ردينه نتعارك وي بواچينه ولا شبيبيج يحاجينه

قبل ان اعرف مصطلح الحب

الاسم :علي العماري
طالب سادس علمي بس بالاسم طبعاً وراح تعرفون ليش
اسكن محافظه ميسان (العماره) جنوب العراق
بدايه القصه سنه ٢٠٠٩ -٢٠١٠
بهذه السنوات جان ماكو مواقع تواصل اجتماعي وماكو فيس بوك وغيره من المواقع او ما منتشر مثل هسه فطالب السادس متفرغ للمحاضرات والدراسه اما اني اعتبرت السادس فتره راحه من الخامس فابتعدت عن الدراسه وجان عندي صديقي حيدر نفس الطموح وياي فا دخلنا السادس بكل شعوذه ومشاكسه وجنه ندخل للصف نوزع حب وعلج ويوم نداوم ويوم ما نداوم وبالصف كانما نباوع ع مسرحيه مو درس لذلك شابعين بسامير من الاساتذه وبالاصل ما مهتمين لوجودنه والكتب اللي عدنه مثل الفلوس الجديده تطكطك لان ما مفتوحه
المهم قربت نتائج الدخول للبكلوريا تظهر
علي:اكلك حيدر باجر نروح نشوف دخولنا شتكول
حيدر :ها وشتكول انت ندخل لو لا
علي:وداعتك هم الخسرانين اذا ما دخلونه
حيدر :ههه هم صحيح خوش باجر نروح ونشوف
رحنا للمدير ثاني يوم بكل قوه وشراسه (واثق الخطوه يمشي ملك)
استاذ احنا داخلين بكلوريا لو لا
الاستاذ :لا ما داخلين وناجحين بس اسلاميه وعربي
علي : حيدر شنو هسه شنسوي
حيدر :اكلك لا تضوج هم خسرانين وهاي سنه اولى النه
علي :يلا تعال عازمك ع قوطيه سفن
حيدر : ههههه (ضحكه مال ضوجه)
رحنا شربنه قوطيتين ونباوع ع المدرسه وع درجاتنه ونضحك ما اعرف ع شنو ورجعنا لبيتنا وعادي الاهل متاكدين منه ما ندخل وقتها
علي : خل اروح لحيدر ضوجه ونسولف بلا باللي صار وشنو الخطوات اللي راح تصير مستقبلاً
رحت لحيدر ولكيته ما مهتم بس كال يلا ع السنه الثانيه ندخل دورات هسه بالعطله وبالسنه الثانيه ننجح غصب عليهم فا فا شوي بردني كلام حيدر واقتنعت ،
وصرنا ندخل دورات خصوصيه
وفد يوم ع السيم كارت جان عندي موبايل بلا كاميرا ابدايه نزول الموبايلات فا اجتني رساله من رقم "١٦١٦" لدخول غرف دردشه داخل العراق والتحدث مع الاعضاء ابعث رقم ١ واستمتع معنا ،،،
فا كلت بلا ادز رساله واشوف كتبت ١ ودزيتها ١٦١٦ اجتني رساله اهلا بك في الدردشه مع زين اختر لقب يناسبك دزيت رساله "علي العماري"
اجت رساله تم الموافقه على طلبك للدخول للغرف ابعث رساله فيها رقم ٣
علي :شنو هالدوخه وشلعان الكلب المهم يلا ادز ٣
اختر احد الغرف التاليه رومانس،حب،رياضه ،فكاهه
علي :اني رومانسي خل اختار رومانس وياها صفنه عود شنو رومانس بلا
دخلت للغرف ولكيت الناس من كل محافظات العراق تسولف
واني اطرش بالزفه وجان اشوف وحده من العماره تحجي وخابصه الجو اني اسمي وديان وحلوه وعيوني لونهم اخضر وطويله وبيتنا هنا فا تقريباً عرفت البنت وقررت ادخل احجي وياها حالي حال البقيه
انتظروني بالجزء القادم وتكمله القصه وي وديان وشلون راح تطور القصه