعيد مكوك جاي من ناحية كوكب من كواكب فبريكان و رايح ناحية كوكبهم ، ماهتمتش اوي ، بس غصب عنها فضلت متتبعاه بعينها لانه كان تقريبا الحاجة الوحيدة المنورة حواليها ، بس فجأة .. لاحظت ان المكوك ثبت فى مكانه من غير اي حركة و بعدها بشوية لمحت مكوكين تانيين عملوا زيه و وقفوا حواليه ، و التلات مكاكيك وقفوا على شكل مثلث و طفوا انوارهم بشكل مريب
بسنت وقفت بانتباه لثواني تشوف اللى هيحصل ، بس لقت ان ماحصلش حاجة ، فقررت تكمل طريقها لحد ماوصلت لمزرعة جمعة ، و هناك لقت هيصة جامدة و عرفت ان البيض فقس ، فجريت دخلت وسط زحمة الناس و هى بتتفرج بفرحة على فراخ البهلوان و هم بيتجمعوا جنب بعض حوالين الامهات اللى بيلموهم تحت جناحاتهم
و من وسط الزحمة ، لمحت رامي و وائل فجريت عليهم و هي بتقول لهم بامتعاض : بقى انتو قاعدين هنا و لاطعينني انا و مسعد الغلبان عند بوابة المعمل و انتو هنا بتتفرجوا على الفقس و ولا على بالكم
وائل : طب ما انتي جيتي اهو انتي كمان تتفرجي
بسنت : لا و انت الصادق ، انا جيت اشوفكم هنا ، لما مسعد قاللي ان الفقس النهاردة قلتله يبقى انتو الاتنين اكيد هنا
رامي باعتذار : معلش يا بسنت ، بس احنا قلنا ان انتم اكيد هتعرفوا من نفسكم و هتيجوا على هنا
بسنت بسخرية : ليه يعني ، ماشيين بالبلورة السحرية معانا فى جيبنا ، ده انا بشيل معايا البوق بالعافية
و وقتها افتكرت مسعد و سحبت البوق بتاعها اللى دايما معلقاه على كتفها و نفخت فيه مرتين بتنغيمة معينة و بعدين قالت : هم وزعوا الاكل و اللا لسه
وائل : لسه
بسنت و هى بتبص على فراخ البهلوان بفرحة : طب كويس ، عشان مسعد ما يزعلش
رامي : طب مين فى المعمل هناك
بسنت : عمال الوردية التانية ، بس انتو جيبتوا الحاجات اللى محتاجينها و اللا لا
رامي بامتعاض : مش كلها
بسنت : ليه بقى
رامي : بذور القمح اللى بنجيبها من فبريكان مش موجودة ، قالوا انها بقت تتكلف كتير و عاوزين يغلوها
بسنت : و عاوزين كام بيضة بقى زيادة
رامي : الموضوع مابقاش موضوع بيض بس يا بسنت ، دول عاوزين بيض فقس مش اي بيض
بسنت باستنكار : بيض فقس مرة واحدة ، ايه الطمع ده ، مش كفاية انهم كل ساعة و التانية بيغلوا علينا ، و بعدين احنا هنجيب بيض الفقس منين اصلا .. طب و العمل .. كده الانتاج هيقف
وائل : مش عارفين بقى .. انا بلغت جناب الكوماندا و سيبته يفكر
بسنت : طب ما احنا ممكن نجيب اللى احنا عاوزينه من كوكب ابو الروس او كوكب صاين
وائل : طب و العقد اللى بيننا و بين فابريكان
بسنت بامتعاض : ماهو الفابريكان عاوزين يكوشوا على كل حاجة من غير ما يتعبوا فى حاجة
رامي بهمس : انا سمعت طراطيش كلام انهم كانوا عاوزين ياخدوا كمان من طير البهلوان نفسه يربوه عندهم بس مش عارفين لانه بيموت منهم و ده هيجننهم
وائل بنفس الهمس : و انا كمان سمعت انهم كانوا عاوزين يعملوا كده و كمان سمعت انهم بيخططوا انهم يهجموا على مزرعة جمعة و يستولوا عليها
بسنت بانتباه : يبقى هم
رامي باستغراب : هم مين .. تقصدي ايه
بسنت : و انا جاية على هنا لمحت تلت مكاكيك و شكلهم تبع كوكب فابريكان ، وقفوا التلاتة قريبين من بعض و هم عاملين زى المثلث و طفوا الانوار بتاعتهم
وائل : احنا لازم نحذر جمعة
رامي : متهيألي مايقدروش يعملوا حاجة وسط اللمة بتاعة الناس دى كلها
بسنت و هى بتدور بعينيها وسط الناس : بالعكس ، دى فرصتهم انهم يندسوا وسط الناس من غير ماحد ياخد باله ، و ادي اولهم
رامي و وائل بصوا ناحية ما بسنت ماكانت مركزة بعينها لقوا فعلا تلت رجالة و اتنين ستات ما شافوهمش قبل كده
