𝒀𝒖𝒚𝒓𝒆𝒏'𝒔 𝑩𝒊𝒛𝒂𝒓𝒓𝒆 𝑾𝒐𝒓𝒍𝒅 ★

كيف صرت اوتاكو؟¿

13/04/2024

السلام عليكم..
ابغى اليوم اشارككم عن كيف صرت اوتاكو....

احم..
كأغلب العرب، كنت أشوف أنمي في سبيستون.. ما كنت ادري أن إسمه أنمي أصلا، كنت أسميه كرتون و بس..

ف..... كنت بنت كده كيوت تشوف أنميات كيوت مثل نجمة الطبخ و رينبو روبي..
لا لا يا أخوتي، كنت أشوف سيف النار و مكرشة عليه و أعيد حلقاته و حافظة الأحداث عن ظهر قلب👁👄👁

طبعا من اليوم اللي تعرفت فيه على سيف النار كان كل كلامي عنه، سيف النار سوا كده، ضربه كده، قال كده.. و أقلد حركاته بعد، طبعا العيد طفش مني كل يوم أجيبه...👩‍🦲

المهم من لما كنت في الخامسة من عمري، لين العاشرة.... كده 5 سنوات و أنا أعيد نفس الـ54 حلقة المدبلجة بدون ملل او كلل...

و بذكائي الخارق (✷‿✷) لاحظت أنو سبحان الله الأنمي ما خلص في الحلقة 54 !!!! أو ماي قــــــ🐸ــــــاد!!!!

و اللحظة اللي غيرت حياتي جات... كتبت الحلقة 55 في البحث و طلعت لي!!!
دخلت.. و سمعت لغة غريبة و طلاسم عجيبة لإستدعاء الجن و الشياطين! فأنا كده اتخرشت و طلعت بسرعة و انا أحمد ربي على ال54 حلقة اللي أنا مكتفية بيهم (✷‿✷)
(القناعة كنز لا يفنى💃💔)

المهم مرت الأيام و حسيت بالفضول تجاه تتمة الأحداث... و قلت خلونا نعطي فرصة للغة الشياطين ذي و ندخل كده عالحلقة و نشوفها...

و نكتشف أشياء ما كنا نعرفها عن الأنمي!! جوليا إسمها يوريا و سيف النار إسمه كينشيرو و ري يحب ماميا!!! و بسم الله في 6 نجوم جنوب مو بس واحد!!

و بديت اكتشف حقائق علمية و تاريخية عن الأنمي و أحس نفسي كنت مخدوعة (شكرا لسبيستون لأنها سوت كده عشان الأطفال.. بس الأطفال كبروا الحين💋)

ختمت الأنمي و طبعا ما كانت كل الحلقات متوفرة في اليوتيوب بس اتس اوكي... و صرت ألف و أدور حول الحلقات اليابانية في ذي الفترة 🗿

و بديت أحس بملل!!!! أخيرا...! بعد 6 سنوات من سيف النار!

المهم في ذي الفترة، قلت لبنت عمتي أني بديت أشوف سيف النار بالياباني، و قالت لي أن اللي يشوفون الأنميات اليابانية إسمهم"الأوتاكو" و أنا كذه حسيت الإسم أسطوري و فرحت لأني مو الوحيدة اللي تشوف كرتون بلغة الجن!!

طبعا كل العالم- قصدي كل العيلة عرفوا أني أوتاكو، كذه أنشر الخبر براس مرفوع و فخر و حماس، أحس نفسي عظيمة و حققت إنجاز عظيم و أنا ما أعرف عن الأنميات الثانية أصلا...

بعد مدري كم...
رحت كتبت في اليوتيوب "أنمي" و طلع لي ثاني أنمي شفته بالياباني!!!

نسيت إسمه بس يتكلم عن عمر الـ12، صديقتين في سن المراهقة يوقعوا في الحب مع ولدين و انا كده اشوف الانمي و احس فراشات و حماس🥰💔

و بسم الله ما شاء الله، بديت أختم أنميات اليوتيوب، أكتب أنمي مدرسي رومانسي يطلع لي...🗿
أخخ تذكرت الماضي الأسود....

و كده عامين و أنا أتسكع في اليوت أبحث عن قناة تنشر ديث نوت، ون بيس، الأنميات اللي الكل يتكلم عنها و ما ألقاهم... 🌚💔

و الحمد لله كان في ذاك الوقت هجوم العمالقة متوفر في اليوت و مرة حبيته لهيك كنت من فانز أتاك و أتشاجر مع الونبيسيين و أقول لهم شفت ون بيس بس اتاك عمك.. و انا ما كنت اعرف مين ون بيس هذا اصلا...🐸✨

و لين ما أكتشفت ✨انمي سلاير✨... العشق الممنوع!! رحت بسرعة لقوقل أحمله و دخلت قابلني كم هائل من الأنميات و انا بديت أبحث عن الأنميات الي ابغاهم و أدخلهم لقائمتي عشان اشوفهم بحماس و خلص عهد اليوتيوب...!

و كان حرفيا يوم اكتشافي لأنمي سلاير في العام الماضي XX/03/2023 ... مر عام كامل على ذاك اليوم، طبعا للحين أعتبر نفسي اوتاكو شوي مبتدئة عشان ما شفت كل الانميات المشهورة...

حاليا شفت 131 أنمي، أغلبهم أنمي مدرسي رومانسي من اليوت 👽

كل ذا بسبب سيف النار💃💔

و بس و الله..
صلوا على النبي..♡