~H.Nasir~
...saalon baad mujhe uske sheher jaana naseeb hua, kaam kaaj or masrufiyaat k bayis kabhi us chotey se sheher ki taraf chakar he na laga tha...sheher ki haalat kafi badal chuki thi, jahan kabhi tamam bazaar khuley or saaf hotey they wahin ab jagah jagah khachrey k dheyr or beyjaa tajaawuzat k bayis peyda honay wala rush ek ajeeb ghutta hua samaa baandh raha tha, logon ne bhe shayad puranay waqton k hanstey damaktey chehron k naqaab badal kar pareshani or khamoshi k libaday oarh liye they, yeh sheher ab apna sa nahin laga....kaam kaaj se faraghat paa kar mene socha k apne mohalay ki haalat bhe dekhta chalun so meyn us taraf barh gaya....yeh androon sheher tha, bahiri diwaron k andar ek munfarid tehzeeb saans lia karti thi, jis mey zaat paat, rang o roop ka khayal kam or parosion, rishtedaron or aleyq saleyq walon ka khayal ziada rakha jaata, log apne bachon ki bachaye dusron k bachon pe shafqat ka hath pehle rakhte...meney isi mohallay mey ankh kholi thi, or 17 saal tak iski bahiri diwaaron k bahir ki dunya se bekhabar raha...isi mohallay mey hamara ghar tha, bohat barra ghar, aas paas k gharon mey sab se barra, or shayad hamara khandaan bhe sab se barra tha, chachi, tayi, phuphi, mamani, or inke ghar walay, sab isi ghar mey raha kartey or jitna bara hamara ghar utni he is mey ronaq thi...ronaq se yad aya, hamara naam bhe ronaq ali rakha gaya ...meyn ahista ahista androon sheher k bal khaatay raston mey se hota hua apne mohallay mey pohncha, tha to wohi magar khad o khaal bey haal huey they, hamari gali k nukkar pe uska ghar tha or akhri wala hamara tha, pehle uske ghar pe nazar pari or baad mey apne pe....uske ghar mey wo kul 5 log rehtey they, amma, abba, 2 bhai or unki ikloti behen Wo, hamarey abba or unke abba mey gehri dosti thi, aksar ek dusrey k haan aana jaana laga rehta, meyn bhe aaya jaaya karta tha...us ek shaam mey jab hum sab ghar walay unkey haan khaanay pe gaye to upari manzil pe gramophone ki awaaz ne mujhe apni jaanib khenchna shuru kia, madam ji ki awaaz mey koi filmy geet baj raha tha, chat pe pohncha to Us ko dekha, dekhta to pehle bhe tha magar is tarah se pehli baar dekha, najanay kiun, chandni mey dooba uska wajud mere andar munakas ho gaya, wo naach rahi thi, holay holay, apni he dhun mey gum sum naach rahi thi, mene awaaz lagani chahi magar is tilism k toot janay k dar se ruk gaya, haan mere halaq ki bajaye neeche sehen se awaz zarur ayi,'ronaaaaqqqqqq', or meyn apne khawab mehel se chalang lagata nikla, 'ji abbuuuuu, ayaaaa', meyn bhaga, paas pari kursi se takra k gira, utha or phir bhaaga, is sab k doraan us pe meri nazar rahi or uski mujh per, uska hansta hua chehra meri ankhon k aagay raha....chand he maah mey ham ek dusrey k bohat qareeb aa chukey they, meyn matric k final year mey tha to wo nehem ki taaliba thi, usey parhanay k bahanay se bhe uske ghar aana jaana laga rehta or siwaye uski bhabhi k hamarey baarey mey kisi ko kuch na pata tha, bhabhi humeyn hamesha duayen detien or ras guley khilati rehtien...ek din pata chala k uski walida ki raat mey achanak tabiyat kharab ho gayi thi, or wo haspataal mey jaa kar dum tor gayin...mujhe bohat dukh hua, or wo baal bikhere apni maa k kamrey k samne bethi hui mili, meyn kuch kehna chahta tha magar samajh nahin aata tha kia, kabhi gham dekha jo nahin tha, hamesha ghar mey ronaq he lagi dekhi thi...usne mujhe dekha to apne apko rok na saki or seeney se lag k khoob royi, us raat bhabhi bhe bohat royin, humen duayen to dien magar ras gulay na khilaye, wo pehli mulaqat thi jis mey bhabhi ne ras gulay nahin khilaye they....kuch he dinon baad maloon hua k uske wali sahab bhe jahan se faani se rukhsat ho gaye, meyn apne abba k sath unke gaon aaya hua tha, khabar mili to mujhe uska khayal sataanay laga, abba ko bola k chalayn wapas to unho ne kaha haan chaltey hayn, us roz abba ko zindagi mey pehli baar rotey dekha tha mene....sheher wapas pohnchey to unki akhri namaz parhi ja chuki thi, meyn abba k sath unke ghar barha, wahan ronay ki awazeyn dheemi par gayi thien, barray bhai to wilayat mey hotey they, unse chotey ki haalat bayaan nahin kar sakta or wo abke apne baap ki charpaayi se lagi nidhaal pari thi...abba ne uske maathey ka bosa lia or bhai k kamrey mey chalay gaye, usne mujhe dekha to rookhi si awaz mey kaha 'ronqey, mera koi nahin raha, ronqey tu bhe aise he chala jaye ga ek din, ronqey meyn mar gayi ronqey, mar gayi meyn' or meyn uske baalon mey munh daal k ronay laga, sard raaton mey kisi cheekhtey geedar ki manind ronay laga....wo meri us se akhri mulaqat thi, barray bhai ne baaqi maanda khandan ko apne pas wilayat bula lia tha, meyn milna chahta tha us se magar ek anjanay khof ne mere qadam zameen mey garhey rakhey, lakh koshish ki magar ek qadam bhe na utha saka...bus naam he ronaq reh gaya mera, zaat andheron mey doob gayi....chand saal baad abba ne androon ko kherbaad kaha or sialkot mey aa k abaad ho gaye, industry mey unka naam kaafi ho gaya tha or karobaar k bayis kabhi wapas jaana naseeb he na hua humeyn....aaj itne saalon baad is mohallay mey aa k aisa maloom hota tha k meri zaat ki tarah is mohallay ki ronaq bhe usi k sath maand par gayi, jahan chandni raqs kia karti thi ab udasi k saaye mundlatey nazar aatay...
~H.Nasir~