بس اللى انتبهوا له انهم بيتكلموا مع بعض بصوت عالي و واحد منهم بيقول : المفروض خير المزرعة ده يتوزع علينا كلنا
فرد عليه التاني و قال : حقيقي .. ليه جمعة يستولي على كل اعداد الطيور دى كلها لوحده
بنت من اللى معاهم : لا و كمان هو بس اللى هيبقى متحكم فى البيض و اللى يعتبر الثروة القومية الوحيدة اللى على الكوكب
رجع الشخص الاول قال : طب ما احنا نطالب بحقنا
الشخص التالت و اللى كان بيراقب انتباه الناس حواليهم قال ببطء و اكنه عاوز يتأكد ان الناس وصل لها كل كلمة بيقولها : جمعة طماع و مش هيوافق ، و انا شايف انه عنده حق يعمل اللى بيعمله ، ماهو شايفنا ساكتين ، لأ و كمان بنحتفل معاه و فرحانين و بنهيص
واحد من اهل كوكب بكر التفت لهم و قال : ماهو جمعة هيوزع علينا كلنا هدايا
البنت اللى من كوكب فابريكان قالت باعتراض : هو هيمن علينا بحقنا ، الطير ده كله ملك الكوكب كله ، مش من حقه ياخد كل الاعداد دي لوحده
بسنت قربت منها و قالت بحدة : و برضه الطير مالي الكوكب و ماحدش منع حد انه ياخد منه ، لكن اللى فى المزرعة هنا .. جمعة هو اللى تعب على ماعمل كل ده ، و هو اللى استورد الخبرة و المكن كمان من الارض ، انتو بقى عاوزين توقعونا فى بعض ليه
الشخص التالت اتمعن اوي فى بسنت و بعدين قال : شكل جمعة مظبطك عننا و عشان كده بتدافعي عنه بحرقة اوي
رامي قرب منهم و قال بصوت عالي و هو بيشاور عليهم : يا اهل كوكب بكر ، اوعوا تصدقوهم .. دول مدسوسين علينا من عند فابريكان عشان يعملوا بلبلة و يسرقوا المزرعة
الشخص الاول بلجلجة : هو احنا عشان عاوزين نفتح عينيكم و نعرفكم حقوقكم عاوزين تطلعونا حرامية
وائل قرب هو كمان و قال بحدة : لو مامشيتوش بالذوق و رجعتوا للمكاكيك بتوعكم اللى راكنينها فى الضلمة عند شط الثقب الاسود ، هنعتقلكم هنا لحد ما يبان لكم اصحاب
الخمسة قربوا من بعض فى دايرة و هم ضهرهم لضهر بعض و فجأة اختفوا من قدامهم بعد ما كل واحد فيهم داس على اسورة لابسها فى ايده
اول ما اختفوا بسنت قالت بصوت عالي : خدوا بالكم مش هتبقى اخر مرة
جمعة جه عليهم و هو بيقول : هو ايه اللى حصل
رامي بامتعاض : انت كنت فين يا عم جمعة و سايبنا كده
جمعة : كنت بتطمن على الفراخ الصغيرة ، و بجمع كل ام مع ولادها .. ايه اللى حصل
بسنت حكت بصوت عالي الحكاية من اولها فجمعة قال : كنت متوقع ان الفابريكان هيعملوا كده خصوصا بعد الاتفاقية اللى عملناها مع ابو الروس
رامي : اتفاقية ايه دى
جمعة : ابو الروس طلب كام طير بهلوان يكونوا جاهزين للبيض و التفريخ عشان هيعمل مزرعة تانية هنا بس احنا اللى هنشغلهاله ، و هيبقى الانتاج بالنص مابين كوكبنا و كوكبهم
بسنت باستغراب : طب و ليه مايعملهاش عنده
جمعة : جربوا قبل كده بس لقوا الطير اللى بياخدوه بيموت عندهم و برضة مابيقدرش يتعايش على كوكبهم
وائل : طب و ده ايه علاقته باللى الفابريكان عملوه
جمعة بسخرية : ماهم عاوزين يقفوا لابو الروس
رامى : يقوموا يسرقوا المزرعة
جمعة : باللي حصل النهاردة هم ماكانوش عاوزين يسرقوا المزرعة ، هم كانوا عاوزين يعملوا فوضى بيننا و بين بعض ، يعني مننا فينا ، و طبعا لما ده هيحصل هييجوا الفابريكان يحطوا رجلهم فى المزرعة و الكوكب كله عشان يحمونا من بعض بحجة انهم كبرات المجرة ، فيحطوا ايدهم على المزرعة و خيرها ، و فى نفس الوقت يوقفوا مشروع المزرعة التانية بتاعة ابو الروس
وائل : ايه الدماغ العالية دى يا عم جمعة ، تصدق ان فعلا كلامك منطقي جدا ، بس الحمدلله ان بسنت شافتهم و قدرنا ننتبه لهم و بوظنا خطتهم
جمعة : و هو انتو فاكرين ان الحكاية كده خلصت خلاص
بسنت بقلق : تفتكر هيحاولوا تانى
وائل : احنا صاحيين لهم
جمعة : الخوف مش فى انهم يحاولوا او لا ، الخوف من اللى ممكن يديهم ودنه و يمشي وراهم ، الفابريكان طول عمرهم مابيدخلوش من الباب ، و جدودهم ياما عملوا فى الارض و اهلها قبل ما يبعتوهم على هنا
بسنت : طب و العمل يا عم جمعة
جمعة : مافيهاش عمل يا بنتى
جمعة وقف و قال بعلو حسه : يا اهل كوكب بكر ، انا وعدتكم بهدايا بمناسبة اول فقس ، و وفيت بوعدي ، و عامل وليمة كبيرة عازمكم كلكم عليها ، و كمان هوزع على كل واحد فيكم تلت بيضات ، و الكلام ده هيكون مع كل فقس جديد
الناس هيصت و فرحت و هنت بعضها ، بس جمعة شاور لهم انه لسه عاوز يتكلم ، فلما سكتوا و انتبهوا له من تانى قال : طير البهلوان مالي الكوكب ، و تربيته مش صعبة ابدا ، و انتو عارفين هو اد ايه مسالم و طيب ، ليه مش كل واحد فينا يربي فى بيته حتى لو طير واحد ، و انا ممكن اساعدكم كلكم
طير البهلوان مابيقدرش يعيش غير على كوكبنا و بس .. كوكب بكر ، لما بيطلع براه بيموت
و عشان كده معظم الكواكب عاوزاه و طمعانة فيه ، و لما ما عرفوش ياخدوه عندهم لانه بيموت منهم ، عاوزين يستولوا عليه و هو على كوكبنا
فيه اللى بيعمل كده بطرق مشروعه و بيطلب مساعدتنا و فى اللى عاوز يخطف الخطفة و يجري
و عشان كده ، عاوزكم تربوه فى بيوتكم عشان ماحدش يقدر يلوي دراعنا و ياخد خيرنا و يجوعنا ، بس برضة هنعمل مزارع و نصدر من انتاجها عشان نقدر نقايض الانتاج باحتياجاتنا
قلتوا ايه
اللغط زاد و النقاش كتر و الاراء اختلفت ، لحد ما الناس رجعت سكتت من تاني لما سمعوا بسنت بتقول : انا معاك يا عم جمعة ، قوللي اعمل ايه و انا هعمله
جمعة : كل اللى موافق على كلامي يأيد اسمه مع بسنت ، و على عدد اللى هيبتدوا مشروعهم ، هساعدهم يعملوا الحظاير بتاعتهم ، و هختار معاهم الطير المناسب للتربية و التفريخ و هفهمهم يعملوا الاقفاص بتاعتهم ازاي و هساعدهم كمان باللي اقدر عليه
البهلوان ده ثروة كوكبنا و لازم نحافظ عليها و نستفيد منها على اد ما نقدر
واحد من اللى موجودين قال بتفكير : طب و لما كلنا نربي البهلوان و نستغله و نفرخ كمان ، انت هتستفيد ايه يا عم جمعة
جمعة بتحذير : الفابريكان طالما حطوا البهلوان فى دماغهم مش هيسيبونا فى حالنا ، و هيحاولوا بدل المرة الف انهم يستولوا على خيرنا ، و انا اللى يهمني .. ان البهلوان خيره مايطلعش برة كوكب بكر الا بمزاجنا و للي عاوزينه
مش عاوز حد يمن علينا بخيرنا يا اهل كوكب بكر
بسنت بصوت عالي : الفابريكان حاولوا النهاردة يوقعونا فى بعض ، حاولوا يكرهونا فى عم جمعة و يخونوه ، بس نسيوا ان بكر الله يرحمه علمنا اننا نتعلم من اخطاء اهل الارض اللى جه منها
نسيوا انه علمنا و علم اهالينا من قبلنا اننا مانسيبش الظلم و الكره يعششوا فى صدورنا
الكل ابتدى يتحمس لكلام جمعة و بسنت اللى قالت بتحذير : و مش لازم ننسى انهم مراقبينا ، واقفين عند شط الثقب الاسود و متخفيين فى ضلمته و مستنيين اننا نغلط اى غلطة او نسهى بس عنهم
ابتدى كل واحد يتشجع و يقول انا معاكم .. انا معاكم
و ابتدت الوليمة ، و كان مسعد وصل لهم و هو مبسوط انه لحق حاجة و لقى بسنت ايدت اسمه فى اللى هيربوا البهلوان
و خلص اليوم و الاحتفال على اتفاقهم انهم هيبتدوا من تاني يوم يجهزوا نفسهم لتربية البهلوان فى بيوتهم 😉🤫